1 Ndien edikem ete kpa nte ediwak emi mikikpaŋke utɔŋ inɔ mme ikɔ Helaman ye nditɔ eka esie ema eboho ɔtɔ kiet ebiɔŋɔ nditɔ eka mmɔ.

2 Ndien idahaemi sese, mmɔ ema eyat esit ata eti eti, tutu ete mmɔ ema ebiere ndiwot mmɔ.

3 Idahaemi ada ibuot mbon emi ekeyatde esit ye nditɔ eka mmɔ ekedi akamba ye enyene odudu owo; ndien enyiŋ esie ekedi Amalickiah.

4 Ndien Amalickiah ama enyene udɔŋ ndidi edidem, ndien mbon emi ekeyatde esit ema enyene udɔŋ ŋko ete enye edi edidem mmɔ; ndien mmɔ emi ekewakde ekan ekedi nsuhɔde mme ebiere ikpe, ndien mmɔ ekeyom odudu.

5 Ndien edi mme nnem-inua Amalickiah ekeda mmɔ usuŋ, ete edieke mmɔ edidade ye enye enyuŋ enim enye nte edidem mmɔ ete ke enye eye anam mmɔ edi mme andikara mme owo.

6 Ke ntem ke Amalickiah akada mmɔ ɔwɔrɔ ɔkpɔŋ usuŋ esin ke mme eneni, isehe ukwɔrɔ ikɔ Helaman ye nditɔ eka esie, iŋ, isehe nte mmɔ eketimde ese ŋkpɔ ebaŋa ufɔk Abasi, koro mmɔ ekedi mme akwa oku ke ufɔk Abasi.

7 Ndien ediwak ema edu ke ufɔk Abasi emi ekenimde ke mme inem-inem ikɔ Amalickiah, ke ntak oro mmɔ ewɔrɔ ekpɔn kpa ke ufɔk Abasi; ndien ke ntem mme edinam ikɔt Nephi etie ata ntime-ntime enyuŋ ɔdiɔk ata eti eti, kpa ye akwa edikan emi mmɔ ekekande mme Lamanite, ye mme akwa idaresit mmɔ emi mmɔ ekenyenede ke ntak ubɔhɔ mmɔ otode ke ubɔk Jehovah.

8 Ke ntem nnyin ikut nte nditɔ owo esɔpde ndifre Jehovah Abasi mmɔ, iŋ, nte esɔpde ndinam ukwaŋ-ŋkpɔ, ndien idiɔk owo oro ada mmɔ ɔwɔrɔ ɔkpɔŋ usuŋ.

9 Iŋ, nnyin ŋko ikut akwa ibak emi ata idiɔk owo kiet ekemede ndinam etibe ke otu nditɔ owo.

10 Iŋ, nnyin ikut ite ke Amalickiah, ke ntak emi enye ekedide owo ŋkari uduak ye owo uwak mme inem inem ikɔ, ete enye ada esit uwak owo ɔwɔrɔ ete inam ibak; iŋ, enyuŋ eyom ndibiat ufɔk Abasi Abasi, ye ndibiat itiat idak isɔŋ uwɔrɔ ufin emi Abasi ɔkɔnɔde mmɔ, mme edidiɔŋ emi Abasi ɔkɔnɔde ke iso isɔŋ ke ntak ndinen owo.

11 Ndien idahaemi edikem ete ke ini Moroni, emi ekedide akwa ada ibuot etubom ekɔŋ nnɔ mme mbon ekɔŋ mme Nephite, ekokopde mme eneni emi, enye ama ayatesit ye Amalickiah.

12 Ndien edikem ete enye awak ɔfɔŋ esie; ndien enye ada ubak esie, onyuŋ ewet ke enye—Ke nditi Abasi nnyin, edu ukpono nnyin, ye uwɔrɔ ufin, ye emem nnyin, iban nnyin, ye nditɔ nnyin—ndien enye otobo enye ke ibuot eto.

13 Ndien enye otobo itam ukwak esie, ye ukwak ikpanesit esie, ye mme ukwak ukpeme esie, onyuŋ ɔbɔbɔ ŋkpɔ ekɔŋ esie ke isin esie; ndien enye emen eto oro, emi ekenyenede ke ibuot esie ɔfɔŋ esie emi ekewakde, (ndien enye okot enye banner ubɔhɔ) ndien enye osuk idem esie ke isɔŋ, onyuŋ ɔbɔŋ akam ke ɔkpɔsɔŋ ɔnɔ Abasi esie oyom yak mme edidiɔŋ uwɔrɔ ufin odu ye nditɔ eka esie, ke adaŋa nte otu mme Christian esuhɔde ndinyene isɔŋ oro—

14 Koro ntem ke ekekot kpukpru mbon emi eketimde enim Christ ke akpanikɔ, emi ekedude ke ufɔk Abasi Abasi, emi mbon emi mikidukke ufɔk Abasi ekekotde.

15 Ndien mbon emi ekedude ke ufɔk Abasi ema ebuɔtidem; iŋ, kpukpru mbon emi eketimde enim ke Christ ke akpanikɔ eda enɔ idem mmɔ, ye inemesit, enyiŋ Christ, mme mme Christian nte ekekotde mmɔ, ke ntak mmɔ enimde ke akpanikɔ ete ke Christ eyedi.

16 Ndien ke ntak oro, ke ini emi, Moroni ama ɔbɔŋ akam ete edumbet mme Christian, ye uwɔrɔ ufin isɔŋ ɔbɔ ufɔn.

17 Ndien edikem ete ke ini enye amake ŋwaŋa ukpɔŋ esie ɔnɔ Abasi, enye okot ofuri isɔŋ emi okodude ke usuk usuk isɔŋ Desolation, iŋ, ndien ke akpatre, ofuri isɔŋ, ke edem edere ye ke usuk usuk mbiba—Isɔŋ emi emekde, ye isɔŋ uwɔrɔ ufin.

18 Ndien enye ɔdɔhɔ ete: Abasi idiyakke ete nnyin, emi esuade ke ntak emi nnyin idade enyiŋ Christ inɔ idem nnyin, ete edighi enyuŋ ewot, tutu nnyin inam enye esim nnyin oto ke mme ndudue nnyin.

19 Ndien ke ini Moroni amaketiŋ mme ikɔ emi, enye aka ke otu mme owo, kofuŋ ubak ɔfɔŋ esie emi ekewakde ke ofum, man kpukpru ekut se ewetde emi enye ekewetde ke ɔfɔŋ emi ekewakde, onyuŋ ofiori ke ɔkpɔsɔŋ uyo, ete:

20 Sese, owo ekededi emi edikpemede banner emi ke isɔŋ emi, yak mmɔ ewɔrɔ edi ke odudu Jehovah, enyuŋ eduk ke ediomi ete ke mmɔ eyekpeme unen mmɔ, ye edu ukpono mmɔ, man Jehovah Abasi ɔdiɔŋ mmɔ.

21 Ndien edikem ete ke ini Moroni amaketiŋ mme ikɔ emi, sese, mme owo efehe edi ɔtɔ kiet ye mbɔbɔ ekɔŋ mmɔ ke isin mmɔ, ewak ɔfɔŋ mmɔ nte idiɔŋɔ, mme nte ediomi, ete ke mmɔ idikpɔŋke Jehovah Abasi mmɔ, mme, ke usuŋ efen, edieke mmɔ eduede mme ibet Abasi, mme eduɔde eduk ke ndudue, enyuŋ ekop but ndida enyiŋ Christ nnɔ idem mmɔ, yak Jehovah awak mmɔ kpa nte mmɔ ewakde ɔfɔŋ mmɔ.

22 Idahaemi emi ekedi ediomi emi mmɔ ekenamde, ndien mmɔ enim ɔfɔŋ mmɔ ke ikpat Moroni, edɔhɔ ete: Nnyin imidiomi ye Abasi nnyin, ite ke eyewot nnyin, kpa nte nditɔ eka nnyin ke isɔŋ edem edere, edieke nnyin iduɔde iduk ke ndudue; iŋ, enye eyenim nnyin ke ikpat mme asua nnyin, kpa nte nnyin inimde ɔfɔŋ nnyin ke ikpat fo man edighi ke ukot, edieke nnyin iduɔde iduk ke ndudue.

23 Moroni ɔdɔhɔ mmɔ ete: Sese, nnyin idi nsuhɔ ubon Jacob; iŋ, nnyin idi nsuhɔ ubon Joseph, emi nditɔ eka esie ekewakde ɔfɔŋ esie ke ediwak mbai; iŋ, ndien idahaemi sese, yak nnyin iti ndinim mme ibet Abasi, midighe nditɔ eka nnyin eyewak ɔfɔŋ nnyin, ndien eyesin nnyin ke ufɔk ŋkpɔkɔbi, midighe eyam, midighe ewot.

24 Iŋ, yak nnyin itim uwɔrɔ ufin nnyin inim nte nsuhɔ Joseph; iŋ, yak nnyin iti mme ikɔ Jacob, mbemiso mkpa esie, koro sese, enye ama okut ete ke ema etim ubak nsuhɔ ɔfɔŋ Joseph enim ndien ke ikibuke. Ndien enye ama ɔdɔhɔ ete—Kpa nte etimde nsuhɔ ɔfɔŋ eyen mi emi enim, ntre ke ubɔk Abasi editim nsuhɔ ubon eyen mi inim, onyuŋ ada ɔnɔ idem esie, ke ini nsuhɔ ubon Joseph edikpade, kpa nte nsuhɔ ɔfɔŋ esie.

25 Idahaemi sese, emi ɔnɔ ukpɔŋ mi mfuhɔ; edi, ukpɔŋ mi adaresit ke eyen mi, ke ntak ubak ubon esie oro emi edimende isɔk Abasi.

26 Idahaemi sese, emi ekedi usem Jacob.

27 Ndien idahaemi anie owo ifiɔk mme nsuhɔ ubon Joseph, emi edikpade nte ɔfɔŋ esie, edi mmɔ emi ewɔrɔde ekpɔnnnyin? Iŋ, ndien ekeme ndidi nnyin edieke nnyin misɔŋke ida ke ukpep-ŋkpɔ edu ukpono Christ.

28 Ndien idahaemi edikem ete ke ini Moroni amaketiŋ mme ikɔ emi enye aka, ndien ŋko ɔdɔŋ ke kpukpru itie ke isɔŋ emi mme eneni ekedude, onyuŋ ataŋ kpukpru mbon emi ekeyomde ndinim uwɔrɔ ufin mmɔ obok ɔtɔ kiet, man eŋwana ye Amalickiah ye mbon emi ekewɔrɔde ekpɔn, emi ekekotde mme Amalickiahite.

29 Ndien edikem ete ke ini Amalickiah okokutde ete ke ikɔt Moroni ema ewak ekan mme Amalickiahite—ndien enye ŋko okut ete ke ikɔt esie ema eyik kabaŋa unenikpeuduak emi mmɔ ekedade enɔ idem—ke ntak oro, ke efehede ete ke enye idikanke ke se enye oyomde, enye ada ikɔt esie emi ekenyimede onyuŋ ɔwɔrɔ aka isɔŋ Nephi.

30 Idahaemi Moroni ekekere ke ikifɔnke ete mme Lamanite enyene odudu aba; ke ntak oro enye ekere ndibiɔŋɔ ikɔt Amalickiah, mme ndimum mmɔ nyuŋ nda mmɔ nyɔŋ ndi, nyuŋ nwot Amalickiah; iŋ, koro enye ama ɔfiɔk ete ke enye eyedemede mme Lamanite ke iyatesit abaŋa mmɔ, ndien anam mmɔ edi uŋwana ekɔŋ ye mmɔ; ndien emi enye amafiɔk ete ke Amalickiah eye anam man enye enyene uduak esie.

31 Ke ntak oro Moroni ama ekere ke ama ɔfɔn ete enye ada mbon ekɔŋ esie, emi ekebokde idem mmɔ ɔtɔ kiet, enyuŋ ekama ŋkpɔ ekɔŋ mmɔ, ndien eduk ke ediomi ndiduŋ ke emem—ndien edikem ete enye emen ekɔŋ esie onyuŋ asaŋa ɔwɔrɔ ye mme tent esie aka wilderness, ndibiɔŋɔusuŋ isaŋ Amalickiah ke wilderness.

32 Ndien edikem ete enye anam nte asaŋade ye mme uduak esie, onyuŋ asaŋa aka ke wilderness, ndien ebem mbon ekɔŋ Amalickiah iso.

33 Ndien edikem ete Amalickiah efehe ye ekpri ibat mbon ekɔŋ esie, ndien ema eyak sikisuhɔde esin ke ubɔk Moroni ndien eda mmɔ efiak eka ke isɔŋ Zarahemla.

34 Idahaemi, Moroni ke edide edenowo emi mme ada ibuot ubiere ikpe ye uyo mme owo ekemekde, ke ntak oro enye ama enyene odudu nte asaŋade ye uduak esie ye mbon ekɔŋ mme Nephite, ndisiak ye ndinam unen ke idem mmɔ.

35 Ndien edikem ete owo ekededi eke mme Amalickiahite emi midukke ke ediomi ndida ye ubiere uwɔrɔ ufin, man mmɔ enyene eti ukara, enye anam ete ewot; ndien edi ekpri ibat owo ekekaŋ ediomi uwɔrɔ ufin oro.

36 Ndien edikem ŋko, ete enye anam ete ewuk banner ubɔhɔ ke kpukpru tower emi ekedude ke ofuri isɔŋ oro, emi mme Nephite ekenyenede; ndien ke ntem Moroni owuk banner ubɔhɔ ke otu mme Nephite.

37 Ndien mmɔ etɔŋɔ ndifiak nyene emem ke isɔŋ oro; ndien ke ntem mmɔ ema enyene emem ke isɔŋ oro tutu ekpere utit ɔyɔhɔ isua ukara efitenaŋ mme ebiere ikpe.

38 Ndien Helaman ye mme akwa oku ŋko ema enim emem ke ufɔk Abasi; iŋ, tutu ke ufaŋ isua inaŋ ke mmɔ ekenyene ata emem ye idaresit ke ufɔk Abasi.

39 Ndien edikem ete ediwak ema edu emi ekekpade, esɔŋɔ ebuɔtidem ete ke Jehovah Jesus Christ afak ukpɔŋ mmɔ; ke ntem mmɔ ewɔrɔ ke ererimbot ye idaresit.

40 Ndien usuk ema edu emi ekekpade ke ntak ufiop idem, emi ekewakde ke usuk ini ke isua ke isɔŋ oro—edi ikidighe ke ntak ufiop idem, ke ntak nfɔŋ-mma uduot mme eto ye mme oruŋ emi Abasi ekenimde ndisio ntak mme udɔŋɔ, emi ekesimde mme owo ke ntak nte obot edide ndaeyo ye ukwɔ-edim—

41 Edi ediwak ema edu emi ekekpade ke usɔŋ; ndien mbon emi ekekpade ke ukpep-ŋkpɔ edu ukpono ke Christ enemesit ke enye, nte anade nnyin ikere