Mga Pinili gikan sa
Basahon ni Moises

1 Ang mga pulong sa Dios, nga iyang gipamulong ngadto ni Moises sa panahon nga si Moises gidala ngadto sa hilabihan ka taas nga bukid,

2 Ug nakakita siya sa Dios nawong sa nawong, ug nakigsulti siya kaniya, ug ang himaya sa Dios anaa kang Moises; mao nga si Moises nakalahutay sa iyang atubangan.

3 Ug misulti ang Dios kang Moises, nga nag-ingon: Tan-awa, ako ang Ginoong Dios nga Labawng Makagagahom, ug Walay Kataposan ang akong ngalan; kay ako walay sinugdanan sa mga adlaw o kataposan sa katuigan; ug dili ba kini walay kataposan?

4 Ug, tan-awa, ikaw mao ang akong anak; mao nga tan-awa, ug akong ipakita kanimo ang mga binuhat sa akong kaugalingong mga kamot; apan dili ang tanan, kay ang akong mga buhat walay kataposan, ug usab ang akong mga pulong, kay dili gayod kini mohunong.

5 Mao nga, walay tawo nga makakita sa akong tanang buhat, gawas kon iyang makita ang akong tanang himaya; ug walay tawo nga makakita sa akong tanang himaya, ug human niana magpabiling buhi dinhi sa yuta.

6 Ug ako adunay buhat alang kanimo, Moises, akong anak; ug ikaw adunay pagkasusama sa akong Bugtong Anak; ug ang akong Bugtong Anak mao ug mamahimo nga Manluluwas, kay puno siya sa grasya ug sa kamatuoran; apan walay laing Dios gawas kanako, ug ang tanang butang ania uban kanako, kay nakaila ako kanilang tanan.

7 Ug karon, tan-awa, kining usa ka butang nga akong ipakita kanimo, Moises, akong anak, kay ikaw anaa sa kalibotan, ug karon ipakita ko kini kanimo.

8 Ug nahitabo nga mitan-aw si Moises, ug nakita ang kalibotan diin siya gilalang; ug nakita ni Moises ang kalibotan ug ang mga kinatumyan niini, ug ang tanang katawhan nga gilalang, ug nalalang; mahitungod niana hilabihan ang iyang kahibulong ug katingala.

9 Ug ang presensya sa Dios mibiya ni Moises, nga ang iyang himaya wala na ni Moises; ug si Moises nag-inusara na lang. Ug samtang nag-inusara siya, natumba siya sa yuta.

10 Ug nahitabo nga milungtad kini sulod sa daghang oras sa wala pa si Moises makadawat pag-usab sa iyang kinaiyanhon nga kusog sama sa tawo; ug miingon siya sa iyang kaugalingon: Karon, tungod niini nasayod ko nga ang tawo walay mahimo, butang nga wala gayod nako mahunahunai sukad.

11 Apan karon ang akong kaugalingong mga mata nakakita sa Dios; apan dili sa akong kinaiyanhon nga mga mata, apan sa akong espirituwal nga mga mata, kay ang akong kinaiyanhon nga mga mata dili mahitabong makakita; kay nalaya na unta ko ug namatay sa iyang atubangan; apan ang iyang himaya ania kanako; ug nakakita ko sa iyang nawong, kay nahimaya ang akong panagway sa iyang atubangan.

12 Ug nahitabo nga sa dihang si Moises nakasulti niini nga mga pulong, tan-awa, si Satanas miabot nga nagtental kaniya, nga nag-ingon: Moises, anak sa tawo, simbaha ako.

13 Ug nahitabo nga si Moises mitan-aw kang Satanas ug miingon: Kinsa man ka? Kay tan-awa, ako mao ang anak sa Dios, nga adunay pagkasama sa iyang Bugtong Anak; ug asa man ang imong himaya, aron mosimba ako kanimo?

14 Kay tan-awa, dili ako makatan-aw sa Dios, gawas kon ang iyang himaya maana kanako, ug mahimaya ang akong panagway sa iyang atubangan. Apan makatan-aw ko kanimo pinaagi sa akong kinaiyanhon nga pagkatawo. Dili ba ingon man kini niana, sa pagkatinuod?

15 Bulahan ang ngalan sa akong Dios, kay ang iyang Espiritu wala mobiya sa hingpit kanako, o labot pa asa man ang imong himaya, kay kangitngit man kini ngari kanako? Ug makaila ako tali kanimo ug sa Dios; kay ang Dios nagsulti kanako: Simbaha ang Dios, kay kaniya lamang ikaw moalagad.

16 Pahawa, Satanas; ayaw ko linglaha; kay ang Dios nagsulti kanako: Ikaw adunay pagkasusama sa akong Bugtong Anak.

17 Ug mihatag usab siya kanako og mga sugo sa dihang iya kong gitawag gikan sa nagdilaab nga sagbot, nga nag-ingon: Tawga ang Dios pinaagi sa ngalan sa akong Bugtong Anak, ug simbaha ako.

18 Ug usab miingon si Moises: Dili ko mohunong sa pagtawag sa Dios, ako adunay laing mga butang nga ipangutana kaniya: kay ang iyang himaya misulod kanako, mao nga makaila ako sa kalainan tali kaniya ug kanimo. Pahawa, Satanas.

19 Ug karon, sa dihang si Moises nakasulti na niini nga mga pulong, si Satanas misinggit sa kusog nga tingog, ug nagyawyaw sa yuta, ug mimando, nga nag-ingon: Ako ang Bugtong Anak, simbaha ako.

20 Ug nahitabo nga si Moises misugod sa pagkahadlok sa hilabihan; ug sa dihang misugod siya sa pagkahadlok, iyang nakita ang pagkapait sa impyerno. Bisan pa man, pinaagi sa pagtawag sa Dios, nakadawat siya og kalig-on, ug mimando siya, nga nag-ingon: Pahawa gikan kanako, Satanas, kay niining usa ka Dios lamang ako mosimba, nga mao ang Dios sa himaya.

21 Ug karon si Satanas misugod sa pagkurog, ug ang yuta nauyog; ug si Moises nakadawat og kalig-on, ug mitawag sa Dios, nga nag-ingon: Sa ngalan sa Bugtong Anak, pahawa, Satanas.

22 Ug nahitabo nga misinggit si Satanas sa makusog nga tingog, uban ang pagbakho, ug pagdanguyngoy, ug pagpangagot sa mga ngipon; ug mipahawa siya, gani gikan sa atubangan ni Moises, nga wala na siya makakita kaniya.

23 Ug karon mao kini ang mga butang nga gipamatud-an ni Moises; apan tungod sa pagkadaotan wala na kini sa taliwala sa katawhan.

24 Ug nahitabo nga sa dihang mipahawa na si Satanas sa atubangan ni Moises, nga si Moises mihangad ngadto sa langit, samtang puno sa Espiritu Santo, nga nagpamatuod sa Amahan ug sa Anak;

25 Ug nagtawag sa ngalan sa Dios, nakita niya ang iyang himaya pag-usab, kay anaa kini kaniya; ug nakadungog siya og usa ka tingog, nga nag-ingon: Bulahan ikaw, Moises, kay ako, ang Labawng Makagagahom, nagpili kanimo, ug ikaw pagahimoong mas gamhanan kaysa daghang katubigan; kay motuman kini sa imong mando sama nga ikaw mao ang Dios.

26 Ug tan-awa, magauban ako kanimo, bisan ngadto sa kataposan sa imong mga adlaw; kay ikaw moluwas sa akong katawhan gikan sa pagkaulipon, gani ang Israel nga akong pinili.

27 Ug nahitabo, samtang nagsulti pa ang tingog, gipunting ni Moises ang iyang mga mata ug nakita ang yuta, oo, gani ang tanan niini; ug walay bisan usa ka tipik niini nga wala niya makita, nga nag-ila niini pinaagi sa Espiritu sa Dios.

28 Ug nakita usab niya ang mga lumulupyo niini, ug walay bisan usa ka kalag nga wala niya makita; ug siya miila kanila pinaagi sa Espiritu sa Dios; ug daghan kaayo sila, gani dili maihap sama sa mga balas sa baybayon.

29 Ug nakita niya ang daghang yuta; ug ang matag yuta gitawag og kalibotan, ug adunay mga lumulupyo sa ibabaw niini.

30 Ug nahitabo nga si Moises mitawag sa Dios, nga nag-ingon: Sultihi ko, ako nangamuyo kanimo, ngano nga kini nga mga butang naingon niana, ug sa unsang paagi nga ikaw mibuhat niini?

31 Ug tan-awa, ang himaya sa Ginoo anaa ni Moises, mao nga si Moises nakabarog sa atubangan sa Dios, ug nakigsulti kaniya nawong sa nawong. Ug ang Ginoong Dios misulti kang Moises: Alang sa akong kaugalingong katuyoan gibuhat ko kini nga mga butang. Ania ang kaalam ug nagpabilin kini kanako.

32 Ug pinaagi sa pulong sa akong gahom, milalang ako niini, nga mao ang akong Bugtong Anak, nga puno sa grasya ug kamatuoran.

33 Ug ang mga kalibotan nga dili maihap akong gilalang; ug milalang usab ako niini alang sa akong kaugalingong katuyoan; ug pinaagi sa akong Anak milalang ako niini, nga mao ang akong Bugtong Anak.

34 Ug ang una nga lalaki sa tanang lalaki akong gitawag og Adan, nga nagpasabot og daghan.

35 Apan ang kasaysayan lamang niini nga kalibotan, ug ang mga lumulupyo niini, ang akong ihatag kanimo. Kay tan-awa, adunay daghang kalibotan nga milabay na pinaagi sa pulong sa akong gahom. Ug adunay daghan nga karon anaa pa, ug dili sila maihap sa tawo; apan ang tanang butang inihap ngari kanako, kay sila akoa ug nakaila ako kanila.

36 Ug nahitabo nga si Moises misulti sa Ginoo, nga nag-ingon: Pagmaluloy-on sa imong sulugoon, O Dios, ug sultihi ako mahitungod niini nga kalibotan, ug sa mga lumulupyo niini, ug usab sa mga langit, ug niana ang imong sulugoon makontento na.

37 Ug ang Ginoong Dios misulti kang Moises, nga nag-ingon: Ang mga langit, daghan kini, ug dili kini maihap sa tawo; apan inihap kini ngari kanako, kay kini akoa.

38 Ug ingon nga ang usa ka kalibotan molabay, ug ang mga langit niini bisan pa niana adunay lain nga moabot; ug walay kataposan ngadto sa akong mga buhat, ni ngadto sa akong mga pulong.

39 Kay tan-awa, mao kini ang akong buhat ug akong himaya—ang pagpahitabo sa pagka-imortal ug kinabuhing dayon sa tawo.

40 Ug karon, Moises, akong anak, sultihan ko ikaw mahitungod niini nga kalibotan nga imong gibarogan; ug imong isulat ang mga butang nga akong isulti.

41 Ug sa adlaw nga ang katawhan dili mohatag og bili sa akong mga pulong ug tangtangon ang daghan niini gikan sa basahon nga imong gisulat, tan-awa, ako mopabarog og laing sama kanimo; ug kini maangkon pag-usab taliwala sa mga anak sa katawhan—taliwala sa kadaghanan kutob sa motuo.

42 (Kini nga mga pulong mao ang gisulti ngadto ni Moises didto sa bukid, diin ang ngalan dili ipahibalo taliwala sa mga anak sa katawhan. Ug karon gisulti kini nganha kanimo. Ayaw kini ipakita ngadto ni bisan kinsa gawas kanila nga motuo. Ug mao gayod kana. Amen.)