1 Idahaemi edikem ete ke ini Moroni amakɔbɔ ŋwed emi enye ama ayatesit akan akpa, koro enye ama ɔfiɔk ete ke Ammoron ama enyene ifiɔk emi ɔfɔnde ama abaŋa ŋkari esie; iŋ, enye ama ɔfiɔk ete ke Ammoron ama ɔfiɔk ete ke ikidighe ke edinen ntak ke enye akaŋwana ekɔŋ ye ikɔt Nephi.

2 Ndien enye ɔdɔhɔ ete: Sese, ami ndikpuhɔke mbon ŋkpɔkɔbi ye Ammoron ibɔhɔke enye okot ntak esie ada, nte ami ntiŋde ke ŋwed mi; koro ami ndiyakke ete enye enyene odudu akan se enye enyenede.

3 Sese, ami mɔfiɔk ebiet emi mme Lamanite ekpemede ikɔt mi emi mmɔ emumde nte mbon ŋkpɔkɔbi; ndien nte Ammoron midinɔhɔ mi ŋwed mi, sese, ami nyɔnɔ enye nte mme ikɔ mi edide; iŋ, ami nyoyom mkpa ke otu mmɔ tutu mmɔ ebeŋe eyom emem.

4 Ndien idahaemi edikem ete ke ini Moroni amaketiŋ mme ikɔ emi, enye anam ete eduŋɔde ke otu ikɔt esie, ete ke ndusuk ke enye oyokut owo emi otode ubon Laman ke otu mmɔ.

5 Ndien edikem ete mmɔ ekut owo kiet, emi enyiŋ esie ekedide Laman; ndien enye ekedi eyen ufɔk edidem emi Amalickiah okowotde.

6 Idahaemi Moroni anam ete yak Laman ye ekpri ibat owo esie eka ebine mme andikpeme mme Nephite.

7 Idahaemi ekekpeme mme Nephite ke obio Gid; ke ntak oro Moroni emek Laman onyuŋ anam ete ekpri ibat owo eka ye enye.

8 Ndien ke ini ekedide mbubreyo Laman aka ebine mme andikpeme mme Nephite, ndien sese, mmɔ ekut nte enye edide ndien mmɔ efiori enye ete asian idem; edi enye ɔdɔhɔ mmɔ ete: Ekufehe ndik; esese, ami ndi Lamanite. Esese, nnyin imifehe ibɔhɔ mme Nephite, ndien mmɔ ke ede idap; ndien nnyin imimem mmim mmɔ inyuŋ ida idi ye nnyin.

9 Idahaemi ke ini mme Lamanite ekekopde mme ikɔ emi mmɔ ebɔ enye ye idaresit; ndien mmɔ edɔhɔ enye ete: Nnɔ nnyin mmin fo, man nnyin iŋwɔŋ; nnyin iminem esit ite ke afo amada mmin edi ye afo koro idem emem nnyin.

10 Edi Laman ɔdɔhɔ mmɔ ete: Yak nnyin inim mmin nnyin tutu nnyin ika uŋwana ekɔŋ ye mme Nephite. Edi ikɔ emi etim anam mmɔ eyom ndiŋwɔŋ mmin oro;

11 Koro, mmɔ edɔhɔ ete: Idem emem nnyin, ke ntak oro yak nnyin iŋwɔŋ mmin emi, ndien ke ekpri ini ama ebe nnyin iyibɔ mmin nte udeme nnyin, emi edinɔde nnyin odudu ndiŋwana ye mme Nephite.

12 Ndien Laman ɔdɔhɔ mmɔ ete: Mbufo enam nte udɔŋ mbufo edide.

13 Ndien edikem ete mmɔ eŋwɔŋ mmin oro nte emama; ndien ama enem ke inua, ke ntak oro mmɔ efiak eŋwɔŋ nte emama; ndien ekedi ɔkpɔsɔŋ mmin, ke ekenamde enye ete enyene odudu.

14 Ndien edikem ete mmɔ ema eŋwɔŋ enyuŋ enam idara, ndien ke ekpri ini ama ekebe mmɔ ema ekpa mmin.

15 Ndien ke ini Laman ye ikɔt esie ekekutde ete ke kpukpru mmɔ ekpa mmin, ndien ke ekedu ke ɔkpɔsɔŋ idap, mmɔ enyɔŋ ebine Moroni enyuŋ ekedɔhɔ enye kpukpru mme ŋkpɔ emi eketibede.

16 Ndien idahaemi emi ekedi nte asaŋade ye uduak Moroni. Ndien Moroni ama ebeŋe ikɔt esie idem ye mme ŋkpɔ ekɔŋ; ndien enye aka obio Gid, ke ini mme Lamanite ekedude ke ɔkpɔsɔŋ idap ye ekpade mmin, ndien otop mme ŋkpɔ ekɔŋ ɔnɔ mbon ŋkpɔkɔbi, tutu ete kpukpru mmɔ ekama mme ŋkpɔ ekɔŋ.

17 Iŋ, ɔnɔ kpa iban mmɔ, ye kpukpru nditɔ mmɔ, ke adaŋa ibat nte ekekemede ndikama mme ŋkpɔ ekɔŋ, ke ini Moroni amakɔnɔ kpukpru mbon ŋkpɔkɔbi oro ŋkpɔ ekɔŋ; ndien ekenam kpukpru ŋkpɔ oro ke ata ndop-uyo.

18 Edi ekpedi ke mmɔ ema edemede mme Lamanite, sese mmɔ ema ekpa mmin ndien mme Nephite ekpeke wot mmɔ.

19 Edi sese, emi ikidighe uduak Moroni; enye ikikopke idaresit ke uwot owo mme uduɔk iyip, edi enye akadaresit ke ndiyaŋa ikɔt esie nsio ke nsobo; ndien man ke ntak emi enye okuda unana edinenikpe unɔ idem esie, enye imaha ndiŋwana ye mme Lamanite nyuŋ nwot mmɔ ke ukpa mmin mmɔ.

20 Edi enye ama enyene mme uduak esie; koro enye ama ɔnɔ mbon ŋkpɔkɔbi mme Nephite emi ekedude ke esit obio mme ŋkpɔ ekɔŋ.

21 Ndien ekem enye anam mbon emi ekedude ye enye efiak edem esisit ekpɔŋ mmɔ, ndien ekanade mbon ekɔŋ mme Lamanite ekuk.

22 Idahaemi sese ekenam emi ke okoneyo, man ke ini mme Lamanite ema edemede ke usen ubɔk mmɔ ekut ete ke mme Nephite ema ekanade mmɔ ekuk ke aŋwa aŋwa obio, ndien ete ke mbon ŋkpɔkɔbi mmɔ ema ekama ŋkpɔ ekɔŋ ke esit obio.

23 Ndien ke emi mmɔ ema ekut ete ke mme Nephite ema enyene odudu ekan mmɔ; ndien ke mme utɔ idaha ntem mmɔ ema ekut ete ke ifɔnke ete mmɔ eŋwana ye mme Nephite; ke ntak oro mme ada ibuot mme etubom ekɔŋ mmɔ oyom ete yak mmɔ esana mme ŋkpɔ ekɔŋ mmɔ eyak, ndien mmɔ eda mmɔ edi enyuŋ etop mmɔ enim ke ikpat mme Nephite, ekpe-ubɔk eyom mbɔm.

24 Idahaemi sese, emi ekedi uduak Moroni. Enye omum mmɔ nte mbon ŋkpɔkɔbi ekɔŋ, onyuŋ ada obio oro enyene, onyuŋ anam ete esana kpukpru mbon ŋkpɔkɔbi eyak, emi ekedide mme Nephite, ndien mmɔ ema ediana ye mbon ekɔŋ Moroni, ndien ekedi akwa odudu enɔ mbon ekɔŋ esie.

25 Ndien edikem ete enye ama anam mme Lamanite, emi enye okomumde nte mbon ŋkpɔkɔbi, ete mmɔ etɔŋɔ utom ke ndisɔŋɔ mme ebiet ukpeme nkanade obio Gid.

26 Ndien edikem ete ke ini enye ama ɔkɔsɔŋɔ obio Gid, nte asaŋade ye mme udɔŋ esie, enye anam ete etaŋ mbon ŋkpɔkɔbi esie eka obio Bountiful; ndien enye ŋko ama ekpeme obio oro ye ata ɔkpɔsɔŋ mbon ekɔŋ.

27 Ndien edikem ete mmɔ ema enam, kpa ye kpukpru mme ŋkari mme Lamanite, enim enyuŋ ekpeme kpukpru mbon ekɔŋ emi mmɔ ekemumde, ndien ŋko ekara kpukpru isɔŋ ye ufɔn emi mmɔ ekefiakde enyene.

28 Ndien edikem ete mme Nephite efiak etɔŋɔ ndikan, ye ndifiak nyene mme unen mmɔ ye mme odudu mmɔ.

29 Ediwak ini ke mme Lamanite ekedomo ndikanade mmɔ nkuk ke okoneyo, edi ke mme edinam emi mmɔ ema enana uwak mbon ekɔŋ.

30 Ndien ediwak ini ke mmɔ ekedomo ndinɔ mme Nephite mmin mmɔ, man mmɔ ewot mmɔ ye idiɔk ibɔk mme ye ukpa mmin.

31 Edi sese, mme Nephite ema esɔp ke nditi Jehovah Abasi mmɔ ke ini ukut mmɔ emi. Owo ikikanke imum mmɔ ke mme afia mmɔ; iŋ, mmɔ ikimaha ndiŋwɔŋ mmin mmɔ, ibɔhɔke mmɔ ebemiso enɔ usuk mbon ŋkpɔkɔbi mme Lamanite.

32 Ndien ke ntem mmɔ ema ekpeme idem man owo ndomo kiet okunɔ mmɔ idiɔk ibɔk; koro edieke mmin mmɔ ekemede ndiwot owo Lamanite enye ŋko ekeme ndiwot owo Nephite; ndien ke ntem mmɔ ema edomo kpukpru se mmɔ eŋwɔŋde ese.

33 Ndien idahaemi edikem ete ke ama ɔfɔn ete Moroni anam mbeŋidem ndiŋwana ye obio Morianton; koro sese, mme Lamanite ema, ke mme utom mmɔ, esɔŋɔ obio Morianton tutu enye akabade edi ata ɔkpɔsɔŋ ebiet.

34 Ndien mmɔ eka iso eda mbufa mbon ekɔŋ edi obio oro, ye ŋko mme mbufa ŋkpɔ udia.

35 Ndien ke ntem ke ɔyɔhɔ isua ukara edip ye usukiet mme ebiere ikpe nnɔ ikɔt Nephi eketre.