1 Ndien edikem ete mmɔ ema enim mbon ukpeme enɔ mbon ŋkpɔkɔbi mme Lamanite, enyuŋ enyik mmɔ ete eka enyuŋ ebuk mme okpo mmɔ, iŋ, ŋko mme okpo mme Nephite emi ekewotde; ndien Moroni enim mme owo ye mmɔ ete ekpeme mmɔ ke ini mmɔ enamde mme utom mmɔ.

2 Ndien Moroni aka obio Mulek ye Lehi, onyuŋ ada ukara obio oro ndien ayak ɔnɔ Lehi. Idahaemi sese, Lehi emi ekedi owo emi okodude ye Moroni ke mme ediwak ekɔŋ esie; ndien enye ekedi edenowo etiede nte Moroni, ndien mmɔ edaresit ke ukpeme kiet eken; iŋ, mmɔ ema ema kiet eken, ndien ŋko kpukpru ikɔt Nephi ema ema mmɔ.

3 Ndien edikem ete ke ini mme Lamanite ema ekebuk mme okpo mmɔ ema ŋko ye okpo mme Nephite, ema efiak eda mmɔ esaŋa eduk isɔŋ Bountiful; ndien Teancum, ke uyo Moroni, ama anam ete mmɔ etɔŋɔ utom ke ndidɔk obube nkanade isɔŋ, mme obio, Bountiful.

4 Ndien enye ama anam ete ebɔp ɔkɔ ke mme eto ubɔp-ufɔk ke esit ebono obube oro; ndien mmɔ etop ntan esio ke obube oro ebon ke ɔkɔ mme eto oro; ndien ke ntem mmɔ ema enam mme Lamanite enam utom tutu mmɔ ema ekanade obio Bountiful ekuk ye ɔkpɔsɔŋ ibibene mme eto ye ntan, emi okoŋde ata eti eti.

5 Ndien obio emi ama akabade edi ata ebiet ɔkpɔsɔŋ ukpeme tɔŋɔ ke ini oro; ndien ke obio emi ke mmɔ ekekpeme mbon ŋkpɔkɔbi mme Lamanite; iŋ, kpa ke esit ɔkɔ emi mmɔ ekenamde mmɔ ebɔp ye ubɔk mmɔ. Idahaemi ema enyik Moroni ete anam mme Lamanite enam utom, koro ama edi mmemm mmem ndikpeme mmɔ ke ini mmɔ enamde utom; ndien enye ama oyom ete kpukpru mbon ekɔŋ esie ke ini enye aŋwanade ekɔŋ ye mme Lamanite.

6 Ndien edikem ete Moroni ama enyene edikan ke mbon ekɔŋ mme Lamanite kiet emi okokponde akan, onyuŋ ada obio Mulek enyene, emi ekedide ebiet ukpeme mme Lamanite kiet emi ɔkɔsɔŋde akan ke isɔŋ Nephi; ndien ke ntem enye ŋko ama ɔbɔp ebiet ukpeme ndinim mbon ŋkpɔkɔbi esie.

7 Ndien edikem ete ke enye ikidomoke ndiŋwana ekɔŋ aba ye mme Lamanite ke isua oro, edi enye ama ada ikɔt esie ebeŋe idem enɔ ekɔŋ, iŋ, ye ke ndinam mme ebiet ukpeme man ekpeme ebaŋa mme Lamanite, iŋ, ndien ŋko ke ndinyaŋa iban mmɔ ye nditɔ mmɔ nsio ke akaŋ ye ukut, ye ndinɔ mbon ekɔŋ mmɔ udia.

8 Ndien edikem ete mbon ekɔŋ mme Lamanite, ke edem usop utin inyaŋ, ke usuk usuk, ke ini Moroni mikiduhe oto ke ntak ekpri ŋkari ke otu mme Nephite, emi akanamde ɔkpɔsɔŋ eneni odu ke otu mmɔ, ema enyene ekpri odudu ekan mme Nephite, iŋ, tutu ete mmɔ ema eda usuk obio mmɔ enyene ke nkaŋ isɔŋ oro.

9 Ndien ke ntem ke ntak ukwaŋ-ŋkpɔ ke otu mmɔ, iŋ, ke ntak ɔkpɔsɔŋ eneni ye ŋkari ke otu mmɔ mmɔ ema enim idem mmɔ ke mme idaha emi ɔkɔdiɔkde akan.

10 Ndien idahaemi sese, ami menyene ekpri ŋkpɔ nditiŋ kabaŋa ikɔt Ammon, emi, ke ntɔŋɔ, ekedide mme Lamanite; edi oto ke Ammon ye nditɔ eka esie, mme midighe oto ke odudu ye ikɔ Abasi, mmɔ ema ekabade esit enɔ Jehovah; ndien ema eda mmɔ esuhɔde edi isɔŋ Zarahemla, ndien tɔŋɔ ke ini oro mme Nephite ema ekpeme mmɔ.

11 Ndien ke ntak uŋwɔŋɔ mmɔ mmɔ ema etre ndimem mme ŋkpɔ ekɔŋ mbaŋa nditɔ eka mmɔ; koro mmɔ ema eda uŋwɔŋɔ ete ke mmɔ ididuɔkke iyip aba; ndien nte uŋwɔŋɔ mmɔ edide mmɔ ekpekekpa; iŋ, mmɔ ekpeyak idem mmɔ eduɔ eduk ke ubɔk nditɔ eka mmɔ, ekpedi ikidighe mbɔm ye ata ima emi Ammon ye nditɔ eka esie ekenyede enɔ mmɔ.

12 Ndien ke ntak emi ema eda mmɔ esuhɔde edi isɔŋ Zarahemla; ndien mme Nephite ema ekpeme mmɔ kpukpru ini.

13 Edi edikem ete ke ini mmɔ ekutde mfina oro, ye mme uwak ukut ye mme afanikɔŋ emi mme Nephi ekeyɔde enɔ mmɔ, mmɔ ema enyene mbɔm ndien eyom nditaŋ mme ŋkpɔ ekɔŋ ke ukpeme obio mmɔ.

14 Edi sese, nte mmɔ ekeyomde nditaŋ mme ŋkpɔ ekɔŋ mmɔ, Helaman ye nditɔ eka esie ema ekan mmɔ ubɔk ye mme mbukpek, koro mmɔ ekeyom ndibiat uŋwɔŋɔ emi mmɔ ekenamde.

15 Ndien Helaman ekefehe ndik man ke ndinam ntre mmɔ ekeme ndinana ukpɔŋ mmɔ; ke ntak oro ema enyik kpukpru mbon emi ekedukde ke ediomi emi ete ese nditɔ eka mmɔ nte esaŋade ebe ke mme ukut emi, ke idiɔk idaha mmɔ ke ini emi.

16 Edi sese, edikem ete mmɔ ema enyene uwak nditɔ iden, emi mikidukke ke ediomi ete ke mmɔ iditaŋke mme ŋkpɔ ekɔŋ mmɔ ndikpeme idem mmɔ kabaŋa mme asua mmɔ; ke ntak oro mmɔ ema esobo idem mmɔ ɔtɔ kiet ke ini emi, ke kpukpru nte ekekemede nditaŋ mme ŋkpɔ ekɔŋ mmɔ, ndien mmɔ ekekot idem mmɔ mme Nephite.

17 Ndien mmɔ ema eduk ke ediomi ndiŋwana nnɔ uwɔrɔ ufin mme Nephite, iŋ, ndikpeme isɔŋ oro tutu esim ndiyak uwem mmɔ; iŋ, tutu mmɔ ema ediomi ete ke mmɔ idisanake uwɔrɔ ufin mmɔ iyak, edi ke mmɔ eyeŋwana ke ofuri ini ndikpeme mme Nephite ye idem mmɔ ke abaŋa ufin.

18 Idahaemi sese, mkparawa oro ekedi tɔsin iba, emi ekedukde ke ediomi emi ndien etaŋ mme ŋkpɔ ekɔŋ mmɔ ndikpeme obio mmɔ.

19 Ndien idahaemi sese, nte mmɔ tutu idahaemi mikidakke ida ke usuŋ mme Nephite, mmɔ ekabade idahaemi ke ini emi ŋko edi akamba uŋwam; koro mmɔ ema etaŋ mme ŋkpɔ ekɔŋ mmɔ, ndien mmɔ eyom ete Helaman edi ada usuŋ mmɔ.

20 Ndien kpukpru mmɔ ekedi mkparawa, ndien mmɔ ema eyɔhɔ eti eti ke uko, ndien ŋko ye odudu ye ifik unam ŋkpɔ; edi sese, emi ikidighe kpukpru—mmɔ ekedi mme idenowo emi ekenamde akpanikɔ kpukpru ini ke ŋkpɔ ekededi emi ekedɔŋde mmɔ.

21 Iŋ, mmɔ ekedi mme idenowo akpanikɔ ye uteŋe, koro ema ekpep mmɔ ndinim mme ibet Abasi ye ndisaŋa nnen nnen ke iso esie.

22 Ndien idahaemi edikem ete Helaman ama ada ke ibuot tɔsin iba mkparawa ekɔŋ esie, ndiŋwam mme owo ke mme adaŋa isɔŋ oro ke usuk usuk ke edem usop utin inyaŋ.

23 Ndien ke ntem ke ɔyɔhɔ isua ukara edip ye itiaita mme ebiere ikpe nnɔ ikɔt Nephi eketre.