1 Ndien idahaemi, eyen mi Helaman, ami nnɔ fi uyo nte yak afo ataŋ mme ŋwed emi emi enɔde mi nkama;

2 Ndien ami ŋko nnɔ fi uyo nte afo enim ŋwed mbon emi, nte ami nnamde, ke mme usan ŋwed emi Nephi ekewetde, nyuŋ nim kpukpru mme ŋkpɔ emi ke edisana emi ami nnimde, kpa nte ami nnimde mmɔ; koro edi ke eti ntak ke enim mmɔ.

3 Ndien mme usan brass emi, emi edɔŋɔde mme ŋkpɔ emi ekapdeemi, emi ewetde ndisana ŋwed Abasi ke mmɔ, emi enyenede mbuk emana mme ete-ete nnyin, tɔŋɔ ke editɔŋɔ—

4 Sese, mme ete nnyin ema etiŋ nte prophet, ete enim mmɔ enyuŋ eyak enɔ emana kiet kiet tutu esim efen, ndien ekpeme enyuŋ etim enim ke ubɔk Jehovah tutu mmɔ esim ofuri idut, iman, usem, ye mme owo, man mmɔ ekpefiɔk ebaŋa mme ndedibe ŋkpɔ emi edɔŋɔde do.

5 Ndien idahaemi sese, edieke enimde mmɔ ana nte mmɔ enyene uyama mmɔ; iŋ, ndien mmɔ eyenyene uyama mmɔ; iŋ, ŋko ye kpukpru mme usan emi edɔŋɔde sidide edisana se ewetde.

6 Idahaemi afo emekeme ndikere ke emi edi ndisime ke ami; edi sese ami ndɔhɔ fi, nte ke oto ke mkpri ye mmem mmem ŋkpɔ ke enam ikpɔ ŋkpɔ etibe; ndien mkpri edinam ke ediwak ini esitimede mme ɔfiɔk ŋkpɔ.

7 Ndien Jehovah Abasi anam utom ke mme edinam man ada edisu akwa ye mme nsinsi uduak esie; ndien oto ke kpukpru mkpri edinam Jehovah etimede mme ɔfiɔk ŋkpɔ onyuŋ ada edinyaŋa esim ediwak ukpɔŋ.

8 Ndien idahaemi, ekedi ifiɔk ke Abasi ete etim mme ŋkpɔ emi enim; koro sese, mmɔ enam ifiɔk mbon emi okpon, iŋ, enyuŋ enam ediwak efiɔk ndudue ke mme ido mmɔ, enyuŋ eda mmɔ edi ke ifiɔk Abasi mmɔ man enyaŋa ukpɔŋ mmɔ.

9 Iŋ, ami ndɔhɔ fi, ekpedi ikidihe ke mme ŋkpɔ emi emi edɔŋɔde ke mme ŋwed emi, emi edude ke mme usan emi, Ammon ye nditɔ eka esie ikpinamke ediwak tɔsin mme Lamanite efiɔk ido mme ete mmɔ emi minenke; iŋ, mme ŋwed emi ye mme ikɔ mmɔ eda mmɔ edi edikabade esit; emi ɔwɔrɔ, mmɔ eda mmɔ edi ifiɔk Jehovah Abasi mmɔ, enyuŋ edaresit ke Jesus Christ Andifak mmɔ.

10 Ndien ekeme ndidi ke mmɔ edidi usuŋ ndida ediwak tɔsin mmɔ, iŋ, ŋko ye tɔsin mme ɔsɔŋ-ibuot nditɔ eka nnyin, mme Nephite, emi esɔŋde esit mmɔ idahaemi ke idiɔk ŋkpɔ ye mme ukwaŋ-ŋkpɔ, ndi ifiɔk Andifak mmɔ?

11 Idahaemi Abasi inamke mi mfiɔk ofuri ofuri mme ndedibe ŋkpɔ emi kaŋa; ke ntak oro ami nyetre.

12 Ndien eyekem edieke ami ndɔhɔde ke etim mmɔ enim enɔ eti ntak, ntak emi Abasi ɔfiɔkde; koro enye ɔnɔ item ke ifiɔk abaŋa kpukpru mme utom esie, ndien mme usuŋ esie edi nnen nnen, ndien usuŋ esie eyire kiet.

13 O ti, ti, eyen mi Helaman, nte mme ibet Abasi esɔŋde. Ndien enye ama ɔdɔhɔ ete: Edieke mbufo edinimde mme ibet mi mbufo eyeforo ke isɔŋ—edi edieke mbufo minimke mme ibet esie eyesibe mbufo esio ke iso esie.

14 Ndien idahaemi ti, eyen mi, ete ke Abasi ayak mme ŋkpɔ emi esin fi kubɔk, emi edide edisana, emi enye enimde ke edisana,ndien ŋko ye emi enye edikpemede inyuŋ itimde inim inɔ eti ntak ke enye, man enye owut mme emana ini iso odudu esie.

15 Ndien idahaemi sese, ami ntiŋ nnɔ fi ke spirit prophecy, nte ke edieke afo eduede mme ibet Abasi, sese, eyeda odudu Abasi ebɔ fi mme ŋkpɔ emi emi edide edisana, ndien eyeyak fi enɔ satan, man enye ekeŋ fi nte ikpɔk ke ofum.

16 Edi edieke afo enimde mme ibet Abasi, onyuŋ anam ye mme ŋkpɔ emi emi edide ndisana nte asaŋade ye se Jehovah ɔnɔde fi uyo, (koro ana afo ebeŋe oto Jehovah kpukpru ŋkpɔ emi anade nte afo anam ye mmɔ) sese, iduhe odudu ndomo kiet ke ererimbot mme hell edikande nditaŋ mmɔ mkpɔŋ fi, koro Abasi enyene odudu ndinam kpukpru ikɔ esie.

17 Koro enye ayanam kpukpru eŋwɔŋɔ esie emi enye edinamde inɔ fi, koro enye ama anam mme eŋwɔŋɔ emi enye akanamde ɔnɔ mme ete nnyin.

18 Koro enye ama ɔŋwɔŋɔ ɔnɔ mmɔ ete ke enye eyetim mme ŋkpɔ emi enim ɔnɔ eti ntak ke enye, man enye owut mme emana ini iso odudu esie.

19 Ndien idahaemi sese, enye amanam ntak kiet, kpa ke ndifiak nnim uwak tɔsin mme Lamanite ke itie ifiɔk akpanikɔ; ndien enye ama owut odudu esie ke mmɔ, ndien enye ŋko oyosuk owut odudu esie ke mmɔ ɔnɔ mme emana ini iso; ke ntak oro eyetim mmɔ enim.

20 Ke ntak oro ami nnɔ fi uyo, eyen mi Helaman, nte afo esin ifik ke ndinam mme ikɔ mi, ndien nte afo esin ifik ke ndinim mme ibet Abasi nte ewetde mmɔ.

21 Ndien idahaemi, ami nyetiŋ ikɔ nnɔ fi ke abaŋa mme usan edip ye inaŋ oro, man afo ekpeme mmɔ, man mme ndedibe ŋkpɔ ye mme utom ekim, ye mme ndedibe utom mmɔ, mme mme ndedibe utom mbon emi ekewotde, eyarade enɔ mbon emi; iŋ, kpukpru mme uwot owo mmɔ, ye mme ŋkan ubɔk, ye mme udia ŋwo mmɔ, ye kpukpru mme ibak ye mme mbubiam ido mmɔ, eyarade enɔ mbon emi; iŋ, ndien man afo etim mme akabade ikɔ emi enim.

22 Koro sese, Jehovah ama okut ete ke ikɔt esie ema etɔŋɔ ndinam utom ekim, iŋ, enam mme uwot owo ke ndedibe ye mme mbubiam; ke ntak oro Jehovah ɔdɔhɔ ete, edieke mmɔ mikabakede esit ana nte ewot mmɔ esio ke iso isɔŋ.

23 Ndien Jehovah ɔdɔhɔ ete: Ami nyetim nnɔ asaŋutom mi Gazelem, itiat, emi ediyamade ke ekim inɔ uŋwana, man nyarade nnɔ ikɔt mi emi enamde utom enɔ mi, man ami nyarade nnɔ mmɔ mme utom nditɔ eka mmɔ, iŋ, mme ndedibe utom mmɔ, mme utom ekim mmɔ, ye mme ibak ye mme mbubiam mmɔ.

24 Ndien idahaemi, eyen mi, eketim mme akabade ikɔ emi man ikɔ Abasi osu, emi enye eketiŋde, ete:

25 Ami nyosio ke ekim nsin ke uŋwana kpukpru mme ndedibe utom mmɔ ye mme mbubiam ido mmɔ; ndien ibɔhɔke mmɔ ekabade esit ami nyowot mmɔ nsio ke iso isɔŋ; ndien ami nyeyarade kpukpru mme ndedibe ye mme mbubiam mmɔ, nnɔ kpukpru idut emi edinyenede isɔŋ ke emi amakebe.

26 Ndien idahaemi, eyen mi, nnyin imikut ite ke mmɔ ikikabakede esit; ke ntak oro ewot mmɔ, ndien tutu esim idahaemi ikɔ Abasi osu; iŋ, eda mme ndedibe mbubiam mmɔ ewɔrɔ ke ekim enyuŋ enam nnyin ifiɔk mmɔ.

27 Ndien idahaemi, eyen mi, ami nnɔ fi uyo nte afo omum kpukpru mme uŋwɔŋɔ mmɔ akama, ye mme ediomi mmɔ, ye mme unyime mmɔ ke mme ndedibe mbubiam mmɔ; iŋ, ye kpukpru mme idiɔŋɔ mmɔ ye mme utibe ŋkpɔ mmɔ ke afo edisin mbon emi, man mmɔ ekufiɔk mmɔ, man ndusuk mmɔ eduɔ eduk ekim ŋko enyuŋ ekpa.

28 Koro sese, isuŋi odoro ke ofuri isɔŋ emi, ete ke nsobo eyesim kpukpru mme anam utom ekim, nte asaŋade ye odudu Abasi, ke ini mmɔ edatde ema; ke ntak oro ami nyomke ete ewot mbon emi.

29 Ke ntak oro afo oyomum mme ndedibe uduakeke mme uŋwɔŋɔ mmɔ akama ye mme ediomi mmɔ unɔhɔ mbon emi, ndien ibak mmɔ ye mme uwot owo mmɔ ye mme mbubiam mmɔ ikpɔŋ ke afo edinam mmɔ efiɔk; ndien afo eyekpep mmɔ ete esua utɔ ibak ye mme mbubiam ye mme uwot owo oro; ndien afo ŋko eyekpep mmɔ ete ke ekewot mme owo emi ke ntak ibak mmɔ ye mme mbubiam mmɔ ye mme uwot owo mmɔ.

30 Koro sese, mmɔ ema ewot kpukpru mme prophet Jehovah emi ekedide ke otu mmɔ nditiŋ nnɔ mmɔ mbaŋa mme ukwaŋ-ŋkpɔ mmɔ; ndien iyip mbon emi mmɔ ekewotde ema eseme enɔ Jehovah Abasi mmɔ eyom usiene abaŋa mbon emi ekewotde mmɔ; ndien ke ntem mme ubiere ikpe Abasi ema esim mme anam utom ekim emi ye mme ebuana ŋkari mmɔ.

31 Iŋ, ndien esuŋi isɔŋ ke nsinsi ye ke nsinsi enɔ mme anam utom ekim ye mme ebuana ŋkari, kpa tutu esim nsobo, ibɔhɔke mmɔ ekabade esit mbemiso mmɔ edat ema.

32 Ndien idahaemi, eyen mi, ti mme ikɔ emi ami ntiŋde nnɔ fi; kuyak mme ndedibe uduak oro unɔ mbon emi, edi kpep mmɔ nsinsi usua baŋa idiɔk ŋkpɔ ye ukwaŋ-ŋkpɔ.

33 Kwɔrɔ erikabade esit nnɔ mmɔ, ye mbuɔtidem ke Jehovah Jesus Christ; kpep mmɔ ete esuhɔde idem mmɔ enyuŋ edi suŋ-suŋ enyuŋ esuhɔhɔre-idem ke esit; kpep mmɔndikan kpukpru idomo satan, ye mbuɔtidem mmɔ ke Jehovah Jesus Christ.

34 Kpep mmɔ ete ukukpa-mba ke ndinam mme nti utom, edi edi suŋ-suŋ enyuŋ esuhɔre idem ke esit; koro utɔ oro edinyene nduɔk-odudu inɔ ukpɔŋ mmɔ.

35 O, ti, eyen mi, nyuŋ kpep ifiɔk ke uyen fo; iŋ, kpep ke uyen fo ndinim mme ibet Abasi.

36 Iŋ, ndien seme Abasi baŋa kpukpru uŋwam fo; iŋ, yak kpukpru edinam fo edi ɔnɔ Jehovah, ndien ebiet ekededi emi afo akade yak edi ke Jehovah; iŋ, yak kpukpru ekikere fo abaŋa Jehovah; iŋ, yak ima esit fo odu ke Jehovah ke nsinsi.

37 Bɔ item to Jehovah ke kpukpru edinam fo, ndien enye eyeda fi usuŋ ke eti; iŋ, ke ini afo anade ke isɔŋ ke okoneyo na nɔ Jehovah, man enye ekpeme fi ke idap fo; ndien ke ini afo edemede ke usenubɔk yak esit fo ɔyɔhɔ ye ekɔm ɔnɔ Abasi; ndien edieke afo anamde mme ŋkpɔ emi, eyemenede fi ke akpatre usen.

38 Ndien idahaemi, eyen mi, ami menyene ekpri ŋkpɔ nditiŋ kabaŋa ŋkpɔ emi mme ete nnyin ekotde nyɔri, mme ada usuŋ—mme mme ete nnyin eke ekot enye Liahona, emi edide, ke ekabade, ŋkpɔ emi adade usuŋ; ndien Jehovah eke tim enye.

39 Ndien sese, owo ndomo kiet iduhe emi akpakande ada ini anam utɔ ubɔkutom emi. Ndien sese, ekenam enye man owut mme ete nnyin usuŋ emi anade nte mmɔ esaŋa ke wilderness.

40 Ndien enye ama anam utom ɔnɔ mmɔ nte mbuɔtidem mmɔ ekedide ke Abasi; ke ntak oro, edieke mmɔ ekenyenede mbuɔtidem ndinim ete ke Abasi ekeme ndinam mme eto ufiak-ndidi oro ewut mmɔ usuŋ emi mmɔ enade nte eka, sese, ema enam; ke ntak oro mmɔ ema enyene utibe ŋkpɔ emi, ŋko ye uwak utibe ŋkpɔ emi ekenamde ke odudu Abasi, ke usen ke usen.

41 Edi, ke ntak emi ekenamde mme utibe ŋkpɔ oro eto mkpri ŋkpɔ enye ama owut mmɔ mme utibe edinam. Mmɔ ekedi ifu, enyuŋ efre ndiwutmbuɔtidem mmɔ ye nsin ifik ndien mme utibe utom oro etre, ndien mmɔ ikikaha iso ke isaŋ mmɔ;

42 Ke ntak oro, mmɔ eduŋ ke wilderness, mme ikisaŋake ke nnen nnen usuŋ, ndien ukut ɔbiɔŋ ye nsat-itɔŋ ama esim mmɔ, ke ntak mme ndudue mmɔ.

43 Ndien idahaemi, eyen mi, ami moyom nte yak afo ɔfiɔk ete ke mme ŋkpɔ emi enyene mbiet; koro nte mme ete nnyin ekedide ifu ke ndikpaŋ utɔŋ nnɔ ŋkpɔ emi adade usuŋ emi (idahaemi mme ŋkpɔ emi edi emi edibede ifep) mmɔ ikiforoke; kpa ntre ke edi ye mme ŋkpɔ emi edide eke spirit.

44 Koro sese, edi mmem mmem ndikpaŋ utɔŋ nnɔ ikɔ Christ, emi ediwutde fi nnen nnen usuŋ emi adade aka nsinsi inemesit, nte eketiede ye mme ete nnyin ndikpaŋ utɔŋ nnɔ ŋkpɔ emi adade usuŋ emi, emi ediwutde mmɔ nnen nnen usuŋ ndika isɔŋ eŋwɔŋɔ.

45 Ndien idahaemi ami ndɔhɔ, ndi utɔ iduhe ke ŋkpɔ emi? Koro kpa ke akpanikɔ nte ada usuŋ emi akadade mme ete nnyin, ke ntitiene usuŋ esie, aka isɔŋ eŋwɔŋɔ, ke mme ikɔ Christ, edieke nnyin itienede usuŋ mmɔ, edida nnyin ibe ebedeŋ ukut emi ika isɔŋ eŋwɔŋɔ emi etim ɔfɔnde akan.

46 O eyen mi, kuyak nnyin idi ifu ke ntak mmem mmem usuŋ; koro ntem ke ekedi ye mme ete nnyin; koro ntem ke ekebeŋe enɔ mmɔ, ete edieke mmɔ edisede mmɔ eyedu uwem; kpa ntre ke edi ye nnyin. Ebeŋe usuŋ, ndien edieke nnyin idisede nnyin iyidu uwem ke nsinsi.

47 Ndien idahaemi, eyen mi, kut ete ke afo emekpeme ndisana ŋkpɔ emi, iŋ, kut ete ke afo emese Abasi onyuŋ odu uwem. Ka bine mbon emi ndien tiŋ ikɔ, nyuŋ sin idem. Eyen mi, saŋa-suŋ.