1 Ndien idahaemi edikem ete, ke ndondo oro Amalickiah ama akada ukara ke obio oro enye ɔtɔŋɔ ndidemede iyatesit ke esit mme Lamanite mbaŋa ikɔt Nephi; iŋ, enye ama emek mme idenowo ete etiŋ ikɔ enɔ mme Lamanite to ke mme tower mmɔ ebaŋa mme Nephite.

2 Ndien ke ntem enye esin ibifik ke esit mmɔ abaŋa mme Nephite, tutu ete ke mkpere utit ɔyɔhɔ isua ukara efutenaŋ mme ebiere ikpe, enye ke ekenyenede mme uduak esie tutu esim ini emi, iŋ, ke ekenamde enye edidem mme Lamanite, enye oyom ŋko ndikara ofuri isɔŋ oro, iŋ, ye kpukpru mbon emi ekedude ke isɔŋ oro, mme Nephite ŋko ye mme Lamanite.

3 Ke ntak oro enye ama anam uduak esie, koro enye ama ɔsɔŋ esit mme Lamanite onyuŋ anam mmɔ enana ekikere, onyuŋ edemere mmɔ ke iyaresit, tutu ete enye ama obok ata ediwak udim owo ɔtɔ kiet man eka ekɔŋ ye mme Nephite.

4 Koro enye ama ekpe ebiere, ke ntak ediwak ibat ikɔt esie, ndikan mme Nephite nyuŋ nda mmɔ nsin ke ufin.

5 Ndien ke ntem enye ama emek mme ada ibuot mme etubom ekɔŋ eke mme Zoramite, ke edide ke edi mmɔ ekefiɔk odudu mme Nephite ekan, ye mme ebiet udibe mmɔ, ye mme nkaŋ obio mmɔ emi ekememde idem akan; ke ntak oro enye ama emek mmɔ ete edi mme ada ibuot mme etubom ekɔŋ ɔnɔ mme mbon ekɔŋ esie.

6 Ndien edikem ete mmɔ eda nna-ekɔŋ mmɔ, enyuŋ eka ke isɔŋ Zarahemla ke wilderness.

7 Idahaemi edikem ete ke ini Amalickiah okosuk ɔbɔde odudu ke ŋkari ye nsu, Moroni, ke ŋkaŋ oko, ke ekebeŋe esit mme owo ete ebuɔtidem ke Jehovah Abasi mmɔ.

8 Iŋ, enye kɔsɔŋɔ mbon ekɔŋ mme Nephite, ndien kɔbɔp mme mkpri ufɔk ukpeme, mme mme ebiet udibe; etop ntan edori ekanade man akanade mbon ekɔŋ esie okuk, ndien ŋko ɔbɔp mme ibibene itiat ndikanade mmɔ nkuk, akanade mme obio mmɔ ye mme adaŋa isɔŋ mmɔ; iŋ, kpukpru akanade isɔŋ okuk.

9 Ndien ke mme ebiet emi ukpeme mmɔ ekememde ekan enye enim ibat owo emi ekewakde ekan; ndien ke ntem enye ekpeme onyuŋ ɔsɔŋɔ isɔŋ emi mme Nephite ekenyenede.

10 Ndien ke ntem enye ekebeŋidem ndikpeme uwɔrɔ ufin mmɔ, mme isɔŋ mmɔ, iban mmɔ, ye nditɔ mmɔ, ye emem mmɔ, ŋko man mmɔ edu uwem enɔ Jehovah Abasi mmɔ, ŋko man mmɔ etim se mme asua mmɔ ekekotde usuŋ unam-ŋkpɔ mme Christian enim.

11 Ndien Moroni ekedi ɔkpɔsɔŋ ye enyene odudu owo; enye ekedi edenowo emi ekenyenede ifiɔk emi ɔfɔnde ama; iŋ, edenowo emi mikidatke esit ke uduɔk iyip; edenowo emi ukpɔŋ esie akadatde esit ke uwɔrɔ ufin ye ubɔhɔ obio esie, ye nditɔ eka esie nto ufin ye utom ufin;

12 Iŋ, edenowo emi esit esie ɔkɔyɔhɔde ye ekɔm ɔnɔ Abasi esie, ke ntak mme uwak ifet ye mme edidiɔŋ emi enye ɔkɔnɔde ikɔt esie; edenowo emi ekesinde idem ata eti eti anam utom ɔnɔ unwam ye ubɔhɔ ikɔt esie.

13 Iŋ, ndien enye ekedi edenowo emi ɔkɔsɔŋde ke ukpek-ŋkpɔ edu ukpono Christ, ndien enye ama otomo ye uŋwɔŋɔ ndikpeme ikɔt esie, mme unen esie, ye obio esie, ye edu ukpono esie, tutu esim ndiduɔk iyip esie.

14 Idahaemi ema ekpep mme Nephite ndikpeme idem mmɔ mbaŋa mme asua mmɔ, tutu ke ndiduɔk iyip edieke anade nte edi ntre; iŋ, ndien ema ekpep mmɔ ŋko ete tutu amama ekuyom owo ikɔ, iŋ, ndien ete tutu amama ekumenede akaŋkaŋ ibɔhɔke edi ye asua, ibɔhɔke edi nditim uwem mmɔ nnim.

15 Ndien emi ekedi ukpep-ŋkpɔ edu ukpono mmɔ, ete ke ndinam ntre ete ke Abasi ayanam mmɔ eforo ke isɔŋ, mme ke usuŋ efen, edieke mmɔ esɔŋɔde ke ndinim mme ibet Abasi ete ke enye ayanam mmɔ eforo ke isɔŋ; iŋ, eteme mmɔ ete efehe, mme ndibeŋidem nnɔ ekɔŋ, nte afanikɔŋ mmɔ edide;

16 Ndien ŋko, ete ke Abasi ayanam mmɔ efiɔk ebiet emi anade nte mmɔ eka man ekpeme idem mmɔ ebaŋa mme asua mmɔ, ndien ke ndinam ntre, Jehovah ayanam mmɔ ebɔhɔ; ndien emi ekedi ukpep-ŋkpɔ edu ukpono Moroni, ndien esit esie amadara ke enye; idighe ke ndiduɔk iyip edi ke ndinam eti, ke nditim ikɔt esie nnim, iŋ, ke ndinim mme ibet Abasi, iŋ, ye ke ndisin ukwaŋ-ŋkpɔ.

17 Iŋ, ke akpanikɔ, ke akpanikɔ ke ami ndɔhɔ mbufo, edieke kpukpru owo ekpekedude, ndien ema edu, ndien nsinsi ekpedu, nte Moroni, sese, kpa mme odudu hell ekpe enyeŋ ke nsinsi; iŋ, satan ikpinyeneke odudu ke esit nditɔ owo.

18 Sese, enye eketie edenowo nte Ammon, eyen eden Mosiah, iŋ, kpa nte nditɔ iden Mosiah eken, iŋ, ŋko ye Alma ye nditɔ iden esie, koro kpukpru mmɔ ekedi mme owo Abasi.

19 Idahaemi sese, Helaman ye nditɔ eka esie ikidaha edem kabaŋa ufɔn mmɔ ye mme owo ikan Moroni; koro mmɔ ema ekwɔrɔ ikɔ Abasi, ndien mmɔ ema enim kpukpru owo ekededi emi ekpaŋde utɔŋ enɔ mme ikɔ mmɔ uduɔkmmɔŋ man ekabade esit.

20 Ndien ke ntem mmɔ eka iso, ndien mme owo ema esuhɔde-idem mmɔ ke ntak mme ikɔ mmɔ, tutu ete Jehovah ama ɔfɔn mfɔn ye mmɔ eti eti, ndien ke ntem mmɔ ema ebɔhɔ mme ekɔŋ ye mme eneni ke otu mmɔ, iŋ, kpa ke ufaŋ isua inaŋ.

21 Edi, kpa nte ami ntiŋde, ke mkpere utit isua efitenaŋ, iŋ, ke kpa ye emem emi okodude ke otu mmɔ, ema enyik mmɔ mmeŋe mmeŋe ete eŋwana ye nditɔ eka mmɔ, mme Lamanite.

22 Iŋ, ke akpatre, mme ekɔŋ mmɔ ikitreke ke ufaŋ uwak isua ye mme Lamanite, kpa ye ɔkpɔsɔŋ mmeŋe mmɔ.

23 Idahaemi, mmɔ ema etua nkpɔfiɔk ke nditaŋ ŋkpɔ ekɔŋ nkeŋwana ye mme Lamanite, koro mmɔ ikidatke esit ke uduɔk iyip; iŋ, ndien emi ikidighe kpukpru—mmɔ ema etua nkpɔfiɔk ke ndidi ntak ndisio ata ediwak nditɔ eka mmɔ ke ererimbot emi nsin ke nsinsi ererimbot, ke unana mbeŋidem ndisobo ye Abasi mmɔ.

24 Edi, mmɔ ikiyakke uwem mmɔ inim, man ewot iban mmɔ ye nditɔ mmɔ eto idiɔk afai mbon emi ekedide nditɔ eka mmɔ ke ini kiet, iŋ, ndien ema ewɔrɔ ekpɔŋ ufɔk Abasi mmɔ, ndien ema ekpɔŋ mmɔ ndien ema eka ndiwot mmɔ ke ndidiana ye mme Lamanite.

25 Iŋ, mmɔ ikikikanke iyɔ ete yak nditɔ eka mmɔ edatesit ebaŋa iyip mme Nephite, ke adaŋa nte owo ndomo kiet okodude emi edinimde mme ibet Abasi, koro eŋwɔŋɔ Abasi ekedi, edieke mmɔ edinimde mme ibet esie mmɔ eyeforo ke isɔŋ oro.