1 Ndien edikem ete enye afiak ewet andikara obio oro, emi ekedide Pahoran, ndien emi edi mme ikɔ emi enye ekewetde, ɔdɔhɔ: Sese, ami nnɔ nwet emi esɔk Pahoran, ke obio Zarahemla, emi edide ada ibuot mme ebiereikpe ye andikara isɔŋ oro, ye ŋko kpukpru mme owo emi ekemekde ndikara nnyuŋ nse ŋkpɔ mbaŋa mme edinam ekɔŋ emi.

2 Koro sese, ami menyene ubak ŋkpɔ nditiŋ nnɔ mmɔ ke usuŋ ubiomikpe; koro sese, mbufo ke idem mbufo emefiɔk ete ke emek mbufo ete etaŋ mme owo ebok ɔtɔ kiet, eyuŋ enɔ mmɔ mme akaŋkaŋ, ye mme ikwa, ye kpukpru utɔ ŋkpɔ ekɔŋ ke utɔ ke utɔ, ndien enɔ ekeŋwana ye mme Lamanite, ke ebiet ekededi emi mmɔ edidukde idi isɔŋ nnyin.

3 Ndien idahaemi sese, ami ndɔhɔ mbufo nte ke ami, ye ŋko ikɔt mi, ye ŋko Helaman ye ikɔt esie, ekut mkpɔsɔŋ ndutuhɔ; iŋ, kpa biɔŋ, nsat-itɔŋ, ye mmem idem, ye utɔ kpukpru ukut ke utɔ ke utɔ.

4 Edi sese, edieke emi ekpedide kpukpru se nnyin ikiyɔde nnyin ikpikunike mme ikpitɔhɔke.

5 Edi sese, akpakip edi uwotowo ke otu ikɔt nnyin; iŋ, mme tɔsin eduɔ ke akaŋkaŋ, ke ini mikpikidighe ntre edieke mbufo ekpekenɔde mme mbon ekɔŋ nnyin odudu ye uŋwam emi ekemde mmɔ. Iŋ, ɔkpɔsɔŋ edi unana udɔŋ enyin mbufo kabaŋa nnyin.

6 Ndien idahaemi sese, nnyin imiyom ndifiɔk ntak ɔkpɔsɔŋ unana udɔŋ enyin emi; iŋ, nnyin imiyom ndifiɔk ntak unana ekikere mbufo emi.

7 Ndi mbufo emekere nditie ke mme ebekpo mbufo ke mme idaha unana ekikere, ke ini mme asua mbufo ke esuan utom mkpa ekanade mbufo? Iŋ, ke ini mmɔ ke ewot mme tɔsin nditɔeka mbufo—

8 Iŋ, kpa mbon emi ekesede mbufo eyom ukpeme, iŋ, enim mbufo ke ebiet emi mbufo ekpeŋwamde mmɔ, iŋ, mbufo ekpekedɔŋ mme mbon ekɔŋ ebine mmɔ, ndikpisɔŋɔ mmɔ idem, ndien ekpekenyaŋa mme tɔsin mmɔ ekuduɔ ke akaŋkaŋ.

9 Edi sese, emi idighe kpukpru—mbufo emesin ndinɔ mmɔ mme ŋkpɔ udia mbufo, tutu ete ke ediwak eŋwana enyuŋ eduɔk iyip tutu ekpa ke ntak mme akwa udɔŋ emi mmɔ enyenede enɔ mfɔnɔŋkpɔ mbon emi; iŋ, ndien emi mmɔ enam ke ini mmɔ ekekperede ndikpa ye biɔŋ, ke ntak ɔkpɔsɔŋ unana udɔŋ enyin mbufo kabaŋa mmɔ.

10 Ndien idahaemi, ndima nditɔeka mi—koro akpana nte mbufo edi ndima; iŋ, ndien akpana mbufo etim edemede idem mbufo enɔ mfɔnɔŋkpɔ ye uwɔrɔ ufin mbon emi; edi sese, mbufo ikidɔŋke enyin ke mmɔ tutu ete ke iyip mme tɔsin oyodoro mbufo ke ibuot oyom usiene; iŋ, koro Abasi ɔfiɔkde kpukpru eyet mmɔ, ye kpukpru ufen mmɔ—

11 Sese, ndi mbufo ekpekere ke mbufo ekpekeme nditie ke ebekpo mbufo, ndien ke ntak akwa mfon Abasi mbufo ikpinamke ŋkpɔ ndomo kiet ndien enye akpanyaŋa mbufo? Sese, edieke mbufo ekekere emi mbufo emekere ke ikpikpu.

12 Ndi mbufo ekere ete, ke ntak emi ewotde ata ediwak nditɔeka mbufo ke edi ke ntak ibak mmɔ? Ami ndɔhɔ mbufo, edieke mbufo ekerede emi mbufo emekere ke ikpikpu; koro ami ndɔhɔ mbufo, ediwak edu emi eduɔde ke akaŋkaŋ; ndien sese edi ɔnɔ ubiom ikpe mbufo;

13 Koro Jehovah ayak ewot ndinen owo man unenikpe ye ubiereikpe esie odoro mme idiɔk owo; ke ntak oro mbufo ekukere ete ke ndinen owo etak ke ntak emi ewotde mmɔ; edi esese, mmɔ eduk ke nduɔk odudu Jehovah Abasi mmɔ.

14 Ndien idahaemi esese, ami ndɔhɔ mbufo, ami mefehe ndik ata eti eti nte ke mme ubiereikpe Abasi eyedoro mbon emi, ke ntak ata ifu mmɔ, iŋ, kpa ifu ukara nnyin, ye ata ɔkpɔsɔŋ unana udɔŋ enyin mmɔ kabaŋa nditɔeka mmɔ, iŋ, kabaŋa mbon emi ema ekewot.

15 Koro ekpedi ke ikidighe ke ntak ibak emi ekebemde iso ɔtɔŋɔ ke ukara nnyin, nnyin ikpikikan ibiɔŋɔ mme asua nnyin ndien mmɔ ikpikinyeneke odudu ke idem nnyin.

16 Iŋ, ekpedi ikidighe ekɔŋ emi akasiahade ke otu nnyin; iŋ, ekpedi ikidighe mme ikɔt edidem emi, emi ekenamde uwak uduɔk iyip odu ke otu nnyin; iŋ, ke ini nnyin ikinenide eneni ke otu nnyin, ekpedi nnyin ima idian odudu nnyin kiet nte nnyin ikisinamde; iŋ, ekpedi ikidighe udɔŋ odudu ye unen emi mme ikɔt edidem oro ekenyenede ke idem nnyin; ekpedi mmɔ ema enam akpanikɔ enɔ ntak uwɔrɔ ufin nnyin, enyuŋ ediana ye nnyin, enyuŋ eka eŋwan ye mme asua nnyin, idighe ndimen akaŋkaŋ mbaŋa nnyin, emi ekedide ntak uwak uduɔk iyip ke otu nnyin; iŋ, ekpedi nnyin ima iŋwana ye mmɔ ke odudu Jehovah, nnyin ikpikisuan mme asua nnyin, koro akpakanam, nte edisu ikɔ esie edide.

17 Edi sese, idahaemi mme Lamanite kedi eŋwan ye nnyin, ke eda mme isɔŋ nnyin enyene, ndien mmɔ ke ewot ikɔt nnyin ye akaŋkaŋ, iŋ, iban nnyin ye nditɔ nnyin, ndien ŋko ke etaŋ mmɔ ewɔrɔ nte mbon ŋkpɔkɔbi, enam ete mmɔ ekut utɔ kpukpru ukut, ndien emi ke ntak ɔkpɔsɔŋ ibak mbon emi eyomde odudu ye unen, iŋ, kpa mme ikɔt edidem oro.

18 Edi ntak emi ami mkpetiŋde uwak ikɔ mbaŋa ŋkpɔ emi? Koro nnyin ifiɔkke edi ke ekeme ndidi ke mbufo ke idem mbufo eyom unen. Nnyin ifiɔkke edi ke ekeme ndidi ke mbufo ŋko edi mbia enɔ obio mbufo.

19 Mme edi ete ke mbufo idɔŋke enyin ke nnyin koro mbufo edude ke esit obio nnyin ndien mbon ukpeme ekanade mbufo ekuk, anam mbufo inamke enɔ udia esɔk nnyin, ŋko ye mme iden ndisɔŋɔ mbon ekɔŋ nnyin?

20 Ndi mbufo emefre mme ibet Jehovah Abasi mbufo? Iŋ, ndi mbufo emefre ŋkpɔkɔbi mme ete nnyin? Ndi mbufo emefre ediwak ini emi nnyin ibɔhɔde iwɔrɔ ke ubɔk mme asua nnyin?

21 Mme ndi mbufo ekere ke Jehovah oyosuk anam nnyin ibɔhɔ, ke ini nnyin itiede ke ebekpo nnyin ndien idaha se Jehovah ɔnɔde nnyin inam ŋkpɔ?

22 Iŋ, ndi mbufo eyedop etie ese ke ini mme tɔsin mmɔ oro ekanade mbufo ekuk, iŋ, ndien mme duop mme tɔsin, emi ŋko edopde etie, ke ini mme tɔsin edude ekanade mme adaŋa isɔŋ emi eduɔde ke akaŋkaŋ, iŋ, edade unan enyuŋ ewɔrɔde iyip?

23 Ndi mbufo ekere ete ke Abasi eyese mbufo nte mbon emi miduehe ke ini mbufo etiede suŋ enyuŋ ese mme ŋkpɔ emi? Esese ami ndɔhɔ mbufo, Iŋ iŋ. Idahaemi ami nyom yak mbufo eti ete ke Abasi ɔdɔhɔ ete ke eyeto enam itie ukara asana, ndien ke ini oro ke itie ekɔŋ edisana ŋko.

24 Ndien idahaemi, ibɔhɔke mbufo ekabade esit ke se mbufo enamde, ndien etɔŋɔ ndidaha nda nnyuŋ nnam, nyuŋ nnɔ udia ye mme iden esɔk nnyin, ye ŋko Helaman, man enye aŋwam ŋkaŋ obio nnyin oro emi enye afiakde ɔbɔ, ŋko man nnyin ŋko ifiak inyene nsuhɔ inyene nnyin ke mme ŋkaŋ emi, esese ɔyɔfɔn ete nnyin ikuŋwana aba ye mme Lamanite tutu nnyin ibemiso inam itie ukara nnyin asana, iŋ, kpa akakan ibuot ukara nnyin.

25 Ndien ibɔhɔke mbufo enam ŋwed mi, ndien ewɔrɔ edi enyuŋ ewut mi spirit uwɔrɔ ufin ke akpanikɔ, enyuŋ edomo ndisɔŋɔ nyuŋ nnam mbon ekɔŋ nnyin enyene odudu, enyuŋ enɔ mmɔ udia ndiŋwam mmɔ, esese ami nyɔkpɔŋ ubak mbon uwɔrɔ ufin mi nte ekpeme ŋkaŋ isɔŋ nnyin emi, ndien nyayak odudu ye mme edidiɔŋ Abasi nnɔ mmɔ, man odudu ndomo kiet efen okuŋwana ye mmɔ—

26 Ndien emi ke ntak ɔkpɔsɔŋ mbuɔtidem mmɔ, ye ime mmɔ ke mme ukut mmɔ—

27 Ndien ami nyedi mbine mbufo, ndien edieke owo ndomo kiet odude ke otu mbufo emi oyomde uwɔrɔ ufin, iŋ, edieke kpa mbeŋe uwɔrɔ ufin ɔsuhɔde, sese ami nyedemede utɔk ke otu mbufo, tutu mbon emi enyenede udɔŋ ndibɔ odudu ye unen eyesop.

28 Iŋ, sese ami mfeheke odudu mbufo mme unen mbufo, edi edi Abasi mi ke ami mfehe; ndien edi nte mme ibet esie edide ke ami mmen akaŋkaŋ mi ndikpeme usuŋ unam-ŋkpɔ obio mi, ndien edi ke ntak ukwaŋ-ŋkpɔ mbufo ke nnyin iyɔ utɔ atahade emi.

29 Esese, edi ini, iŋ, idahaemi ini ekpere, ete ke ibɔhɔke mbufo edemede idem mbufo ke ukpeme obio mbufo ye nditɔ mbufo, akaŋkaŋ unenikpe odoro mbufo ke idem; iŋ, ndien enye ɔyɔduɔ mbufo ke idem ndien edise mbufo tutu esim ndisobo mbufo ofuri ofuri.

30 Esese, ami ke mbet uŋwam nto mbufo, ndien, ibɔhɔke mbufo enam ŋkpɔ ndiŋwam nnyin, esese, ami kendi mbine mbufo, kpa ke isɔŋ Zarahemla, ndien mmia mbufo ye akaŋkaŋ, tutu ete mbufo idinyeneke odudu aba nditre nka-iso mbon emi ke usuŋ uwɔrɔ ufin nnyin.

31 Koro esese, Jehovah idiyakke ete mbufo edu uwem enyuŋ ekop odudu ke mme ukwaŋ-ŋkpɔ mbufo ndiwot ndinen ikɔt esie.

32 Esese, ndi mbufo emekere ete ke Jehovah ɔyɔsuhɔ mbufo ndien anam ubiere ikpe ke mme Lamanite, ke ini edide ete ke ido mme ete mmɔ anam usua mmɔ, iŋ, ndien mbon emi esinde ndinyime ye nnyin enam enye okpon ke itie iba, ke ini ukwaŋ-ŋkpɔ mbufo edide ke ntak ima mbufo nnɔ ubɔŋ ye mme ikpikpu ŋkpɔ ederimbot?

33 Mbufo emefiɔk ete ke mbufo emedue mme mbet Abasi, ndien mbufo emefiɔk ete ke mbufo emedighi mmɔ ke idak ikpat mbufo. Esese, Jehovah ama ɔdɔhɔ mi: Edieke mbon emi mbufo emekde mme andikara mbufo mikabakede esit ke mme idiɔk ŋkpɔ ye mme ukwaŋ-ŋkpɔ mmɔ, afo ayaka ekɔŋ ye mmɔ.

34 Ndien idahaemi esese, ami, Moroni, enyik mi, nte ediomi emi ami nnamde ndinim mme ibet Abasi mi edide; ke ntak oro ami moyom nte yak mbufo enam ikɔ Abasi, enyuŋ edɔŋ ke usɔp enɔ mi mme ŋkpɔ udia mbufo ye mme mbon ekɔŋ mbufo, ndien ŋko enɔ Helaman.

35 Ndien esese, edieke mbufo midinamke emi ami kendi mbine mbufo ke usɔp; koro esese, Abasi idiyakke ete nnyin ikpa ke biɔŋ; ke ntak oro enye ɔyɔnɔ nnyin udia mbufo, okposuk edi ke ana nte edi ke akaŋkaŋ. Idahaemi ekut ete ke mbufo eme enam ikɔ Abasi.

36 Esese, ami ndi Moroni, ada ibuot mme etubom ekɔŋ mbufo. Ami nyomke odudu, edi ndiwuri enye. Ami nyomke ukpono ererimbot, edi nyom ubɔŋ Abasi mi, ye uwɔrɔ ufin ye mfɔnɔŋkpɔ obio mi. Ndien ke ntem ami ntre ŋwed mi.