1 Ndien idahaemi edikem ke ntɔŋɔ ɔyɔhɔ isua edip ye usukkiet mme ebiere ikpe, ete ke Ammon ɔdɔŋ etop ɔnɔ Moroni oyom ete enye ɔkpuhɔ mbon ŋkpɔkɔbi.

2 Ndien edikem ete Moroni adaresit ata eti eti abaŋa ebeŋe emi, koro enye ama oyom ndinyene mme ŋkpɔ udu uwem/udia emi ekenɔde man eŋwam mbon ŋkpɔkɔbi mme Lamanite man eda eŋwam ikɔt esie; ndien enye ŋko ama oyom ikɔt esie man esɔŋɔ mbon ekɔŋ esie.

3 Idahaemi mme Lamanite ema emum uwak iban ye nditɔ, ndien ŋwan ndomo kiet mme eyen ikiduhe ke ofuri mbon ŋkpɔkɔbi Moroni, mme mbon ŋkpɔkɔbi emi Moroni okomumde; ke ntak oro Moroni ama ebiere ke ŋkari ndibɔ ediwak mbon ŋkpɔkɔbi mme Nephite nte ekpededi nto mme Lamanite.

4 Ke ntak oro enye ewet ŋwed, onyuŋ ɔdɔŋ eyen ufɔk Ammoron, ukem emi akadade ŋwed ɔsɔk Moroni. Idahaemi emi edi mme ikɔ emi enye ekewetde ɔnɔ Ammoron, ete:

5 Sese, Ammoron, ami mewet nnɔ fi esisit kabaŋa ekɔŋ emi emi afo aŋwanade ye ikɔt mi, mme midihe emi eyen eka fo akaŋwanade ye mmɔ, ye emi afo osuk ebierede ndika iso ye ke ini enye ama akakpa.

6 Sese, ami nyetiŋ esisit nnɔ fi mbaŋa unenikpe Abasi, ye akaŋkaŋ iyatesit Abasi Ibom esie, emi ɔkɔŋɔde ebet mbufo ibɔhɔke mbufo ekabade esit enyuŋ ekot mme mbon ekɔŋ mbufo esio esin ke mme isɔŋ mbufo, mme mme isɔŋ inyene mbufo, emi edide isɔŋ Nephi.

7 Iŋ, ami nyetiŋ mme ŋkpɔ emi nnɔ fi edieke afo enyenede ukeme ndikpaŋ utɔŋ nnɔ mmɔ; iŋ, ami nyetiŋ nnɔ fi mbaŋa enyene ndik hell emi ebetde ndibɔ utɔ mme owot owo nte afo ye eyen eka fo edide, ibɔhɔke mbufo ekabade esit enyuŋ efiak edem ekpɔŋ mme uduak uwot owo mbufo, ndien efiak edem ye mme mbon ekɔŋ mbufo eka isɔŋ mbufo.

8 Edi ke ntak emi mbufo ekesinde mme ŋkpɔ emi ini kiet, ndien enyuŋ eŋwana ye ikɔt Jehovah, kpa ntre ami mekere ke mbufo eyefiak enam ntre.

9 Ndien idahaemi sese, nnyin imibeŋe idem ndiŋwana ye mbufo, ndien ibɔhɔke mbufo efiak edem ekpɔŋ mme uduak mbufo, sese, mbufo eyeda iyatesit Abasi oro emi mbufo esinde edori ke idem mbufo, tutu esim ofuri ofuri nsobo mbufo.

10 Edi, ke adaŋa nte Jehovah odude uwem, mme mbon ekɔŋ nnyin eyedi ebine mbufo ibɔhɔke mbufo efiak edem, ndien mkpa ɔyɔsɔp edise mbufo, koro nnyin iyenim mme obio nnyin ye mme isɔŋ nnyin; iŋ, ndien nnyin iyenim edu ukpono nnyin ye edu Abasi nnyin.

11 Edi sese, etie mi nte ami ntiŋ mme ŋkpɔ emi nnɔ fi ke ikpikpu; mme etie mi nte ke afo edi eyen hell; ke ntak oro ami nyetre ŋwed mi ke ndidɔhɔ fi nte ke ndikpuhɔke mbon ŋkpɔkɔbi, ibɔhɔke edi ke unyime ete ke afo ayasana ebe ye ŋwan esie ye nditɔ esie ayak, ke ibuot owo kiet; edieke emi edide ete ke mbufo eyenam enye, ami nyanam ukpuhɔ.

12 Ndien sese, edieke mbufo minamke emi, ami ye mme mbon ekɔŋ mi iyidi eŋwan ye mbufo; iŋ, tutu ami nyɔnɔ iban mi ye nditɔ mi mme ŋkpɔ ekɔŋ, ndien ami nyedi eŋwan ye mbufo, ndien ami nyetiene mbufo tutu ke esit isɔŋ mbufo, emi edide isɔŋ akpa inyene nnyin; iŋ, ndien edidi iyip ke iyip, iŋ, uwem ke uwem; ndien ami nyɔnɔ mbufo ekɔŋ kpa tutu ewot mbufo esio ke iso isɔŋ.

13 Sese, ami ndu ke iyatesit mi, ye ŋko ikɔt mi; mbufo emedomo ndiwot nnyin, ndien nnyin idomo ndikpeme idem nnyin ikpɔŋ. Edi sese, edieke mbufo edomode ndika iso nwot nnyin nnyin iyidomo ndiwot mbufo; iŋ, ndien nnyin iyiyom isɔŋ nnyin, isɔŋ akpa inyene nnyin.

14 Idahaemi ami metre ŋwed mi. Ami ndi Moroni; ami ndi ada usuŋ mbon mme Nephite.

15 Idahaemi edikem ete Ammoron, ke ini enye amakɔbɔ ŋwed emi, ama ayatesit; ndien enye ewet ŋwed efen ɔnɔ Moroni, ndien emi edi mme ikɔ emi enye ekewetde, ete:

16 Ami ndi Ammoron, edidem mme Lamanite; ami ndi eyen eka Amalickiah emi mbufo ewotde. Sese, ami nyosio usiene iyip esie ke idem mbufo, iŋ, ndien ami nyedi eŋwan ye afo ye mme mbon ekɔŋ mi koro ami mfeheke mme ikɔ efime fo.

17 Koro sese, mme ete mbufo ema enam idiɔk ye nditɔ eka mmɔ, tutu ete mmɔ ema ebɔ mmɔ unen ndikara mmɔ ke ini ekedide unen mmɔ ndikara.

18 Ndien idahaemi sese, edieke mbufo ediyakde mme ŋkpɔ ekɔŋ mbufo inim, enyuŋ esuk idem mbufo nte mbon emi ekenyenede unen ndikara ukara, ke ini oro ke ami ndinam ete ikɔt mi eyak mme ŋkpɔ ekɔŋ mmɔ enim ndien idiŋwanake ekɔŋ aba.

19 Sese, afo eme ofime ediwak ikɔ-ndik abaŋa mi ye ikɔt mi; edi sese, nnyin ifeheke mme ikɔ efime fo.

20 Edi, ami nyayak enam ukpuhɔ mbon ŋkpɔkɔbi nte afo ebeŋede, ye idaresit, man ami nsuhɔ udia mi nnɔ mbon ekɔŋ mi; ndien nnyin iyiŋwana ekɔŋ emi edidide nsinsi, mme edi ke ndisin mme Nephite ke idak nnyin mme ke nsinsi nsobo mmɔ.

21 Ndien kabaŋa Abasi oro emi afo ɔdɔhɔde ke nnyin imisin, sese, nnyin ifiɔkke utɔ owo oro; mbufo ŋko ifiɔkke; edi edieke edide ete ke utɔ owo oro odu, nnyin ikereke ite ke enye obot nnyin ye mbufo.

22 Ndien edieke edide ete ke satan ye hell edu, sese ndi enye ididɔŋke fi aka do okoduŋ ye eyen eka mi emi mbufo ewotde, emi afo ekerede ete ke enye aka utɔ ebiet oro? Edi sese mme ŋkpɔ emi idighe akpan ŋkpɔ.

23 Ami ndi Ammoron, ndien nto ubon Zoram, emi mme ete mbufo ekefikde enyuŋ edade ewɔrɔ ke Jerusalem.

24 Ndien idahaemi sese, ami ndi enyene uko Lamanite; sese, eŋwana ekɔŋ emi ndisio usiene idiɔk emi ekenamde mmɔ, ye ndinim nyuŋ mbɔ mme unen mmɔ ndikara; ndien ami ntre ŋwed mi emi ŋwetde nnɔ Moroni.