Ibuot 63
Shiblon ndien e ke ini ebede Helaman eda ndisana ŋwed enyene—Ediwak mme Nephite eka isɔŋ ke edere edere—Hagoth ɔbɔp mme ubom, emi ewatde eka inyaŋ edem usoputin—Moronihah akan mme Lamanite ke ekɔŋ. Ŋkpɔ nte 56-52 M.C.
1 Ndien edikem ke ntɔŋɔ ɔyɔhɔ isua ukara edip ye efitekiet mme ebiere ikpe nnɔ ikɔt Nephi, ete ke Shiblon ama ada mme edisana ŋkpɔ oro emi Alma akayakde ɔnɔ Helaman enyene.
2 Ndien enye ekedi edinen owo, ndien enye ama asaŋa nnennen ke iso Abasi; ndien enye ama anam eti ŋkpɔ kpukpru ini, ndinim mme ibet Jehovah Abasi esie; ŋko ye eyeneka esie.
3 Ndien edikem ete Moroni akpa ŋko. Ndien ke ntem ke ɔyɔhɔ isua ukara edip ye efutekiet mme ebiere ikpe eketre.
4 Ndien edikem ete ke ɔyɔhɔ isua ukara edip ye efiteba mme ebiere ikpe, akwa udim idenowo ema edu, kpa emi ekesimde tɔsin ition ye ikinaŋ, ye iban mmɔ ye nditɔ mmɔ, ewɔrɔ ekpɔŋ isɔŋ Zarahemla eka isɔŋ emi okodude ke edere edere.
5 Ndien edikem ete ke Hagoth, ke ntak emi enye ekedide edenowo emi ɔduŋɔrede ŋkpɔ ata eti eti, ke ntak oro enye aka okonyuŋ ɔbɔp ata akamba ubom mbakara ɔnɔ idem esie, ke mme adaŋa isɔŋ Bountiful, ekperede isɔŋ Desolation, onyuŋ esin enye ke inyaŋ edem usoputin, ekperede mfafaha usuŋ emi adade oduk isɔŋ edere edere.
6 Ndien sese, ediwak mme Nephite ema edu emi ekedukde ke esit enyuŋ ewat ewɔrɔ ye ediwak ŋkpɔ udia, ŋko ye uwak iban ye nditɔ; ndien mmɔ eda uwat mmɔ eka edere edere. Ndien ke ntem ke ɔyɔhɔ isua edip ye efuteba eketre.
7 Ndien ke ɔyɔhɔ isua edip ye efuteta, edenowo emi ɔbɔp mme ubom mbakara efen. Ndien akpa ubom mbakara ŋko ama ɔnyɔŋ edi, ndien uwak owo efen ema eduk enye; ndien mmɔ ŋko ema emen ediwak ŋkpɔ udia, enyuŋ efiak ewat eka isɔŋ ke edere edere.
8 Ndien edikem ete ke mme Nephite ikikopke ibaŋa mmɔ aba. Ndien nnyin ikere ke mmɔ ema esip ke mme udem inyaŋ. Ndien edikem ete ke ubom mbakara kiet efen ama awat ɔwɔrɔ; ndien ebiet emi enye akakade nnyin ifiɔkke.
9 Ndien edikem ete ke isua emi uwak owo ema edu emi ekekade isɔŋ edere edere. Ndien ke ntem ke ɔyɔhɔ isua edip ye efiteta eketre.
10 Ndien edikem ke ɔyɔhɔ isua ukara edip ye efitenaŋ mme ebiere ikpe, Shiblon ama akpa ŋko, ndien Corianton ama aka isɔŋ edere edere ke ubom mbakara, ndida mme ŋkpɔ udia nsɔk mbon emi ekekade isɔŋ oro.
11 Ke ntak oro ama ɔfɔn ete Shiblon ayak mme ndisana ŋkpɔ oro, mbemiso mkpa esie, ɔnɔ eyen Helaman, emi ekekotde Helaman, emi ekekotde edian enyiŋ ete esie.
12 Idahaemi sese, kpukpru mme ŋkpɔ emi ekekapde emi ekedude ke ubɔk Helaman ema ewet enyuŋ enɔ nditɔ owo ke ofuri isɔŋ oro, ibɔhɔke ekedi mme ŋkaŋ oro emi Alma ɔkɔnɔde uyo ete ekuka.
13 Edi, akana nte enim mme ŋkpɔ emi ke edisana, enyuŋ eyak enɔ tɔŋɔ ke emana kiet sim efen; ke ntak oro, ke isua emi, ema eyak mmɔ enɔ Helaman, mbemiso mkpa Shiblon.
14 Ndien edikem ke isua emi ŋko ete ke usuk mbon mfaŋa ema edu emi ekekade ebine mme Lamanite; ndien ema efiak edemede mmɔ ke iyatesit ebaŋa mme Nephite.
15 Ndien ŋko kpa ke ukem isua emi mmɔ ema edi ye ediwak mbon ekɔŋ ndiŋwana ye ikɔt Moronihah, mme ye mbon ekɔŋ Moronihah, ke emi ekekande mmɔ enyuŋ efiak ebinde mmɔ eka isɔŋ mmɔ, eyɔ akwa ntak urua.
16 Ndien ke ntem ke ɔyɔhɔ isua ukara edip ye efitenaŋ mme ebiere ikpe nnɔ ikɔt Nephi eketre.
17 Ndien ke ntem ke mbuk Alma eketre, ye Helaman eyen esie, ye ŋko Shiblon, emi ekedide eyen esie.