1 Ndien idahaemi edikem ete ke ami mma mbɔ ŋwed nto Ammoron, edidem, ɔdɔhɔde ete ke edieke ami ndisanade mbon ŋkpɔkɔbi ekɔŋ emi nnyin ikimumde iyak ke enye ayayak obio Antiparah ɔnɔ nnyin.

2 Edi ami nnɔ ŋwed esɔk edidem, nte ke nnyin ima ifiɔk ke mme mbon ekɔŋ nnyin ekeme ndimum obio Antiparah ye odudu nnyin; ndien yak nnyin ikut idem nnyin nte mme anana ifiɔk ke ndisana mbon ŋkpɔkɔbi nyak ke ntak obio oro, ndien ete ke nnyin idisana mbon ŋkpɔkɔbi nnyin iyak ke ukpuhɔ ikpɔŋ.

3 Ndien Ammoron esin ŋwed mi, koro enye midikpuhɔke mbon ŋkpɔkɔbi; ke ntak oro nnyin itɔŋɔ ndinam mbeŋeidem ndika eŋwan ye obio Antiparah.

4 Edi mbon Antiparah ema ekpɔŋ obio oro, enyuŋ efehe eka mme obio mmɔ efen, emi mmɔ ekenyenede, ndisɔŋɔ mmɔ; ndien ke ntem obio Antiparah ama ɔduɔ oduk ke ubɔk nnyin.

5 Ndien ke ntem ke ɔyɔhɔ isua ukara edip ye itiaita mme ebiere ikpe eketre.

6 Ndien edikem ete ke ntɔŋɔ isua edip ye usukkiet, nnyin ima ibɔ mme ŋkpɔ udu uwem, ye ŋko ndiana inɔ mbon ekɔŋ nnyin, ito isɔŋ Zarahemla, ye isɔŋ emi akanade okuk, esimde ke ibat iden tɔsin itiokiet, idian ye nditɔ iden mme Ammonite ata emi ekedide ndidiana ye nditɔeka mmɔ, otu ekpri ibat nditɔ tɔsin iba mi. Ndien idahaemi sese, nnyin ima ikop odudu, iŋ, ndien nnyin ima inyene ŋko akpakip ŋkpɔ udu uwem ekedade esɔk nnyin.

7 Ndien edikem ete ke ekedi uduak nnyin ndiŋwana ekɔŋ ye mbon ekɔŋ emi ekenimde ndikpeme obio Cumeni.

8 Ndien idahaemi sese, ami nyowut fi nte ke nnyin ima inam uduak nnyin; iŋ, ye ɔkpɔsɔŋ mbon ekɔŋ nnyin, mme ye ubak ɔkpɔsɔŋ mbon ekɔŋ nnyin, nnyin ima ikanade ikuk, ke okoneyo, obio Cumeni, ke ekpri ini mbemiso mmɔ ebɔ mme ŋkpɔ udia.

9 Ndien edikem ete ke nnyin ima ina ikanade obio ikuk ke uwak okoneyo; edi nnyin ima ina ke enyɔŋ mme akaŋkaŋ nnyin, inyuŋ inim mbon ukpeme, man mme Lamanite ekudi ke okoneyo idiwot nnyin, emi mmɔ ekedomode ediwak ini; edi ke adaŋa ini nte mmɔ ekedomode emi ema eduɔk iyip mmɔ.

10 Ke akaptre mme ŋkpɔ udia mmɔ ema edisim, ndien mmɔ ekeyom ndiduk obio oro ke okoneyo. Ndien nnyin, utu ke idi mme Lamanite, ikidi mme Nephite; ke ntak oro, nnyin ima imum mmɔ ye mme ŋkpɔ udia mmɔ.

11 Ndien ke misehe mme Lamanite ekebiɔŋɔde mmɔ esio ke uŋwam mmɔ ke utɔ usuŋ emi, mmɔ ema esuk ebiere ndinyene obio oro; ke ntak oro ama ɔfɔn ete nnyin ida mme ŋkpɔ udia oro inyuŋ inɔ mmɔ eka obio Judea, ye mbon ŋkpɔkɔbi nnyin eka isɔŋ Zarahemla.

12 Ndien edikem ete ke uwak usen ikibehe ifep mbemiso mme Lamanite etɔŋɔ ndiduɔk ofuri idorienyin kabaŋa uŋwam; ke ntak oro mmɔ ema eyak obio oro esin nnyin ke ubɔk; ndien ke ntem nnyin ima inam uduak nnyin ke ndinyene obio Cumeni.

13 Edi edikem ete mbon ŋkpɔkɔbi nnyin ema ewak eti eti ete, kpa ye ibat nnyin awakde eti, nnyin ikikanke inyaŋa ke ana nte nnyin ida kpukpru mbon ekɔŋ nnyin ndikpeme mmɔ, mme ndiwot mmɔ.

14 Koro sese, mmɔ eyewɔrɔ ke uwak ibat, ndien eŋwana ye mme itiat, ye mme eto, mme ŋkpɔ ekededi emi mmɔ emumde ke ubɔk mmɔ, tutu ete ke nnyin ima iwot mmɔ emi ekewakde ekan tɔsin iba ke ini mmɔ ema ekeyak idem mmɔ enɔ nte mbon ŋkpɔkɔbi ekɔŋ.

15 Ke ntak oro ama ɔfɔn ɔnɔ nnyin, ete nnyin isin utit ke uwem mmɔ, midighe ikpeme mmɔ, ye akaŋkaŋ ke ubɔk, isuhɔde ika isɔŋ Zarahemla; ndien ŋkomme ŋkpɔ udia nnyin ikikemke ikɔt nnyin aba, isehe ke nnyin ima ibɔ ito mme Lamanite.

16 Ndien idahaemi, ke mme mkpɔsɔŋ idaha emi, ama akabade edi ata akpan-ŋkpɔ ndibiere mbaŋa mme mbon ŋkpɔkɔbi ekɔŋ emi; edi, nnyin ima ibiere ndinɔ mmɔ esuhɔde eka isɔŋ Zarahemla; ke ntak oro nnyin isat usuk ikɔt nnyin, inyuŋ inɔ mmɔ odudu ibaŋa mbon ŋkpɔkɔbi ekɔŋ nnyin ndida mmɔ nsuhɔde ŋka isɔŋ Zarahemla.

17 Edi edikem ete ke mkpɔŋ mmɔ ema enyɔŋ edi. Ndien idahaemi sese, nnyin ikibupke mmɔ ibaŋa mbon ŋkpɔkɔbi emi; koro sese, mme Lamanite ema edi eŋwan ye nnyin, ndien mmɔ eke enyɔŋ edi ke ini ndinyaŋa nnyin man ididuɔ iduk ubɔk mmɔ. Koro sese, Ammoron ama ɔnɔ mbufa ŋkpɔ udia esɔk mmɔ ŋko ye ata ediwak mbon ekɔŋ.

18 Ndien edikem ete mme iden oro emi nnyin ikidɔŋde ye mbon ŋkpɔkɔbi oro ema edisim ke ini nditre mmɔ, nte mmɔ ekeyomde ndikan nnyin.

19 Edi sese, mkpri ibat nditɔ tɔsin iba ye ata mi ema eŋwana ata eti eti; iŋ, mmɔ ema esɔŋɔ ke iso mme Lamanite, ndien ema ewot kpukpru mbon emi ekebiɔŋɔde mmɔ.

20 Ndien nte nyɔhɔ nsuhɔ mbon ekɔŋ nnyin ekeyomde ndifiak edem ke iso mme Lamanite, sese, tɔsin iba ye ata oro ema esɔŋɔ inyuŋ inyimeke.

21 Iŋ, ndien mmɔ ema esuk ibuot enyuŋ edomo ndinam kpukpru uyo ikɔ nnennen; iŋ, ndien kpa nte asaŋade ye mbuɔtidem mmɔ ema enam enɔ mmɔ; ndien ami mma nti mme ikɔ emi mmɔ eketiŋde enɔ mi ete ke mme eka mmɔ ema ekpep mmɔ.

22 Ndien idahaemi sese, ekedi nditɔ mi emi, ye mbon oro emi ekesatde ete eda mbon ŋkpɔkɔbi usuŋ, ke nnyin ikɔm ibaŋa akwa edikan emi; koro edi mmɔ ekekan mme Lamanite; ke ntak oro ema ebin mmɔ efiak enyɔŋ obio Manti.

23 Ndien nnyin ikaiso inyene obio nnyin Cumeni, ndien owo ikiwotke nnyin kpukpru ke akaŋkaŋ; edi, ima iyɔ akwa atahade.

24 Ndien edikem ete ke ini mme Lamanite ema ekefehe, ami nsɔp nnɔ uyo nte esio ikɔt mi emi ekedade unan efep ke otu mme akpa mkpa, nnyuŋ nnam ete esɔbɔ unan mmɔ.

25 Ndien edikem ete ke mmɔ ekedi ikie iba, ke otu tɔsin iba ye ata mi, emi ekeduɔde isiɔŋ ke ntak unana iyip; edi, nte asaŋade ye mfɔn Abasi, ye ke akwa mkpaidem nnyin, ye ŋko ye ke idaresit ofuri mbon ekɔŋ nnyin, ikiduhe owo mmɔ ndomo kiet emi akakpade; iŋ, ndien owo mmɔ ndomo kiet ikiduhe emi mikinyeneke ediwak unan.

26 Ndien idahaemi, ntim nnim mmɔ ama akpa ofuri mbon ekɔŋ nnyin idem, iŋ, ete ke esuhɔ mmɔ ke ini ekewotde nditɔeka nnyin tɔsin kiet. Ndien nnyin ke akpanikɔ ibat enye inɔ utibe odudu Abasi, ke ntak akwa mbuɔtidem mmɔ ke se ekekpepde mmɔ ete ebuɔtidem—ete ke edinen Abasi odu, ndien ke owo ekededi emi miyikke, ete ke eyetim mmɔ enim ke utibe odudu esie.

27 Idahaemi emi ekedi mbuɔtidem mmɔ emi ami ntiŋde mbaŋa; mmɔ edi mme uyen, ndien esit mmɔ ɔsɔŋ, ndien mmɔ esin idorienyin mmɔ ke Abasi kpukpru ini.

28 Ndien edikem ete ke ini nnyin ima ikise ŋkpɔ ibaŋa mbon nnyin emi ekedade unan, ima ikinyuŋ ibuk mme akpa mkpa nnyin ye ŋko mme akpa mkpa mme Lamanite, emi ekewakde, nnyin ima ibup Gid ibaŋa mbon ŋkpɔkɔbi emi mmɔ eketɔŋɔde ndida nsuhɔde ŋka isɔŋ Zarahemla.

29 Idahaemi Gid ekedi ada ibuot mme etubom ekɔŋ emi ekemekde ete ada mmɔ aka isɔŋ oro.

30 Ndien idahaemi, emi edi mme ikɔ emi Gid eketiŋde ɔnɔ mi ete: Sese, nnyin ima itɔŋɔ ndisuhɔde ŋka isɔŋ Zarahemla ye mbon ŋkpɔkɔbi nnyin. Ndien edikem ete ke nnyin ima isobo ye mbon uyep mme mbon ekɔŋ nnyin, emi ekedɔŋde ete ekeyep nna ekɔŋ mme Lamanite.

31 Ndien mmɔ efiori enɔ nnyin, ete—Esese, mbon ekɔŋ mme Lamanite ke esaŋa eka obio Cumeni; ndien esese, mmɔ eyeŋwana ye mmɔ, iŋ, ndien eyewot ikɔt nnyin.

32 Ndien edikem ete mbon ŋkpɔkɔbi nnyin ema ekop mfiori mmɔ, emi akanamde mmɔ enyene uko; ndien mmɔ ema edaha eda ke nsɔŋ ibuot ye nnyin.

33 Ndien edikem ke ntak nsɔŋ ibuot mmɔ nnyin ima inam ete akaŋkaŋ nnyin odoro mmɔ ke idem. Ndien edikem ete ke mmɔ ke eboho kiet ema efehe eduk mme akaŋkaŋ nnyin, ke emi, ema ewot ibat mmɔ emi ekewakde akan; ndien mbon emi ekesuhɔde ewɔrɔ ke otu enyuŋ efehe ekpɔŋ nnyin.

34 Ndien sese, ke ini mmɔ ema ekefehe ndien nnyin ikanke isim mmɔ, nnyin isɔp ida isaŋ nnyin ika obio Cumeni; ndien sese, nnyin ima isim ke ini man nnyin iŋwam nditɔ eka nnyin ke nditim obio oro nnim.

35 Ndien sese, efiak enam nnyin ibɔhɔ ke ubɔk mme asua nnyin. Ndien ekɔm enyene enyiŋ Abasi nnyin; koro sese, edi enye anam nnyin ibɔhɔ; iŋ, anam akpan-ŋkpɔ emi ɔnɔ nnyin.

36 Idahaemi edikem ete ke ini ami, Helaman, mma nkokop mme ikɔ Gid emi, ami mma nyɔhɔ ye akwa idaresit ke ntak mfɔn Abasi ke nditim nnyin nnim, man nnyin kpukpru ikukpa; iŋ, ami modori enyin nte ke mme ukpɔŋ mbon emi ekewotde ke eduk ke nduɔk odudu Abasi mmɔ.