1 Ndien idahaemi, eyen mi, ami menyene esisit nditiŋ nnɔ fi nkan se ami nketiŋde nnɔ eyen eka fo; koro sese, afo unyeneke nsɔŋɔ nda eyen eka fo, ntiŋ-enyin esie, ye nsin ifik esie ke ndinim mme ibet Jehovah? Sese, ndi enye inimke eti uwut-ŋkpɔ inɔ fi?

2 Koro afo ukukpaŋke utɔŋ unɔ mme ikɔ mi nte eyen eka fo akanamde, ke otu mme Zoramite. Idahaemi emi edi se ami nyenede mbaŋa fi; afo ama aka isoanam inua ke odudu fo ye ke ifiɔk fo.

3 Ndien emi idighe kpukpru, eyen mi. Afo ama anam sifinade ami; koro afo ama ɔkpɔŋ utom, ndien onyuŋ aka ke isɔŋ Siron ke ufɔt isɔŋ mme Lamanite, etiene ŋwan akpara Isabel.

4 Iŋ, enye ama eyip esit ediwak; edi emi ikidihe ntak inɔ fi, eyen mi. Akpakana nte afo esin idem ke utom emi ekenɔde fi.

5 Ndi afo ufiɔkke, eyen mi, ete ke mme ŋkpɔ emi edi mbubiam ke iso Jehovah; iŋ, edi mbubiam akan kpukpru idiɔk ŋkpɔ ibɔhɔke edi ndiduɔk iyip owo emi miduehe mme ndikaŋ Edisana Spirit?

6 Koro sese, edieke afo akaŋde Edisana Spirit ke ini enye ama ekenyene ebiet ke idem fo, ndien afo ɔmɔfiɔk ke afo amakaŋ enye, sese, emi edi idiɔk ŋkpɔ emi minyeneke edifen nnɔ; iŋ, ndien owo ekededi emi owotde owo ke misaŋake ye uŋwana ye ifiɔk Abasi, imemke inɔ enye ndinyene edifen nnɔ; iŋ, ami ndɔhɔ fi, eyen mi, nte ke imemke inɔ enye ndinyene edifen nnɔ.

7 Ndien idahaemi, eyen mi, ami mbeŋe Abasi nte yak ukudi ke afo emedue ke utɔ akamba ndudue emi. Ami mkpetiŋke ikɔ mbaŋa mme ndudue fo, nditimede ukpɔŋ fo, edieke mikpidighe ke ufɔn fo.

8 Edi sese, afo ukumeke ndidip Abasi mme ndudue fo; ndien ibɔhɔke afo akabade esit mmɔ eyeda nte ikɔ ntiense ebaŋa fi ke akpatre usen.

9 Idahaemi eyen mi, ami moyom nte afo akabade esit onyuŋ ɔkpɔŋ mme idiɔk ŋkpɔ fo, ukunyuŋ uyom aba mme idiɔkitɔŋ enyin fo, edi fad-idem fo baŋa kpukpru mme ŋkpɔ emi; koro ibɔhɔke afo anam emi afo ukemeke ndinyene obio ubɔŋ Abasi. Oh, ti, nyuŋ nyime ke idem fo, nyuŋ fad-idem fo ke mme ŋkpɔ emi.

10 Ndien ami nnɔ fi uyo nte afo ɔkɔk ibuot ye ikpɔ nditɔ eka fo ke mme edinam fo; koro sese, afo odu ke ini uyen fo, ndien afo omoyom ete nditɔ eka fo ebɔk fi. Ndien kpaŋutɔŋ nnɔ item mmɔ.

11 Kuyak ikpikpu mme ndisime ŋkpɔ ndomo kiet ada fi ɔwɔrɔ ɔkpɔŋ usuŋ; kuyak satan ada esit fo aba ɔwɔrɔ aka etiene mme idiɔk iban akpara oro. Sese, O eyen mi, nsutɔ akamba ukwaŋ-ŋkpɔ ke afo ada ɔnɔ mme Zoramite; koro ke ini mmɔ ekekutde ido fo mmɔ imaha ndibuɔt idem ke mme ikɔ mi.

12 Ndien idahaemi Spirit Jehovah ɔdɔhɔ mi ete: Nɔ nditɔ fo uyo ete enam eti, man mmɔ ekuda esit ediwak owo uwɔrɔ uka nsobo; ke ntre ami nnɔ fi uyo, eyen mi, ke uteŋe Abasi, nte afo osioŋo idem ɔkpɔŋ mme ukwaŋ-ŋkpɔ fo;

13 Nte afo afiak edem etiene Jehovah ye ofuri esit, ukeme, ye odudufo; man afo ukuda mme esit uwɔrɔ aba ete ekenam idiɔk; edi kam fiak tiene mmɔ, nyuŋ nyime mme ndudue fo ye idiɔk ŋkpɔ emi afo anamde.

14 Kuyom inyene ye mme ikpikpu ŋkpɔ ererimbot emi; koro sese, afo ukemeke ndikama mmɔ ye afo.

15 Ndien idahaemi, eyen mi, ami nyetiŋ esisit nnɔ fo kabaŋa edidi Christ. Sese, ami ndɔhɔ fi, nte ke enye ke akpanikɔ edidi ndimem mme idiɔk ŋkpɔ ererimbot ifep; iŋ, enye kedi ndinɔ ikɔt esie nti mbuk edinyaŋa.

16 Ndien idahaemi, eyen mi, emi edi utom emi ekekotde fi, ete etiŋ nti mbuk emi ɔnɔ mbon emi, man ebeŋe esit mmɔ, mme ke usuŋ efen man edinyaŋa edi ɔnɔ mmɔ, man mmɔ ebeŋe esit nditɔ mmɔ ndikop ikɔ ke ini edidi esie.

17 Ndien idahaemi ami nyenam esit fo ɔsuhɔre esisit kabaŋa ŋkpɔ emi. Sese, idem akpa fi abaŋa ntak enamde efiɔk mme ŋkpɔ emi tɔŋɔ oko. Sese, ami ndɔhɔ fi, ndi ukpɔŋ kiet idahaemi inyeneke ufɔn inɔ Abasi nte ukpɔŋ kiet edinyenede ke ini edidi esie?

18 Ndi idighe akpan ete enam mbon emi ye nditɔ mmɔ ŋko efiɔk ebaŋa uduak edifak?

19 Ndi idighe kpa mmem mmem ke ini emi inɔ Jehovah ete ɔdɔŋ angel esie ete etiŋ nti mbuk emi ɔnɔ nnyin nte etiŋ ye nditɔ nnyin, mme kpa ke ini enye ama ekedi?