1 Ndien idahaemi edikem ke ntɔŋɔ isua edipyeduop mme ebiere ikpe, ke ɔyɔhɔ usen iba ke akpa ɔfiɔŋ, Moroni ɔbɔ ŋwed oto Helaman, etiŋde abaŋa mme ubono ŋkpɔ mme owo ke nkaŋ isɔŋ oro.

2 Ndien emi edi mme ikɔ emi enye ekewetde, ete: Edima eyeneka mi, Moroni, ke Jehovah ye ke mme ukut nnyin ke ekɔŋ; sese, edima eyen eka mi, ami menyene ubak ŋkpɔ nditiŋ nnɔ fi kabaŋa ekɔŋ nnyin ke nkaŋ isɔŋ emi.

3 Sese, mme nditɔ iden tosin iba mme owo emi Ammon akadade ɔsuhɔde ɔwɔrɔ edi ke isɔŋ Nephi—idahaemi afo ɔmɔfiɔk ke mmɔ emi eke eto ubon Laman, emi ekedide akpan ete nnyin Lehi;

4 Idahaemi ami nyomke nditiŋ nnɔ fi mbaŋa mme ido mmɔ mme unana mbuɔtiden mmɔ, koro afo ɔmɔfiɔk abaŋa kpukpru mme ŋkpɔ emi—

5 Ke ntak oro ekem mi ete ndɔhɔ fi nte ke mkparawa tosin iba emi etaŋ mme ŋkpɔ ekɔŋ mmɔ, ndien eyom ete yak ami ndi ada usuŋ mmɔ; ndien nnyin imidi ndikpeme obio nnyin.

6 Ndien idahaemi afo ŋko ɔmɔfiɔk abaŋa ediomi emi mme ete mmɔ ekenamde, ete ke mmɔ iditaŋke mme ŋkpɔ ekɔŋ mmɔ iŋwana ye nditɔ eka mmɔ man eduɔk iyip.

7 Edi ke ɔyɔhɔ isua edip ye itiokiet, ke ini mmɔ eke ekutde mme ukut nnyin ye mme nnanenyin nnyin ke ntak mmɔ, mmɔ ema eyom ndibiat ediomi emi mmɔ ekenamde nyuŋ ntaŋ mme ŋkpɔ ekɔŋ mmɔ ke ukpeme nnyin.

8 Edi ami nkayakke ete yak mmɔ ebiat ediomi emi emi mmɔ ekenamde, nkerede nte ke Abasi ɔyɔnɔ nnyin odudu, tutu ete yak nnyin ikubɔ aba ufen ke ntak edisu eŋwɔŋɔ emi mmɔ ekenamde.

9 Edi sese, emi edi ŋkpɔ kiet nnyin idinyenede akwa idaresit. Koro sese, ke ɔyɔhɔ isua edip ye itiokiet, ami, Helaman, mma nda ke ibuot mkparawa tosin iba emi ŋka ke obio Judea, man nkaŋwam Antipus, emi afo ekemekde ada usuŋ ɔnɔ mme owo ke nkaŋ isɔŋ oro.

10 Ndien ami mma ndian nditɔ tosin iba mi, (koro mmɔ edot se ekotde nditɔ) ke mbon ekɔŋ Antipus, ndien ke odudu emi Antipus ama dara ata eti eti; koro sese, mme Lamanite ema enam mbon ekɔŋ esie ekpri ke ibat ke ntak emi mbon ekɔŋ mmɔ ekewotde ata ediwak ibat owo nnyin, ke ntak emi ana nnyin ifuhɔ.

11 Edi, nnyin iyidɔŋ idem nnyin esit ke ŋkpɔ kiet emi, ite ke mmɔ ekpa enɔ edumbet obio mmɔ ye eke Abasi mmɔ, iŋ, ndien mmɔ enemesit.

12 Ndien mme Lamanite ema enyuŋ emum uwak mbon ŋkpɔkɔbi ekama, kpukpru emi edide mme ada ibuot mme etubom ekɔŋ, koro ndomo kiet efen mmɔ ikisuhɔke uwem. Ndien nnyin ikere ite ke mmɔ ke ini emi edu ke isɔŋ Nephi; edi ntre edieke owo miwotke mmɔ.

13 Ndien idahaemi emi edi mme obio emi mme Lamanite enyenede ke ndiduɔk iyip ata ediwak mbon uko nnyin.

14 Isɔŋ Manti, mme obio Manti, ye obio Zeezrom, ye obio Cumeni, ye obio Antiparah.

15 Ndien emi edi mme obio emi mmɔ ekenyenede ke ini ami nkesimde obio Judea; ndien ami nkut Antipus ye ikɔt esie nte enamde ɔkpɔsɔŋ utom ye odudu mmɔ ndikpeme obio oro.

16 Iŋ, ndien mmɔ ema efuhɔ ɔkpɔsɔŋ ke obuk idem ye ke spirit, koro mmɔ ema eŋwana uko uko ke uwemeyo ndien enam ɔkpɔsɔŋ utom ke okoneyo ndikpeme mme obio mmɔ; ndien ke ntem mmɔ ema ekut ndutuhɔ ediwak ukut eke kpukpru utɔ.

17 Ndien idahaemi mmɔ ema ebiere ndikan ke ebiet emi midighe ntre ekpa; ke ntak oro afo emenyene ntak ndikere ke ekpri ibat mbon ekɔŋ emi ami nkadade ndi ye ami, iŋ, nditɔ mi oro, ema enɔ mmɔ akamba idorenyin ye ɔkpɔsɔŋ idaresit.

18 Ndien idahaemi edikem ete ke ini mme Lamanite ekutde ete ke Antipus ama ɔbɔ akwa odudu ɔnɔ mbon ekɔŋ esie, ema enyik mmɔ ke uyo Ammoron ete ekuka obio Judea, mme ye nnyin, ndiŋwana ekɔŋ.

19 Ndien ke ntem ke Jehovah ɔkɔfɔn ye nnyin; koro ekpedi mmɔ ema edi eŋwan ye nnyin ke mmem idem nnyin emi ekeme ndidi ndusuk ke mmɔ ekpekewot ekpri ibat mbon ekɔŋ nnyin; edi ke ntem ke eketim nnyin enim.

20 Ammoron ama ɔnɔ mmɔ uyo ete ekpeme mme obio emi mmɔ ekebɔde. Ndien ke ntem ke ɔyɔhɔ isua edip ye itiokiet eketre. Ndien ke ntɔŋɔ ɔyɔhɔ isua edip ye itiaba nnyin ima ibeŋe idem obio nnyin ye idem nnyin inɔ ukpeme.

21 Idahaemi nnyin ikiyom ite mme Lamanite edi eŋwan ye nnyin; koro nnyin ikiyomke ndiŋwana ye mmɔ ke mkpɔsɔŋ ebiet mmɔ.

22 Ndien edikem ete nnyin inim mbon uyep ikanade, ite ekpeme mme edinam mme Lamanite, man mmɔ ekube nnyin ke okoneyo mme ke uwemeyo nkeŋwana ye mme obio nnyin eken emi ekedude ke edere edere.

23 Koro nnyin ima ifiɔk ite ke mme obio oro ke mmɔ ikisɔŋɔkeidem ikem ndiŋwana ye mmɔ; ke ntak oro nnyin ima iyom, edieke mmɔ ebede nnyin, ndiŋwana ye mmɔ ke edem, ndien ke ntem iŋwana ye mmɔ ke edem ke ukem ini emi eŋwanade ye mmɔ ke iso. Nnyin ima ikere ke imikeme ndikan mmɔ ubɔk; edi sese, idorenyin nnyin ama akpa mfuhɔ ke ekikere nnyin emi.

24 Mmɔ ikibehe nnyin ye ofuri mbon ekɔŋ mmɔ, ŋko mmɔ ikibehe ye ubak, man ke ndusuk mmɔ misɔŋke idem ikem ndien ekan mmɔ.

25 Ŋko mmɔ ikisaŋake isuhɔde iduk obio Zarahemla; ŋko mmɔ ibehe ke ibuot Sidon, ibe iduk obio Nephihah.

26 Ndien ke ntem, ye mbon ekɔŋ mmɔ, mmɔ ema ebiere ndinim mme obio emi mmɔ ekebɔde.

27 Ndien idahaemi edikem ke ɔyɔhɔ ɔfiɔŋ iba ke isua emi, mme ete nditɔ tosin iba mi oro ema eda ediwak ŋkpɔ udu uwem esɔk nnyin.

28 Ndien ŋko ema enɔ mme owo tɔsin iba ke Zarahemla esɔk nnyin. Ndien ke ntem nnyin ima ibeŋe idem ye mme owo tɔsin duop, ye mme ŋkpɔ udu uwem inɔ mmɔ, ye ŋko eke iban mmɔ ye eke nditɔ mmɔ.

29 Ndien mme Lamanite, ke ntem ekutde nte mbon ekɔŋ nnyin etɔtde ke usen ke usen, ye mme ŋkpɔ udu uwem esimde ndiŋwam nnyin, mmɔ etɔŋɔ ndifehe ndik, enyuŋ etɔŋɔ ndibumede nwɔrɔ ndi, ete edieke ekemede nditre nnyin ndibɔ mme ŋkpɔ udia ye odudu.

30 Idahaemi ke ini nnyin ikikutde ite ke mme Lamanite etɔŋɔ nditimede esit mbaŋa ŋkpɔ emi, nnyin ima iyom ndinam mmɔ ŋkari; ke ntak oro Antipus ɔnɔ uyo ete ami nsaŋa ye mkpri nditɔ mi ŋka obio eke adianade, nte nnyin ikpimen mme ŋkpɔ udia ika obio emi adianade.

31 Ndien ete ana nte nnyin isaŋa ikpere obio Antiparah, nte nnyin ika obio emi ebede enye esim, ke mme adaŋa mben inyaŋ.

32 Ndien edikem ete nnyin isaŋa ika, nte ikama mme ŋkpɔ udu uwem nnyin, ndika obio oro.

33 Ndien edikem ete Antipus ama asaŋa ika ye ubak mbon ekɔŋ esie, ɔkpɔŋde usuk ete ekpeme obio oro. Edi enye ikisaŋake ika tutu ami mma nkaka ye ekpri mbon ekɔŋ mi, nyuŋ ndi kpere obio Antiparah.

34 Ndien idahaemi, ke obio Antiparah ke ekenim mbon ekɔŋ mme Lamanite emi ekesɔŋde odudu ekan; iŋ, enye emi ekewakde ekan.

35 Ndien edikem ete ke ini mbon uyep mmɔ ekedɔhɔde mmɔ, mmɔ ewɔrɔ edi ye mbon ekɔŋ mmɔ enyuŋ edi ndiŋwana ye nnyin.

36 Ndien edikem ete nnyin ima ifehe mmɔ, inɔ edere edere. Ndien ke ntem nnyin ima ida mbon ekɔŋ mme Lamanite emi ekenyenede odudu ekan iwɔrɔ;

37 Iŋ, ika anyan, tutu ete ke ini mmɔ ekekutde mbon ekɔŋ Antipus nte ebinede mmɔ, ye odudu mmɔ, mmɔ ikiwɔŋɔkede inɔ nnasia mme ufien, edi mmɔ eka iso efehe nnen nnen etiene nnyin; ndien nte nnyin ikerede, ekedi uduak mmɔ ndiwot nnyin mbemiso Antipus esim mmɔ, ndien emi man ikɔt nnyin ekukanade mmɔ ukuk.

38 Ndien idahaemi Antipus, ke okutde ŋkpɔndik nnyin, ama anam mbon ekɔŋ esie esɔp edi. Edi sese, ekedi okoneyo; ke ntak oro mmɔ ikisimke nnyin, ŋko Antipus ikisimke mmɔ; ke ntak oro nnyin ima ina ke okoneyo oro.

39 Ndien edikem ete ke mbemiso usiere usenubɔk, sese, mme Lamanite ke ebine nnyin. Idahaemi nnyin ikisɔŋke idem ikem ndiŋwana ye mmɔ; iŋ, ami nyakke nte mkpri nditɔ mi eduɔ eduk ke ubɔk mmɔ; ke ntak oro nnyin ima ika iso ke isaŋ nnyin, ndien nnyin ida isaŋ nnyin iduk wilderness.

40 Idahaemi mmɔ ikiwɔŋɔkede inɔ nnasia mme ufien mbak owo ukukanade mmɔ ukuk; ŋko ami ŋwɔŋɔkede nnɔ nnasia mme ufien mbak mmɔ ekusim mi, ndien nnyin ikikanke iŋwana ye mmɔ, koro ekpewot nnyin, ndien mmɔ ekpefehe ebɔhɔ; ndien ke ntem nnyin ima ifehe ke ofuri usen oro iduk wilderness, tutu eyo okim.

41 Ndien edifiak edikem ete, ke ini uŋwana usenubɔk edide nnyin ikut mme Lamanite edide ekpere nnyin, ndien nnyin ima ifehe ke iso mmɔ.

42 Ndien edikem ete ke mmɔ ikibineke nnyin ika anyan mbemiso mmɔ etre; ndien ekedi ke usenubɔk ɔyɔhɔ usen ita ke ɔyɔhɔ ɔfiɔŋ itiaba.

43 Ndien idahaemi, mme Antipus ama esim mmɔ nnyin ikifiɔkke, edi ami mma ndɔhɔ ikɔt mi nte: Esese, nnyin ikere ke mmɔ etre man nnyin idi idiŋwana ye mmɔ, man mmɔ emum nnyin ke afia mmɔ;

44 Ke ntak oro mbufo edɔhɔ didie, nditɔ mi, ndi mbufo eyeka eŋwan ye mmɔ?

45 Ndien idahaemi ami ndɔhɔ fi, edima eyeneka mi Moroni, nte ke akananam ami nkwe utɔ akwa uko oro, iŋ iŋ, idughe ke otu ofuri mme Nephite.

46 Koro nte nkokotde mmɔ nditɔ mi (koro mmɔ kpukpru mmɔ ekedi ata mkparawa) kpa ntre mmɔ edɔhɔ mi ete: Ete, sese Abasi nnyin odu ye nnyin, ndien enye idiyakke ete yak nnyin iduɔ; ndien yak nnyin ika iso; nnyin idiwotke nditɔ eka nnyin edieke mmɔ edikpɔŋde nnyin; ke ntak oro yak nnyin ika, man mmɔ ekukan mbon ekɔŋ Antipus.

47 Idahaemi akananam mmɔ iŋwanake eŋwan, edi mmɔ ikifeheke mkpa; ndien mmɔ ema etim ekere ebaŋa uwɔrɔ ufin mme ete mmɔ ekan nte mmɔ ekekerede uwem mmɔ; iŋ, mme eka mmɔ ema ekpep mmɔ, ete ke edieke mmɔ miyikke, Abasi ayanam mmɔ ebɔhɔ.

48 Ndien mmɔ ema etiŋ mme ikɔ eka mmɔ enɔ mi, ete: Nnyin iyikke ite ke mme eka nnyin ema efiɔk.

49 Ndien edikem ete ami mma mfiak nyɔŋ ŋka ye tɔsin iba mi ndiŋwana ye mme Lamanite emi ekebinede nnyin. Ndien idahaemi sese, mbon ekɔŋ Antipus ema esim mmɔ, ndien ɔkpɔsɔŋ eŋwan ama ɔtɔŋɔ.

50 Mbon ekɔŋ Antipus ke idem ememde, ke ntak anyan isaŋ mmɔ ke ekpri ufaŋ ini, ema eyom ndiduɔ nduk ubɔk mme Lamanite; ndien ekpedi ami ŋkɔŋyɔŋke ŋka ye tɔsin iba mi mmɔ ekpenyene uduak mmɔ.

51 Koro Antipus ama akpa ke akaŋkaŋ, ye ediwak mme ada usuŋ esie, ke ntak mmem idem mmɔ, emi okotode nte mmɔ ekesɔpde isaŋ—ke ntak oro ikɔt Antipus, ke eketimede ke ntak iduɔ mme ada usuŋ mmɔ, etɔŋɔ ndifiak edem ke iso mme Lamanite.

52 Ndien edikem ete mme Lamanite enyene uko, ndien etɔŋɔ ndibine mmɔ; ndien ke ntem ke mme Lamanite ekebine mmɔ ye ɔkpɔsɔŋ odudu ke ini Helaman otode edem edem esim mmɔ ye tɔsin iba esie, onyuŋ ɔtɔŋɔ ndiwot mmɔ ata eti eti, tutu ete ke ofuri mbon ekɔŋ mme Lamanite etre enyuŋ eŋwɔŋɔde eŋwana ye Helaman.

53 Idahaemi ke ini ikɔt Antipus ekekutde ete ke mme Lamanite ema eŋwɔŋɔde edem, mmɔ esobo ikɔt mmɔ ɔtɔ kiet ndien efiak eto edem edem eŋwana ye mme Lamanite.

54 Ndien idahaemi edikem ete nnyin, ikɔt Nephi, ikɔt Antipus, ye ami ye tɔsin mi iba, ima ikanade mme Lamanite ikuk, ndien inyuŋ iwot mmɔ; iŋ, tutu ete ke ema enyik mmɔ ndisana mme ŋkpɔ ekɔŋ mmɔ nyak ŋko ye idem mmɔ nte mme mbon ŋkpɔkɔbi ekɔŋ.

55 Ndien idahaemi edikem ete ke ini mmɔ ema ekesana idem mmɔ eyak enɔ nnyin, sese, ami mbat mkparawa oro emi ekeŋwanade ye ami, mfehe ndik nte ke ewot ediwak mmɔ.

56 Edi sese, ke akwa idaresit mi, owo ndomo kiet ikiduɔhɔ ke isɔŋ; iŋ, ndien mmɔ ekeŋwana nte edi ye odudu Abasi; iŋ, akananam owo ikwe nte mme owo eŋwanade ye utɔ utibe odudu oro; ndien ye utɔ akwa odudu oro ke mmɔ ekeŋwana ye mme Lamanite, tutu mmɔ enam idem enyek mmɔ; ndien ke ntak emi ke mme Lamanite ekesana idem mmɔ eyak enɔ nte mbon ŋkpɔkɔbi ekɔŋ.

57 Ndien nnyin ikinyeneke ebiet ndinim mbon ŋkpɔkɔbi nnyin, man nnyin ikpeme mmɔ kabaŋa mme mbon ekɔŋ mme Lamanite, ke ntak oro nnyin inɔ mmɔ eka isɔŋ Zarahemla, ye ubak ikɔt Antipus emi owo mikiwotke, ye mmɔ; ndien nyɔhɔ nsuhɔ ami nda nyuŋ dian mmɔ ye mkparawa Ammonite mi, ndien ida isaŋ nnyin ifiak inyɔŋ obio Judea.