ទ្រព្យសម្បត្តិខាងវិញ្ញាណ
នៅពេលបងប្អូនអនុវត្តសេចក្ដីជំនឿលើព្រះអម្ចាស់ និងអំណាចបព្វជិតភាពរបស់ទ្រង់ នោះសមត្ថភាពរបស់បងប្អូនដើម្បីទាញយកទ្រព្យសម្បត្តិខាងវិញ្ញាណ ដែលព្រះបានមានសម្រាប់ បងប្អូន នឹងចម្រើនឡើង ។
អរគុណចំពោះតន្ត្រីដ៏ពិរោះ ។ នៅពេលយើងទាំងអស់គ្នាក្រោកឈរដើម្បីច្រៀងចម្រៀងពាក់កណ្ដាលម៉ោងនូវបទ « យើងអរគុណព្រះចំពោះព្យាការី » ខ្ញុំមានគំនិតដ៏ខ្លាំងពីរយ៉ាងកើតមានចំពោះខ្ញុំ ។ ទីមួយគឺអំពីព្យាការី យ៉ូសែប ស្ម៊ីធ ជាព្យាការីនៃគ្រាកាន់កាប់ត្រួតត្រានេះ ។ ក្ដីស្រឡាញ់ និងការកោតសរសើររបស់ខ្ញុំចំពោះលោកមានច្រើនឡើងជារៀងរាល់ថ្ងៃ ។ គំនិតទីពីរដែលបានកើតមាន នៅពេលខ្ញុំមើលទៅភរិយារបស់ខ្ញុំ កូនស្រី ចៅស្រី និងជីទួតស្រី ។ ខ្ញុំមានអារម្មណ៍ថា ខ្ញុំចង់ប្រកាសដល់បងប្អូនគ្រប់រូបថាបងប្អូនមានចំណែកជាគ្រួសាររបស់ខ្ញុំ ។
ជាច្រើនខែកន្លងទៅ នៅពេលចប់សម័យប្រជុំអំណោយទានពិសិដ្ឋក្នុងព្រះវិហារបរិសុទ្ធ ខ្ញុំបាននិយាយនឹងភរិយាខ្ញុំថា « បងសង្ឃឹមថាបងប្អូនស្ត្រីទាំងឡាយយល់អំពីទ្រព្យសម្បត្តិខាងវិញ្ញាណជាច្រើនដែលជារបស់ពួកគេនៅក្នុងព្រះវិហារបរិសុទ្ធ » ។ បងប្អូនស្ត្រី ជាញឹកញាប់ ខ្ញុំឃើញថាខ្ញុំគិតអំពីបងប្អូន រួមទាំងកាលពីពីរខែមុន នៅពេលវិនឌី និងខ្ញុំបានទៅ ភូមិហាម៉ូនី រដ្ឋផែនស៊ីលវេញ៉ា ។
នេះគឺជាការធ្វើដំណើរជាលើកទីពីររបស់យើងទៅទីនោះ ។ ទាំងពីរលើក យើងបានរំជួលចិត្ត នៅពេលយើងដើរនៅលើដីដ៏ពិសិដ្ឋនោះ ។ គឺនៅភូមិ ហាម៉ូនីនេះហើយ ដែលយ៉ូហាន បាទីស្ទ បានលេចមកឯយ៉ូសែប ស្ម៊ីធ ហើយបានស្ដារបព្វជិតភាពអើរ៉ុនឡើងវិញ ។
គឺនៅទីនោះហើយ ដែលសាវក ពេត្រុស យ៉ាកុប និងយ៉ូហាន បានលេចមកដើម្បីស្ដារបព្វជិតភាពមិលគីស្សាដែកឡើងវិញ ។
គឺនៅភូមិ ហាម៉ូនី ដែល អិមម៉ា ហេល ស្ម៊ីធ បានបម្រើជាស្មៀនដំបូងគេរបស់ស្វាមីគាត់ ខណៈដែលព្យាការី យ៉ូសែប បានបកប្រែព្រះគម្ពីរមរមន ។
គឺនៅក្នុងភូមិហាម៉ូនីនេះហើយ ដែលយ៉ូសែប បានទទួលវិវរណៈបើកសម្ដែងពីព្រះទ័យរបស់ព្រះអម្ចាស់ទៅកាន់ អិមម៉ា ។ ព្រះអម្ចាស់បានបង្រៀនអិមម៉ាឲ្យអធិប្បាយបទគម្ពីរ ដើម្បីដាស់តឿនដល់សាសនាចក្រ ដើម្បីទទួលព្រះវិញ្ញាណបរិសុទ្ធ ហើយចំណាយពេលក្នុងជីវិតគាត់ « រៀនឲ្យបានច្រើន » ។ អិមម៉ា ក៏ត្រូវបានទូន្មានផងដែរ« ឲ្យទុកចោលរឿងនៃលោកិយ ហើយស្វែងរករឿងដែលល្អប្រសើរ ហើយកាន់ខ្ជាប់សេចក្ដីសញ្ញាជាមួយព្រះ ។ ព្រះអម្ចាស់បានបញ្ចប់ការបង្រៀនរបស់ទ្រង់ដោយនូវពាក្យសម្ដីដ៏ជម្រុញនេះថា ៖ « នេះគឺជាសំឡេងរបស់យើងដល់មនុស្សទាំងពួង » ។១
អ្វីៗ ដែលបានកើតឡើងនៅក្នុងភូមិ ហាម៉ូនី មានការអនុវត្តដ៏ប្រពៃសម្រាប់ជីវិត របស់បងប្អូន ។ ការស្ដារឡើងវិញនៃបព្វជិតភាព ព្រមជាមួយនឹងពាក្យទូន្មានរបស់ព្រះអម្ចាស់ទៅកាន់អិមម៉ា អាចដឹកនាំ និងប្រទានពរដល់បងប្អូនម្នាក់ៗ ។ ខ្ញុំពិតជាចង់ឲ្យបងប្អូនយល់ថា ការស្ដារឡើងវិញនៃបព្វជិតភាព គឺទាក់ទងនឹងបងប្អូនក្នុងនាមជាស្ត្រីមួយរូប ក៏ដូចជាចំពោះមនុស្សនានាផងដែរ ។ ដោយសារតែបព្វជិតភាពមិលគីស្សាដែក ត្រូវបានស្ដារឡើងវិញ ទាំងស្ត្រី និងបុរសដែលរក្សាសេចក្ដីសញ្ញា អាចទទួលបាន « ព្រះពរខាងវិញ្ញាណនៅក្នុងសាសនាចក្រ ទាំងអស់ » ២ ឬ យើងអាចនិយាយថា ទ្រព្យខាងវិញ្ញាណទាំងអស់ដែលព្រះអម្ចាស់មានគឺសម្រាប់កូនចៅរបស់ទ្រង់ ។
ស្ត្រី និងបុរសគ្រប់រូបដែលចុះសេចក្ដីសញ្ញាជាមួយព្រះ ហើយរក្សាសេចក្ដីសញ្ញាទាំងនោះ និងចូលរួមក្នុងពិធីបរិសុទ្ធបព្វជិតភាពដោយសក្ដិសម មានឥទ្ធិពលផ្ទាល់ចំពោះព្រះចេស្ដារនៃព្រះ ។ អ្នកដែលបានទទួលអំណោយទានពិសិដ្ឋនៅក្នុងព្រះដំណាក់នៃព្រះអម្ចាស់បានទទួលអំណោយទានមួយនៃអំណាចបព្វជិតភាពតាមរយៈគុណធម៌នៃសេចក្ដីសញ្ញារបស់ពួកគេព្រមទាំងអំណោយទាននៃចំណេះដឹងដើម្បីដឹងពីរបៀបដើម្បីទាញយកព្រះចេស្ដានោះ ។
ស្ថានសួគ៌គឺបើកចំពោះ ស្ត្រី ដែលត្រូវបានប្រទានឲ្យនូវព្រះចេស្ដារបស់ព្រះតាមរយៈសេចក្ដីសញ្ញាបព្វជិតភាពរបស់ពួកគេ ដូចជាបុរស ដែលកាន់បព្វជិតភាពផងដែរ ។ ខ្ញុំអធិស្ឋានថា សេចក្ដីពិត នឹងចុះនៅក្នុងដួងចិត្តរបស់បងប្អូនម្នាក់ៗ ដោយសារខ្ញុំជឿថាវានឹងផ្លាស់ប្ដូរជីវិតបងប្អូន ។ បងប្អូនស្ត្រី បងប្អូនមានសិទ្ធិដើម្បីទាញយកព្រះចេស្ដាររបស់ព្រះអង្គសង្គ្រោះដើម្បីជួយគ្រួសារបងប្អូន និងអ្នកដទៃដែលបងប្អូនស្រឡាញ់ ។
បងប្អូនអាចនិយាយនឹងខ្លួនឯងថា « វាល្អណាស់ តែតើខ្ញុំត្រូវធ្វើយ៉ាងម៉េចទៅ ? តើខ្ញុំអាចទាញយកព្រះចេស្ដារបស់ព្រះអង្គសង្គ្រោះដាក់ក្នុងជីវិតដោយរបៀបណា ? »
បងប្អូននឹងរកមិនឃើញដំណើរការនេះប្រាប់នៅក្នុងសៀវភៅណាទេ ។ ព្រះវិញ្ញាណបរិសុទ្ធនឹងជាគ្រូបង្វឹកផ្ទាល់ខ្លួនរបស់បងប្អូន នៅពេលបងប្អូនស្វែងយល់អំពីអ្វីដែលព្រះអម្ចាស់ចង់ឲ្យបងប្អូនដឹង និងធ្វើ ។ ដំណើរការនេះគឺមិនឆាប់រហ័ស និងងាយស្រួលទេ ប៉ុន្តែវា គឺជា ថាមពលខាងវិញ្ញាណ ។ តើមានអ្វីដែលរំភើបជាងការធ្វើការជាមួយព្រះវិញ្ញាណដើម្បីយល់អំពីអំណាចបព្វជិតភាព — ជាព្រះចេស្ដារបស់ព្រះនោះ ?
អ្វីដែលខ្ញុំ អាច ប្រាប់ដល់បងប្អូន គឺថាការទទួលព្រះចេស្ដារនៃព្រះនៅក្នុងជីវិតរបស់បងប្អូនតម្រូវនូវរឿងដូចគ្នាដែលព្រះអម្ចាស់បានណែនាំទៅកាន់ អិមម៉ា និងបងប្អូនម្នាក់ៗឲ្យធ្វើ ។
ដូច្នេះ ខ្ញុំសូមអញ្ជើញបងប្អូនឲ្យសិក្សា កណ្ឌ ២៥ នៃ គោលលទ្ធិ និង សេចក្តីសញ្ញា ប្រកបដោយការអធិស្ឋាន ហើយស្វែងរកនូវអ្វីដែលព្រះវិញ្ញាណបរិសុទ្ធ នឹងបង្រៀនដល់ បងប្អូន ។ ការខិតខំផ្ទាល់ខ្លួន និងខាងវិញ្ញាណរបស់បងប្អូន នឹងនាំអំណរដល់បងប្អូន នៅពេលបងប្អូនទទួលបាន យល់ដឹង ហើយប្រើព្រះចេស្ដាដែលបងប្អូនបានទទួលនោះ ។
ចំណែកនៃការខិតខំនេះ នឹងតម្រូវឲ្យបងប្អូនលះបង់រឿងជាច្រើននៃលោកិយនេះចោល ។ ពេលខ្លះ យើងនិយាយយ៉ាងសាមញ្ញបំផុតអំពីការដើរចេញពីលោកិយ ដែលមានការឈ្លោះទាស់ទែង ការល្បួង និងទស្សនវិជ្ជាខុសឆ្គងជាច្រើន ។ ប៉ុន្តែតាមពិត ការធ្វើដូច្នោះ តម្រូវឲ្យបងប្អូនពិនិត្យពិច័យពីជីវិតរបស់បងប្អូនដោយប្រយ័ត្នប្រយែង និងជាទៀងទាត់ ។ នៅពេលបងប្អូនធ្វើដូច្នោះ ព្រះវិញ្ញាណបរិសុទ្ធនឹងបំផុសគំនិតបងប្អូនអំពីអ្វីដែលលែងត្រូវការ អ្វីដែលគ្មានភាពសក្ដិសមសម្រាប់ចំណាយពេល និងថាមពលរបស់បងប្អូន ។
នៅពេលបងប្អូនបង្វែរការផ្ដោតរបស់បងប្អូនពីការរំខានខាងលោកិយ មានរឿងមួយចំនួនហាក់ដូចជាសំខាន់ចំពោះបងប្អូនក្នុងពេលឥឡូវនេះ នឹងកាត់បន្ថយអាទិភាព ។ បងប្អូននឹងពុំចាំបាច់និយាយអ្វី ទោះជាពួកគេហាក់ដូចជាគ្មានគ្រោះថ្នាក់ក្ដី ។ នៅពេលបងប្អូនចាប់ផ្ដើម ហើយបន្ដដំណើរការនៃឧទ្ទិសជីវិតរបស់បងប្អូនថ្វាយព្រះអម្ចាស់ នោះការផ្លាស់ប្ដូរទស្សនវិស័យ អារម្មណ៍ និងកម្លាំងខាងវិញ្ញាណ នឹងធ្វើឲ្យបងប្អូនមានភាពអស្ចារ្យ !
ឥឡូវមានពាក្យព្រមានខ្លះៗ ។ មានអ្នកដែលនឹងបង្អាក់សមត្ថភាពរបស់បងប្អូនក្នុងការហៅរកព្រះចេស្ដារនៃព្រះ ។ មានមនុស្សខ្លះដែលនឹងធ្វើឲ្យបងប្អូនសង្ស័យនឹងខ្លួនឯង ហើយបន្ទាបសមត្ថភាពខាងវិញ្ញាណរបស់បងប្អូនក្នុងនាមជាស្ត្រីសុចរិត ។
ច្បាស់ណាស់ មារសត្រូវមិនចង់ឲ្យបងប្អូនយល់សេចក្ដីសញ្ញាដែលបងប្អូនបានធ្វើនៅពិធីបុណ្យជ្រមុជទឹក ឬអំណោយទាននៃចំណេះដឹងដ៏មហិមា និងអំណាចដែលបងប្អូនបានទទួល ឬនឹងទទួលនៅក្នុងព្រះវិហារបរិសុទ្ធ— ព្រះដំណាក់នៃព្រះអម្ចាស់ នោះទេ ។ ហើយសាតាំង ពិតជាមិនចង់ឲ្យបងប្អូនយល់ថាគ្រប់ពេលដែលបងប្អូនបម្រើ និងថ្វាយបង្គំដោយសក្ដិសមនៅក្នុងព្រះវិហារបរិសុទ្ធ នោះបងប្អូនបានក្រសោបដោយព្រះចេស្ដានៃព្រះ ហើយមានពួកទេវតារបស់ទ្រង់ « មើលថែ » បងប្អូន ឡើយ ។៣
សាតាំង និងពួកបរិវារវា នឹងបង្កើតជាឧបសគ្គរារាំងបងប្អូនមិនឲ្យយល់អំណោយទានខាងវិញ្ញាណដែលបងប្អូនមាន និងអាចត្រូវបានប្រទានពរ ។ ជាអកុសល ឧសបគ្គទាំងនោះមួយចំនួនកើតចេញមកពីទង្វើមិនល្អរបស់អ្នកដទៃទៀត ។ វាធ្វើឲ្យខ្ញុំសោកសៅពេលគិតថា បងប្អូនរាល់គ្នាត្រូវបានគេមិនឲ្យតម្លៃ ឬថ្នាក់ដឹកនាំបព្វជិតភាពម្នាក់មិនជឿ ឬត្រូវបានប្ដី ឪពុក ឬមិត្តម្នាក់បំពាន ឬក្បត់នោះ ។ ខ្ញុំមានអារម្មណ៍សោកស្ដាយខ្លាំងដែលបងប្អូនមានអារម្មណ៍ថាគេមិនឲ្យតម្លៃ មិនគោរព ឬគិតខុស ។ ទង្វើអាក្រក់ទាំងនេះ គ្មានកន្លែងនៅក្នុងនគរព្រះឡើយ ។
ផ្ទុយទៅវិញ វាធ្វើឲ្យខ្ញុំរំភើប នៅពេលខ្ញុំដឹងថាថ្នាក់ដឹកនាំបព្វជិតភាព ព្យាយាមដាក់បញ្ចូលស្ត្រីនៅក្នុងវួដ និងស្ដេកមកក្នុងក្រុមប្រឹក្សា ។ ខ្ញុំមានការបំផុសគំនិតពីស្វាមីម្នាក់ៗ ដែលបានបង្ហាញថា ការទទួលខុសត្រូវបព្វជិតភាពសំខាន់បំផុតរបស់គាត់ គឺដើម្បីមើលថែភរិយារបស់គាត់ ។ ៤ ខ្ញុំសូមសរសើរដល់បុរសដែលគោរពដល់សមត្ថភាពភរិយារបស់គាត់ក្នុងការទទួលវិវរណៈ ហើយឲ្យតម្លៃនាង ជាដៃគូស្នើភាពគ្នាក្នុងអាពាហ៍ពិពាហ៍របស់ពួកគេ ។
នៅពេលបុរសម្នាក់យល់អំពីភាពរុងរឿង និងអំណាចនៃស្ត្រីពួកបរិសុទ្ធថ្ងៃចុងក្រោយដែលបានទទួលអំណោយទានពិសិដ្ឋដ៏សុចរិត ដោយព្យាយាម តើគាត់មានងឿងឆ្ងល់ទេ ដែលថាគាត់មានអារម្មណ៍ថាត្រូវក្រោកឈរនៅពេលនាងដើរចូលក្នុងបន្ទប់នោះ ឬទេ?
ចាប់តាំងពីដំបូងស្ត្រីត្រូវបានប្រទានពរឲ្យមានត្រីវិស័យសីលធម៌ពិសេសមួយ— ជាសមត្ថភាពដើម្បីញែកដឹងខុសត្រូវ ។ អំណោយទាននេះ គឺត្រូវបានពង្រីកនៅក្នុងខ្លួននៃអ្នកទាំងឡាយដែលធ្វើ និងរក្សាសេចក្ដីសញ្ញានានា ។ ហើយវាកាត់បន្ថយនៅក្នុងខ្លួនបងប្អូនដែលមិនឲ្យតម្លៃដល់បទបញ្ញត្តិរបស់ព្រះដោយចេតនា ។
ខ្ញុំប្រញាប់បន្ថែមថា ខ្ញុំមិនមានន័យថា បុរសអាចគេចពីតម្រូវការរបស់ព្រះសម្រាប់ ពួកគេ ឲ្យញែកដឹងរវាងខុស និងត្រូវនោះទេ ។ ប៉ុន្តែបងប្អូនស្ត្រីជាទីស្រឡាញ់ សមត្ថភាពរបស់បងប្អូនអាចដឹងសេចក្ដីពិតពីកំហុស ដើម្បីការពារសីលធម៌របស់សង្គម គឺសំខាន់នៅក្នុងថ្ងៃចុងក្រោយនេះ ។ ហើយយើងពឹងផ្អែកលើបងប្អូនដើម្បីបង្រៀនអ្នកដទៃទៀតដូចគ្នាផងដែរ ។ ខ្ញុំសូមនិយាយឲ្យច្បាស់ពីរឿងនេះ ៖ បើពិភពលោកនេះបាត់បង់សុចរិតភាពខាងសីលធម៌នៃស្ត្រី នោះពិភពលោកនឹង ពុំអាច ជាសះស្បើយបានទេ ។
យើងជាពួកបរិសុទ្ធថ្ងៃចុងក្រោយ ពុំមែនជារបស់ផងលោកិយទេ យើងគឺជាពួកអ៊ីស្រាអែលក្នុងសេចក្ដីសញ្ញា ។ យើងត្រូវបានហៅឲ្យរៀបចំមនុស្សសម្រាប់ការយាងមកជាលើកទីពីររបស់ព្រះអម្ចាស់ ។
ឥឡូវខ្ញុំសូមបញ្ជាក់ចំនុចបន្ថែមមួយចំនួនដោយមានការគោរពដល់ស្ត្រី និងបព្វជិតភាព ។ នៅពេលបងប្អូនត្រូវបានញែកចេញឲ្យបម្រើនៅក្នុងការហៅមួយ នៅក្រោមការដឹកនាំនៃអ្នកដែលកាន់កូនសោបព្វជិតភាព— ដូចជាប៊ីស្សព ឬប្រធានស្ដេករបស់បងប្អូន— នោះបងប្អូនត្រូវបានប្រគល់ឲ្យនូវសិទ្ធិអំណាចបព្វជិតភាពដើម្បីប្រើនៅក្នុងការហៅនោះ ។
ស្រដៀងគ្នានេះផងដែរ នៅក្នុងព្រះវិហារបរិសុទ្ធ បងប្អូនត្រូវបានអនុញ្ញាតឲ្យធ្វើ និងបម្រើនៅក្នុងពិធីបរិសុទ្ធនៃបព្វជិតភាព រាល់ពេលដែលបងប្អូនចូលរួម ។ អំណោយទានពិសិដ្ឋក្នុងព្រះវហារបរិសុទ្ធរបស់បងប្អូនរៀបចំបងប្អូនឲ្យធ្វើដូច្នោះ ។
បើបងប្អូនត្រូវបានទទួលអំណោយទានពិសិដ្ឋ ប៉ុន្តែមិនទាន់បានរៀបការនឹងបុរសណាម្នាក់ដែលកាន់បព្វជិតភាព ឬនរណាម្នាក់និយាយមកកាន់បងប្អូនថា « ខ្ញុំសូមទោស ដែលអ្នកពុំមានបព្វជិតភាពនៅក្នុងផ្ទះរបស់អ្នក » សូមយល់ថា សេចក្ដីថ្លែងនោះពុំត្រឹមត្រូវទេ ។ បងប្អូនអាចពុំមែនជា អ្នកកាន់ បព្វជិតភាពនៅក្នុងផ្ទះរបស់បងប្អូនពិតមែន ប៉ុន្តែបងប្អូនបានទទួលអំណោយទានពិសិដ្ឋនៃអំណាចបព្វជិតភាពរបស់បងប្អូននៅក្នុងព្រះវិហារបរិសុទ្ធ ។ នៅក្នុងសេចក្ដីសញ្ញាទាំងនោះធ្វើឲ្យកើតមាននូវការប្រទាននៃអំណាចបព្វជិតភាពរបស់ទ្រង់មកលើបងប្អូន ។ ហើយសូមចងចាំថា បើស្វាមីរបស់បងប្អូនស្លាប់ បងប្អូន នឹងធ្វើជាអធិបតីនៅក្នុងផ្ទះរបស់បងប្អូន ។
ក្នុងនាមជាស្ត្រីពួកបរិសុទ្ធថ្ងៃចុងក្រោយដែលបានទទួលអំណោយទានពិសិដ្ឋ សុចរិត នោះបងប្អូននិយាយ និងបង្រៀនដោយព្រះចេស្ដារ និងសិទ្ធិអំណាចមកពីព្រះ ។ ទោះជាដោយការដាស់តឿន ឬការសន្ទនា នោះយើងត្រូវការសំឡេងរបស់បងប្អូនបង្រៀនគោលលទ្ធិនៃព្រះគ្រីស្ទ ។ យើងត្រូវការមតិរបស់បងប្អូននៅក្នុងក្រុមប្រឹក្សាគ្រួសារ វួដ និងស្តេក ។ ការចូលរួមរបស់បងប្អូនគឺចាំបាច់ ហើយពុំមែនមិនសំខាន់ទេ !
បងប្អូនស្រីជាទីស្រឡាញ់ អំណាចរបស់បងប្អូននឹងចម្រើនឡើង នៅពេលបងប្អូនបម្រើអ្នកដទៃ ។ ការអធិស្ឋាន ការតមអាហារ ពេលវេលាអានបទគម្ពី និងការបម្រើនៅក្នុងព្រះវិហារបរិសុទ្ធ និងកិច្ចការពង្សប្រវត្តិរបស់បងប្អូន នឹងបើកស្ថានសួគ៌ចំពោះបងប្អូន ។
ខ្ញុំសូមអញ្ជើញបងប្អូនឲ្យសិក្សាសេចក្ដីពិត ទាំងអស់ ប្រកបដោយការអធិស្ឋាន តាមដែលបងប្អូនអាចធ្វើទៅបាន ដើម្បីស្វែងរកអំណាចបព្វជិតភាព ។ បងប្អូនអាចចាប់ផ្ដើមជាមួយនឹង គោលលទ្ធិ និង សេចក្តីសញ្ញា កណ្ឌទី ៨៤ និង ១០៧ ។ កណ្ឌទាំងនោះនឹងដឹកនាំបងប្អូនទៅរកវគ្គបទគម្ពីរដទៃទៀត ។ បទគម្ពីរ និងការបង្រៀនដោយពួកព្យាការី អ្នកមើលឆុត និង អ្នកទទួលវិវរណៈសម័យទំនើប ត្រូវបានបំពេញដោយសេចក្ដីពិតទាំងនេះ ។ នៅពេលការយល់ដឹងរបស់បងប្អូនចម្រើនឡើង ហើយនៅពេលបងប្អូនអនុវត្តសេចក្ដីជំនឿលើព្រះអម្ចាស់ និងអំណាចបព្វជិតភាពរបស់ទ្រង់ នោះសមត្ថភាពរបស់បងប្អូនដើម្បីទាញយកទ្រព្យសម្បត្តិខាងវិញ្ញាណនេះ ដែលព្រះបានមានសម្រាប់បងប្អូន នឹងចម្រើនឡើង ។ នៅពេលបងប្អូនធ្វើដូច្នោះ នោះបងប្អូននឹងរកឃើញថាខ្លួនឯងអាចជួយបង្កើតគ្រួសារអស់កល្បជានិច្ចដែលមានសាមគ្គីភាព ផ្សារភ្ជាប់នៅក្នុងព្រះវិហារបរិសុទ្ធរបស់ព្រះអម្ចាស់ ហើយពោរពេញដោយក្ដីស្រឡាញ់ចំពោះព្រះវរបិតាសួគ៌ និងព្រះយេស៊ូវគ្រីស្ទរបស់យើង ។
រាល់ការខិតខំរបស់យើងដើម្បីផ្ដល់ការងារបម្រើដល់គ្នាទៅវិញទៅមក ប្រកាសដំណឹងល្អ ធ្វើឲ្យពួកបរិសុទ្ធបានគ្រប់លក្ខណ៍ ហើយប្រោសលោះមនុស្សស្លាប់ គឺទាក់ទងគ្នានៅក្នុងព្រះវិហារបរិសុទ្ធ ។ ឥឡូវយើងមានព្រះវិហារបរិសុទ្ធចំនួន ១៦៦ នៅទូទាំងពិភពលោក ហើយនឹងមានច្រើនទៀត ។
ដូចបងប្អូនបានដឹងហើយថា ព្រះវិហារបរិសុទ្ធទីក្រុងសលត៍ វិសាលដ្ឋាននៃព្រះវិហារបរិសុទ្ធ និងផ្លាសារនៅជិតនឹងអគារការិយាល័យសាសនាចក្រនឹងត្រូវជួសជុលឡើងវិញនៅក្នុងគម្រោងមួយដែលនឹងចាប់ផ្ដើមបិទនៅក្នុងឆ្នាំនេះ ។ ព្រះវិហារបរិសុទ្ធពិសិដ្ឋ នេះ ត្រូវតែរក្សា និងរៀបចំដើម្បីបំផុសគំនិតជំនាន់អនាគត ដូចដែលវាមានឥទ្ធិពលមកលើយើងនៅជំនាន់នេះ ។
នៅពេលសាសនាចក្ររីកចម្រើន ព្រះវិហារបរិសុទ្ធកាន់តែច្រើននឹងត្រូវបានសង់ឡើង ដើម្បីក្រុមគ្រួសារជាច្រើនអាចទទួលបានពរជ័យដ៏មហិមាបំផុត គឺជីវិតអស់កល្បជានិច្ច ។៥ យើងគោរពព្រះវិហារបរិសុទ្ធ ជា សំណង់អគារសាសនាចក្រដែលពិសិដ្ឋបំផុត ។ នៅពេលណាផែនការត្រូវបានប្រកាសដើម្បីសង់ព្រះវិហារបរិសុទ្ធថ្មី នោះវាក្លាយជាចំណែកដ៏សំខាន់មួយនៃប្រវត្តិសាស្ត្ររបស់យើង ។ ដូចយើងបានពិភាក្សានាយប់នេះ បងប្អូនស្ត្រីអើយ បងប្អូនសំខាន់ចំពោះកិច្ចការនៃព្រះវិហារបរិសុទ្ធ ហើយព្រះវិហារបរិសុទ្ធ គឺជាកន្លែងដែលបងប្អូននឹងទទួលបាននូវទ្រព្យសម្បត្តិខាងវិញ្ញាណដ៏ខ្ពស់បំផុតរបស់បងប្អូន ។
សូមស្ដាប់ដោយយកចិត្តទុកដាក់ និងគារវភាព នៅពេលខ្ញុំប្រកាសអំពីផែនការដើម្បីសាងសង់ព្រះវិហារបរិសុទ្ធថ្មីចំនួនប្រាំបីទៀតក្នុងពេលឥឡូវនេះ ។ បើមានព្រះវិហារបរិសុទ្ធមួយត្រូវបានប្រកាសនៅកន្លែងដែលមានអត្ថន័យចំពោះបងប្អូន ខ្ញុំសូមផ្ដល់យោបល់ឲ្យបងប្អូនលំឱនកាយអធិស្ឋានថ្លែងអំណរគុណក្នុងដួងចិត្តរបស់បងប្អូន ។ យើងមានក្ដីសោមនស្សប្រកាសអំពីផែនការដើម្បីសាងសង់ព្រះវិហារបរិសុទ្ធនៅក្នុងទីតាំងដូចខាងក្រោម ៖ ហ្វ្រីថោន, សៀរ៉ា លីអន, អូរឹម, យូថាហ៍, ផត ម័រេសប៊ី, ប៉ាប៉ៅ នូវ ហ្គីនៀ, បិនតុនវិល, អាកានសាស, បាកូឡុត, ហ្វីលីពីន, ម៉ាក់អាឡិន, តិចសាស, ខូបាន, ហ្គ័រតាមីឡា, និង ថេលើរស្វិល យូថាហ៍ ។ សូមអរគុណ បងប្អូនស្រី ។ ពួកយើងមានអំណរគុណយ៉ាងជ្រាលជ្រៅចំពោះការទទួលយកផែនការទាំងនេះ និងឆ្លើយតបដោយការគោរព ។
ទីបញ្ចប់ ខ្ញុំចង់បន្សល់ទុកពរជ័យមួយមកលើបងប្អូន ថាបងប្អូនអាចយល់អំពីអំណាចបព្វជិតភាពដែលមានដែលត្រូវបានប្រទានពរឲ្យ ហើយដែលបងប្អូននឹងបំពេញបន្ថែមអំណាចនោះដោយការអនុវត្តសេចក្ដីជំនឿរបស់បងប្អូន លើព្រះអម្ចាស់ និងព្រះចេស្ដារបស់ទ្រង់ ។
បងប្អូនស្ត្រីជាទីស្រឡាញ់ ដោយការគោរព និងការដឹងគុណដ៏ជ្រាលជ្រៅបំផុត ខ្ញុំសូមសម្ដែងសេចក្ដីស្រឡាញ់របស់ខ្ញុំចំពោះបងប្អូន ។ ខ្ញុំសូមប្រកាសដោយរាបសារថា ព្រះមានព្រះជន្មរស់ ! ព្រះយេស៊ូវជាព្រះគ្រីស្ទ ។ នេះគឺជាសាសនាចក្ររបស់ទ្រង់ ។ ខ្ញុំសូមថ្លែងទីបន្ទាល់ដូច្នោះក្នុងព្រះនាមនៃព្រះយេស៊ូវគ្រីស្ទ អាម៉ែន ។