1 Eyen mi, kpaŋ utɔŋ nɔ mme ikɔ mi, koro ami ndɔhɔ fi, kpa nte nkɔdɔhɔde Helaman, nte ke adaŋa nte afo edinimde mme ibet Abasi afo oyoforo ke isɔŋ; ndien ke adaŋa nte afo mudunimke mme ibet Abasi eyesibe fi esio ke iso esie.

2 Ndien idahaemi, eyen mi, ami menim nte ke ami nyenyene akwa idaresit ke ntak fo, ke ntak nsɔŋɔ nda fo ye ntiŋ enyin fo ke Abasi; koro nte afo ɔtɔŋɔde ke uyen fo ndise Jehovah Abasi fo, kpa ntre ami modorienyin nte ke afo aya ka iso ke ndinim mme ibet esie; koro ɔfɔfɔn ɔnɔ enye emi emede tutu esim utit.

3 Ami ndɔhɔ fi, eyen mi, nte ke ami menyene akwa idaresit ke afo kaŋa, ke ntak ntiŋ enyin fo ye nsin ifik fo, ye ime fo ye anyan ime fo ke otu mbon mme Zoramite.

4 Koro ami mɔfiɔk nte ke afo okodu ke mme ŋkpɔkɔbi; iŋ, ndien ami ŋko mofiɔk nte ke ema etɔ fi ke itiat ke ntak ikɔ; ndien afo ama ɔyɔ kpukpru ŋkpɔ ye ime koro Abasi ama odu ye afo; ndien idahaemi afo ɔmɔfiɔk ete ke Jehovah ama anam fi ɔbɔhɔ.

5 Ndien idahaemi eyen mi, Shiblon, ami moyom nte afo eti, ete ke adaŋa nte afo edi berede edem ke Abasi ke kpa ntre ke edinam fi ɔbɔhɔ ke mme idomo fo, ye mme afanikɔŋ fo, ye mme ukut fo, ndien eyemenede fi ke akpatre usen.

6 Idahaemi, eyen mi, ami nyomke nte afo ekere ke ami mfiɔk mme ŋkpɔ emi ke idem mi, edi Spirit Abasi emi odude ke ami anam mi mfiɔk mme ŋkpɔ emi; koro ekpedi nkamanake ke Abasi ami mkpefiɔkke mme ŋkpɔ emi.

7 Edi sese, Jehovah ke akwa mbɔm esie ama ɔdɔŋ angel esie edidɔhɔ mi ete ke ana nte ntre utom nsobo ke otu ikɔt esie; iŋ, ndien ami mokut angel iso ye iso, ndien enye etiŋ ikɔ ye ami, ndien uyo esie eketie nte obuma, ndien enye enyeŋe ofuri isɔŋ.

8 Ndien edikem ete ke ami nkodu ke ɔkpɔsɔŋ ubiak ye ndutuhɔ ke ukpɔŋ ke usen ita ye okoneyo ita; ndien akananam, tutu nseme nnɔ Jehovah Jesus Christ nyom mbɔm, ke ami nkɔbɔ edifen ke mme idiɔk ŋkpɔ mi. Edi sese, mma nseme nnɔ enye ndien mma nyene emem nnɔ ukpɔŋ mi.

9 Ndien idahaemi, eyen mi, ami ntiŋ emi nnɔ fi man afo ekpep ifiɔk, man afo ekpep oto mi ete ke usuŋ efen iduhe mme ŋkpɔ efen emi ekemede ndinyaŋa owo, ibɔhɔke oto ke onyuŋ ebe ke Christ. Sese, enye edi uwem ye uŋwana ererimbot. Sese, enye edi ikɔ akpanikɔ ye nnen nnen ido.

10 Ndien idahaemi, nte afo amake tɔŋɔ ndikpep ikɔ emi kpa ntre ke ami nyom nte yak afo aka iso ndikpep; ndien ami moyom nte afo esin ifik onyuŋ akama idem ke ufat ke kpukpru ŋkpɔ.

11 Kut ete ke afo umenekede ke ntaŋidem; iŋ, kut ete ke afo unamke inua ubaŋa ke ifiɔk fo, ŋko ye akwa odudu fo.

12 Da uko, edi ukudi ke ifik; ndien ŋko kut ete ke amakara ofuri udɔŋ fo, man afo ɔyɔhɔ ye ima; kut ete ke afo emetre ifu.

13 Kubɔŋ akam nte mme Zoramite ebɔŋde, koro afo omokut ete ke mmɔ ebɔŋ man mme owo ekop, ŋko man etoro mmɔ ke ifiɔk mmɔ.

14 Kudɔhɔ ete: O Abasi, ami mɔkɔm fi koro nnyin imifɔn ikan nditɔ eka nnyin; edi kap dɔhɔ ete: O Jehovah, fen nc unana edidot mi, nyuŋ ti nditɔ eka mi ke mbɔm—iŋ, nyime unana edidot fo ke iso Abasi ke kpukpru ini.

15 Ndien yak Jehovah ɔdiɔŋ ukpɔŋ fo, onyuŋ ɔbɔ fi ke akpatre usen esin ke obio ubɔŋ esie, man etie ke emem. Idahaemi ka, eyen mi, nyuŋ kpep mbon emi ikɔ emi. Sin idem. Eyen mi, saŋa-suŋ.