1 Idahaemi eyen mi, se esisit mi emi nditiŋde nnɔ fi; koro mekere nte ke esit fo etimede kabaŋa eriset ke mkpa eke mkpa.

2 Sese, ami ndɔhɔ fi, nte ke eriset ke mkpa iduhe—mme, ami mkpedɔhɔ, ke usuŋ efen, nte ke eke mkpa emi isineke uwem emi mkpa miduhe, mbiara emi isineke emi mikemeke ndibiara—tutu ini Christ ama edi.

3 Sese, enye anam eriset ke mkpa eke mkpa etibe. Edi sese, eyen mi, eriset ke mkpa idighe kaŋa. Idahaemi, ami nyanam fi ɔfiɔk ndedibe ŋkpɔ kiet; edi, uwak mme ndedibe ŋkpɔ edu emi edibde, man owo ndomo kiet ukufiɔk mmɔ ibɔhɔke Abasi ke idem esie. Edi ami nwut fi ŋkpɔ kiet emi ami mbeŋede Abasi ke nsin-ifik man ami mfiɔk—emi abaŋade eriset ke mkpa.

4 Sese, ini odu emi enimde emi kpukpru ediwɔrɔde ke mkpa. Idahaemi ini emi ini oro edidide owo ndomo kiet ifiɔkke; edi Abasi ɔfiɔk ini emi enimde.

5 Idahaemi, mme ini kiet edidu, mme ɔyɔhɔ ini iba, mme ɔyɔhɔ ini ita, emi mme owo ediwɔrɔde idi ke mkpa, idighe akpan-ŋkpɔ; koro Abasi ɔfiɔk kpukpru mme ŋkpɔ emi; ndien ekem mi ndifiɔk nte ke emi edi ntre—ete ke ini odu emi enimde ete kpukpru eyeset ke mkpa.

6 Idahaemi ana ufaŋ odu ke ufɔt ini mkpa ye ini eriset ke mkpa.

7 Ndien idahaemi ami nyobup se iditibede inɔ mme ukpɔŋ owo tɔŋɔ ke ini mkpa emi tutu esim ini emi enimde enɔ eriset ke mkpa?

8 Idahaemi mme ini odu akan kiet emi enimde enɔ mme owo ndiset idighe akpan-ŋkpɔ; koro kpukpru owo ikpaha ini kiet, ndien emi idighe akpan-ŋkpɔ; kpukpru edi nte usen kiet ɔnɔ Abasi, ndien edi mme owo ikpɔŋ ke edomo ini enɔ.

9 Ke ntak oro, ini odu emi enimde enɔ mme owo ete mmɔ eset ke mkpa; ndien ufaŋ odu ke ufɔt ini mkpa ye eriset ke mkpa. Ndien idahaemi, kabaŋa ufaŋ ini emi, se itibede inɔ ukpɔŋ mme owo edi se ami nsinde ifik mbup ndifiɔk nto Jehovah; ndien emi edi ŋkpɔ emi ami mfiɔkde.

10 Ndien ke ini edidide emi kpukpru owo anade nte eset, ini oro ke mmɔ edifiɔk ete ke Abasi ɔfiɔk kpukpru ini emi enimde enɔ owo.

11 Idahaemi, kabaŋa idaha ukpɔŋ ke ufɔt ini mkpa ye eriset ke mkpa—Sese, angel anam mi mfiɔk, ete ke mme spirit kpukpru owo, ke ata ini emi mmɔ ekpɔŋde idem eke mkpa emi, iŋ, mme spirit kpukpru owo, mme mmɔ edi eti mme idiɔk, eda mmɔ enyɔŋ ufɔk ebine Abasi oro emi ɔkɔnɔde mmɔ uwem.

12 Ndien ke ini oro ke edikem, ete ke eyebɔ spirit mbon oro emi edide nnen nnen esin ke idaha inemesit, emi ekotde paradise, idaha nduɔk-odudu, idaha emem, emi mmɔ ediduɔkde odudu ke kpukpru mme mfina ye ke mme ekikere, ye ndutuhɔ mmɔ.

13 Ndien ini oro ke edikem, ete ke spirit mme idiɔk owo, iŋ, emi ediɔkde—koro sese, mmɔ inyeneke udeme mme ubak ke Spirit Jehovah; koro sese, mmɔ ekemek mme idiɔk utom idighe nti; ke ntak oro spirit satan oduk mmɔ idem, onyuŋ ada ufɔk mmɔ enyene—ndien mmɔ emi ke edibin isio isin ke ekim; do ke editua eyet,ye usio mkpo, ye edita edet edidu, ndien emi ke ntak ukwaŋ-ŋkpɔ mmɔ, sia edide spirit satan ada mmɔ usuŋ.

14 Idahaemi emi edi idaha ukpɔŋ mme idiɔk owo, iŋ, ke ekim, ye ke idiɔk idaha, eke enyene ndik idorienyin ikaŋ-ikaŋ iyaresit eke ifiop-esit Abasi esimde mmɔ; ke ntem mmɔ edu ke idaha emi, kpa ye ndinen ke paradise, tutu esim ini ediset ke mkpa mmɔ.

15 Idahaemi, usuk edu emi efiɔkde ete ke idaha inemesit emi ye idaha ukut eke ukpɔŋ emi, mbemiso eriset ke mkpa, ekedi akpa eriset ke mkpa. Iŋ, ami menyime ke ekeme ndikot eriset ke mkpa, ndidemede spirit mme ukpɔŋ ye ndinim mmɔ ke inemesit mme ukut, nte asaŋade ye mme ikɔ emi etiŋde.

16 Ndien sese, ema efiak etiŋ, ete ke akpa eriset ke mkpa odu, eriset ke mkpa eke kpukpru mbon emi ekedude, mme emi edude, mme emi edidude, tutu esim eriset ke mkpa Christ.

17 Idahaemi, nnyin ikereke ite ke akpa eriset ke mkpa emi, emi etiŋde ebaŋa ke utɔ usuŋ emi, ekeme ndidi eriset ke mkpa eke mme ukpɔŋ ye ndinim mmɔ ke inemesit mme ukut. Afo ukemeke ndikere ke emi edi se enye ɔwɔrɔde.

18 Sese, ami ndɔhɔ fi, Iŋ iŋ, edi ɔwɔrɔ ukpɔŋ ye obukidem ndifiak ndiana kiet, eke mbon oro tɔŋɔ ke eyo Adam tutu esim eriset ke mkpa Christ.

19 Idahaemi, mme mme ukpɔŋ ye mme idem mbon oro emi etiŋde ebaŋa eyefiak ediana kiet kpukpru ini kiet, idiɔk ye nnen nnen owo, ami ntiŋke; yak ekem, ete ke ami ndɔhɔ nte ke kpukpru mmɔ ewɔrɔ edi; mme ke usuŋ efen, eriset ke mkpa mmɔ etibe mbemiso eriset ke mkpa eke mbon emi ekekpade ke ini Christ ama ekeset ke mkpa.

20 Idahaemi, eyen mi, ami ndɔhɔke nte ke eriset ke mkpa mmɔ edi ke ini eriset ke mkpa Christ; edi sese, ami nnɔ enye nte ekikere mi, nte ke mme ukpɔŋ ye mme idem ediana kiet, eke ndinen, ke ini eriset ke mkpa Christ, ye edidɔk ke heaven esie.

21 Edi mme edidi ke eriset ke mkpa esie mme ke ini oro ama ebe, ami ntiŋke; edi emi ke ami ndɔhɔ, nte ke ufaŋ odu ke ufɔt mkpa ye eriset ke mkpa eke idem, ye idaha ukpɔŋ ke inemesit mme ke ukut tutu esim ini emi Abasi enimde ete mme akpa mkpa ewɔrɔ edi, enyuŋ efiak ediana kiet, ukpɔŋ ye idem mbiba, ndien eda mmɔ edida ke iso Abasi, enyuŋ edikpe ikpe enɔ mmɔ nte mme utom mmɔ edide.

22 Iŋ, emi ada ndifiak nnim ke itie kpukpru ŋkpɔ oro emi eketiŋde ke inua mme prophet edi.

23 Eyefiak enim ukpɔŋ ke itie enɔ idem, ndien enim idem enɔ ukpɔŋ; iŋ, ndien eyefiak enim kpukpru ubɔk ye ukot ke itie idem esie; iŋ, kpa idet ibuot kiet idisopke; edi eyefiak enim kpukpru ŋkpɔ ke itie mmɔ nte obot edide ye nte ɔfɔnde ama.

24 Ndien idahaemi, eyen mi, emi edi ndifiak nnim ke itie emi eketiŋde ke inua mme prophet—

25 Ndien ke ini oro ke ndinen owo ediyama ke obio ubɔŋ Abasi.

26 Edi sese, idiɔk mkpa edi ɔnɔ mme idiɔk owo; koro mmɔ ekpa kabaŋa mme ŋkpɔ nnen nnen ido; koro mmɔ misanake, ndien ŋkpɔ ndomo kiet emi misanake ikemeke ndida obio ubɔŋ Abasi nyene; edi ebin mmɔ esio, ndien enim mmɔ ete edia mme mfri ubɔk-utom mmɔ mme utom mmɔ, emi ekedide idiɔk; ndien mmɔ eŋwɔŋ mme ntak idot cup.