1 Ndien idahaemi edikem ete ke ini Moroni amakɔbɔ ŋwed emi esit esie amaɔbɔ uko, ndien ama ɔyɔhɔ ye ata akwa idaresit ke ntak nsɔŋɔ-nda Pahoran, ete ke enye ŋko idighe owo mbia inɔ uwɔrɔ ufin ye edu obio esie.

2 Edi enye ŋko ama ɔfuhɔ ata eti eti ke ntak ukwaŋ-ŋkpɔ mbon emi ekebinde Pahoran esio ke itie ikpe, iŋ, ke akpatre ke ntak mbon emi ekesɔŋde ibuot ye obio mmɔ ŋko ye Abasi mmɔ.

3 Ndien edikem ete Moroni asaŋa ye ekpri ibat iden, nte asaŋade ye udɔŋ Pahoran, onyuŋ ɔnɔ Lehi ye Teancum ukara abaŋa nsuhɔ mbon ekɔŋ esie, ndien enye emen isaŋ esie aka isɔŋ Gideon.

4 Ndien enye ama emenede banner ubɔhɔ ke ebiet ekededi emi enye okodukde, onyuŋ enyene mbon ekɔŋ ekededi emi enye akakande ke kpukpru isaŋ esie ndika isɔŋ Gideon.

5 Ndien edikem ete ke mme tɔsin ema eboho eka banner esie, enyuŋ etaŋ mme akaŋkaŋ mmɔ ke ukpeme uwɔrɔ ufin mmɔ, man mmɔ ekuduk ufin.

6 Ndien ke ntem, ke ini Moroni ama okobok ɔtɔ kiet mme iden ekededi emi enye akakande ke ofuri isaŋ esie, enye edisim isɔŋ Gideon; ndien ke adiande mbon ekɔŋ esie ye eke Pahoran mmɔ ekabade esɔŋ idem ata eti eti, esɔŋ idem ekan mme iden Pachus, emi ekedide edidem mbon mfaŋa emi ekebinde mbon uwɔrɔ ufin esio ke isɔŋ Zarahemla enyuŋ edade isɔŋ oro enyene.

7 Ndien edikem ete Moroni ye Pahoran ewɔrɔ ye mme mbon ekɔŋ mmɔ eka isɔŋ Zarahemla, enyuŋ eka eŋwan ye obio oro, ndien ema esobo ye ikɔt Pachus, tutu ete ke mmɔ ediŋwana eŋwan.

8 Ndien sese, ema ewot Pachus enyuŋ emum ikɔt esie nte mbon ŋkpɔkɔbi, ndien ema efiak enim Pahoran ke itie ikpe esie.

9 Ndien ikɔt Pachus ema eda ke ikpe mmɔ, nte asaŋade ye mbet, ye ŋko mme ikɔt edidem oro emi ekemumde enyuŋ etopde esin ke ufɔk ŋkpɔkɔbi; ndien ema ewot mmɔ nte asaŋade ye mbet; iŋ, ikɔt Pachus oro ye ikɔt edidem oro, ekededi emi midimenke ŋkpɔ ekɔŋ ke ukpeme obio mmɔ, edi eŋwana ye enye, ema ewot.

10 Ndien ke ntem ama ɔfɔn ete etim enim mbet emi ke ntak uwɔrɔ ufin obio mmɔ; iŋ, ndien ema ewot ke usɔp owo ekededi emi ekekutde nte akaŋde uwɔrɔ ufin mmɔ nte asaŋade ye mbet.

11 Ndien ke ntem ke ɔyɔhɔ isua ukara edip ye duop mme ebiere ikpe nnɔ ikɔt Nephi eketre; Moroni ye Pahoran ke ema ekefiak esim emem ke isɔŋ Zarahemla, ke otu ikɔt mmɔ, ke ema ekewot kpukpru owo emi mikinamke akpanikɔ ye edumbet uwɔrɔ ufin.

12 Ndien edikem ke ntɔŋɔ isua ukara edip ye duopekiet mme ebiere ikpe nnɔ ikɔt Nephi, Moroni ama ɔsɔp anam ete enɔ mme ŋkpɔ udu uwem, ye ŋko mbon ekɔŋ tɔsin itiokiet esɔk Helaman, man eŋwam enye ke nditim ŋkaŋ isɔŋ oro nnim.

13 Ndien enye ŋko anam ete yak enɔ mbon ekɔŋ tɔsin itiokiet, ye udia emi ekemde, esɔk mme mbon ekɔŋ Lehi ye Teancum. Ndien edikem ete ke ekenam emi ndisɔŋɔ isɔŋ oro mbaŋa mme Lamanite.

14 Ndien edikem ete ke Moroni ye Pahoran, ke ekpɔŋde ediwak ibat iden ke isɔŋ Zarahemla, emen isaŋ mmɔ ye ediwak ibat iden eka isɔŋ Nephihah, i ke ebierede ndikan mme Lamanite ke obio oro.

15 Ndien edikem ete nte mmɔ ekesaŋade eka isɔŋ oro, mmɔ emum ediwak ibat mbon mme Lamanite, enyuŋ ewot ediwak mmɔ, enyuŋ etaŋ mme ŋkpɔ udia mmɔ ye mme ŋkpɔ ekɔŋ mmɔ.

16 Ndien edikem ke ini mmɔ ema ekemum mmɔ, mmɔ enam mmɔ eduk ke ediomi ete ke mmɔ iditaŋke mme ŋkpɔ ekɔŋ mmɔ aba iŋwana ye mme Nephite.

17 Ndien ke ini mmɔ ema ekeduk ke ediomi emi mmɔ enɔ mmɔ ekeduŋ ye ikɔt Ammon, ndien ibat mmɔ ekedi ŋkpɔ nte tɔsin inaŋ emi owo mikiwotke.

18 Ndien edikem ete ke ini mmɔ ema ekesio mmɔ unyɔŋ mmɔ eka iso ke isaŋ mmɔ eka isɔŋ Nephihah. Ndien edikem ete ke ini mmɔ ema ekedisim obio Nephihah, mmɔ ema ewuk mme tent mmɔ ke mme una-isɔŋ Nephihah, emi ekperede obio Nephihah.

19 Idahaemi Moroni ama oyom ete mme Lamanite ewɔrɔ edi eŋwan ye mmɔ, ke mme una-isɔŋ oro; edi mme Lamanite, ke efiɔkde ata akwa uko mmɔ, ye ke ekutde akwa ibat mmɔ, ke ntak oro mmɔ iwɔrɔke idi eŋwan ye mmɔ; ke ntak oro mmɔ ikidighe eŋwan ye mmɔ usen oro.

20 Ndien ke ini okoneyo ekedide, Moroni ɔwɔrɔ aka ke ekim okoneyo, onyuŋ ekesim enyɔŋ ibibene ndiyep ŋkaŋ obio emi mme Lamanite ekenade ye mbon ekɔŋ mmɔ.

21 Ndien edikem ete ke mmɔ ekedu ke edem usiaha utin, ke usuŋ emi etode eduk; ndien kpukpru mmɔ ekede idap. Ndien idahaemi Moroni afiak ɔnyɔŋ ebine mbon ekɔŋ esie, onyuŋ anam ete mmɔ esɔp enam mme ɔkpɔsɔŋ uruk ye mme eberi, man esuhɔde ke enyɔŋ ibibene esin ke esit obio.

22 Ndien edikem ete Moroni anam ete ikɔt esie esaŋa eka enyuŋ edisim enyɔŋ ibibene, ndien esuhɔde idem mmɔ esin ke ŋkaŋ obio oro, iŋ, kpa ke edem usop utin, emi mme Lamanite mikinaha ye mme mbon ekɔŋ mmɔ.

23 Ndien edikem ete ke ema esuhɔde kpukpru mmɔ esin ke obio oro ke okoneyo, ke mme ɔkpɔsɔŋ uruk mmɔ ye mme eberi mmɔ; ke ntem ke ini usen ubɔk ekedide kpukpru mmɔ ekedu ke esit obio oro.

24 Ndien idahaemi, ke ini mme Lamanite ekedemerede enyuŋ ekut ete ke mme mbon ekɔŋ Moroni ekedu ke esit obio, idem ama enyek mmɔ ata eti eti, tutu ete ke mmɔ ema efehe ewɔrɔ ke inua otop.

25 Ndien idahaemi ke ini Moroni okokutde ete ke mmɔ efehe ke iso esie, enye anam ete ikɔt esie ebine mmɔ, enyuŋ ewot mmɔ, ndien ema ekanade ediwak eken ekuk, ndien emum mmɔ nte mbon ŋkpɔkɔbi; ndien mbon emi ekesuhɔde efehe eduk isɔŋ Moroni, emi okodude ke mme adaŋa ke mben inyaŋ.

26 Ke ntem ke Moroni ye Pahoran ekeda obio Nephihah enyene ke owo ndomo kiet mikikpaha; ndien ediwak mme Lamanite ema edu emi ekewotde.

27 Idahaemi edikem ete ke ediwak mme Lamanite emi ekedide mbon ŋkpɔkɔbi ema eyom ndidiana ye ikɔt Ammon nyuŋ nkabade ndi mbon uwɔrɔ ufin.

28 Ndien edikem ete ke kpa nte ediwak emi ekeyomde, ema enam enɔ mmɔ nte asaŋade ye mme uduak mmɔ.

29 Ke ntak oro, kpukpru mbon ŋkpɔkɔbi mme Lamanite ema ediana ye ikɔt Ammon, enyuŋ etɔŋɔ ndinam utom ata eti eti, etibi isɔŋ, etɔ kpukpru utɔ mkpasip, ebɔk mme ufene ye mme enaŋ ke utɔ ke utɔ; ndien ke ntem ke mme Nephite ekebɔhɔ eto ndodobi mbiomo; iŋ, tutu ete ke mmɔ ema ebɔhɔ eto kpukpru mbon ŋkpɔkɔbi mme Lamanite.

30 Idahaemi edikem ete ke Moroni, ke ini enye amakɔbɔ obio Nephihah enyene, ke amakada ediwak mbon ŋkpɔkɔbi, emi ɔkɔsuhɔrede ibat mme mbon ekɔŋ mme Lamanite ata eti eti, ndien ke ema ekefiak enyene ediwak mme Nephite emi ekemumde nte mbon ŋkpɔkɔbi, emi akanamde mbon ekɔŋ Moroni esɔŋ idem ata eti eti; ke ntak oro Moroni oto ke isɔŋ Nephihah aka isɔŋ Lehi.

31 Ndien edikem ete ke ini mme Lamanite ekekutde ete ke Moroni kedi ndiŋwana ye mmɔ, idem ama afiak enyek mmɔ ndien efehe ke iso mbon ekɔŋ Moroni.

32 Ndien edikem ete Moroni ye mbon ekɔŋ esie ema ebine mmɔ ke obio ke obio, tutu Lehi ye Teancum esobo ye mmɔ; ndien mme Lamanite efehe ekpɔŋ Lehi ye Teancum, tutu esuhɔde esim mme adaŋa ke mben inyaŋ, tutu mmɔ edisim isɔŋ Moroni.

33 Ndien kpukpru mme mbon ekɔŋ mme Lamanite ema esobo ɔtɔ kiet, tutu ete ke kpukpru mmɔ ekedi kiet ke isɔŋ Moroni. Idahaemi Ammoron, edidem mme Lamanite, ama odu ŋko ye mmɔ.

34 Ndien edikem ete Moroni ye Lehi ye Teancum ema ena ye mme mbon ekɔŋ mmɔ ekanade ekuk mme adaŋa isɔŋ Moroni, tutu ete ke ema ekanade mme Lamanite ekuk ke mme adaŋa wilderness ke usuk usuk, ye mme adaŋa wilderness ke edem usiaha utin.

35 Ndien ke ntem ke mmɔ eke ena ke okoneyo oro. Koro sese, idem ama emem mme Nephite ye mme Lamanite ŋko ke ntak anyan isaŋ oro; ke ntak oro mmɔ ikibiereke ke ŋkari ndomo kiet ke okoneyo oro, ibɔhɔke Teancum; koro enye ama ayatesit ata eti eti ye Ammoron, tutu ete ke enye ama ekere ete ke Ammoron, ye Amalickiah eyeneka esie, ekedi ntak ɔkpɔsɔŋ ye anyan-ini ekɔŋ emi ke ufɔt mmɔ ye mme Lamanite, emi ekedide ntak akwa ekɔŋ ye uduɔk iyip, iŋ, ye ɔkpɔsɔŋ akaŋ.

36 Ndien edikem ete ke Teancum ke iyatesit esie ama aka nna-ekɔŋ mme Lamanite, ndien ama ɔsuhɔde idem esie ke enyɔŋ mme ibibene esit ke obio oro. Ndien enye ama aka ye uruk, ke ebiet ke ebiet, tutu ete ke enye ama okut edidem; ndien enye ama ekim enye ye eduat, emi ekekimde enye ekpere esit. Edi sese, edidem ama edemede nditɔ ufɔk esie mbemiso enye akpa, tutu ete ke mmɔ ema ebine Teancum, enyuŋ ewot enye.

37 Idahaemi edikem ete ke ini Lehi ye Moroni ekefiɔkde ete ke Teancum ama akpa mmɔ ema efuhɔ ata eti eti; koro sese, enye ekedi eden emi akaŋwanade uko uko ɔnɔ obio esie, iŋ, ata ufan uwɔrɔ ufin; ndien enye amayɔ ata ɔkpɔsɔŋ ndiɔi ukut. Edi sese, enye ama akpa, ndien ama aka usuŋ ofuri ererimbot.

38 Idahaemi edikem ete ke Moroni ama adaha isaŋ ke ndaŋnsiere, onyuŋ ediŋwana ye mme Lamanite, tutu ete ke mmɔ ema ewot mmɔ ye akpakip uwotowo ; ndien mmɔ ema ebin mmɔ esio ke isɔŋ oro; ndien mmɔ ema efehe, tutu ete ke mmɔ ikinyɔŋke idi ke ini oro ndiŋwana ye mme Nephite.

39 Ndien ke ntem ke ɔyɔhɔ isua ukara edip ye duopekiet mme ebiere ikpe nnɔ ikɔt Nephi eketre; ndien ke ntem mmɔ ema enyene mme ekɔŋ, ye mme uduɔk iyip, ye akaŋ, ye ukut, ke ufaŋ ediwak isua.

40 Ndien mme uwotowo ema edu, ye mme eneni, ye mme utɔk, ye utɔ kpukpru ukwaŋ-ŋkpɔ ke otu ikɔt Nephi; edi ke ntak ndinen owo, iŋ, ke ntak mme akam ndinen owo, ema esuhɔ mmɔ.

41 Edi sese, ke ntak ata anyan ini ekɔŋ emi ke ufɔt mme Nephite ye mme Lamanite ediwak ema ekabade esɔŋ ibuot, ke ntak ata anyan ini ekɔŋ emi; ndien ediwak ema emem ke ntak mme ukut mmɔ, tutu ete ke mmɔ ema esuhɔde-idem mmɔ ke iso Abasi, tutu ke ntɔtuŋɔ nsuhɔre-idem.

42 Ndien edikem ete ke ini Moroni ama ɔkɔsɔŋɔ mme ŋkaŋ isɔŋ oro emi eketimde ewɔrɔ ena ɔnɔ mme Lamanite, tutu mmɔ esɔŋ idem ekem, enye ɔnyɔŋ aka obio Zarahemla; ndien ŋko Helaman ɔnyɔŋ aka isɔŋ inyene esie; ndien ema efiak esiak emem ke otu ikɔt Nephi.

43 Ndien Moroni ayak ukara mme mbon ekɔŋ esie esin ke ubɔk eyen esie, emi enyiŋ esie ekedide Moronihah; ndien enye ɔnyɔŋ ufɔk esie man enye abiat nsuhɔ usen esie ke emem.

44 Ndien Pahoran ama ɔnyɔŋ aka itie ikpe esie; ndien Helaman ama afiak ada ɔnɔ idem esie ndikwɔrɔ ikɔ Abasi nnɔ mme owo; koro ke ntak ata ediwak ekɔŋ ye mme eneni ama ɔfɔn ete efiak eneŋede ŋkpɔ ebon ke ufɔk Abasi.

45 Ke ntak oro, Helaman ye nditɔeka esie ema eka, enyuŋ ekwɔrɔ ikɔ Abasi ye ata odudu man enam ediwak owo ekpuhɔde ekikere ebaŋa ibak mmɔ, emi akanamde mmɔ ekabade esit ebaŋa mme idiɔk ŋkpɔ mmɔ enyuŋ ena uduɔkmmɔŋ enɔ Jehovah Abasi mmɔ.

46 Ndien edikem ete mmɔ ema efiak esiak ufɔk Abasi Abasi, ke ofuri isɔŋ oro.

47 Iŋ, ndien ema enam mme uneŋede ŋkpɔ kabaŋa mbet. Ndien ema emek mme ebiere ikpe mmɔ, ye mme ada ibuot mme ebiere ikpe mmɔ.

48 Ndien ikɔt Nephi ema efiak etɔŋɔ ndiforo ke isɔŋ oro, enyuŋ etɔŋɔ nditɔt nyuŋ mfiak nkɔri ke nsɔŋ-idem ata eti eti ke isɔŋ oro. Ndien mmɔ etɔŋɔ ndikɔ inyene ata eti eti.

49 Edi ke misehe inyene mmɔ, mme odudu mmɔ, mme uforo mmɔ, mmɔ ikimenekede ke ntaŋidem enyiŋ mmɔ; edi mmɔ ema esɔp nditi Jehovah Abasi mmɔ; ŋko mmɔ ema esuhɔde-idem ata eti eti ke iso esie.

50 Iŋ, mmɔ ema eti mme akpanŋkpɔ emi Jehovah akanamde ɔnɔ mmɔ, ete ke enye ama anyaŋa mmɔ osio ke mkpa, ye ke ufin, ye ke mme ŋkpɔkɔbi, ye ke utɔ kpukpru ukut, ndien ke enye ama anam mmɔ ebɔhɔ ewɔrɔ ke ubɔk mme asua mmɔ.

51 Ndien mmɔ ema ebɔŋ akam enɔ Jehovah Abasi mmɔ kpukpru ini, tutu ete ke Jehovah ama ɔdiɔŋ mmɔ, nte asaŋade ye ikɔ esie, tutu ete ke mmɔ ema ekop odudu enyuŋ eforo ke isɔŋ oro.

52 Ndien edikem ete ke ema enam kpukpru mme ŋkpɔ emi. Ndien Helaman ama akpa, ke ɔyɔhɔ isua ukara edip ye efit mme ebiere ikpe nnɔ ikɔt Nephi.