ចូរមកតាមខ្ញុំ—ជាយុទ្ធសាស្ត្រវាយបក និងផែនការទុកជាមុនរបស់ព្រះអម្ចាស់

ដោយ ម៉ាក អិល ភែក

ប្រធានសាលាថ្ងៃអាទិត្យទូទៅ

ព្រះអម្ចាស់រៀបចំរាស្ត្រទ្រង់តតាំងនឹងការវាយប្រហាររបស់មារសត្រូវ ។ ចូរមកតាមខ្ញុំ គឺជាយុទ្ធសាស្ត្រវាយបក និងផែនការទុកជាមុនរបស់ព្រះអម្ចាស់ ។

យើងរីករាយនឹងការជួបជុំគ្នានៅក្នុងសន្និសីទទូទៅដ៏មហិមានេះ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ វាគឺជាពរជ័យដើម្បីទទួលព្រះបញ្ញាញ្ញាណ និងព្រះទ័យរបស់ព្រះអម្ចាស់ តាមរយៈការបង្រៀនពីពួកព្យាការី និងពួកសាវករបស់ទ្រង់ ។ ប្រធាន រ័សុល អិម ណិលសុន គឺជាព្យាការីនៅរស់របស់ព្រះអម្ចាស់ ។ យើងមានអំណរគុណជាអនេកចំពោះការទូន្មានដ៏បំផុស និងការណែនាំដែលបានទទួលនៅថ្ងៃនេះ ។

ខ្ញុំសូមបន្ថែមសាក្សីរបស់ខ្ញុំទៅនឹងអ្នកដែលបានចែករំលែកមុននេះ ។ ខ្ញុំថ្លែងទីបន្ទាល់ពីព្រះ ជាព្រះវរបិតាដ៏នៅអស់កល្បជានិច្ច ។ ទ្រង់រស់ហើយស្រឡាញ់យើង និងមើលថែយើង ។ ផែនការនៃសុភមង្គលរបស់ទ្រង់ផ្តល់ឲ្យយើងនូវពរជ័យនៃជីវិតរមែងស្លាប់នេះ ហើយនឹងមូលហេតុដែលយើងត្រឡប់ទៅទីវត្តមានរបស់ទ្រង់វិញ ។

ខ្ញុំក៏សូមថ្លែងទីបន្ទាល់អំពីព្រះយេស៊ូវគ្រីស្ទដែរ ។ ទ្រង់គឺជាបុត្រាសំណព្វតែមួយគត់របស់ព្រះ ។ ទ្រង់បានសង្រ្គោះយើងពីសេចក្តីស្លាប់ ហើយទ្រង់ប្រោសលោះយើងពីអំពើបាប នៅពេលយើងអនុវត្តសេចក្តីជំនឿលើទ្រង់ ហើយប្រែចិត្ត ។ ពលិកម្មដ៏គ្មានទីបញ្ចប់របស់ទ្រង់ជំនួសឲ្យយើង នាំមកនូវពរជ័យនៃជីវិតអមតៈ និងអស់កល្បជានិច្ច ។ « សូមអរគុណដល់ព្រះចំពោះអំណោយដ៏លើសលុបនៃព្រះរាជបុត្រារបស់ទ្រង់ » ( ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » Liahona ខែ ឧសភា ឆ្នាំ ២០១៧ ខាងក្នុងគម្របខាងមុខ ) ។

ពួកបរិសុទ្ធថ្ងៃចុងក្រោយជុំវិញពិភពលោក មានពរជ័យ កាលថ្វាយបង្គំព្រះយេស៊ូវគ្រីស្ទនៅក្នុងព្រះវិហារបរិសុទ្ធរបស់ទ្រង់ ។ ក្នុងចំណោមព្រះវិហារបរិសុទ្ធទាំងនោះ មានព្រះវិហារបរិសុទ្ធមួយកំពុងសាងសង់នៅទីក្រុងវីននីផេក ប្រទេសកាណាដា ។ ភរិយារបស់ខ្ញុំ អាន ម៉ារី និងខ្ញុំបានមានឱកាសទៅមើលការដ្ឋានសាងសង់កាលពីខែសីហាឆ្នាំនេះ ។ ព្រះវិហារបរិសុទ្ធបានរចនាយ៉ាងស្រស់ស្អាត ហើយប្រាកដជាស្អាតណាស់ក្រោយពេលធ្វើហើយ ។ ទោះជាយ៉ាងណាក្តី បងប្អូនមិនអាចមានព្រះវិហារបរិសុទ្ធដ៏ស្រស់ស្អាតនៅ វីននីផេក ឬនៅកន្លែងណាផ្សេងទៀត បើគ្មានគ្រឹះដ៏រឹងមាំនោះបានទេ ។

ស្ថានភាពដីឡើងកកធ្វើឲ្យមានការលំបាកក្នុងការបុកគ្រឹះព្រះវិហារបរិសុទ្ធ វីននីផេក ។ ហេតុដូច្នោះហើយ វាត្រូវបានកំណត់ថា គ្រឹះនៅព្រះវិហារបរិសុទ្ធនេះនឹងត្រូវប្រើសរសរដែកថែបចំនួន ៧០ ស្រោបដោយបេតុង ។ សរសរទាំងនេះមានប្រវែង ១៨.២៩ ម៉ែត្រ និង មានអង្កត់ផ្ចិតពី ៣០.៥ ទៅ ៥០.៨ សង់ទីម៉ែត្រ ។ សរសរទាំងនេះត្រូវបានខួងបុកចូលក្នុងដីរហូតដល់វាប៉ះនឹងស្រទាប់ថ្ម ប្រហែលជា ១៥.២៤ ម៉ែត្រ ក្នុងស្រទាប់ដី ។ តាមវិធីនេះ សរសរទាំង ៧០ ដើមចាក់គ្រឹះរឹងមាំសម្រាប់ព្រះវិហារបរិសុទ្ធវីននីផេក ដ៏ស្រស់ស្អាត ។

ក្នុងនាមជាពួកបរិសុទ្ធថ្ងៃចុងក្រោយ យើងស្វែងរកគ្រឹះដ៏រឹងមាំ និងពិតប្រាកដស្រដៀងគ្នានេះនៅក្នុងជីវិតរបស់យើង — គ្រឹះខាងវិញ្ញាណត្រូវការសម្រាប់ការធ្វើដំណើររបស់យើងនៅក្នុងជីវិតរមែងស្លាប់ និងត្រឡប់ទៅផ្ទះសួគ៌ាយើងវិញ ។ គ្រឹះដែលត្រូវបានសង់ឡើងនៅលើស្រទាប់ថ្មនៃការផ្លាស់ប្រែចិត្តជឿរបស់យើងចំពោះព្រះអម្ចាស់យេស៊ូវគ្រីស្ទ ។

« ចូរចងចាំចុះ ចូរចងចាំចុះថា គឺនៅលើសិលានៃព្រះដ៏ប្រោសលោះនៃយើង គឺព្រះគ្រីស្ទជា ព្រះរាជបុត្រានៃព្រះ ដែលកូនត្រូវសង់គ្រឹះរបស់កូន ដើម្បីកាលណាអារក្សបញ្ចេញខ្យល់ដ៏ខ្លាំងក្លារបស់វាមក មែនហើយ ព្រួញរបស់វានៅក្នុងខ្យល់គួច … នោះវានឹងគ្មានអំណាចមកលើកូនឡើយ ដើម្បីទាញកូនចុះទៅក្នុងជង្ហុកនៃសេចក្តីវេទនា និងទុក្ខលំបាក ដ៏មិនចេះចប់មិនចេះហើយ ពីព្រោះមកពីសិលាដែលកូនបានសង់នៅលើនោះ ដែលជាគ្រឹះដ៏ខ្ជាប់ខ្ជួនមួយ ជាគ្រឹះមួយ បើសិនណាមនុស្សសង់នៅលើនោះ នោះពួកគេមិនអាចរលំបានឡើយ » ( ហេលេមិន ៥:១២ ) ។

គួរឲ្យមានអំណរគុណណាស់ ដែលយើងរស់នៅក្នុងយុគសម័យដែលពួកព្យាការី និងសាវកបង្រៀនយើងពីព្រះអង្គសង្រ្គោះយេស៊ូវគ្រីស្ទ ។ ការធ្វើតាមការប្រឹក្សារបស់ពួកលោក ជួយយើងឲ្យស្ថាបនាគ្រឹះដ៏រឹងមាំនៅលើព្រះគ្រីស្ទ ។

ដូចដែលប្រធាន រ័សុល អិម ណិលសុន បានពន្យល់នៅក្នុងសន្និសីទទូទៅកាលពីខែតុលាឆ្នាំ ២០១៨មុនថា « គោលបំណងរបស់សាសនាចក្រជាយូរមក គឺដើម្បីជួយដល់សមាជិកទាំងអស់ឲ្យបង្កើនសេចក្ដីជំនឿរបស់ពួកគេទៅលើព្រះអម្ចាស់យេស៊ូវគ្រីស្ទ និងដង្វាយធួនរបស់ទ្រង់ ដើម្បីជួយពួកគេនៅក្នុងការចុះ និងការរក្សាសេចក្ដីសញ្ញារបស់ពួកគេជាមួយនឹងព្រះ ហើយពង្រឹង និងផ្សារភ្ជាប់ក្រុមគ្រួសាររបស់ពួកគេ » ។ នៅក្នុងពិភពលោកដ៏ស្មុគស្មាញសព្វថ្ងៃនេះ វាពុំមែនជារឿងងាយស្រួលទេ ។មារសត្រូវកំពុងបង្កើនការវាយប្រហាររបស់វាទៅលើសេចក្ដីជំនឿមកលើយើង និងក្រុមគ្រួសារក្នុងអត្រាដ៏លឿនមួយ ។ដើម្បីរស់រានខាងវិញ្ញាណ យើងត្រូវការ យុទ្ធសាស្ត្រវាយបក និងផែនការទុកជាមុនរបស់ព្រះអម្ចាស់» (« Opening Remarks » Liahona ខែវិច្ឆិកា ឆ្នាំ ២០១៨, ៧; បានគូសបញ្ជាក់បន្ថែម ) ។

ដើម្បីធ្វើតាមសារលិខិតរបស់ប្រធាន ណិលសុន អែលឌើរ ឃ្វីនថិន អិល ឃុក នៃកូរ៉ុមនៃពួកសាវកដប់ពីរនាក់ បានណែនាំសៀវភៅចូរ មកតាមខ្ញុំ ជាធនធានសម្រាប់បុគ្គលម្នាក់ៗ និងក្រុមគ្រួសារទាំងឡាយ ។ សុន្ទរកថារបស់លោករួមមានដូចខាងក្រោមនេះ ៖

« ធនធានសិក្សាថ្មីនៅឯគេហដ្ឋាន ចូរមកតាមខ្ញុំ …ត្រូវបានរៀបចំឡើងដើម្បីជួយសមាជិកឲ្យរៀនដំណឹងល្អនៅក្នុងគេហដ្ឋាន » ។
« ធនធាននេះគឺសម្រាប់បុគ្គលម្នាក់ៗ និងក្រុមគ្រួសារនៅក្នុងសាសនាចក្រ » [ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ( ឆ្នាំ២០១៩ ) ទំព័រ vi ] ។
« គោលបំណងរបស់យើងគឺធ្វើឲ្យមានតុល្យភាពលើបទពិសោធន៍ទាំងនៅព្រះវិហារ និងនៅគេហដ្ឋាន ក្នុងរបៀបមួយដែលនឹងបង្កើនសេចក្តីជំនឿ និងជីវភាពខាងវិញ្ញាណកាន់តែប្រសើរឡើង ព្រមទាំងប្រែចិត្តជឿកាន់តែខ្លាំងលើព្រះវរបិតាសួគ៌ និងព្រះអម្ចាស់យេស៊ូវគ្រីស្ទ » ។ ( « Deep and Lasting Conversion to Heavenly Father and the Lord Jesus Christ » Liahonaខែ វិច្ឆិកា ឆ្នាំ ២០១៨ ទំព័រ ៩–១០ ។

ចាប់ពីខែមករាឆ្នាំនេះ ពួកបរិសុទ្ធថ្ងៃចុងក្រោយទូទាំងពិភពលោក បានចាប់ផ្ដើមសិក្សាព្រះគម្ពីរសញ្ញាថ្មីជាមួយនឹងចូរមកតាមខ្ញុំជាធនធានសម្រាប់ណែនាំយើង ។ ព្រមជាមួយនឹងកាលវិភាគប្រចាំសប្តាហ៍ ចូរមកតាមខ្ញុំជួយយើងឲ្យសិក្សាព្រះគម្ពីរ គោលលទ្ធិនៃដំណឹងល្អ និងការបង្រៀនទាំងឡាយរបស់ព្យាការី និងសាវក ។ វាគឺជាធនធានដ៏អស្ចារ្យសម្រាប់យើងទាំងអស់គ្នា ។

បន្ទាប់ពីការខិតខំសិក្សាព្រះគម្ពីរនេះអស់រយៈពេលប្រាំបួនខែទូទាំងពិភពលោក តើបងប្អូនបានឃើញអ្វីខ្លះ ? យើងឃើញពួកបរិសុទ្ធគ្រប់ទីកន្លែងរីកចម្រើននៅក្នុងសេចក្តីជំនឿ និងពលិកម្មចំពោះព្រះអម្ចាស់យេស៊ូវគ្រីស្ទ ។ យើងឃើញបុគ្គល និងក្រុមគ្រួសារនីមួយៗទុកពេលមួយចំណែកនៅក្នុងសប្តាហ៍ដើម្បីសិក្សាព្រះបន្ទូលរបស់ព្រះអង្គសង្រ្គោះយើង ។ យើងឃើញការបង្រៀនដំណឹងល្អកំពុងកែលម្អនៅក្នុងថ្នាក់សាលាថ្ងៃអាទិត្យរបស់យើង នៅពេលយើងសិក្សាព្រះគម្ពីរមកពីផ្ទះ ហើយចែកចាយគំនិតរបស់យើងនៅក្នុងសាសនាចក្រ ។ យើងឃើញក្រុមគ្រួសារមានសេចក្តីអំណរ និងសាមគ្គីភាព ដោយសារតែយើងងាកពីការអានព្រះគម្ពីរសាមញ្ញៗទៅជាការសិក្សាដោយយកចិត្តទុកដាក់ ។

ខ្ញុំមានកិត្តិយសណាស់ដែលបានទៅទស្សនកិច្ចពួកបរិសុទ្ធថ្ងៃចុងក្រោយ និងបានឮពីបទពិសោធន៍ផ្ទាល់របស់ពួកគេជាមួយកម្មវិធីចូរមកតាមខ្ញុំ ។ ការបង្ហាញពីសេចក្តីជំនឿរបស់ពួកគេធ្វើឲ្យដួងចិត្តខ្ញុំពោរពេញដោយសេចក្តីអំណរ ។ នេះគឺជាមតិដែលខ្ញុំបានឭពីសមាជិកខុសៗគ្នានៅក្នុងសាសនាចក្រ ៖

មានឪពុកម្នាក់បានចែកចាយថា « ខ្ញុំចូលចិត្តសៀវភៅ ចូរមកតាមខ្ញុំ ដោយសារវាផ្ដល់ឱកាសឲ្យថ្លែងទីបន្ទាល់ទៅកាន់កូនៗរបស់ខ្ញុំអំពីព្រះអង្គសង្គ្រោះ » ។
នៅក្នុងគ្រួសារមួយទៀត មានកុមារម្នាក់បានពោលថា ៖ « នេះគឺជាឱកាសដើម្បីស្ដាប់ឮឪពុកម្ដាយខ្ញុំថ្លែងទីបន្ទាល់របស់ពួកគាត់ » ។
មានម្ដាយម្នាក់បានចែកចាយថា « យើងបានបំផុសគំនិតពីរបៀបទុកព្រះជាអាទិភាពទីមួយ ។ គ្រាដែលយើង [ បានគិតថា យើង ] ពុំបាន [ ពោរពេញ ] ដោយសេចក្ដីសង្ឃឹម អំណរ ភាពសុខសាន្ត និងជោគជ័យតាមរបៀបដែលយើងពុំដឹងអាចកើតឡើងបាន » ។
ស្វាមីភរិយាមួយគូបានសង្កេតឃើញថា « យើងកំពុងអានព្រះគម្ពីរខុសប្លែកទាំងស្រុងពីរបៀបដែលយើងធ្លាប់ធ្វើពីមុន ។ យើងកំពុងរៀនច្រើនលើសពីអ្វីដែលយើងធ្លាប់បានរៀនពីមុន ។ ព្រះអម្ចាស់សព្វព្រះទ័យឲ្យយើងឃើញអ្វីៗខុសប្លែកពីមុន ។ ព្រះអម្ចាស់កំពុងរៀបចំយើង » ។
មានម្ដាយម្នាក់បានពោលថា « ខ្ញុំចូលចិត្តពេលដែលយើងកំពុងរៀនរឿងដូចគ្នាជាមួយគ្នា ។ ពីមុន យើងអានវា ។ ឥឡូវនេះ យើងកំពុងរៀនពីវា » ។
មានប្អូនស្រីម្នាក់បានចែកចាយទស្សនៈដ៏មានន័យនេះថា « ពីមុន អ្នកមានមេរៀន និងបទគម្ពីរជាជំនួយ ។ ឥឡូវ អ្នកមានបទគម្ពីរ និងមេរៀនជាជំនួយវិញ » ។
មានប្អូនស្រីម្នាក់ទៀតបានថ្លែងថា ៖ « ខ្ញុំមានអារម្មណ៍ខុសប្លែក ពេលខ្ញុំធ្វើវា [ ដោយប្រៀបធៀបទៅនឹង ] ពេលដែលខ្ញុំពុំបានធ្វើ ។ ខ្ញុំឃើញថា វាមានភាពងាយស្រួលក្នុងការនិយាយទៅកាន់អ្នកដទៃអំពីព្រះយេស៊ូវគ្រីស្ទ និងជំនឿរបស់យើង » ។
ជីដូនម្នាក់បាននិយាយថា ៖ « ខ្ញុំហៅកូនៗ និងចៅរបស់ខ្ញុំនៅថ្ងៃអាទិត្យ ហើយយើងចែករំលែកខាងវិញ្ញាណចេញពីចូរមកតាមខ្ញុំ ជាមួយគ្នា » ។
បងស្រីម្នាក់បានសង្កេតឃើញថា ៖ « ចូរមកតាមខ្ញុំ មានអារម្មណ៍ថា ដូចជាព្រះអង្គសង្រ្គោះកំពុងធ្វើការងារបម្រើមកខ្ញុំដោយផ្ទាល់ ។ វាគឺជាការបំផុសមកពីស្ថានសួគ៌ » ។
ឪពុកម្នាក់ផ្ដល់មតិថា ៖ « នៅពេលយើងប្រើ ចូរមកតាមខ្ញុំ យើងគឺដូចជាកូនចៅនៃអ៊ីស្រាអែលដូច្នោះដែរ ដោយគូសនៅលើទ្វាររបស់យើង ដើម្បីការពារក្រុមគ្រួសារយើងពីឥទ្ធិពលរបស់មេកំណាច » ។

បងប្អូនប្រុសស្រី ខ្ញុំមានអំណរដែលបានមកជួប និងស្តាប់ថាតើការខិតខំរបស់បងប្អូនជាមួយកម្មវិធីចូរមកតាមខ្ញុំបានប្រទានពរដល់ជីវិតរបស់បងប្អូនយ៉ាងណា ។ សូមអរគុណចំពោះពលិកម្មរបស់បងប្អូន ។

ការសិក្សាព្រះគម្ពីរដោយមានចូរមកតាមខ្ញុំជាមគ្គុទេសន៍ កំពុងពង្រឹងការផ្លាស់ប្រែចិត្តជឿរបស់យើងចំពោះព្រះយេស៊ូវគ្រីស្ទ និងដំណឹងល្អរបស់ទ្រង់ ។ យើងមិនមែនចំណាយពេលមួយម៉ោងនៅឯព្រះវិហារនៅថ្ងៃអាទិត្យតិចជាងមុន ដើម្បីបន្ថែមមួយម៉ោងទៀតសិក្សាព្រះគម្ពីរនៅឯផ្ទះនោះទេ ។ ការសិក្សាដំណឹងល្អគឺជាការខិតខំជាប្រចាំនៅពេញមួយសប្តាហ៍ ។ ដូចបងស្រីម្នាក់បានចែកចាយជាមួយខ្ញុំថា ៖ « គោលបំណងនោះគឺមិនមែនជាការកាត់បន្ថយម៉ោងនៅព្រះវិហារឲ្យខ្លីជាងមុនមួយម៉ោងនោះទេ ផ្ទុយទៅវិញ គឺកំពុងធ្វើឲ្យព្រះវិហារមានរយៈប្រាំមួយថ្ងៃច្រើនជាងមុនទេតើ ! »

ឥឡូវនេះ សូមគិតពិចារណាម្តងទៀតពីការព្រមានរបស់ព្យាការីយើង ប្រធាន ណិលសុន បានផ្តល់ឲ្យកាលលោកបើកសន្និសីទទូទៅកាលពីខែតុលា ឆ្នាំ ២០១៨ ថា ៖

« មារសត្រូវកំពុងបង្កើនការវាយប្រហាររបស់វាទៅលើសេចក្ដីជំនឿ មកលើយើង និងក្រុមគ្រួសារក្នុងអត្រាដ៏លឿនមួយ ។ ដើម្បីរស់រានខាងវិញ្ញាណ យើងត្រូវការយុទ្ធសាស្ត្រវាយបក និងផែនការទុកជាមុន » ( រ័សុល អិម ណិលសុន« សុន្ទរកថាបើក » ទំព័រ ៧ ) ។

បន្ទាប់មក ( ប្រហែលជា ២៩ ម៉ោងក្រោយមក ) នារសៀលថ្ងៃអាទិត្យ លោកបានបិទសន្និសីទជាមួយនឹងការសន្យាថា ៖ « នៅពេលបងប្អូនធ្វើការដោយឧស្សាហ៍ព្យាយាម ដើម្បីរៀបចំគេហដ្ឋានរបស់បងប្អូនឲ្យក្លាយទៅជាមជ្ឈមណ្ឌលនៃការរៀនសូត្រដំណឹងល្អ…ឥទ្ធិពលរបស់មារសត្រូវនៅក្នុងជីវិតរបស់បងប្អូន និងគេហដ្ឋានរបស់បងប្អូននឹងត្រូវសាបរលាប » ( រ័សុល អិម ណិលសុន « Becoming Exemplary Latter-day Saints » Liahona ខែ វិច្ឆិកា ឆ្នាំ ២០១៨ ទំព័រ ១១៣ ) ។

តើវាយប្រហាររបស់មារសត្រូវកើនឡើងយ៉ាងដូចម្តេច ខណៈពេលដូចគ្នាឥទ្ធិពលរបស់មារសត្រូវតាមពិតកំពុងចុះសាបរលាបនោះ ? វាអាចកើតឡើងបាន ហើយវាកំពុងកើតឡើងនៅក្នុងសាសនាចក្រ ពីព្រោះព្រះអម្ចាស់រៀបចំប្រជាជនរបស់ទ្រង់ប្រឆាំងនឹងការវាយប្រហាររបស់ពួកមារសត្រូវ ។ចូរមកតាមខ្ញុំគឺជាយុទ្ធសាស្ត្រវាយបក និងផែនការទុកជាមុនរបស់ព្រះអម្ចាស់ ។ ដូចជាប្រធាន ណិលសុន បានបង្រៀនថា « កម្មវិធីសិក្សាបញ្ចូលគ្នាថ្មីដែលផ្ដោតទៅលើគេហដ្ឋាន មានការគាំទ្រពីសាសនាចក្រ មានសក្ដានុពលដើម្បីបើកសម្ដែងឡើងនូវអំណាចនៃគ្រួសារ » ។ ទោះជាយ៉ាងណាក្តី វាតម្រូវឲ្យយើងខិតខំខ្លាំង យើងត្រូវ « [ ធ្វើតាម ] កម្មវិធីនោះប្រកបដោយមនសិការ និងដោយយកចិត្តទុកដាក់ ដើម្បីផ្លាស់ប្រែគេហដ្ឋានរបស់ [ យើង ] ទៅជាទីបរិសុទ្ធនៃសេចក្ដីជំនឿ » ( រ័សុល អិម ណិលសុន « Becoming Exemplary Latter-day Saints » ទំព័រ ១១៣ ) ។

ក្រោយមកប្រធាន ណិលសុន ក៏បានមានប្រសាសន៍ថា « ពួកយើងម្នាក់ៗមានការទទួលខុសត្រូវលើការរីកចម្រើនខាងវិញ្ញាណរៀងៗខ្លួន » ( រ័សុល អិម ណិលសុន« ការថ្លែងសុន្ទរកថាបើកកម្មវិធី » ទំព័រ ៨ ) ។

ដោយមានចូរមកតាមខ្ញុំ ទុកជាធនធាន ព្រះអម្ចាស់កំពុងរៀបចំយើង « សម្រាប់គ្រាលំបាកដែលយើងប្រឈមមុខ » ( ឃ្វីនថិន អិល ឃុក « ការប្រែចិត្តជឿដ៏រឹងប៉ឹង និងយូរអង្វែង » ទំព័រ ១០ ) ។ ទ្រង់កំពុងជួយយើងស្ថាបនាលើ « គ្រឹះដ៏ខ្ជាប់ខ្ជួនមួយ ជាគ្រឹះមួយបើសិនណាមនុស្សសង់នៅលើនោះ នោះពួកគេមិនអាចរលំបានឡើយ » ( ហេលេមិន ៥:១២ ) — គ្រឹះនៃទីបន្ទាល់ដែលបោះយ៉ាងរឹងមាំនៅលើថ្មនៃការប្រែចិត្តជឿលើព្រះអម្ចាស់យេស៊ូវគ្រីស្ទ ។

សូមឲ្យការខិតខំរបស់យើងជារៀងរាល់ថ្ងៃនៅក្នុងការសិក្សាព្រះគម្ពីរចិញ្ចឹមបីបាច់យើង ហើយឆ្លុះបញ្ចាំងឲ្យឃើញថា យើងមានភាពស័ក្តិសមដើម្បីទទួលពរជ័យដែលបានសន្យាទុកទាំងនេះ ។ ខ្ញុំសូមបួងសួងដូច្នោះ ក្នុងព្រះនាមនៃព្រះយេស៊ូវគ្រីស្ទ អាម៉ែន ៕