Ibuot 59
Moroni ebeŋe Pahoran ete ɔsɔŋɔ mbon ekɔŋ Helaman idem—Mme Lamanite emum obio Nephihah—Moroni ayatesit ye ukara. Ŋkpɔ nte 62 M.C.
1 Ndien edikem ke ɔyɔhɔ isua ukara edipyeduop mme ebiere ikpe nnɔ ikɔt Nephi, ke Moroni ama ɔkɔbɔ onyuŋ okotde nwed Helaman, enye ama adara ata eti eti ke ntak mfɔnɔŋkpɔ, iŋ, ata eti-utip emi Helaman amakenyene ke ndinyene mme isɔŋ oro emi eketakde.
2 Iŋ, ndien enye ama anam kpukpru ikɔt esie efiɔk, ke ofuri ŋkanade nkuk isɔŋ ke ŋkaŋ oro emi enye okodude, man mmɔ edara ŋko.
3 Ndien edikem ete enye ke ndondo oro ɔnɔ ŋwed esɔk Pahoran, eyom ete enye anam mme owo esobo ɔtɔ kiet ndisɔŋɔ Helaman idem, mme mme mbon ekɔŋ Helaman idem, tutu ete man enye ke mmem mmem usuŋ enim ŋkaŋ isɔŋ oro emi enamde enye afiak enyene ke utibe usuŋ.
4 Ndien edikem ke ini Moroni amakɔnɔ ŋwed emi aka isɔŋ Zarahemla, enye afiak ɔtɔŋɔ ndinim usuŋ man enye enyene mme nsuhɔ inyene ye mme obio oro emi mme Lamanite ekebɔde mmɔ.
5 Ndien edikem ete ke ini Moroni akanamde mme mbeŋe idem ntem ndikiŋwana ekɔŋ ye mme Lamanite, sese, mme Lamanite ema eka eŋwan ye mbon Nephihah, emi ekebohode ɔtɔ kiet eto obio Moroni ye obio Lehi ye obio Morianton.
6 Iŋ, tutu mbon emi ekenyikde ete efehe ekpɔŋ isɔŋ Manti, ye nkan nkuk isɔŋ oro, ema eto edi enyuŋ edidiana ye mme Lamanite ke ŋkaŋ isɔŋ emi.
7 Ndien ke ewakde ata eti eti ntem, iŋ, enyuŋ ebɔde odudu ke usen ke usen, ke uyo Ammoron mmɔ ema edi eŋwan ye mbon Nephihah, ndien mmɔ ema etɔŋɔ ndiwot mmɔ ye ata akpakip uwotowo.
8 Ndien mme mbon ekɔŋ mmɔ ema ewak ata eti eti tutu ema enyik nsuhɔ mbon Nephihah ete efehe ke iso mmɔ; ndien mmɔ edi ke akpanikɔ enyuŋ ediana ye mbon ekɔŋ Moroni.
9 Ndien idahaemi nte Moroni ekekerede ete ke akpana nte enɔ mme mbon ekɔŋ eka obio Nephihah, ndiŋwam mme owo ke ndinim obio oro, ndien kɔfiɔkde ete ke etim edi mmemmem ndikpeme obio oro okuduɔ uduk ubɔk mme Lamanite akan ndifiak mbɔ mmɔ enye, enye ama ekere ke edide mmemmem ɔnɔ mmɔ nditim nnim obio oro.
10 Ke ntak oro enye ama enim kpukpru mbon ekɔŋ esie ete ekpeme mme ebiet oro emi enye ɔkɔbɔde.
11 Ndien idahaemi, ke ini Moroni okokutde ete ke obio Nephihah ama atak enye ama ɔfuhɔ ata eti eti, ndien ɔtɔŋɔ ndiyik, ke ntak ibak mme owo, mme edide nte mmɔ eduɔ eduk ubɔk nditɔ eka mmɔ.
12 Idahaemi emi ekedi sikitibede ye kpukpru mme ada ibuot mme etubom ekɔŋ esie. Mmɔ ema eyik enyuŋ edu ke mkpaidem ŋko ke ntak ibak mme owo, ndien emi ke ntak eti-utip mme Lamanite ke idem mmɔ.
13 Ndien edikem ete ke Moroni ama ayatesit ye ukara, ke ntak unana udɔŋ enyin mmɔ kabaŋade uwɔrɔ ufin obio mmɔ.