1 Ndien edikem ete ke ɔyɔhɔ isua edip ye duopenaŋ amabe efep, ye ŋko ɔyɔhɔ edip ye efit, ndien sese mme mbet Jesus ema esiak ufɔk Abasi Christ ke kpukpru mme nkanade isɔŋ. Ndien ke adaŋa nte ediwak emi ekedide etiene mmɔ, enyuŋ ekabade esit ebaŋa mme idiɔk ŋkpɔ mmɔ ke akpanikɔ, ema ena uduɔkmmɔŋ ke enyiŋ Jesus; ndien mmɔ ŋko ema ebɔ Edisana Spirit.

2 Ndien edikem ke ɔyɔhɔ isua edip ye efitekiet, kpukpru mme owo ema ekabade esit enɔ Jehovah, ke ofuri iso isɔŋ, mme Nephite ye mme Lamanite mbiba, ndien mme eneni ye mme mfaŋa ikiduhe ke otu mmɔ, ndien kpukpru owo ema enam ŋkpɔ nte enende ye kiet eken.

3 Ndien mmɔ ema eda kpukpru ŋkpɔ ukem-ukem ke otu mmɔ; ke ntak oro enyene ŋkpɔ ye ubuene ikiduhe, ifin ye eyen isɔŋ, edi ema enam kpukpru mmɔ ebɔhɔ, enyuŋ ebuana ke enɔ eke heaven.

4 Ndien edikem ete ke ɔyɔhɔ isua edip ye efiteba amabe efep ŋko, ndien emem amakaiso odu ke isɔŋ oro.

5 Ndien mme mbet Jesus ema enam akwa ye mme utibe utom, tutu ete ke mmɔ ema ekɔk mbon udɔŋɔ, enyuŋ enam mme akpa mkpa eset, enyuŋ enam mme mbuŋɔ esaŋa isaŋ, ye mme nnan ekut usuŋ, ye mme inan ekop ŋkpɔ; ndien utɔ kpukpru mme utibe ŋkpɔ ke mmɔ ekenam ke otu nditɔ owo; ndien mmɔ ikinamke utibe ŋkpɔ ndomo kiet ibɔhɔke ekedi ke enyiŋ Jesus.

6 Ndien ke ntem ke ɔyɔhɔ isua edip ye efiteta ekebe efep, ye ŋko ɔyɔhɔ isua edip ye efidenaŋ, ye aba ye kiet, ye aba ye iba, iŋ, tutu isua aba ye usukkiet ema ebe efep, ye ŋko aba ye duopekiet, ye aba ye duopeba; iŋ, ye tutu isua aba ye efitenaŋ ama ebe efep.

7 Ndien Jehovah ama anam mmɔ eforo ata eti eti ke isɔŋ oro; iŋ, tutu ete ke mmɔ ema efiak ebɔp mme obio ke ebiet emi ekefɔpde mme obio.

8 Iŋ, kpa akwa obio oro Zarahemla ke mmɔ ekenam ete efiak ebɔp.

9 Edi mme ediwak obio ema edu emi ekesipde, ndien mme mmɔŋ ema edɔk edi ke mme ebiet mmɔ; ke ntak oro owo ikikanke ifiak ibɔp mme obio oro.

10 Ndien idahaemi, sese, edikem ete ke ikɔt Nephi ema ekop odudu, enyuŋ esɔp etɔt ata eti eti, ndien ekabade eye uyai ata eti eti enyuŋ edi mbon idaresit.

11 Ndien mmɔ ema edɔ-ndɔ, enyuŋ enɔ ke ndɔ, enyuŋ ediɔŋ mmɔ nte asaŋade ye mme ediwak eŋwɔŋɔ emi Jehovah akanamde ɔnɔ mmɔ.

12 Ndien mmɔ ikisaŋake aba ke mme edinam ye mme edinam eke mbet Moses; edi mmɔ ema esaŋa ke mme ibet emi mmɔ ekebɔde eto Jehovah mmɔ ye Abasi mmɔ, ekade iso ke utre udia ye ke akam, ye ke ndisobo ɔtɔ kiet ke ini ke ini ndibɔŋ akam ye ndikop ikɔ Jehovah.

13 Ndien edikem ete ke eneni ikiduhe ke otu kpukpru mme owo, ke ofuri isɔŋ oro; edi ema enam ikpɔ utibe ŋkpɔ ke otu mme mbet Jesus.

14 Ndien edikem ete ke ɔyɔhɔ isua ata ye duopekiet ama ebe efep, ŋko ye ɔyɔhɔ isua ata ye duopeba, iŋ, ndien ke akpatre, tutu ɔyɔhɔ isua ata ye efitenaŋ ama ebe efep; iŋ, tutu isua ikie ama ebe efep, ndien mme mbet Jesus, emi enye ekemekde, kpukpru ema eka paradise Abasi, ibɔhɔke ekedi mme mbet ita oro ekenade nte esuhɔ; ndien ema enim mme mbet efen ke itie mmɔ; ndien ŋko ediwak emana oro ema ebe efep.

15 Ndien edikem ete ke eneni ikiduhe ke isɔŋ oro, ke ntak ima Abasi emi okoduŋde ke esit mme owo.

16 Ndien mme ufip, mme mme eŋwan, mme mme ndutime, mme mme use, mme mme abiaŋa, mme mme uwot-owo, mme utɔ obukpo ido ndomo kiet ikiduhe; ndien ke akpanikɔ iduhe mbon emi ekenemde esit ke otu ofuri mme owo emi ubɔk Abasi okobotde.

17 Mme inɔ, mme mme owot-owo, ŋko mme Lamanite ikiduhe, mme mme uduot owo ndomo kiet; edi mmɔ ekedi kiet, nditɔ Christ, ye mme adia-akpa ke obio ubɔŋ Abasi.

18 Ndien didie ke ekediɔŋ mmɔ! Koro Jehovah ama ɔdiɔŋ mmɔ ke kpukpru mme edinam mmɔ; iŋ, tutu ema ediɔŋ mmɔ enyuŋ eforo tutu isua ikie ye duop amabe efep; ndien akpa emana tɔŋɔ ke Christ ema ebe efep, ndien eneni ikiduhe ke ofuri isɔŋ oro.

19 Ndien edikem ete ke Nephi, enye emi ekewetde akpatre ŋwed emi, (ndien enye ekewet enye ke mme usan ŋwed emi Nephi ekewetde) ama akpa, ndien eyen esie Amos ekewet enye ke itie esie; ndien enye ekewet enye ke mme usan ŋwed emi Nephi ekewetde ŋko.

20 Ndien enye ekewet enye ke isua anaŋ ye inaŋ, ndien emem amasuk odu ke isɔŋ oro, ibɔhɔke ekedi ekpri ubak mme owo emi eketrede ndikop uyo ke ufɔk Abasi ekenyuŋ edade enyiŋ Lamanite enɔ idem mmɔ; ke ntak oro ema efiak etɔŋɔ ndinyene mme Lamanite ke isɔŋ oro.

21 Ndien edikem ete ke Amos ama akpa ŋko, (ndien ekedi isua ikie ye anaŋ ye duopenaŋ tɔŋɔ ke edidi Christ) ndien eyen esie Amos ekewet ŋwed ke itie esie; ndien enye ŋko ekewet enye ke mme usan ŋwed emi Nephi ekewetde; ndien ekewet enye ŋko ke ŋwed Nephi, emi edide ŋwed emi.

22 Ndien edikem ete ke isua ikieiba ama ebe efep; ndien ɔyɔhɔ emana iba ama ebe efep kpukpru ibɔhɔke ekedi ibat owo ifaŋ.

23 Ndien idahaemi ami, Mormon, nyom yak mbufo efiɔk ete ke mmɔ owo ema etɔt, tutu ete ke mmɔ ema esuana ke ofuri iso isɔŋ, ndien ete ke mmɔ ema enyene ŋkpɔ ata eti eti, ke ntak uforo mmɔ ke Christ.

24 Ndien idahaemi, ke isua ikiba ye kiet emi ama ɔtɔŋɔ ndidu ke otu mmɔ mbon emi ekemenede ke ntaŋidem, ke nte ndisine nsɔŋ-urua ɔfɔŋ, ye utɔ kpukpru ndiye ŋkpɔ uto, ye ndiye ŋkpɔ ererimbot.

25 Ndien tɔŋɔ ke ini oro ka iso mmɔ ikinyeneke mme ŋkpɔ mmɔ ye inyene mmɔ ukem-ukem ke otu mmɔ.

26 Ndien mmɔ etɔŋɔ ndibahade ndu ke mme ikpehe ke ikpehe; ndien mmɔ etɔŋɔ ndibɔp mme ufɔk Abasi nnɔ idem mmɔ man enyene udori enyuŋ etɔŋɔ ndikaŋ ata ufɔk Abasi Christ.

27 Ndien edikem ete ke ini isua ikieiba ye duop amakebe efep mme ediwak ufɔk Abasi ema edu ke isɔŋ oro; iŋ, ediwak ufɔk Abasi ema edu emi ekebiaŋade ete ke imifiɔk Christ, ndien edi ke mmɔ ikikaŋke ema ekaŋ akamba ubak gospel esie, tutu ete ke mmɔ ema eyak utɔ kpukpru ibak, ndien ema emene sikidide edisana enɔ enye emi ekekpande ke ntak unana edidot.

28 Ndien ufɔk Abasi emi ama ɔtɔt ata eti eti ke ntak ukwaŋ-ŋkpɔ, ye ke ntak odudu Satan emi ekenyenede ke esit mmɔ.

29 Ndien ŋko, ufɔk Abasi efen amadu emi akakaŋde Christ; ndien mmɔ ema ekɔbɔ ata ufɔk Abasi Christ, ke ntak nsuhɔde-idem mmɔ ye mbuɔtidem mmɔ ke Christ; ndien mmɔ ema esin mmɔ ke ntak mme ediwak utibe ŋkpɔ emi ekenamde ke otu mmɔ.

30 Ke ntak oro mmɔ ema enyene odudu ye unen ke idem mme mbet Jesus emi ekesuhɔde ye mmɔ, ndien mmɔ ema etop mmɔ esin ke ufɔk ŋkpɔkɔbi; edi ke odudu ikɔ Abasi, emi okodude ke mmɔ, mme ufɔk ŋkpɔkɔbi ema esiaha iba, ndien mmɔ ema eka iso ndinam ikpɔ utibe ŋkpɔ ke otu mmɔ.

31 Edi, ndien ke misehe kpukpru mme utibe ŋkpɔ emi, mbon emi ema esɔŋ esit mmɔ, enyuŋ eyom ndiwot mmɔ, kpa nte mme Jew ke Jerusalem ekeyomde ndiwot Jesus, nte ikɔ esie edide.

32 Ndien mmɔ ema esin mmɔ ke akamba ikaŋ, edi mmɔ ewɔrɔ edi idaha unan.

33 Ndien mmɔ ŋko ema etop mmɔ esin ke mme obube mme unam ikɔt, ndien mmɔ ema ebre mbre ye mme unam ikɔt kpa nte nsek eyen ebrede ye eyen-erɔŋ; ndien mmɔ ema ewɔrɔ edi ke otu mmɔ, ŋkpɔ inamke mmɔ.

34 Edi, mbon emi ema esɔŋ esit mmɔ, koro ediwak mme oku ye mme prophet abiaŋa ekeda mmɔ usuŋ ete ebɔp mme ediwak ufɔk Abasi, enyuŋ enam utɔ kpukpru ukwaŋ-ŋkpɔ. Ndien mmɔ ema emia ikɔt Jesus; edi ikɔt Jesus ikimiaha mmɔ kusiene. Ndien ke ntem ke mmɔ eketaha ke unana edinim ye ibak, ke isua ke isua, kpa tutu mme isua ikieiba ye edip ye duop ema ebe efep.

35 Ndien idahaemi edikem ke isua emi, iŋ, ke isua ikieiba ye edip ye duopekiet, ɔkpɔsɔŋ ubahade ama odu ke otu mme owo.

36 Ndien edikem ete ke isua emi ke mme owo emi ekekotde mme Nephite ema edu, ndien mmɔ ekedi mbon emi ekenimde Christ ke akpanikɔ; ndien ke otu mmɔ ema odu mbon emi ekekotde mme Lamanite—mme Jacobite, ye mme Josephite, ye mme Zoramite;

37 Ke ntak oro ekekot ata mbon emi enimde ke Christ, ye mme ata andikpono Christ, (ke otu mmɔ ekedi mme mbet Jesus ita emi akanade nte esuhɔ) mme Nephite, ye mme Jacobite, ye mme Josephite, ye mme Zoramite.

38 Ndien edikem ete ke ekekot mmɔ emi ekesinde gospel mme Lamanite, ye mme Lemuelite, ye mme Ishmaelite; ndien mmɔ ikitahake ke unana edinim, edi mmɔ ekefɔfiɔk esɔŋibuot ye gospel Christ; ndien mmɔ ema ekpep nditɔ mmɔ ete mmɔ ekubuɔtidem, kpa nte mme ete mmɔ, tɔŋɔ ke editɔŋɔ, ema etaha.

39 Ndien ekedi ke ntak ibak ye mbubiam ido mme ete mmɔ, kpa nte ekedide ke editɔŋɔ. Ndien ema ekpep mmɔ ndisua nditɔ Abasi, kpa nte ekekpepde mme Lamanite ndisua nditɔ Nephi tɔŋɔ ke editɔŋɔ.

40 Ndien edikem ete ke isua ikieiba ye aba ye inaŋ ama ebe efep, ndien ke ntem ke ekedi ye mme ŋkpɔ mbon oro. Ndien akamba ubak mme idiɔk owo ema ekop odudu, enyuŋ ekabade ewak ata eti eti ekan ikɔt Abasi.

41 Ndien mmɔ ema eka iso ndisiak mme ufɔk Abasi nnɔ idem mmɔ, nyuŋ ndian utɔ kpukpru nsɔŋ-urua ŋkpɔ ke mmɔ. Ndien ke ntem ke isua ikieiba ye aba ye duop ekebe efep, ŋko ye isua ikiba ye ata.

42 Ndien edikem ete ke ubak mme idiɔk owo ema efiak etɔŋɔ ndisiak mme ndedibe eŋwɔŋɔ ye mme ebuana Gadianton.

43 Ndien ŋko mbon emi ekekotde ikɔt Nephi ema etɔŋɔ nditaŋidem ke esit mmɔ, ke ntak ata ediwak inyene mmɔ, enyuŋ ekabade ekutidem nte nditɔ eka mmɔ, mme Lamanite.

44 Ndien tɔŋɔ ke ini emi mme mbet ema etɔŋɔ ndifuhɔ ke ntak mme idiɔk ŋkpɔ ererimbot.

45 Ndien edikem ete ke ini isua ikieita ema ekebe efep, ikɔt Nephi ye mme Lamanite ema ebakibak ata eti eti kiet nte eken.

46 Ndien edikem ete mme inɔ Gadianton ema esuana ke ofuri iso isɔŋ; ndien nnennen owo ndomo kiet ikiduhe ibɔhɔke ekedi mme mbet Jesus. Ndien gold ye silver ke mmɔ ekenim ediwak ke ufɔk ubono ŋkpɔ, enyuŋ enyam urua ye kpukpru uto ŋkpɔ urua.

47 Ndien edikem ete ke ini isua ikieita ye ition ema ekebe efep, (ndien mme owo esuk eka iso ke ibak) Amos ama akpa; ndien eyen eka esie, Ammaron, ama ewet ŋwed emi ke itie esie.

48 Ndien edikem ete ke ini isua ikieita ye edip ema ekebe efep, Ammaron, ke Edisana Spirit ekeyikde enye, ama edip ndisana ŋwed emi—iŋ, kpa kpukpru ndisana ŋwed emi ekeyakde enɔ tɔŋɔ ke emana ye emana, emi ekedide ndisana—kpa tutu isua ikita ye edip tɔŋɔ ke edidi Christ.

49 Ndien enye ama edip mmɔ ke Jehovah, man mmɔ ekpefiak edi nnɔ nsuhɔ ufɔk Jacob, nte asaŋade ye mme prophecy ye mme eŋwɔŋɔ Jehovah. Ndien ntem edi utit ŋwed Ammaron.