1 Ndien idahaemi edikem ke ntɔŋɔ ɔyɔhɔ isua edip ye ition mme ebiere ikpe nnɔ ikɔt Nephi, ke mmɔ ema ekesiak emem ke ufɔt ikɔt Lehi ye Morianton kabaŋa mme isɔŋ mmɔ, ndien ke ema ketɔŋɔ ɔyɔhɔ isua edip ye ition ke emem;

2 Edi, mmɔ ikinyeneke ata emem ibighi ke isɔŋ oro, koro eneni ama ɔtɔŋɔ ndidu ke otu mme owo kabaŋa ada ibuot mme ebiere ikpe Pahoran; koro sese, mme ubak owo ema edu emi ekeyomde ete ke ana nte ekpuhɔ mme ŋkpɔ ifaŋ ke mbet.

3 Edi sese, Pahoran ikimaha ndikpuhɔ mme ndiyak ete ekpuhɔ mbet, ke ntak oro, enye ikikpaŋke utɔŋ inɔ mbon emi ekenɔde uyo mmɔ ye ebeŋe mmɔ kabaŋa ndikpuhɔ mbet.

4 Ke ntak oro, mbon emi ekeyomde ete ekpuhɔ mbet ema eyatesit ye enye, enyuŋ eyom ete enye okudi aba ada ibuot mme ebiere ikpe ke isɔŋ oro; ke ntak oro ɔkpɔsɔŋ eneni ama odu kabaŋa ŋkpɔ oro, edi ikidighe eke uduɔk iyip.

5 Ndien edikem ete ke ekekot mbon emi ekeyomde ete edorode Pahoran ke itie ikpe mbon edidem, koro mmɔ ekeyom ete ekpuhɔ mbet ke usuŋ emi edidorode ukara uwɔrɔ ufin ifep ndien enim edidem ke isɔŋ oro.

6 Ndien mbon emi ekeyomde ete Pahoran ɔsuhɔ nte ada ibuot mme ebiere ikpe ke isɔŋ oro eda mbon uwɔrɔ ufin nte enyiŋ enɔ idem mmɔ; ndien emi ekedi ubahade emi okodude ke otu mmɔ, koro mbon uwɔrɔ ufin emi ema etomo mme ediomi ndikpeme unen mmɔ ye odudu edu ukpono mmɔ ke ukara uwɔrɔ ufin.

7 Ndien edikem ete ke ekebiere ŋkpɔ eneni mmɔ emi ke uyo mme owo. Ndien edikem ete ke uyo mme owo ekeda enɔ mbon uwɔrɔ ufin, ndien Pahoran ama aka iso enyene itie ikpe, emi akanamde ɔkpɔsɔŋ idaresit odu ke otu nditɔ eka Pahoran ye ata ediwak mbon uwɔrɔ ufin, emi ŋko akanamde mbon edidem edop uyo, man mmɔ ekufaŋa edi enyime ndikpeme ntak uwɔrɔ ufin.

8 Idahaemi mbon emi ekemade ndidem ekedi mbon inyene, ndien mmɔ ekeyom ndidi ndidem; ndien mbon emi ekeyomde odudu ye unen mbaŋa mme owo ema eda ye mmɔ.

9 Edi sese, emi ekedi ɔkpɔsɔŋ ini ɔnɔ utɔ mme eneni emi ndidu ke otu ikɔt Nephi; koro sese, Amalickiah amafiak edemede esit mme Lamanite abaŋa mme Nephite, ndien enye kobok mbon ekɔŋ oto ke ofuri ŋkaŋ ke isɔŋ esie, ndien kɔnɔ mmɔ mme ŋkpɔ ekɔŋ, onyuŋ ebeŋe idem ɔnɔ ekɔŋ ye ofuri isin-ifik; koro enye ama otomo ndiŋwɔŋ iyip Moroni.

10 Edi sese, nnyin iyikut ite ke eŋwɔŋɔ emi enye akanamde ekedi ke mbumede; edi enye ama ebeŋe idem esie ye mbon ekɔŋ esie ndiŋwana ekɔŋ ye mme Nephite.

11 Idahaemi mbon ekɔŋ esie ikiwakke nte ekesidide, ke ntak uwak mme tɔsin emi ekewotde ke ubɔk mme Nephite; edi ke misehe akwa ntak urua mmɔ, Amalickiah ama obok ɔtɔ kiet utibe akwa mbon ekɔŋ, tutu ete ke enye ikifeheke ndisuhɔde isɔŋ Zarahemla.

12 Iŋ, kpa Amalickiah ke idem esie ama ɔsuhɔde edi, ke ibuot mme Lamanite. Ndien ekedi ke ɔyɔhɔ isua ukara edip ye ition mme ebiere ikpe; ndien ekedi kpa ke ukem ini oro ke mmɔ eketɔŋɔ ndinam emem mbaŋa mme eneni mmɔ kabaŋa ada ibuot mme ebiere ikpe, Pahoran.

13 Ndien edikem ete ke ini mme owo emi ekekotde mbon edidem ema ekekop ete ke mme Lamanite ke edi ndiŋwana ekɔŋ ye mmɔ, mmɔ ema edara ke esit mmɔ; ndien mmɔ esin ndiŋwana, koro mmɔ ema eyatesit eti eti ye ada ibuot mme ebiere ikpe, ŋko ye mbon uwɔrɔ ufin, tutu mmɔ esin ndiŋwana man ekpeme obio mmɔ.

14 Ndien edikem ete ke ini Moroni okokutde emi, ndien ŋko okut ete ke mme Lamanite ke edi ndiduk mme adaŋa isɔŋ, enye ama ayaresit ata eti eti ke ntak nsɔŋibuɔt mbon oro emi enye ekesinde ifik anam utom nditim nnim; iŋ, enye ama ayatesit ata eti eti; ukpɔŋ esie ɔkɔyɔhɔ ye iyatesit abaŋa mmɔ.

15 Ndien edikem ete enye ɔnɔ ŋwed, ye uyo mme owo, esɔk andikara isɔŋ oro, oyom ete enye okot enye, onyuŋ ɔnɔ enye (Moroni) odudu ndinyik mbon emi ekefehede ewɔrɔ ekpɔŋ ete ekpeme obio mmɔ mme ewot mmɔ.

16 Koro ekedi akpa mbubehe esie nditre mme utɔ eneni oro ye mme ɔkpɔsɔŋ mfaŋa ke otu mme owo; koro sese, emi amadedi ntak eke ofuri nsobo mmɔ. Ndien edikem ete ema enyime asaŋa nte uyo mme owo edide.

17 Ndien edikem ete Moroni ɔnɔ mbon ekɔŋ esie uyo ete yak eka eŋwan ye mbon edidem oro, man ewot ntaŋidem mmɔ ye nkutidem mmɔ enyuŋ ewuri mmɔ enim ke isɔŋ, midighe mmɔ etaŋ mme ŋkpɔ ekɔŋ enyuŋ eda ye edumbet uwɔrɔ ufin.

18 Ndien edikem ete mbon ekɔŋ ema eka eŋwan ye mmɔ; ndien mmɔ ema ewot ntaŋidem mmɔ ye nkutidem mmɔ, tutu ete nte mmɔ eketaŋde mme ŋkpɔ ekɔŋ mmɔ ndiŋwana ye mbon Moroni ema ekpi enyuŋ ewurimmɔ enim ke isɔŋ.

19 Ndien edikem ete ke edi mbon emi ekefehede ewɔrɔ ekpɔŋ tɔsin inan ke ekewot ke akaŋkaŋ; ndien ema emum mme ada usuŋ mmɔ emi owo mikiwotke ke ekɔŋ enyuŋ esin ke ufɔk ŋkpɔkɔbi, koro ufaŋ ikiduhe ndikpe ikpe mmɔ ke ini emi.

20 Ndien nyɔhɔ nsuhɔ mbon emi ekefehede ewɔrɔ ekpɔŋ oro, utu ke ekpi mmɔ ke akaŋkaŋ, enyime enɔ banner ubɔhɔ, ndien enyik mmɔ ete emenede banner ubɔhɔ ke mme tower mmɔ, ye ke mme obio mmɔ, ye nditaŋ mme ŋkpɔ ekɔŋ man ekpeme obio mmɔ.

21 Ndien ke ntem Moroni etre mbon edidem oro, tutu ete ke owo ikifiɔkke owo ndomo kiet ke enyiŋ mbon edidem; ndien ke ntem enye etre nsɔŋibuot ye ntaŋidem mbon emi ekesede idem mmɔ ye iyip mbon inyene; edi ema esuhɔde mmɔ enim ndisuhɔde idem mmɔ nte nditɔ eka mmɔ, ye ndiŋwana uko uko nnɔ ndiwɔrɔ ke ufin mmɔ.

22 Sese, edikem ete ke ini Moroni ke ntem okosuk etrede mme ekɔŋ ye mme eneni ke otu ikɔt esie, onyuŋ ɔnɔde mmɔ emem ye ntatenyin, onyuŋ anamde mme mbet ndibeŋe idem nnɔ ekɔŋ ye mme Lamanite, sese, mme Lamanite ema ediduk isɔŋ Moroni, emi okodude ke mme adaŋa mben inyaŋ.

23 Ndien edikem ete mme Nephite ikisɔŋke idem ikem ke obio Moroni; ke ntak oro Amalickiah ama ebin mmɔ afiak edem, owot ediwak mmɔ. Ndien edikem ete Amalickiah ada obio oro enyene, iŋ, enyene kpukpru mme ebiet ukpeme mmɔ.

24 Ndien mbon emi ekefehede ewɔrɔ ke isɔŋ Moroni edi obio Nephihah; ndien ŋko mbon obio Lehi esobo idem mmɔ ɔtɔ kiet, enyuŋ enam mbeŋidem ndien ema ebeŋe idem ndisobo ye mme Lamanite ke ekɔŋ.

25 Edi edikem ete Amalickiah ikiyakke mme Lamanite eka ekɔŋ ye obio Nephihah, edi enim mmɔ ke mben inyaŋ, ɔkpɔŋ mme owo ke kpukpru obio ndise nyuŋ mkpeme enye.

26 Ndien ke ntem enye aka iso, ada uwak mme obio enyene, obio Nephihah, ye obio Lehi, ye obio Morianton, ye obio Omner, ye obio Gid, ye obio Mulek, kpukpru emi ekedude ke edem usiaha utin eke mme adaŋa ke mben inyaŋ.

27 Ndien ke ntem ke mme Lamanite ekenyene, ke ŋkari Amalickiah, ata uwak obio, ke anana ibat udim mmɔ, kpukpru emi ekesɔŋɔde eti eti ke ukem usuŋ nte mme nsɔŋɔ Moroni; kpukpru emi ekenɔde mme Lamanite mme mkpɔsɔŋ ebiet ukpeme.

28 Ndien edikem ete mmɔ esaŋa eka mme adaŋa isɔŋ Bountiful, ebin mme Nephite enɔ iso enyuŋ ewot ediwak mmɔ.

29 Edi edikem ete Teancum ama osobo ye mmɔ, emi okowotde Morianton onyuŋ ebemde ikɔt esie iso ke itɔk esie.

30 Ndien edikem ete enye ebem Amalickiah iso ŋko, nte enye asaŋade ye uwak mbon ekɔŋ esie man enye ada isɔŋ Bountiful enyene, ŋko ye isɔŋ ke edem edere.

31 Edi sese enye ama akpa mfuhɔ ke Teancum ye ikɔt esie ndibin enye mfiak edem, koro mmɔ ekedi ikpɔ mbon ekɔŋ; koro kpukpru mbon Teancum ema ekan mme Lamanite ke odudu mmɔ ye ke ifiɔk ekɔŋ, tutu ete ke mmɔ ema efɔn ekan mme Lamanite.

32 Ndien edikem ete ke mmɔ ema efina mmɔ, tutu ete mmɔ ema ewot mmɔ kpa tutu eyo okut. Ndien edikem ete Teancum ye ikɔt esie ema ewuk mme tent mmɔ ke mme adaŋa isɔŋ Bountiful; ndien Amalickiah ama owuk mme tent esie ke mme adaŋa esuk ke mben inyaŋ, ndien ke utɔ usuŋ emi ke ekebin mmɔ.

33 Ndien edikem ete ke ini eyo okokutde, Teancum ye eyen ufɔk esie enyɔni enyuŋ ewɔrɔ ke okoneyo, enyuŋ eka ke nna-ekɔŋ Amalickiah; ndien sese, idap ama akan mmɔ ke ntak ɔkpɔsɔŋ mmem-idem mmɔ, emi okotode mme utom ye ufiop usen.

34 Ndien edikem ete Teancum ɔnyɔni ke ndibe oduk ke tent edidem, onyuŋ ekim esit esie ye eduat; ndien emi ama anam edidem akpa ke ndondo oro ndien enye ikidemekede nditɔ ufɔk esie.

35 Ndien enye afiak ɔnyɔŋ ke ndibe aka nna-ekɔŋ esie, ndien sese, ikɔt esie ekede idap, ndien enye edemede mmɔ onyuŋ ɔdɔhɔ mmɔ kpukpru mme ŋkpɔ emi enye akanamde.

36 Ndien enye anam ete mbon ekɔŋ esie eda ke mbeŋidem, mbak ekpedi ke mme Lamanite ema edemede enyuŋ edi eŋwan ye mmɔ.

37 Ndien ke ntem ke ɔyɔhɔ isua ukara edip ye ition mme ebiere ikpe nnɔ ikɔt Nephi eketre; ndien ke ntem ke eyo uwem Amalickiah eketre.