1 Sese, idahaemi edikem ete ikɔt Nephi ema edaresit ata eti eti, koro Jehovah ama afiak anam mmɔ ebɔhɔ ke ubɔk mme asua mmɔ; ke ntak oro mmɔ enɔ Jehovah Abasi mmɔ ekɔm; iŋ, ndien mmɔ ema etre udia eti eti enyuŋ ebɔŋ akam eti eti, ndien mmɔ ema ekpono Abasi ye ata akwa idaresit.

2 Ndien edikem ke ɔyɔhɔ isua ukara efutenaŋ mme ebiere ikpe nnɔ ikɔt Nephi, ete Alma edibine eyen esie Helaman onyuŋ ɔdɔhɔ enye ete: Ndi afo ɔmɔbuɔtidem ke mme ikɔ emi ami ntiŋde nnɔ fi kabaŋa mme ŋwed emi ekenimde?

3 Ndien Helaman ɔdɔhɔ enye ete: Iŋ, ami mɔbuɔtidem.

4 Ndien Alma afiak ɔdɔhɔ ete: Ndi afo ɔmɔbuɔtidem ke Jesus Christ, emi edidide?

5 Ndien enye ɔdɔhɔ ete: Iŋ, ami mɔbuɔtidem ke kpukpru ikɔ emi afo etiŋde.

6 Ndien Alma afiak ɔdɔhɔ enye ete: Ndi afo eyenim mme ibet mi?

7 Ndien enye ɔdɔhɔ ete: Iŋ, ami nyenim mme ibet fo ye ofuri esit mi.

8 Ndien Alma ɔdɔhɔ enye ete: Ɔfɔfɔn ɔnɔ fi; ndien Jehovah ayanam fi oforo ke isɔŋ emi.

9 Edi sese, ami menyene ŋkpɔ nditiŋ nte prophet nnɔ fi; edi se ami ntiŋde nte prophet nnɔ fi inaha nte afo anam efiɔk; iŋ, se ami ntiŋde nnɔ fi nte prophet owo idinamke efiɔk, tutu prophecy oro osu; ke ntak oro wet mme ikɔ emi ami nditiŋde.

10 Ndien emi edi mme ikɔ oro: Sese, ami mokut nte ke kpa mbon emi, mme Nephite, nte spirit ediyarade odude ke ami, ke isua ikie-inaŋ tɔŋɔ ke ini emi Jesus Christ ediyarade idem esie inɔ mmɔ, eyetaha ke unana edinim ke akpanikɔ.

11 Iŋ, ndien ke ini oro ke mmɔ edikut mme ekɔŋ ye mme udɔŋɔ, iŋ, mme akaŋ ye uduɔk-iyip, kpa tutu ikɔt Nephi esop—

12 Iŋ, ndien emi ke ntak emi mmɔ editahade ke unana mbuɔtidem enyuŋ eduɔ eduk ke mme utom ekim, ye obukpo ido, ye utɔ kpukpru mme ukwaŋ-ŋkpɔ; iŋ, ami ndɔhɔ fi, nte ke ntak emi mmɔ edinamde idiɔk ŋkpɔ ye utɔ akwa uŋwana ye ifiɔk emi, iŋ, ami ndɔhɔ fi, nte tɔŋɔ ke usen oro, kpa ɔyɔhɔ emana inaŋ idibehe ifep mbemiso akwa ukwaŋ-ŋkpɔ emi edi.

13 Ndien ke ini akwa usen oro edide, sese, ini kɔsɔp edi emi mbon emi edude idahaemi, mme ubon mbon emi ebatde idahaemi esin ke otu ikɔt Nephi, owo idibatke mmɔ aba isin ke otu ikɔt Nephi.

14 Edi owo ekededi emi ɔsuhɔde, ndien owo iwotke ke akwa ye enyene ndik usen oro, eyebat esin ke otu mme Lamanite, ndien ayakabade etie nte mmɔ, kpukpru, ibɔhɔke edi ekpri ibat emi edikotde mme mbet Jehovah; ndien mmɔ ke mme Lamanite edibine tutu mmɔ esop. Ndien idahaemi, ke ntak ukwaŋ-ŋkpɔ, prophecy emi oyo su.

15 Ndien idahaemi edikem ete ke ini Alma amaketiŋ mme ŋkpɔ emi ɔnɔ Helaman, enye ɔdiɔŋ enye, ŋko ye nditɔ iren esie eken; ndien enye ŋko ɔdiɔŋ isɔŋ oro ke ntak mme nnen nnen ido owo.

16 Ndien enye ɔdɔhɔ ete: Ntem ke Jehovah Abasi ɔdɔhɔ—Eye esuŋi isɔŋ, iŋ, isɔŋ emi, enɔ ofuri idut, iman, usem, ye mme owo, man esobo, emi enamde ibak, ke ini mmɔ edatde ema; ndien nte ami ntiŋde kpa ntre ke edidi; koro emi edi isuŋi ye edidiɔŋ Abasi ɔnɔ isɔŋ, koro Jehovah ikemeke ndise idiɔk ŋkpɔ ye ekpedi ata ekpri unyime.

17 Ndien idahaemi, ke ini Alma amaketiŋ mme ikɔ emi enye ɔdiɔŋ ufɔk Abasi, iŋ, kpukpru mbon emi edisɔŋde ida ke mme ukpep-ŋkpɔ edu ukpono tɔŋɔ ke ini oro ka iso.

18 Ndien ke ini Alma ama akanam emi enye ɔwɔrɔ ke isɔŋ Zarahemla, nte akpaka isɔŋ Melek. Ndien edikem ete owo ikikopke ŋkpɔ ibaŋa enye aba; kabaŋa mkpa ye ubuk okpo esie nnyin ifiɔkke ibaŋa.

19 Sese, emi nnyin imifiɔk, ite ke enye ekedi nnen nnen owo; ndien ikɔ emi ama ɔwɔrɔ asuana ke ufɔk Abasi ete ke Spirit ekemen enye ɔdɔk, mme ke ekebuk ke ubɔk Jehovah, kpa nte Moses. Edi sese, mme ŋwed Abasi edɔhɔ ete ke Jehovah ama ada Moses ɔnɔ idem esie; ndien nnyin ikere ite ke enye ŋko ɔbɔ Alma ke spirit, ɔnɔ idem esie; ke ntak oro, ke abaŋa ŋkpɔ emi nnyin ifiɔkke ŋkpɔ ndomo kiet ibaŋa mkpa ye ubuk okpo esie.

20 Ndien idahaemi edikem ke ntɔŋɔ ɔyɔhɔ isua ukara efitenaŋ mme ebiere ikpe nnɔ ikɔt Nephi, ete ke Helaman aka ke otu mme owo man ɔkwɔrɔ ikɔ ɔnɔ mmɔ.

21 Koro sese, ke ntak mme ekɔŋ mmɔ ye mme Lamanite ye ediwak mme mkpri eneni ye mme eŋwan emi ekedude ke otu mme owo, ama ɔfɔn ete ekwɔrɔ ikɔ Abasi ke otu mmɔ, iŋ, ndien ete eneŋede ŋkpɔ enim ke ofuri ufɔk Abasi.

22 Ke ntak oro, Helaman ye nditɔ eka esie ema eka man efiak esiak ufɔk Abasi ke ofuri isɔŋ, iŋ, ke kpukpru obio ke ofuri isɔŋ emi mbon Nephi ekenyenede. Ndien edikem ete mmɔ ema emek mme oku ye mme andikpep ke kpukpru ofuri isɔŋ, ke ofuri mme ufɔk Abasi.

23 Ndien idahaemi edikem ete ke ini Helaman ye nditɔ eka esie ema ekemek mme oku ye mme andikpep enɔ mme ufɔk Abasi ete ke eneni ama odu ke otu mmɔ, ndien mmɔ ikipaŋke utɔŋ inɔ mme ikɔ Helaman ye nditɔ eka esie;

24 Edi mmɔ ekɔri ke ntaŋidem, emenede ke esit mmɔ, ke ntak mme ata ediwak inyene mmɔ; ke ntak oro mmɔ ekɔri ke inyene ke enyin mmɔ, ndien mmɔ ikpaŋke utɔŋ inɔ mme ikɔ mmɔ, ndisaŋa nnen nnen ke iso Abasi.