1 Eyen mi, kpaŋutɔŋ nnɔ mme ikɔ mi; koro ami motomo nnɔ fi, nte ke adaŋa nte afo edinimde mme ibet Abasi afo oyoforo ke isɔŋ.

2 Ami moyom nte afo anam nte ami nnamde, ke nditi ŋkpɔkɔbi mme ete nnyin; koro mmɔ ekedu ke ufin, ndien owo ndomo kiet ikikanke inam mmɔ ebɔhɔ ibɔhɔke ekedi Abasi Abraham, ye Abasi Isaac, ye Abasi Jacob; ndien ke akpanikɔ enye ama anam mmɔ ebɔhɔ ke mme ukut mmɔ.

3 Ndien idahaemi, O eyen mi Helaman, sese, afo odu ke ini uyen fo, ndien ke ntak oro, ami mbeŋe fi nte yak afo okop mme ikɔ mi onyuŋ ekpep ebaŋa mi; koro ami mɔfiɔk nte ke owo ekededi emi edisinde idorienyin mmɔ ke Abasi ke eyeŋwam mmɔ ke mme idomo mmɔ, ye mme afanikɔŋ mmɔ, ye mme ukut mmɔ, ndien eyemenere ke akpatre usen.

4 Ndien ami nyomke fi ekere ete ke ami mfiɔk ke idem mi—idighe ke emi edibede ifep edi edike eke spirit, idighe ke esit obukidem ediedi ke Abasi.

5 Idahaemi, sese, ami ndɔhɔ fi nte, edieke menkamanake ke Abasi ke ami mkpifiɔkke mme ŋkpɔ emi; edi Abasi oto, ke inua edisana angel esie, anam mi mfiɔk mme ŋkpɔ emi, idighe ke ntak emi ami ndotde;

6 Koro ami nkasaŋa ye nditɔ iren Mosiah, nyom ndisobo ufɔk Abasi Abasi; edi sese, Abasi ɔdɔŋ edisana angel esie ete akpan nnyin ke usuŋ.

7 Ndien sese, enye ɔdɔhɔ nnyin, eketie nte uyo obuma, ndien ofuri isɔŋ enyek ke idak ikpat nnyin; ndien nnyin iduɔ ke isɔŋ, koro uteŋe Jehovah ama esim nnyin.

8 Edi sese, uyo oro ɔdɔhɔ mi ete: Dahada. Ndien ami ndahada nyuŋ ndada, nyuŋ nkut angel oro.

9 Ndien enye ɔdɔhɔ mi ete: Edieke afo oyomde idem fo ndiwot, kuyom aba ndisobo ufɔk Abasi Abasi.

10 Ndien edikem ete ami nduɔ ke isɔŋ; ndien ekedi ke ufaŋ usen ita ye okoneyo ita ke ami menkakanke nkubɔde inua mi, ŋko nkankanke menede ubɔk mme ukot.

11 Ndien angel etiŋ mme ikɔ efen ɔnɔ mi, emi nditɔ eka mi ekekopde, edi ami nkokopke mmɔ; koro ke ini ami nkokopde mme ikɔ oro—Edieke afo oyomde idem fo ndiwot, kuyom aba ndisobo ufɔk Abasi Abasi—Ata ndik ye mkpaidem ama omum mi nte ke ndusuk eyewot mi, tutu ami nduɔ ke isɔŋ ndien nkokopke aba.

12 Edi ami nkɔyɔhɔ ye nsinsi ndutuhɔ, koro ukpɔŋ mi ama anuaha esim mkpon-nkan idaha onyuŋ ɔyɔhɔye kpukpru idiɔk ŋkpɔ mi.

13 Iŋ, ami mma nti kpukpru idiɔk ŋkpɔ ye mme ukwaŋ-ŋkpɔ mi, emi ekenamde etuhɔde mi ye mme ubiak hell; iŋ, ami mma nkut nte ke ami mma nsɔŋ ibuot ye Abasi mi, ndien nte ke ami nkenimke ndisana ibet esie.

14 Iŋ, ndien ami mma nwot ediwak nditɔ esie, mme ke nditim ntiŋ nda mmɔ ŋwɔrɔ nduk ke nsobo; iŋ, ndien ke akpatre mme ukwaŋ-ŋkpɔ mi ema okpon etieti, tutu ata ekikere ndidi iso Abasi mi ama ɔyɔhɔ ukpɔŋ mi ye nyomonsia emi owo mikemeke nditiŋ

15 Oh, ami nkekere, nte ekpebin mi esio ndien nkabade nsop ke ukpɔŋ ye obukidem, man ekuda mi ndida ke iso Abasi mi, man edibiere ikpe ebaŋa mme edinam mi.

16 Ndien idahaemi, ke usen ita ye okoneyo ita ke ami nkɔyɔhɔ, kpa ye mme ubiak ukpɔŋ emi obiomde ikpe.

17 Ndien edikem ete nte ami nkɔyɔhɔde ye ndutuhɔ ntem, ke ini ekikere ediwak idiɔk ŋkpɔ mi akanuakde mi, sese, ami nti ŋko nte nkokopde ete mi etiŋde nte prophet ɔnɔ mme owo abaŋa edidi Jesus Christ kiet, Eyen Abasi, ndifak mme idiɔk ŋkpɔ ererimbot.

18 Idahaemi, ke ini esit mi omumde ekikere emi, ami nseme ke esit mi nte: O Jesus, afo Eyen Abasi, tua mi mbɔm, emi ndude ke ata ndot-ndot, ndien mme nsinsi ŋkpɔkɔbi mkpa ekanade mi ekuk.

19 Ndien idahaemi, sese, ke ini nkekerede emi, ami ntihi mme ubiak mi aba; iŋ, ekikere mme idiɔk ŋkpɔ miikinuakke mi aba.

20 Ndien oh, nso idaresit, ye nso utibe uŋwana ke ami nkokut; iŋ, ukpɔŋ mi ama ɔyɔhɔ ye idaresit emi okokponde nte ubiak mi!

21 Iŋ, ami ndɔhɔ fi, eyen mi, nte ke ikemeke ndidu ŋkpɔ ndomo kiet emi okponde onyuŋ odorode nte mme ubiak mi. Iŋ, ndien mfiak ndɔhɔ fi, eyen mi, nte ke usuŋ efen, ke ŋkpɔ ndomo kiet iduhe emi okponde onyuŋ enemde nte idaresit mi.

22 Iŋ, ami nkekere ke mma nkut, kpa nte ete nnyin Lehi okokutde, Abasi etiede ke ebekpo esie, anana ibat udim mme angel ekanade enye ekuk, ke edu ukwɔ ikwɔ ye nditoro Abasi mmɔ; iŋ, ndien ama ɔdɔŋ ukpɔŋ mi ndidu do.

23 Edi sese, ubɔk ye ukot mi ema efiak enyene odudu mmɔ, ndien ami ndada ke ikpat mi, ndien nyarade nnɔ mme owo nte ke ami mma mana ke Abasi.

24 Iŋ, ndien tɔŋɔ ke ini oro tutu esim idahaemi, ami manam utom ndopke, man nda mme ukpɔŋ nnɔ edikabade esit; man nda mmɔ editabi ata idaresit emi ami nkatabide; man mmɔ ŋko emana ke Abasi, enyuŋ eyɔhɔ ye Edisana Spirit.

25 Iŋ, ndien idahaemi sese, O eyen mi, Jehovah ɔnɔ mi ata akwa idaresit ke mfri mme utom mi;

26 Koro ke ntak ikɔ emi enye anamde mimfiɔk, sese, ediwak emana ke Abasi, ndien etabi nte ami ntabide, ndien ekut enyin ke enyin nte ami nkutde; ke ntak oro mmɔ efiɔk mme ŋkpɔ emi ami ntiŋde mbaŋa, nte ami mfiɔkde, ndien ifiɔk emi ami nyenede edi eke Abasi.

27 Ndien eŋwam mi ke ndude ke mme idomo ye mme afanikɔŋ eke kpukpru utɔ, iŋ, ye ke utɔ kpukpru ukut; iŋ, Abasi anam mi mbɔhɔ ke ufɔk-ŋkpɔkɔbi, ye ke mme mbɔbɔ, ye ke mkpa; iŋ, ndien ami ndori enyin ke enye, ndien enye oyosuk anam mi mbɔhɔ.

28 Ndien ami mɔfiɔk ke enye eyemenede mi ke akpatre usen, man nduŋ ye enye ke ubɔŋ; iŋ, ndien ami nyotoro enye ke nsinsi, koro enye ada mme ete nnyin ɔwɔrɔ ke Egypt, ndien enye esip mme Egyptian ke Iduduot Inyaŋ; ndien enye ada mmɔ usuŋ ke odudu esie aka ke isɔŋ enwɔŋɔ; iŋ, ndien enye anam mmɔ ebɔhɔ ke ufin ye nkpɔkɔbi ke ini ke ini.

29 Iŋ, ndien enye ŋko ada mme ete nnyin ɔwɔrɔ ke isɔŋ Jerusalem; ndien enye ŋko, ke nsinsi odudu esie, anam mmɔ ebɔhɔ ke ufin ye nkpɔkɔbi, ke ini ke ini tutu ɔsuhɔde esim usen emi; ndien ami meti nkpɔkɔbi mmɔ kpukpru ini; iŋ, ndien akpana nte afo ŋko eti, nte ami nnamde, nkpɔkɔbi mmɔ.

30 Edi sese, eyen mi, emi idighe kpukpru; koro akpana nte afo ɔfiɔk nte ami mfiɔkde, ete ke adaŋa nte afo edinimde mme ibet Abasi afo oyoforo ke isɔŋ; ndien akpana nte afo ɔfiɔk ŋko, ete ke adaŋa nte afo mudunimke mme ibet Abasi ke eyesibe fi esio ke iso esie. Idahaemi emi edi nte ikɔ esie edide.