1 Ao ngkai e koro bukina bwa ngke Aramwa e mwananga man te aba are Kiteon mai meang, nakon te aba are Maentaai, nooria, e mimi, ngke e ^akaitibo ma ^bnatin Motiaea aika mwaane aika a mwananga nakon te aba are Taraemera.

2 Ao ngkanne natin Motiaea mwaane aikai bon raon Aramwa n te tai are e ^amoan kaoti te anera nakoina; ngaia are Aramwa e korakora kimwareireina ngke e nooriia tarina; ao teraa are e a raka riki iai kimwareireina, bon tarina naba ngaia i nanon te Uea; eng, ao a bon matoatoa n te rabakau ibukin te koaua; bwa bon mwaane ngaia aika a raoiroi aia atatai ao a bon tia n ^bukoukouri koroboki aika tabu ma nanomwakaia, bwa aonga n ataa ana taeka te Atua.

3 Ma tiaki ti ngaia aio; a bon tia naba ni kakorakoraia n ^atataro, ma n aki mamatam; ngaia ae iai irouia te tamnei n taeka ni burabeti, ao te tamnei ni kaotioti, ao ngkana ^banga reirei, a reirei ma mwaakan ao ana kariaia te Atua.

4 Ao a bon tia n reirei ana taeka te Atua i nanon te maan ae tebwi ma aua te ririki i buakoia Reimwanaite, ma ni korakora ^atokanikaia ni ^bkairia aika a mwaiti nakon ataakin te koaua; eng, man mwaakan aia taeka a mwaiti ake a roko i matan ana bao ni karea te Atua, ni wewetea arana ma ni ^ckaoti aia bure i matana.

5 Ao ngkanne aikai aroia i nanon mwamwanangaia, bwa a mwaiti karawawatakia; ao a bon kainnano n rabwataia ao aia iango, n aron te baki, te taka, ao te korakai, ao te ^abeku korakora naba n te tamnei.

6 Ao ngkanne aikai mwanangaia: Ngke ^aa tia ni kitana tamaia, Motiaea, n aia moan ririki taan moti; ma n ^brawa ni butimwaea aban ueaia are tamaia e rang tangiria ni katokaa iaoia, ao aio naba bon nanoia aomata;

7 Ma e ngae n anne a otinako man te aba are Taraemera, a uoti aia kabaang, ao aia kainiwai, ma aia kai ni katebe, ma kanoan aia kai ni katebe ao aia bana; ao aio a karaoia n te aro are a na kona ni karekei oin kanaia i nanon menaia n te rereua.

8 Ao ngaia are a mwananga nakon te rereua ma mwaitia are a tia n rineia, bwa a na waerake nakon te aba are Nibwaai, bwa a na taekina ana taeka te Atua nakoia Reimwanaite.

9 Ao e koro bukina bwa a mwananga i nanon te rereua i nanon boong aika a mwaiti, ao e korakora aia aki mamatam ma aia ^atataro bwa te Uea e na anganiia tamneina bwa e na iriia, man tiku irarikiia, bwa aonga n riki bwa ^bbwaai ni mwakuri i nanon bain te Atua bwa a na kairia, ngkana e kona, tariia, aika Reimwanaite nakon ataakin te koaua, nakon ataakin buakakan ^ckateia aia bakatibu, ake a bon aki eti.

10 Ao e koro bukina bwa te Uea e bon ^akawaria n ^bTamneina, ao e taku nakoia: ^cKarau nanomi. Ao a rau nanoia.

11 Ao te Uea e taku nakoia naba: Naako nakoia Reimwanaite, ake tarimi, ao katea au taeka; ma kam na ^ataotaon nanomi n te tai ni kainnano ae maan ma karawawata, bwa kam aonga ni kaoti banna aika a raraoi nakoia irou, ao N na karaoi ngkami bwa bwaai ni mwakuri i nanon baiu ibukin kamaiuaia aomata aika a mwaiti.

12 Ao e koro bukina bwa nanoia natin Motiaea ake mwaane, n ikotaki ma ake raoia, a ninikoria ni waaki nakoia Reimwanaite n taekina nakoia ana taeka te Atua.

13 Ao e koro bukina bwa ngke a roko n tian abaia Reimwanaite, ao a ^akamaenakoia ma ni kitania temanna ma temanna, n onimakina te Uea bwa a na manga kaitibo riki n tokin aia ^btai; bwa a kataua bwa e korakora te beku are a kataua bwa a na waakinna.

14 Ao e koaua bwa e bon korakora, bwa a tia ni kataua bwa a na taekina ana taeka te Atua nakoia aomata aika a ^amoaanti ma ni matoatoa ma n iowawa; aomata aika kukurein nanoia tiringakia Nibwaite, te kimoa ma iraean aia bwai; ao nanoia e bane iaon te kaubwai, iaon te koora ma te tirewa, ao atibu aika a kakawaki; ma a karekei bwaai aikai man te tiritiri ao te iraa, bwa aonga n aki mwakuri ibukiia n oin baia.

15 Ngaia ae bon aomata ngaia aika a rang taningaroti, ao a mwaiti mai irouia aika a taromauria bouananti, ao a na ^amaraia te Atua e bwaka iaoia ibukin ^bkateia aia bakatibu; e ngae ngke a anganaki ana berita te Uea ngkana a rairinanoia.

16 Ngaia, ae aio ^abukin are natin Motiaea mwaane a kataua te mwakuri, bwa aonga ni kairia nakon te rairannano; bwa aonga ni kairia nakon ataakin te babaire ni kabomwi.

17 Ngaia ae a kamaenakoia, ao a waaki nako i buakoia, temanna i bon irouna, n aron ana taeka ma mwaakan te Atua are e a tia n reke irouna.

18 Ngkai Amon bon te mataniwi iaoia ke bon ngaia are e bon buokiia, ao e kitania, i mwin tiana ni ^akakabwaiaia n aron nakoaia, i mwin tiana n anganiia ana taeka te Atua, ni buokiia i mwaain nakona; ao ai ngaia are a waakina mwamwanangaia ni kabuta te aba.

19 Ao Amon e nako nakon te aba are Itimaera, te aba are e aranaki imwiia natin ^aItimaera mwaane ake a riki naba bwa Reimwanaite.

20 Ao ngke Amon e rin n te aba are Itimaera, Reimwanaite a anaia ao a kabaea, bwa bon aia katei kabaeakiia Nibwaite ake a mwane i nanon baia, ma n uotia nako matan aia Uea; ao ngaia are e a bon tiku iroun te Uea bwa e na tiringia ke e na tauiia ni kabureia, ke a na teweaki nako nanon te karabuti, ke a na teweaki nako man te aba, n aron nanona ma kukureina.

21 Ao ngaia are Amon e a bon uotaki nako matan te uea are e bon uea iaon te aba are Itimaera; ao arana bon Ramonaai; ao bon kanoan Itimaera.

22 Ao te uea e ukora mai iroun Amon bwa nanona bwa te kan maeka n te aba i buakoia Reimwanaite, ke i buakoia ana aomata.

23 Ao e taku Amon nakoina: Eng, I tangiria ni maeka i buakoia te botanaomata aio; eng, tao ni karokoa te bong are I mate iai.

24 Ao e koro bukina bwa te uea are Ramonaai e bon rang kukurei iroun Amon, ae e tua bwa a na kabwaraki kabaeana; ao e tangiria bwa Amon e na anaa temanna natina te aine bwa buuna.

25 Ma Amon e taku nakoina: Tiaki, ma N na riki ngai bwa temanna am toro. Ngaia are Amon e a riki bwa ana toro te uea are Ramonaai. Ao e koro bukina bwa e a kanakoaki irarikiia toro temwaangina bwa a na kaawakin ana nanai ni man Ramonaai, n aron kateia Reimwanaite.

26 Ao i mwin tenibong menana ni beku ibukin te uea, ao e mena i buakoia toro aika Reimwananite ake a mwananga ma aia nanai ni man nakon te tabo n ran, are e aranaki bwa ranin Teebuti, ao Reimwanaite ni kabane a kairia aia nanai ni man nako iai bwa aonga n iai aia ran—

27 Ngaia are, ngke Amon ao ana toro te uea a uotia aia nanai nakon te tabo n ran, nooria, Reimwanaite tabemwaang ake a roko ma aia nanai ni man bwa a na mooi, a tei ma ni kamaenakoia aia nanai ni man Amon ma ana toro te uea, ao a kamaenakoia n te aro are a biri nakon kawai aika a mwaiti.

28 Ao ngkanne ana toro te uea a bon ngurengure, ni kangai: Ngkai te uea e na bon tiringira, n aroia naba tarira ake a kamaenakoaki aia nanai ni man ibukin buakakaia aomata aikai. Ao a bon tang ni kakorakoraia, ni kangai, Nooria, ara nanai a bon tia ni kamaenakoaki.

29 Ao ngkanne a bon tang ibukin maakakin te tiringaki. Ao ngkanne ngke Amon e noora aio ao e onrake nanona n te kimwareirei; bwa, e taku, N na kaota mwaakau nakoia raou n toro, ke te mwaaka are irou, ni kaoki nanai aikai nakon te uea, bwa I aonga n ana nanoia raou n toro aikai, bwa N na kairia bwa a na kakoaui au taeka.

30 Ao ngkai, aikai ana iango Amon, ngke e noora karawawatakia naake e araniia bwa tarina.

31 Ao e koro bukina bwa e kabwaka nanoia n ana taeka, ni kangai: Tariu, kakukureingkami ao ti a nako ni kakaei ara nanai ni man, ao ti na ikotiia ao ti na manga kairia n oki nakon nnen te ran; ao ikai are ti na kawakina iai ana nanai ni man te uea ao e na bon aki tiringira.

32 Ao e koro bukina bwa a mwananga n ukoukora te nanai ni man, ao a bon ira Amon, ao a bon mwananga ma te waekoa ma ni kairia ana nanai ni man te uea, ma n ikotiia nakon te tabo n ran.

33 Ao mwaane akekei a manga tei naba bwa a na manga kamaenakoia riki aia nanai ni man; ma Amon e taku nakoia tarina: Katobibia te nanai ni man ma ni katabwanin bwa a na aki biri nako; ao N na nako n un ma mwaane ake a kamaenakoia ara nanai ni man.

34 Ngaia are, a karaoa are e tuangiia Amon ao e waaki nako ma n tei bwa e na un ma naake a tei i rarikin ranin Teebuti; ao a bon aki karako mwaitia.

35 Ngaia are a bon aki maaka Amon, bwa a taku inanoia bwa temanna raoia e kona n tiringnga n aron are a tangiria, bwa a aki ataia ae te Uea e a tia ni berita nakon Motiaea bwa e na ^akamaiuia natina mwaane ma i nanon baia; ao akea naba te bwai ae ataia ni kaineti ma te Uea; ngaia are a kukurei n tiringia tariia; ao ibukin aio are a tei bwa a na kamaenakoia ana nanai ni man te uea.

36 Ma ^aAmon e tei ao e waaki ni kareia n te atibu n ana bana; eng, n te korakora ae bati ao e banaiia n te atibu; ao ikai are e a tiringia ^btabemwaang n te aro are a bon mimi ni korakorana; ma e ngae n anne ao a bon un ibukin tiringakia tariia, ao a kantaningaia bwa e na bwaka; ngaia are ngke a nooria bwa e aki ^ckona ni boo irouia n aia atibu, ao a roko nakoina ma aia ambo bwa a na tiringnga.

37 Ma nooria, bwa ni kabane mwaane ake a tabeka aia ambo bwa a na orea Amon, e bon oroia ni kakibanakoa baia n ana kabaang; bwa e bon katoka kaina man aia oro n oroi baia n taran ana kabaang, n te aro are a bon rang mimi, ao a biri nako mai irouna; eng; ao a bon aki karako mwaitia; ao e kabirinakoiia ni korakoran baina.

38 Ao ngkanne bon onoman ake a bwaka n ana bana, ma akea ae e tiringia ma ti aia mataniwi; ao e kakibanakoi baai aika a mwaiti ake a tabekaki ni kaitaraa, ao a bon aki karako.

39 Ao ngke e a tia ni kakioia nako kiraroa, e okirikaki ao a kamooia aia nanai ni man ao a kaokia nakon ana nne ni man te uea, ao a nakon te uea, ma uotaia baai ake a tia ni kakibanakoaki n ana kabaang Amon, are baia naake a kataia n tiringnga; ao a bon uotaki nakon te uea bwa kakoauan te bwai are a tia ni karaoia.