1 Sese, idahaemi edikem ete ikibighike Moroni ɔkɔnɔde nwed esie esɔk ada ibuot mme andikara, enye ɔbɔ nwed oto Pahoran, ada ibuot mme andikara. Ndien emi edi mme ikɔ emi enye ɔkɔbɔde:

2 Ami, Pahoran, emi ami ndide ada ibuot mme andikara ke isɔŋ emi, nnɔ mme ikɔ emi esɔk Moroni, ada ibuot mme etubom ekɔŋ nnɔ mbon ekɔŋ. Sese, ami ndɔhɔ fi, Moroni, nte ke ami ndarake ke mme ɔkpɔsɔŋ ukut mbufo, iŋ, anam ukpɔŋ mi ɔfuhɔ.

3 Edi sese, odu mbon emi edarade ke mme ukut mbufo, iŋ, tutu ete ke mmɔ edaha eda ke nsɔŋ ibuot ye ami, ye ŋko ikɔt mi emi edide mbon uwɔrɔ ufin, iŋ, ndien mbon emi edahade eda ewak ata eti eti.

4 Ndien edi mmɔ emi edomode ndibɔ mi itie ikpe edi ntak ɔkpɔsɔŋ ukwaŋ-ŋkpɔ emi; koro mmɔ ekama uwak nnem-inua, ndien mmɔ eda esit uwak owo ewɔrɔ, emi edidide ntak idiɔk ukut ke otu nnyin; mmɔ emum mme ŋkpɔ udia nnyin ekama, ndien efik mbon uwɔrɔ ufin nnyin enim man mmɔ ekudi ubine mbufo.

5 Ndien sese, mmɔ ebin mi esio ke iso mmɔ, ndien ami mefehe ŋka isɔŋ Gideon, ye nte ediwak iden emi nte nkekemede ndinyene.

6 Ndien sese, ami mɔnɔ ntɔt ke ofuri ŋkaŋ isɔŋ emi; ndien sese, mmɔ ke enyɔŋ edi ebine nnyin ke usen ke usen, ye mme ŋkpɔ ekɔŋ mmɔ, ke ukpeme obio mmɔ ye uwɔrɔ ufin mmɔ, ye ndisio usiene nnɔ se eduede nnyin.

7 Ndien mmɔ edi ebine nnyin, tutu ete ke mbon emi edahade eda ke nsɔŋ ibuot ye nnyin etut utɔŋ, iŋ, tutu ete mmɔ ebak nnyin ndien iwɔrɔke idi ndiŋwana ekɔŋ ye nnyin.

8 Mmɔ enyene isɔŋ oro, mme obio oro, eke Zarahemla; mmɔ emek edidem enɔ idem mmɔ, ndien enye ewet ŋwed ɔnɔ edidem mme Lamanite, ke emi enye anamde edidiana kiet ye enye; ke edidiana kiet emi enye enyime ndikpeme obio Zarahemla, edikpeme emi enye ekerede ke ayanam mme Lamanite ekan nsuhɔ isɔŋ, ndien ke eyenim enye nte edidem enɔ mbon emi ke ini edikande mmɔ ke idak mme Lamanite.

9 Ndien idahaemi, ke ŋwed fo afo mebiom mi ikpe, edi ifinake; ami nyatke esit, edi ndaresit ke akwa esit fo. Ami, Pahoran, nyomke odudu, ibɔhɔke ndinyene itie ikpe mi man ami ntim mme unen ye uwɔrɔ ufin ikɔt mi nnim. Ukpɔŋ mi ɔsɔŋɔ ada ke uwɔrɔ ufin oro emi Abasi anamde nnyin ibɔhɔ.

10 Ndien idahaemi, sese, nnyin iyibiɔŋɔ ibak kpa tutu ke uduɔk iyip. Nnyin ididuɔkke iyip mme Lamanite edieke mmɔ edidude ke isɔŋ eke mmɔ.

11 Nnyin ididuɔkke iyip nditɔeka nnyin edieke mmɔ mididahake ida ke nsɔŋ ibuot inyuŋ imen akaŋkaŋ ibaŋa nnyin.

12 Nnyin iyisin idem nnyin ke ɔkpɔnɔ itie ufin edieke edide se unenikpe Abasi eyomde, mme edieke enye ɔnɔde nnyin uyo ete inam ntre.

13 Edi sese enye inɔhɔ nnyin uyo ete nnyin iyak idem nnyin inɔ mme asua nnyin, edi ete yak nnyin idori enyin ke enye, ndien enye ayanyaŋa nnyin.

14 Ke ntak oro, edima eyeneka mi, Moroni, yak nnyin isin ibak, ndien ibak ekededi emi nnyin mikanke isin ye ikɔ nnyin, iŋ, nte mme utɔk ye mme eneni, yak nnyin isin mmɔ ye akaŋkaŋ nnyin, man nnyin inim uwɔrɔ ufin nnyin, man nnyin idaresit ke saŋasaŋa ifet ufɔk Abasi nnyin, ye ke usuŋ Andifak nnyin ye Abasi nnyin.

15 Ke ntak oro, di bine mi ke usɔp ye mme iden fo ifaŋ, nyuŋ yak mbon esuhɔde sin ke ukama Lehi ye Teancum; nnɔ mmɔ odudu ndiŋwana ekɔŋ ke ŋkaŋ isɔŋ oro, nte asaŋade ye Spirit Abasi, emi edide ŋko spirit uwɔrɔ ufin emi odude ke mmɔ.

16 Sese ami mɔnɔ ekpri ŋkpɔ udu uwem esɔk mmɔ, man mmɔ ekukpa tutu afo akan edi ebine mi.

17 Bok ɔtɔ kiet mbon ekɔŋ ekededi emi afo akande ke isaŋ fo ndidi mi, ndien nnyin iyisɔp ika eŋwan ye mbon mfaŋa oro, ke odudu Abasi nnyin nte asaŋade ye mbuɔtidem emi odude ke nnyin.

18 Ndien nnyin iyida obio Zarahemla inyene, man nnyin inyene udia efen ndinɔ esɔk Lehi ye Teancum; iŋ, nnyin iyika eŋwan ye mmɔ ke odudu Jehovah, ndien nnyin iyitre ɔkpɔsɔŋ ukwaŋ-ŋkpɔ emi.

19 Ndien idahaemi, Moroni, ami madaresit ke ndibɔ ŋwed fo, koro ama afina mi ata eti kabaŋa se anade nte nnyin inam, mme edi nnennen nnyin ndika eŋwan ye nditɔeka nnyin.

20 Edi afo ɔmɔdɔhɔ ete, ibɔhɔke mmɔ ekabade esit Jehovah ɔnɔ fi uyo ete afo aka eŋwan ye mmɔ.

21 Kut ete ke afo ɔmɔsɔŋɔ Lehi ye Teancum idem ke Jehovah; dɔhɔ mmɔ ekufehe ndik, koro Abasi ayanam mmɔ ebɔhɔ, iŋ, ye ŋko kpukpru mbon emi esɔŋɔde eda ke uwɔrɔ ufin emi Abasi anamde mmɔ ebɔhɔ. Ndien idahaemi ami ntre ŋwed mi emi nnɔde eyeneka mi, Moroni.