1 Idahaemi nnyin iyifiak ke ŋwed nnyin ika Amalickiah ye mbon emi ekefehede ye enye eduk eka wilderness, koro, sese, enye ama ada mbon emi ekesaŋade ye enye, onyuŋ ɔdɔk aka isɔŋ Nephi ke otu mme Lamanite, onyuŋ edemede mme Lamanite ke iyatesit abaŋa ikɔt Nephi, tutu ete edidem mme Lamanite ɔnɔ ntɔt ke ofuri isɔŋ oro, ke otu ikɔt esie, man mmɔ efiak esobo idem mmɔ ɔtɔ kiet man eka eŋwan ye mme Nephite.

2 Ndien edikem ete ke ini ntɔt amakesim otu mmɔ ndik ama mum mmɔ ata eti eti; iŋ, mmɔ ema ekop ndik ndinam esit ayat edidem, ndien mmɔ ŋko ekop ndik ndika ekɔŋ ye mme Nephite man mmɔ ekunana uwem mmɔ. Ndien edikem ete mmɔ ikimaha, mme mmɔ emi ewakde ekan ikimaha, ndisuk ibuot nnɔ mme ibet edidem.

3 Ndien idahaemi edikem ete edidem ama ayatesit ke ntak ntut-utɔŋ mmɔ; ke ntak oro enye ɔnɔ Amalickiah ete akara mbon ekɔŋ esie emi ekesukde ibuot enɔ uyo esie, ndien ɔnɔ enye uyo ete aka onyuŋ enyik mmɔ ete eŋwana ekɔŋ

4 Idahaemi sese, emi ekedi udɔŋ Amalickiah; koro enye ekedide ata owo ŋkari man anam idiɔk ke ntak oro enye ama ekere ke esit esie ndidorode edidem mme Lamanite.

5 Ndien idahaemi enye ama enyene unen ndikara ubak mme Lamanite emi ekemade edidem; ndien enye oyom ndinyene mfɔn nto mbon emi mikisukke ibuot; ke ntak oro enye ebe aka ebiet emi ekekotde Onidah, koro do ke kpukpru mme Nephite ekefehe eka; koro mmɔ ema efiɔk ete ke mbon ekɔŋ ke edi, ndien, ekerede ete ke mmɔ edi ndiwot mmɔ, ke ntak oro mmɔ efehe eka Onidah, eka ebiet ŋkpɔ ekɔŋ.

6 Ndien mmɔ ema emek owo ete edi edidem ɔnɔ mmɔ, koro ekebierede ke esit mmɔ ye mkpe-mbiere ete ke mmɔ idiyakke ete enam mmɔ eka eŋwan ye mme Nephite.

7 Ndien edikem ete ke mmɔ ema esobo idem mmɔ ɔtɔ kiet ke enyɔŋ obot emi ekekotde Antipas, ke mbeŋidem ekɔŋ.

8 Idahaemi ikidighe uduak Amalickiah ndiŋwana ye mmɔ nte asaŋade ye mme ibet edidem; edi sese, ekedi uduak esie ndikut mfɔn ye mbon ekɔŋ mme Lamanite, man enye enim idem esie ke ibuot mmɔ onyuŋ odorode edidem ndien ada ukara obio oro.

9 Ndien sese, edikem ete enye anam mbon ekɔŋ esie ewuk mme tent mmɔ ke itighede emi ekekperede obot Antipas.

10 Ndien edikem ete ke ini ekedide okoneyo enye ɔdɔŋ isuŋ-utom ke ndibe aka obot Antipas, oyom ete ada ibuot mbon emi ekedude ke obot oro, emi enyiŋ esie ekedide Lehonti, ete yak enye ɔsuhɔde edi ikpat obot oro, koro enye ama oyom nditiŋ ikɔ ye enye.

11 Ndien edikem ete ke ini Lehonti ɔkɔbɔde etop oro enye ikisuhɔkede ika ikpat obot oro. Ndien edikem ete Amalickiah afiak ɔdɔŋ ɔyɔhɔ ikaba ini, oyom ete enye ɔsuhɔde edi. Ndien edikem ete Lehonti imaha ndisuhɔde nka; ndien enye afiak ɔdɔŋ ɔyɔhɔ ikata.

12 Ndien edikem ete ke ini Amalickiah okutde ete ke enye ikanke inam Lehonti ɔsuhɔde ke obot edi, enye ɔdɔk aka obot oro, ekpere nna-ekɔŋ Lehonti; ndien enye afiak ɔdɔŋ etop esie ɔyɔhɔ ikanaŋ ɔnɔ Lehonti, oyom ete enye ɔsuhɔde edi, ndien ete yak enye asaŋa ye mbon ukpeme esie edi ye enye.

13 Ndien edikem ete ke ini Lehonti ama kasaŋa ye mbon ukpeme esie edi ebine Amalickiah, ete Amalickiah oyom ete enye ɔsuhɔde ye mbon ekɔŋ esie edi ke ini okoneyo, onyuŋ akanade mme owo emi edidem ɔkɔnɔde enye ukara ke nna-ekɔŋ mmɔ okuk, ndien ete ke enye ayayak mmɔ esin ke ubɔk Lehonti, edieke enye edinamde enye (Amalickiah) ɔyɔhɔ ada ibuot iba nnɔ ofuri mbon ekɔŋ.

14 Ndien edikem ete Lehonti ɔsuhɔde edi ye mbon ekɔŋ esie onyuŋ akanade mbon ekɔŋ Amalickiah okuk, man otodo ke ini mmɔ edemede ke usiere mbon ekɔŋ Lehonti ema ekanade mmɔ ekuk.

15 Ndien edikem ete ke ini mmɔ ekekutde ete ke ekanade mmɔ ekuk, mmɔ ebeŋe Amalickiah ete enye ayak mmɔ ediana ye nditɔ eka mmɔ, man ekuwot mmɔ. Idahaemi emi edi ata ŋkpɔ emi Amalickiah okoyomde.

16 Ndien edikem ete enye ayak ikɔt esie ɔnɔ, ke nte misaŋake ye uyo edidem. Idahaemi emi edi ŋkpɔ emi Amalickiah okoyomde, man enye anam mme uduak esie ke ndidorode edidem.

17 Idahaemi ekedi ido ke otu mme Lamanite, edieke ewotde ada ibuot ukara mmɔ, ete emek ɔyɔhɔ ada ibuot iba edi ada ibuot ukara mmɔ.

18 Ndien edikem ete Amalickiah anam ete eyen ufɔk esie kiet ɔnɔ Lehonti idiɔk ibɔk ke adaŋa ke adaŋa, man enye akpa.

19 Idahaemi, ke ini Lehonti amaka akpa, mme Lamanite emek Amalickiah ete edi ada ibuot mmɔ ye akwa ada ibuot mme etubom ekɔŋ mmɔ.

20 Ndien edikem ete Amalickiah asaŋa ye mbon ekɔŋ esie (koro enye ama enyene mme uduak esie) ndisim isɔŋ Nephi, ndisim obio Nephi, emi ekedide ada ibuot obio.

21 Ndien edidem ɔwɔrɔ edi ndisobo ye enye ye mbon ukpeme esie, koro enye ekekere ete ke Amalickiah ama anam mme uyo esie, ndien ete ke Amalickiah ama obok akwa mbon ekɔŋ ɔtɔ kiet man ekeŋwana ye mme Nephite.

22 Edi sese, nte edidem ɔwɔrɔde edi ndisobo ye enye Amalickiah anam ete nditɔ ufɔk esie ewɔrɔ eka ekesobo ye edidem. Ndien mmɔ eka enyuŋ esuk ibuot ke iso edidem, nte ndinɔ enye uteŋe ke ntak akwa idaha esie.

23 Ndien edikem ete edidem anyan ubɔk esie ndimenede mmɔ, nte ido mme Lamanite ekedide, nte idiŋɔ emem, ido emi mmɔ ekedade eto mme Nephite.

24 Ndien edikem ete ke ini enye ama ekemenede akpa owo ke isɔŋ, sese enye ekim edidem ke esit; ndien enye ɔduɔ ke isɔŋ.

25 Idahaemi nditɔ ufɔk edidem efehe; ndien nditɔ ufɔk Amalickiah efiori mkpo, ete:

26 Esese, nditɔ ufɔk edidem ekim enye ke esit, ndien enye ɔduɔ ndien mmɔ efehe; esese, edi enyuŋ ese.

27 Ndien edikem ete Amalickiah ɔnɔ uyo ete mbon ekɔŋ esie eka iso enyuŋ ese sikitibede inɔ edidem; ndien ke ini mmɔ ekedisimde ebiet oro, enyuŋ ekut nte edidem anade ke iyip esie, Amalickiah abiaŋa nte ayatesit, onyuŋ ɔdɔhɔ ete: Owo ekededi emi akamade edidem, yak enye aka, onyuŋ ebine nditɔ ufɔk esie man ewot mmɔ.

28 Ndien edikem ete kpukpru mbon emi ekemade edidem, ke ini mmɔ ekopde mme ikɔ emi, ewɔrɔ edi enyuŋ ebine nditɔ ufɔk edidem.

29 Idahaemi ke ini nditɔ ufɔk edidem ekekutde nte mbon ekɔŋ ebinede mmɔ, ndik afiak omum mmɔ, ndien efehe eduk wilderness, enyuŋ edi ke isɔŋ Zarahemla ndien edidiana ye ikɔt Ammon.

30 Ndien mbon ekɔŋ emi ekebinede mmɔ efiak edem, ke ekebinede mmɔ ke ikpikpu; ndien ke ntem Amalickiah, ke ŋkari esie, enyene esit mme owo.

31 Ndien edikem ke mkpɔŋ enye oduk obio Nephi ye mbon ekɔŋ esie, onyuŋ ada obio oro enyene.

32 Ndien idahaemi edikem ete ɔbɔŋ-aŋwan, ke ini enye okokopde ete ke ewot edidem—koro Amalickiah ama ɔdɔŋ isuŋ-utom ɔnɔ ɔbɔŋ-aŋwan ɔdɔhɔ enye ete ke nditɔ ufɔk edidem ema ewot enye, ete ke enye ama ebine mmɔ ye mbon ekɔŋ esie, edi ekedi ke ikpikpu, ndien mmɔ ema efehe—

33 Ke ntak oro, ke ini ɔbɔŋ-aŋwan ama ɔkɔbɔ etop emi enye ɔdɔŋ utom ɔnɔ Amalickiah, oyom enye ete enye ɔsuhɔ mbon obio oro; ndien enye ŋko oyom ete enye edise enye; ndien enye ŋko oyom ete enye ada mme ntiense edi ye enye editie ntiense kabaŋa mkpa edidem.

34 Ndien edikem ete Amalickiah ada kpa eyen ufɔk emi okowotde edidem, ye kpukpru mbon emi ekedude ye enye, enyuŋ eka ekese ɔbɔŋ-aŋwan, ke ebiet emi enye eketiede; ndien kpukpru mmɔ etie ntiense enɔ enye ete ke edi nditɔ ufɔk esie ekewot edidem; ndien mmɔ edɔhɔ ŋko ete: Mmɔ efehe; ndi emi itiehe ntiense ibaŋa mmɔ? Ndien ke ntem mmɔ enam ɔbɔŋ-aŋwan enim mmɔ ke akpanikɔ kabaŋa mkpa edidem.

35 Ndien edikem ete Amalickiah oyom mfɔn oto ɔbɔŋ-aŋwan, onyuŋ ada enye ɔnɔ idem esie nte ŋwan; ndien ke ntem ke ŋkari esie, ndien ye uŋwam mme akari-ŋkari nditɔ ufɔk esie, enye ama ada ukara; iŋ, ema enyime enye nte edidem ke ofuri isɔŋ oro, ke otu ofuri mbon mme Lamanite, emi ekedɔŋɔde mme Lamanite ye mme Lemuelite ye mme Ishmaelite, ye kpukpru mbon mfaŋa mme Nephite, tɔŋɔ ke ukara Nephi tutu edisim ini emi.

36 Idahaemi mbon emi ekefehede ewɔrɔ emi, ke enyenede ukem ido ye ukem ifiɔk mme Nephite, iŋ, ke ekekpepde mmɔ ke ukem ifiɔk Jehovah, edi, edi esen-esen nditiŋ, ibighike tɔŋɔ ke ini mme eneni mmɔ mmɔ ekabarde esɔŋ esit ye unana erikabade esit, ndien edi mbon ikɔt, ebak-ibak ye obom ekan mme Lamanite—ewɔŋ ke mme ido mme Lamanite; enɔ ifu ufaŋ, ye kpukpru utɔ obukpo ido; iŋ, efre Jehovah Abasi mmɔ ofuri ofuri.