1 Ndien idahaemi edikem ke ɔyɔhɔ ɔfiɔŋ duopekiet ke isua efitenaŋ, ke ɔyɔhɔ usen duop ke ɔfiɔŋ, ema ekut nte mbon ekɔŋ mme Lamanite esaŋade ekpere isɔŋ Ammonihah.

2 Ndien sese, ema efiak ebɔp obio oro, ndien Moroni ama enim mbon ekɔŋ ke mme adaŋa obio oro, ndien mmɔ ema etop ntan ekanade man ekpeme mmɔ ebaŋa mme idaŋ ye mme itiat mme Lamanite; koro sese, mmɔ ekeŋwana ye mme itiat ye mme idaŋ.

3 Sese, ami ndɔhɔ ke ema efiak ebɔp obio Ammonihah. Ami ndɔhɔ mbufo, iŋ, nte ke ema ebɔp ubak; ndien ke ntak emi mme Lamanite ekebiatde enye ke ini kiet ke ntak ukwaŋ-ŋkpɔ mme owo, mmɔ ema ekere ke ayafiak edi ata mmem mmem ɔnɔ mmɔ ndikan.

4 Edi sese, idorienyin mmɔ ama akpa mfɔhɔ eti eti; koro sese, mme Nephite ema etibi obube ke isɔŋ ebono ye itiat ye ntan ekanade mmɔ, emi okokoŋde tutu mme Lamanite ikikanke itop mmɔ mme itiat mmɔ ye mme idaŋ mmɔ man enyene ufɔn, ŋko mmɔ ikikanke isim mmɔ ibɔhɔke eto ebiet emi mmɔ etode eduk.

5 Idahaemi ke ini emi idem ama akpa ada ibuot mme etubom ekɔŋ mme Lamanite ata eti eti, ke ntak ifiɔk mme Nephite ke ndibeŋe mme ebiet ukpeme mmɔ.

6 Idahaemi mme ada usuŋ mme Lamanite ema ekere, ke ntak akamba ibat mmɔ, iŋ, mmɔ ema ekere ete ke mmɔ eyenyene mfɔniso ndisime mmɔ nte mmɔ ekedahade enam; iŋ, ndien mmɔ ŋko ema ebeŋe idem mmɔ ye mme ukwak ukpeme, ye mme ukwak ikpanesit; ndien mmɔ ŋko ema ebeŋe idem mmɔ ye mme ɔfɔŋ ikpa, iŋ, mme ata ndodobi ɔfɔŋ ndifuk iferi mmɔ.

7 Ndien ke ekebeŋede idem ntem mmɔ ekekere ete ke mmɔ eyekan ke mmem mmem usuŋ ndien esin nditɔ eka mmɔ ke idak ɔkpɔnɔ itie-ufin, mme ewot enyuŋ ewot mmɔ ke ibak nte asaŋade ye inemesit mmɔ.

8 Edi sese, ke ata mkpaidem mmɔ, mmɔ ema ebeŋe idem ebet mmɔ, ke usuŋ emi akananam ikɔt Lehi mikifiɔkke. Idahaemi mmɔ ema ebeŋe idem enɔ mme Lamanite, ndiŋwana ekɔŋ nte Moroni eketemede.

9 Ndien edikem ete mme Lamanite, mme mme Amalickiahite, ema ekpa idem ata eti eti ke utɔ mbeŋidem ekɔŋ mmɔ emi.

10 Idahaemi, ekpedi edidem Amalickiah ama ɔsuhɔde ɔwɔrɔ ke isɔŋ Nephi, ke ibuot mbon ekɔŋ esie, ndusuk enye akpanam mme Lamanite eka eŋwan ye mme Nephite ke obio Ammonihah; koro sese, enye ikikereke ibaŋa iyip ikɔt esie.

11 Edi sese, Amalickiah ikisuhɔkede idi ke idem esie ndiŋwana ekɔŋ. Ndien sese, mme ada ibuot mme etubom ekɔŋ esie ikikaha eŋwan ye mme Nephite ke obio Ammonihah, koro Moroni ama ɔkpuhɔ mme edu unam ŋkpɔ ke otu mme Nephite, tutu ete idorienyin mme Lamanite ama akpa mfɔhɔ ke ntak mme ebiet udibe mmɔ ndien mmɔ ikanke iŋwana ye mmɔ.

12 Ke ntak oro mmɔ efiak edem eduk ke wilderness, ndien emen nna-ekɔŋ mmɔ enyuŋ esaŋa eka isɔŋ Noah, ekere ete ke oro edi ebiet efen emi ɔfɔnde akan ndiŋwana ye mme Nephite.

13 Koro mmɔ ikifiɔkke ite ke Moroni ama ɔsɔŋɔ, mme ama ɔbɔp mme ebiet ukpeme, ɔnɔ obio kiet kiet ke ofuri nkanade isɔŋ oro; ke ntak oro, mmɔ esaŋa eka isɔŋ Noah ye ata mkpe-mbiere; iŋ, mme ada ibuot mme etubom ekɔŋ mmɔ ewɔrɔ edi enyuŋ eda uŋwɔŋɔ ete ke mmɔ eyewot mbon obio oro.

14 Edi sese, ke mkpaidem mmɔ, obio Noah, emi ekedide mmem mmem ebiet ke edem, idahaemi, oto ke edinam Moroni, akabade ɔkpɔsɔŋ, iŋ, tutu ndikan odudu obio Ammonihah.

15 Ndien idahaemi, sese, emi ekedi ifiɔk ke Moroni; koro enye ama ekere ke idem eyenyeŋ mmɔ ke obio Ammonihah; ndien nte obio Noah ekedide nkaŋ emi ekememde akan ke isɔŋ oro, ke ntak oro mmɔ eyeka do ndiŋwana ekɔŋ; ndien ntem ke ekedi nte asaŋade ye mme uduak esie.

16 Ndien sese, Moroni ama emek Lehi nte ada ibuot mme etubom ekɔŋ ɔnɔ mme owo ke obio oro; ndien ekedi kpa ukem Lehi odo akaŋwana ye mme Lamanite ke itighede ke edem usiaha utin akpa Sidon.

17 Ndien idahaemi sese edikem, ete ke ini mme Lamanite ekekutde ete ke edi Lehi akakara obio oro idorienyin mmɔ ama afiak akpa mfuhɔ, koro mmɔ ema ebak Lehi ata eti eti, edi mme ada ibuot mme etubom ekɔŋ mmɔ ema eda uŋwɔŋɔ ndiŋwana ye obio oro; ke ntak oro, mmɔ eda mbon ekɔŋ mmɔ edi.

18 Idahaemi sese, mme Lamanite ikikanke iduk mme ebiet ukpeme mmɔ ke baba usuŋ ndomo kiet ibɔhɔke ke ebiet emi etode eduk, ke ntak nkoŋ-nkoŋ ntan emi ekebɔpde enim, ye ntɔtuŋɔ obube emi ekedɔkde ekanade, ibɔhɔke ekedi ke inuaotop.

19 Ndien ke ntem ke mme Nephite ekebeŋe idem ndiwot kpukpru mbon edomode ndidɔk nduk enyɔŋ ebiet ukpeme ke usuŋ ndomo kiet efen, ke nditop mmɔ mme itiat ye mme idaŋ.

20 Ke ntem ke mmɔ ekebeŋe idem, iŋ, mbon mmɔ emi esɔŋde idem ekan, ye akaŋkaŋ mmɔ ye ikaŋ-ɔkpɔ mmɔ, ndimia nnim ke isɔŋ kpukpru mbon emi edomode ndiduk ebiet ukpeme mmɔ nto ebiet emi etode eduk; ndien ke ntem ke mmɔ ekebeŋe idem ndikpeme idem mmɔ mbaŋa mme Lamanite.

21 Ndien edikem ete mme ada ibuot mme etubom ekɔŋ mme Lamanite eda mme mbon ekɔŋ mmɔ edi ebiet emi etode eduk, ndien etɔŋɔ ndiŋwana ye mme Nephite, man eduk ebiet ukpeme mmɔ; edi sese, ema ebin mmɔ efiak edem ke ini ke ini, tutu ete ema ewot mmɔ ye akwa ediwot.

22 Idahaemi ke ini mmɔ ekekutde ete ke mmɔ ikikanke inyene odudu ke idem mme Nephite ito nto-nduk, mmɔ etɔŋɔ ndidɔk ntan nsio man mmɔ enyene usuŋ enɔ mbon ekɔŋ mmɔ, man mmɔ enyene ukem ufaŋ ndiŋwana; edi sese, ke ndidomo emi ema esobo mmɔ ye mme itiat ye mme idaŋ emi eketopde mmɔ ; ndien utu ke eyɔhɔ obube mmɔ ye ntan emi edɔkde, mmɔ ekeyɔhɔ ke ubak ye mme okpo-owo mmɔ ye mme ada unan.

23 Ke ntem mme Nephite ema enyene ofuri odudu ye mme asua mmɔ; ndien ke ntem mme Lamanite ema edomo ndiwot mme Nephite tutu ewot kpukpru mme ada ibuot mme etubom ekɔŋ mmɔ; iŋ, ndien ema ewot mme Lamanite emi ekewakde ekan tɔsin kiet, ke ini edide, ke ŋkaŋ oko, owo ikiwotke owo mme Nephite ndomo kiet.

24 Ŋkpɔ nte aba ye duop ekeda unan, emi mme idaŋ mme Lamanite ekemumde ke nto-nduk, edi mme ukwak ukpeme mmɔ emafuk mmɔ, ye mme ukwak ikpanesit mmɔ, ye mme itam ukwak mmɔ, tutu ete ke unan mmɔ okodu ke ukot mmɔ, ediwak emi ekedide ata ndioi

25 Ndien edikem, ete ke ini mme Lamanite ekekutde ete ke ewot kpukpru mme ada ibuot mme etubom ekɔŋ mmɔ efehe eduk wilderness. Ndien edikem ete mmɔ enyɔŋ eka isɔŋ Nephi, man ekedɔhɔ edidem mmɔ, Amalickiah, emi ekedide owo Nephite ke emana, ebaŋa sitakde mmɔ.

26 Ndien edikem ete ke enye ama ayatesit ata eti eti ye ikɔt esie, koro enye ikinyeneke uduak esie ye mme Nephite; enye ikisinke mmɔ ke idak ɔkpɔnɔ itie-ufin.

27 Iŋ, enye ama ayatesit ata eti eti, ndien enye ama osuŋi Abasi, ŋko ye Moroni, otomo ye uŋwɔŋɔ ete ke enye ɔyɔŋwɔŋ iyip esie; ndien emi ke ntak emi Moroni ekenimde mme ibet Abasi ke ndibeŋe idem ubɔhɔ nnɔ ikɔt esie.

28 Ndien edikem, ete ke ŋkaŋ oko, ikɔt Nephi ema ekɔm Jehovah Abasi mmɔ, ke ntak anana mbiet odudu esie ke ndinyaŋa mmɔ nsio ke ubɔk mme asua mmɔ.

29 Ndien ke ntem ke ɔyɔhɔ isua ukara efitenaŋ mme ebiere ikpe nnɔ ikɔt Nephi eketre.

30 Iŋ, ndien nka-iso emem ama odu ke otu mmɔ, ndien ata akwa uforo ke ufɔk Abasi ke ntak ntiŋ-enyin ye ifik mmɔ emi mmɔ ekenɔde ikɔ Abasi, emi Helaman, ye Shiblon, ye Corianton, ye Ammon ye nditɔ eka esie ekekwɔrɔde enɔ mmɔ, iŋ, ŋko ye kpukpru mbon emi ekenimde ke edisana utɔ Abasi, ke enade uduɔkmmɔŋ man ekabade esit, enyuŋ enɔ eka man ekwɔrɔ ikɔ ke otu mme owo.