1 Ndien idahaemi, edikem ke ɔyɔhɔ isua edip ye itiokiet mme ebiere ikpe nnɔ ikɔt Nephi, sese, ke ini mme Lamanite ekedemede ke akpa usenubɔk ke akpa ɔfiɔŋ, sese, mmɔ ekut ke Amalickiah ama akpa ke tent esie; ndien mmɔ ŋko ekut ete ke Teancum ama ebeŋe idem ndiŋwana ekɔŋ ye mmɔ ke usen oro.

2 Ndien idahaemi, ke ini mme Lamanite ekutde emi ndik ama omum mmɔ; ndien mmɔ ekpɔŋ uduak mmɔ ke ndisaŋa nduk isɔŋ ke edem edere, ndien efiak edem ye kpukpru mbon ekɔŋ mmɔ eduk obio Mulek, enyuŋ eyom ukpeme ke mme ebiet ukpeme mmɔ.

3 Ndien edikem ete ke ema emek eyen eka Amalickiah nte edidem enɔ mme owo; ndien enyiŋ esie ekedi Ammoron; ke ntem edidem Ammoron, eyen eka edidem Amalicliah, ke ekemek ete akara ke itie esie.

4 Ndien edikem ete enye ama ɔnɔ ikɔt esie uyo ete ekpeme mme obio oro, emi mmɔ ekebɔde eto ke ndiduɔk iyip; koro mmɔ ikibɔhɔ obio ndomo kiet ibɔhɔke ke mmɔ ema eduɔk ediwak iyip.

5 Ndien idahaemi, Teancum ama okut ete ke mme Lamanite ema ebiere ndinyene mme obio oro emi mmɔ ekebɔde, ye mme ubak isɔŋ emi mmɔ ekenyenede; ndien ŋko ke ekutde akamba ibat mmɔ, Teancum ama ekere ke ifɔnke ete enye odomo ndiŋwana ye mmɔ ke mme ebiet ukpeme mmɔ.

6 Edi enye ama enim ikɔt esie akanade, nte anam mme mbeŋidem ekɔŋ; iŋ, ndien ke akpanikɔ enye ekebeŋe idem ndikpeme idem esie mbaŋa mmɔ, ke ndibɔp mme ibibene nkanade ye ndibeŋe mme ebiet udibe.

7 Ndien edikem ete enye aka iso ntem ebeŋe idem ɔnɔ ekɔŋ tutu Moroni ama ɔnɔ ediwak ibat owo ete edisɔŋɔ mbon ekɔŋ esie.

8 Ndien Moroni ŋko ɔnɔ uyo esɔk enye ete yak enye enim mbon ŋkpɔkɔbi emi ekeduɔde eduk ubɔk esie; koro ke adaŋa nte mme Lamanite ekemumde uwak mbon ŋkpɔkɔbi, ete enye enim kpukpru mbon ŋkpɔkɔbi mme Lamanite nte ufak enɔ mbon emi mme Lamanite ekemumde.

9 Ndien enye ŋko ɔnɔ uyo esɔk enye ete yak enye ɔsɔŋɔ isɔŋ Bountiful, onyuŋ ekpeme mfafaha usuŋ emi adade oduk isɔŋ ke edem edere, mbak mme Lamanite idinyene ebiet oro inyuŋ inyene odudu ndinyeŋe mmɔ nto ofuri nkaŋ.

10 Ndien Moroni ŋko ɔnɔ esɔk enye, oyom enye ete enye etiŋ-enyin ke ndikpeme nkaŋ isɔŋ oro, ndien ete enye oyom kpukpru ufaŋ ndimia mme Lamanite ke nkaŋ oro, ke adaŋa nte odude ke odudu esie, man ke ekeme ndidi ke enye eyefiak ada ŋkari mme usuŋ efen ɔbɔ mme obio oro emi ekesiode ke ubɔk mmɔ; ndien ete enye ŋko eyekpeme onyuŋ ɔsɔŋɔ mme obio emi ekanade ekuk, emi mikiduɔhɔ iduk ubɔk mme Lamanite.

11 Ndien enye ŋko ɔdɔhɔ enye ete, ami nyedi sobo fi, edi sese, mme Lamanite ke eŋwana ye nnyin ke mme adaŋa isɔŋ ke edem usop utin inyaŋ; ndien sese, ami ke ŋwana ye mmɔ, ke ntak oro ami nkemeke ndidi ndisobo fi.

12 Idahaemi, edidem (Ammoron) ama ɔwɔrɔ ke isɔŋ Zarahemla, ndien ama anam ɔbɔŋ-aŋwan ɔfiɔk abaŋa mkpa eyen eka esie, ndien ama osobo ediwak ikɔt esie ɔtɔ kiet, onyuŋ adaha aka eŋwan ye mme Nephite ke mme adaŋa edem usop utin inyaŋ.

13 Ndien ke ntem enye ama odomo ndifina mme Nephite; ye nditap nsio usuk mbon ekɔŋ mmɔ ŋka ke ubak isɔŋ oro, ke ini enye ama ɔkɔnɔ mbon emi enye ɔkɔkpɔŋde uyo ete enyene mme obio emi enye ɔkɔbɔde, ete mmɔ ŋko efina mme Nephite ke mme adaŋa edem usiaha utin inyaŋ, enyuŋ eda mme isɔŋ mmɔ enyene ke adaŋa nte okodude ke odudu mmɔ, nte asaŋade ye odudu mbon ekɔŋ mmɔ.

14 Ndien ke ntem ke mme Nephite ekedu ke mme idiɔk ndaha oro ke utit ɔyɔhɔ isua ukara edip ye itiokiet mme ebiere ikpe nnɔ ikɔt Nephi.

15 Edi sese, edikem ke ɔyɔhɔ isua ukara edip ye itiaba mme ebiere ikpe, ete ke Teancum, ke uyo Moroni—emi akasiakde mbon ekɔŋ ete ekpeme mme adaŋa usuk usuk ye edem usop utin isɔŋ, ndien ama ɔtɔŋɔ isaŋ esie ndika isɔŋ Bountiful, man enye aŋwam Teancum ye ikɔt esie ke ndifiak mbɔ mme obio emi mmɔ ekenanade—

16 Ndien edikem ete Teancum ama ɔbɔ uyo ndiŋwana ekɔŋ ye obio Mulek, nyuŋ mfiak mbɔ enye edieke ekemede.

17 Ndien edikem ete Teancum ama anam mbeŋidem ndiŋwana ekɔŋ ye obio Mulek, nyuŋ nsaŋa ye mbon ekɔŋ esie ŋka ndiŋwana ye mme Lamanite; edi enye ama okut ete ke enye idikemeke ndikan mmɔ ke ini mmɔ edude ke mme ebiet ukpeme mmɔ; ke ntak oro enye asana uduak esie oro ayak onyuŋ afiak ɔnyɔŋ edi obio Bountiful, ndibet edidi Moroni, man enye enyene odudu ɔnɔ mbon ekɔŋ esie.

18 Ndien edikem ete Moroni ama ekesim ye mbon ekɔŋ esie ke isɔŋ Bountiful, ke mkpere utit isua ukara edip ye itiaba mme ebiere ikpe nnɔ ikɔt Nephi.

19 Ndien ke ntɔŋɔ ɔyɔhɔ isua edip ye itiaita, Moroni ye Teancum ye ediwak mme ada ibuot mme etubom ekɔŋ enyene esop ekɔŋ—se anade nte mmɔ enam man anam mme Lamanite ewɔrɔ edi eŋwan; mme ete mmɔ ke usuŋ efen eda nneminua esio mmɔ ke mme ebiet ukpeme mmɔ, man mmɔ enyene ufaŋ ekan mmɔ enyuŋ ekan efiak enyene obio Mulek.

20 Ndien edikem ete mmɔ edɔŋ mme isuŋ-utom enɔ mbon ekɔŋ mme Lamanite, emi ekekpemede obio Mulek, enɔ ada usuŋ mmɔ, emi enyiŋ esie ekedide Jacob, eyom ete enye ɔwɔrɔ edi ye mbon ekɔŋ esie edisobo ye mmɔ ke mme una-isɔŋ ke ufɔt obio iba oro. Edi sese, Jacob, emi ekedide owo Zoramite, ikimaha ndiwɔrɔ ndi ye mbon ekɔŋ esie ndisobo ye mmɔ ke mme una-isɔŋ oro.

21 Ndien edikem ete Moroni, ke minyeneke idorienyin ndisobo ye mmɔ ke mme ebiet emi efɔnde, ke ntak oro, enye ebiere ke uduak man enye atap mme Lamanite osio ke mme ebiet ukpeme mmɔ.

22 Ke ntak oro enye anam ete Teancum ada ekpri ibat owo onyuŋ asaŋa ɔsuhɔde ekpere mben inyaŋ; ndien Moroni ye mbon ekɔŋ esie, ke okoneyo, esaŋa ke wilderness, ke edem usop utin obio Mulek; ndien ke ntem, ke mkpɔŋ oro, ke ini mbon ukpeme mme Lamanite ekekutde Teancum, mmɔ ema efehe eketiŋ enɔ Jacob, ada usuŋ mmɔ.

23 Ndien edikem ete mbon ekɔŋ mme Lamanite ema esaŋa eka eŋwan ye Teancum, ekere ke ntak mme ibat mmɔ ndikan Teancum ke ntak ekpri ibat esie. Ndien nte Teancum okokutde mbon ekɔŋ mme Lamanite nte ewɔrɔde edi ndiŋwana ye enye enye ɔtɔŋɔ ndifiak edem nsuhɔde ke mben inyaŋ, ke edem edere.

24 Ndien edikem ete ke ini mme Lamanite ekekutde ete ke enye ɔtɔŋɔ ndifehe, mmɔ enyene uko enyuŋ ebine mmɔ ye ifik. Ndien ke ini Teancum akadade mme Lamanaite ɔwɔrɔ ntem emi ekebinede mmɔ ke ikpikpu, sese, Moroni ɔnɔ uyo ete yak ubak mbon ekɔŋ esie emi ekedude ye enye esaŋa eduk obio oro, enyuŋ eda enye enyene.

25 Ndien ntem ke mmɔ ekenam, ndien ewot kpukpru mbon emi ekekpɔŋde ete ekpeme obio oro, iŋ, kpukpru mbon emi midiyakke mme ŋkpɔ ekɔŋ mmɔ inim.

26 Ndien ke ntem Moroni ama ɔbɔ obio Mulek enyene ye ubak mbon ekɔŋ esie, ke ini enye asaŋade ye nsuhɔ ndisobo ye mme Lamanite ke ini mmɔ enyɔŋde ndibine Teancum edi.

27 Ndien edikem ete mme Lamanite ema ebine Teancum tutu mmɔ edikpere obio Bountiful, ndien Lehi osobo ye mmɔ ye ekpri ibat mbon ekɔŋ, emi ekekpɔŋde ete ekpeme obio Bountiful.

28 Ndien idahaemi sese, ke ini mme ada ibuot mme etubom ekɔŋ mme Lamanite ekekutde Lehi ye mbon ekɔŋ esie nte edide ndiŋwana ye mmɔ, mmɔ efehe ke ntime, man ndusuk mmɔ idibɔhɔ obio Mulek mbemiso Lehi ebe mmɔ; koro idem ama emem mmɔ ke ntak isaŋ mmɔ, ndien idem ikimemke/ama ɔsɔŋ ikɔt Lehi.

29 Idahaemi mme Lamanite ikifiɔkke ite ke Moroni ama odu mmɔ ke edem ye mbon ekɔŋ esie; ndien kpukpru se mmɔ ekefehede ekedi Lehi ye ikɔt esie.

30 Idahaemi Lehi ikiyomke ndibe mmɔ tutu mmɔ esobo ye Moroni ye mbon ekɔŋ esie.

31 Ndien edikem ete mbemiso mme Lamanite efiakde edem eka anyan mme Nephite ema ekanade mmɔ ekuk, ye ikɔt Moroni ke nkaŋ kiet, ndien ikɔt Lehi ke nkaŋ oko, kpukpru emi idem ikimemke/ama ɔsɔŋ enyuŋ eyɔhɔ ye odudu; edi idem ama emem mme Lamanite ke ntak anyan isaŋ mmɔ.

32 Ndien Moroni ɔnɔ ikɔt esie uyo ete eŋwana ye mmɔ tutu mmɔ eyak mme ŋkpɔ ekɔŋ mmɔ ebono.

33 Ndien edikem ete Jacob, ke edide ada usuŋ mmɔ, ke edide ŋko owo Zoramite, ye ke enyenede spirit emi owo mikemeke ndikan, enye ada mme Lamanite aka ekɔŋ ye ɔkpɔsɔŋ iyatesit abaŋa Moroni.

34 Moroni ke odude ke usuŋ isaŋ mmɔ, ke ntak oro Jacob ama ebiere ndiwot mmɔ nyuŋ nsiak usuŋ esie mbe nkesim obio Mulek. Edi sese, Moroni ye ikɔt esie ema enyene odudu ekan mmɔ; ke ntak oro mmɔ ikinɔhɔ mme Lamanite usuŋ.

35 Ndien edikem ete mmɔ ema eŋwana ke edem mbiba ye ɔkpɔsɔŋ iyatesit; ndien ema ewot ediwak ke ŋkaŋ mbiba; iŋ, ndien ema enɔ Moroni unan ndien ema ewot Jacob.

36 Ndien Lehi ama eyire mmɔ ke edem ye ata iyaresit ye ikɔt esie, tutu mme Lamanite ke edem eyak mme ŋkpɔ ekɔŋ mmɔ ebono; ndien nyɔhɔ nsuhɔ mmɔ, ke etimde etimede, ifiɔkke ebiet emi ekpekade mme ekpeŋwawanade.

37 Idahaemi Moroni ke okutde editimede mmɔ, enye ɔdɔhɔ mmɔ ete: Edieke mbufo edidade mme ŋkpɔ ekɔŋ mbufo idi enyuŋ esana mmɔ eyak, sese nnyin iyitre ndiduɔk iyip mbufo.

38 Ndien edikem ete ke ini mme Lamanite ema ekekop mme ikɔ emi, mme ada ibuot mme etubom ekɔŋ mmɔ, kpukpru mbon emi owo mikiwotke, ewɔrɔ edi enyuŋ etop mme ŋkpɔ ekɔŋ mmɔ enim ke ikpat Moroni, ndien ŋko enɔ ikɔt mmɔ uyo ete yak mmɔ enam ukem ukem oro.

39 Edi sese, ediwak ema edu emi mikimaha; ndien mbon emi mikimaha ndiyak mme akaŋkaŋ mmɔ nnɔ ema emum enyuŋ ebɔp mmɔ, ndien ema ebɔ mmɔ mme ŋkpɔ ekɔŋ mmɔ, ndien enyik mmɔ ete esaŋa ye nditɔ eka mmɔ ekeduk isɔŋ Bountiful.

40 Ndien idahaemi ibat mbon ŋkpɔkɔbi emi ekemumde ema ewak ekan ibat mbon emi ekewotde, iŋ, ewak ekan mbon emi ekewotde ke ŋkaŋ mbiba.