1 Ndien idahaemi, eyen mi, ami mekere ke odu ekpri ŋkpɔ efen emi afinade esit fo, emi miŋwaŋake fi—emi abaŋade nnen nnen ido Abasi ke ndimia anam idiɔk ŋkpɔ ufen; koro afo aŋwana ndikere ete ke idighe nnen nnen ete ke akpana esin anam idiɔk ŋkpɔ ke idaha ukut.

2 Idahaemi sese, eyen mi, ami nyenam ŋkpɔ emi aŋwaŋa fi. Koro sese, ke ini Jehovah Abasi ama ekebin akpa ete ye eka nnyin osio ke iŋwaŋ Eden, ete ekefuŋ isɔŋ, emi mmɔ eketode—iŋ, enye osio enye, onyuŋ enim ke utit edem usiaha utin iŋwaŋ Eden, cherubim, ye emineŋmineŋ akaŋkaŋ ikaŋ emi ɔŋwɔŋɔre ke kpukpru ŋkaŋ, ete ekpeme eto uwem—

3 Idahaemi, nnyin imikut ite ke owo ama akabade etie nte Abasi, ɔfiɔk eti ye idiɔk; ndien mbak enye idinyan ubɔk esie, iyuŋ ida ito eto uwem ŋko, iyuŋ idia iyuŋ idu uwem ke nsinsi, Jehovah Abasi enim cherubim ye emineŋmineŋ akaŋkaŋ ikaŋ, man enye ukudia mfri oro—

4 Ke emi nnyin ikut, ite ke ama odu ini emi ekenɔde owo ete akabade esit, iŋ, ini idomo, ini ndikabade esit nyuŋ nnam utom nnɔ Abasi.

5 Koro sese, edieke Adam ekpeke anyande ubɔk esie ndondo oro, onyuŋ adia oto eto uwem oro, enye ekpekedu uwem ke nsinsi, nte asaŋade ye ikɔ Abasi, inyeneke ufaŋ inɔ edikabade esit; iŋ, ndien ŋko ikɔ Abasi ekpekedi ukpɔk, ndien akwa uduak edinyaŋa ekpa biara.

6 Edi sese, ema enim ete owo akpa—ke ntak oro, nte ekesibede mmɔ esio ekpɔŋ eto uwem ana nte esibe mmɔ esio ke iso isɔŋ—ndien owo akabade osop ke nsinsi, iŋ, mmɔ ekabade edi owo iduɔ.

7 Ndien idahaemi, afo omokut ete ke ema esibe akpa ete ye eka nnyin esio ke iso Jehovah ke obukidem ye ke spirit; ndien ke emi nnyin ikut ite ke mmɔ edu ke idak ndinam uduak mmɔ.

8 Idahaemi sese, ikifɔnke ite efak owo esio ke mkpa emi edibede ifep emi, koro emi ayabiat akwa uduak inemesit.

9 Ke ntak oro, nte ukpɔŋ mikemeke ndikpa, ndien iduɔ ama ada mkpa eke spirit ɔsɔk kpukpru owo kpa ye emi edibede ifep, oro edi, ke ema esibe mmɔ esio ke iso Jehovah, ama ɔfɔn ete efak mme owo esio ke mkpa eke spirit.

10 Ke ntak oro, nte mmɔ ekekabade edi obukidem, eke obukidem, ye se idiɔkde, ke edimehe, idaha idomo emi akabade edi idaha ɔnɔ mmɔ ndibeŋe idem; enye akabade edi idaha mbeŋe-idem.

11 Ndien idahaemi ti, eyen mi, ekpedi ikidighe uduak edifak, (ke ekpesiode enye efep) mmɔ ndikpakpa ukpɔŋ mmɔ ebɔ ukut, ke esibede mmɔ esio ke iso Jehovah.

12 Ndien idahaemi, usuŋ ikiduhe ndifak mme owo ke idaha iduɔ emi, emi owo akadade ɔnɔ idem esie ke ntak nsɔŋibuot esie;

13 Ke ntak oro, nte edide nnen nnen, uduak edifak ikpiduhe, ibɔhɔke ɔkɔŋɔ ke edikabade esit mme owo ke idaha idomo emi, iŋ, idaha mbeŋe-idem emi; koro ibɔhɔke ke ɔkɔŋɔ ke mme ŋkpɔ emi, mbɔm ikpiduhe ibɔhɔke enye abiat utom nnen nnen ido. Idahaemi utom nnen nnen ido ikpikemeke ndibiara; edieke edide ntre, Abasi ekpetre ndidi Abasi.

14 Ndien ke emi nnyin ikut ite ke kpukpru owo ema eduɔ, ndien mmɔ ekedu ke idak ukara nnen nnen ido; iŋ, nnen nnen ido Abasi, emi ekesinde ete esibe mmɔ esio ke iso esie ke nsinsi.

15 Ndien idahaemi, uduak mbɔm ikpikemeke nditibe ibɔhɔke enam usio-isop; ke ntak oro Abasi ke idem esie afak mme idiɔk ŋkpɔ ererimbot, man ada uduak mbɔm edi, ndikem ke se nnen nnen ido oyomde, man Abasi edi emi ɔfɔnde ama, edinen Abasi, ye enyene mbɔm Abasi ŋko.

16 Idahaemi, edikabade esit ikiduhe inɔ mme owo ibɔhɔke ufen odu, emi ŋko ekedide nsinsi nte uwem ukpɔŋ ekpedide, emi misaŋake ye uduak inemesit emi ekenimde, emi ekedide nsinsi ŋko nte uwem ukpɔŋ.

17 Idahaemi, didie ke owo ekeme ndikabade esit ibɔhɔke enye anam idiɔk ŋkpɔ? Didie ke enye akpanam idiɔk ŋkpɔ edieke mbet miduhe? Mbet anam didie odu ibɔhɔke ufen odu?

18 Idahaemi, ema enim ufen, ndien ema enɔ edinen mbet, emi ekadade esit ŋkpɔfiɔk ɔnɔ owo.

19 Idahaemi, edieke mbet mikiduhe—edieke owo owotde owo ana enye akpa—ndi enye ekpefehe ndik ke enye eyekpa edieke enye owotde owo?

20 Ndien ŋko, edieke mbet mikiduhe ibaŋa idiɔk ŋkpɔ mme owo ikpifeheke ndik ndinam idiɔk ŋkpɔ.

21 Ndien edieke mbet mikiduhe, edieke mme owo ekenamde idiɔk ŋkpɔ nso ke nnen nnen ido akpanam, mme mbɔm ŋko, koro mmɔ ikpinyeneke unen ke idem owo?

22 Edi odu mbet emi enɔde, ye ufen emi enimde, ye edikabade esit emi enɔde; edikabade esit emi, mbɔm adade; midighe ntre, nnen nnen ido ada owo oro onyuŋ anam mbet, ndien mbet amia ufen; midighe ntre, ekpebiat mme utom nnen nnen ido, ndien Abasi ekpetre ndidi Abasi.

23 Edi Abasi itreke ndidi Abasi, ndien mbɔm ada atua ŋkpɔfiɔk, ndien mbɔm odu ke ntak usio-isop; ndien usio-isop anam eriset ke mkpa eke mkpa etibe; ndien eriset ke mkpa eke mkpa ada mme owo afiak edi iso Abasi; ke emi ke edi ke efiak enim mmɔ ke itie ke iso esie, man edikpe ikpe nte mme utom mmɔ edide, nte mbet ye nnen nnen ido edide.

24 Koro sese, nnen nnen ido anam kpukpru se enye oyomde, ndien ŋko mbɔm oyom kpukpru sidide esie; ndien ke ntem,owo ndomo kiet ibɔhɔke enye emi atuade ŋkpɔfiɔk ke akpanikɔ ke enyaŋa.

25 Nso, ndi afo ekere ete ke mbɔm ekeme ndituk nnen nnen ido? Ami ndɔhɔ fi, Iŋ iŋ; idighe ke ŋkpɔ ndomo kiet. Edieke edide ntre, Abasi ekpetre ndidi Abasi.

26 Ndien ke ntem ke Abasi anam akwa ye mme nsinsi uduak esie, emi ekenimde tɔŋɔ ke eritɔŋɔ ererimbot. Ndien ke ntem ke edinyaŋa ye edifak etibe ɔnɔ mme owo, ŋko ye nsobo ye ukut mmɔ.

27 Ke ntak oro, O eyen mi, owo eke oyomde ndidi yak edi onyuŋ ɔŋwɔŋ mme mmɔŋ uwem nte amama; ndien owo eke miyomke ndidi ukem oro ke Abasi minyikke ete edi; edi ke akpatre usen eyefiak enim ke itie enɔ enye nte asaŋade ye mme utom esie.

28 Edieke enye enyenede udɔŋ ndinam idiɔk, ndien ikabakede esit ke eyo esie, sese, eyenam idiɔk enɔ enye, nte ndifiak nnim ke itie Abasi edide.

29 Ndien idahaemi, eyen mi, ami nyom nte yak afo ukuyak mme ŋkpɔ emi afina fi aba, ndien yak mme idiɔk ŋkpɔ fo ikpɔŋ afina fi, ye mfina oro emi edidade fi isuhɔde idi inɔ edikabade esit.

30 O eyen mi, ami nyom nte yak afo ukukaŋ nnen nnen ido Abasi aba. Kuyom ndisio idem fo mfep ke ŋkpɔ ndomo kiet ke ntak mme idiɔk ŋkpɔ fo, ke ndikaŋ nnen nnen ido Abasi; edi yak nnen nnen ido Abasi, ye mbɔm esie, ye anyan ime esie enyene ofuri ufaŋ ke esit fo; ndien yak enye ada fi ɔsuhɔde edi ntan ke nsuhɔde-idem.

31 Ndien idahaemi, O eyen mi, Abasi okot fi ete ɔkwɔrɔ ikɔ ɔnɔ mbon emi. Ndien idahaemi, eyen mi, ka usuŋ fo, kwɔrɔ ikɔ ye akpanikɔ ye uteŋe, man afo ada mme ukpɔŋ ɔnɔ edikabade esit, man akwa uduak mbɔm enyene unen ke idem mmɔ. Ndien yak Abasi ɔnɔ fi nte mme ikɔ mi edide. Amen.