1 Ndien idahaemi, eyen mi, ami menyene esisit nditiŋ kabaŋa eriset ke mkpa emi etiŋde mi; koro sese, usuk eyurɔde mme ŋwed Abasi, ndien ewɔrɔ ekpɔŋ usuŋ ke ntak ŋkpɔ emi. Ndien ami nkere nte ke afina fi ke esit ŋko kabaŋa ŋkpɔ emi. Edi sese, ami nyanam aŋwaŋa fi.

2 Ami ndɔhɔ fi, eyen mi, nte ke uduak edifak edi akpan akpan ɔnɔ nnen nnen ido Abasi; koro edi akpan ŋkpɔ ete efiak enim kpukpru ŋkpɔ ke itie ata idaha mmɔ. Sese, edi akpan ŋkpɔ ye nnen nnen, nte asaŋade ye odudu ye eriset ke mkpa Christ, ete ke ana efiak enim ukpɔŋ owo ke itie idem esie, ndien ete ke ana efiak enim kpukpru ubak idem ke itie esie.

3 Ndien edi akpan ŋkpɔ ɔnɔ nnen nnen ido Abasi ete edikpe ikpe enɔ mme owo nte mme utom mmɔ edide; ndien edieke mme utom mmɔ ekefɔnde ke uwem emi, ndien mme uduak esit mmɔ ema efɔn, ete ke ana mmɔ ŋko, ke akpatre usen, efiak enim ke itie emi ɔfɔnde.

4 Ndien edieke mme utom mmɔ edide idiɔk eyefiak enim mmɔ ke itie enɔ idiɔk. Ke ntak oro, eyefiak enim kpukpru ŋkpɔ ke ata idaha mmɔ, kpukpru ŋkpɔ ke itie esie nte obot edide—edemede emi enyenede ndikpa enim ke uwem emi mkpa miduhe, mbiara ke emi mikemeke ndibiara—edemede enim ke anana utit inemesit man enyene obio ubɔŋ Abasi, mme ke anana utit ukut man enyene obio ubɔŋ satan, kiet ke ubɔk kiet, enye oko ke oko—

5 Kiet edemede enim ke inemesit nte mme udɔŋ inemesit esie edide, mme eti nte mme udɔŋ eti esie edide; ndien enye oko ke idiɔk nte mme udɔŋ idiɔk esie edide; koro nte enye ekenyenede udɔŋ ndinam idiɔk ke ofuri usen kpa ntre ke enye edinyene utip idiɔk esie ke ini okoneyo edide.

6 Ndien ntre ke edi ke ubɔk enye oko. Edieke enye akakabade esit ke mme idiɔk ŋkpɔ esie, ndien oyom nnen nnen ido tutu utit uwem esie, kpa ntre eyenɔ enye utip nnen nnen ido.

7 Emi edi mmɔ emi Jehovah afakde; iŋ, emi edi mmɔ emi etaŋde esio, emi enamde ebɔhɔ ke anana utit okoneyo ekim oro; ndien ke ntre mmɔ eda mme eduɔ; koro sese, mmɔ edi mme ebiere ikpe idem mmɔ, mme ndinam eti mme ndinam idiɔk.

8 Idahaemi, mme ewuhɔ Abasi ikpuhɔke; ke ntak oro, enim usuŋ ete owo ekededi emi oyomde ayasaŋa ke enye onyuŋ ɔbɔ edinyaŋa.

9 Ndien idahaemi sese, eyen mi, kusin itɔŋ unam ndudue ndomo kiet efen ye Abasi fo kabaŋa mme itie ke ukpep-ŋkpɔ oro, emi afo ekesinde itɔŋ anam idiɔk ŋkpɔ.

10 Kukere, ke ntak emi etiŋde ebaŋa ndifiak nnim ke itie, ete ke eyesio fi ke idiɔk ŋkpɔ efiak enim ke itie inemesit. Sese, ami ndɔhɔ fi, ke akananam ibak ikidighe inemesit.

11 Ndien idahaemi, eyen mi, kpukpru owo emi edude ke idaha nte obot edide, mme mkpedɔhɔ ke obukidem, edu ke ata idot-idot ye ke mme uruk ukwaŋ-ŋkpɔ; mmɔ inyeneke Abasi ke ererimbot emi, ndien mmɔ ewɔrɔ ekpɔŋ obot Abasi; ke ntak oro, mmɔ edu ke idaha emi misaŋake ye obot inemesit.

12 Ndien idahaemi sese, ndi edi se ikɔ emi fiak nim ke itie ndida ŋkpɔ ke idaha nte obot edide nyuŋ nnim enye ke idaha emi midighe nte obot edide ɔwɔrɔde, mme ndinim enye ke idada emi misaŋake ye obot esie?

13 O, eyen mi, emi idighe ntre, edi ikɔ emi fiak nim ke itie ɔwɔrɔ ndifiak nda idiɔk nnɔ idiɔk, mme obukidem nnɔ obukidem, mme se idiɔkde nnɔ se idiɔkde—eti nnɔ emi edide eti; nnen nnen nnɔ emi edide nnen nnen; edinen nnɔ emi edide edinen; ndinyene mbɔm nnɔ emi enyenede mbɔm.

14 Ke ntak oro, eyen mi, kut ete ke emenyene mbɔm abaŋa nditɔ eka fo; nam ŋkpɔ nte enende, biere ikpe ke nnen nnen, nyuŋ nam eti kpukpru ini; ndien edieke afo anamde kpukpru mme ŋkpɔ emi ke ini oro ke afo edibɔ utip fo; iŋ, eyefiak enim mbɔm ke itie enɔ fi; eyefiak enim nnen nnen ke itie enɔ fi; eyefiak enim nnen nnen ubiere ikpe ke itie enɔ fi; ndien eyefiak enɔ fi eti utip.

15 Koro se afo anamde eyefiak ɔnyɔŋ etiene fi, ndien efiak enim ke itie; ke ntak oro, ikɔ emi fiak nim ke itie etim etip anam idiɔk ŋkpɔ ikpe, ndien itebeke enye ikpe ke baba usuŋ ndomo kiet.