1 Ndien sese, idahaemi edikem ete ke udiana uduak nnyin ekedi ndinyene obio Manti; edi sese, usuŋ ikiduhe nte ikpidade mmɔ iwɔrɔ ke obio ye mkpri ibat ikɔt nnyin. Koro sese, mmɔ ema eti se nnyin ikinamde mbemiso ini emi; ke ntak oro nnyin ikikanke itap mmɔ isio ke mkpɔsɔŋ ebiet mmɔ.

2 Ndien mmɔ ema ewak ata eti eti ekan nte mbon ekɔŋ nnyin ekedide ete nnyin ikanke ika ikiŋwana ye mmɔ ke mkpɔsɔŋ ebiet mmɔ.

3 Iŋ, ndien ama ɔfɔn ete yak nnyin ida ikɔt nnyin ete ekpeme mme ŋkaŋ isɔŋ inyene nnyin oro emi nnyin ikifiakde ibɔ; ke ntak oro ama ɔfɔn ete nnyin ibet, man nnyin inyene mbon ekɔŋ efen ito isɔŋ Zarahemla ŋko ye mme mbufa ŋkpɔ udu uwem.

4 Ndien edikem ete ke ami mma ndɔŋ isuŋutom nnɔ andikara isɔŋ nnyin, man nnam enye ɔfiɔk abaŋa mme edinam ikɔt nnyin. Ndien edikem ete nnyin ima ibet ndibɔ mme ŋkpɔ udu uwem ye mbon ekɔŋ efen nto isɔŋ Zarahemla.

5 Edi sese, emi ɔkɔfɔn ye nnyin esisit; koro mme Lamanite ŋko ke ekebɔ akwa odudu ke usen ke usen, ŋko ye ediwak ŋkpɔ udu uwem; ndien ke ntem ke ndaha nnyin ekedi ke ini emi.

6 Ndien mme Lamanite ke ekebumede ewɔrɔ edi ndiŋwana ye nnyin ke ini ke ini, ebierede ye ŋkari ndiwot nnyin; edi nnyin ikikanke idi eŋwan ye mmɔ, ke ntak mme ebiet udibe mmɔ ye mkpɔsɔŋ ebiet mmɔ.

7 Ndien edikem ete ke nnyin ima ibet ke mkpɔsɔŋ ndaha emi ke ufaŋ ediwak ɔfiɔŋ, tutu nnyin iyom ndikpa ke ntak unana udia.

8 Edi edikem ete nnyin ima ibɔ udia, emi mbon ekɔŋ tɔsin iba ekekpemede eda esɔk nnyin man aŋwam nnyin; ndien emi ekedi kpukpru uŋwam emi nnyin ikibɔde, ndikpeme idem nnyin ye obio nnyin ndiduɔ nduk ke ubɔk mme asua nnyin, iŋ, ndiŋwana ye asua emi owo mikikanke ibat.

9 Ndien idahaemi ntak mme esuene nnyin emi, mme ntak emi mmɔ mikinɔhɔ mbon ekɔŋ efen esɔk nnyin, nnyin ikifiɔkke; ke ntak oro nnyin ima ifuhɔ ndien ŋko iyɔhɔ ye ndik, man idito ke usuŋ ndomo kiet mme ubiere ikpe Abasi edisim isɔŋ nnyin, ke edidorode nnyin ye edisobo nnyin ofuri ofuri.

10 Ke ntak oro nnyin ima iŋwaŋa esit nnyin ke akam inɔ Abasi, man enye ɔsɔŋɔ nnyin onyuŋ anam nnyin ibɔhɔ iwɔrɔ ke ubɔk mme asua nnyin, iŋ, ndien ŋko ɔnɔ nnyin odudu man nnyin inim mme obio nnyin, ye mme isɔŋ nnyin, ye mme inyene nnyin, ke ntak ediŋwam ikɔt nnyin.

11 Iŋ, ndien edikem ete Jehovah Abasi nnyin edise nnyin ye mme nsɔŋɔ ete ke enye ayanam nnyin ibɔhɔ, iŋ, tutu ete enye ama etiŋ emem ɔnɔ ukpɔŋ nnyin, ndien ama ɔnɔ nnyin ɔkpɔsɔŋ mbuɔtidem, ndien onyuŋ anam nnyin ete yak nnyin idorienyin inɔ edibɔhɔ nnyin ke enye.

12 Ndien nnyin ima inyene uko ye ekpri ibat mbon ekɔŋ nnyin emi nnyin ikibɔde, ndien isɔŋɔ ibiere ndikan mme asua nnyin, ye ndikpeme mme isɔŋ nnyin, ye mme inyene nnyin, ye iban nnyin, ye nditɔ nnyin, ye edumbet ubɔhɔ nnyin.

13 Ndien ke ntem nnyin ima ika ye ofuri odudu nnyin ndiŋwana ye mme Lamanite, emi ekedude ke obio Manti; ndien nnyin ima iwuk mme tent nnyin ke ŋkaŋ wilderness, emi ekekperede obio oro.

14 Ndien edikem ete ke mkpɔŋ, ete ke ini mme Lamanite ekekutde ete ke nnyin ikidu ke mme adaŋa wilderness emi ekekperede obio oro, ete mmɔ edɔŋ mme mbon uyep mmɔ ekanade nnyin ekuk man mmɔ efiɔk ibat ye odudu mbon ekɔŋ nnyin.

15 Ndien edikem ete ke ini mmɔ ekekutde ete ke nnyin isɔŋke idem, nte ibat nnyin edide, ndien ke efehede ete ke nnyin iyisibe mmɔ isio ke uŋwam mmɔ ibɔhɔke mmɔ ewɔrɔ edi eŋwan ye nnyin enyuŋ ewot nnyin, ndien ŋko ke ekerede ete ke mmɔ ekeme ndiwot nnyin ke mmem mmem usuŋ ye uwak udim ekɔŋ mmɔ, ke ntak oro mmɔ etɔŋɔ ndibeŋe idem ndiwɔrɔ ndiŋwana ekɔŋ ye nnyin.

16 Ndien ke ini nnyin ikikutde ite ke mmɔ kenam mbeŋe idem ndiwɔrɔ ndi eŋwan ye nnyin, sese, ami nnam ete yak Gid, ye ekpri ibat owo, edip idem esie ke wilderness, ndien ŋko ete yak Teomner ye ekpri ibat owo edip idem mmɔ ŋko ke wilderness.

17 Idahaemi Gid ye ikɔt esie ekedu ke ubɔk nnasia ndien mbon eken edu ke ubɔk ufien; ndien ke ini mmɔ ema ekedip idem mmɔ ntem, sese, ami nsuhɔ, ye nyɔhɔ nsuhɔ mbon ekɔŋ mi, ke ukem ebiet oro emi nnyin ikiwukde mme tent nnyin ibaŋa ini oro emi mme Lamanite ediŋwɔrɔde idi eŋwan.

18 Ndien edikem ete mme Lamanite ema ewɔrɔ edi ye ediwak mbon ekɔŋ mmɔ ndiŋwana ye nnyin. Ndien ke ini mmɔ ekedide enyuŋ ebeŋede idem ndiŋwana ye nnyin ye akaŋkaŋ, ami mma nnam ete yak ikɔt mi, mbon emi ekedude ye ami, efiak edem eduk wilderness.

19 Ndien edikem ete mme Lamanite ema etiene nnyin ye ata usɔp, koro mmɔ ema etim eyom ndibe nnyin man mmɔ ewot nnyin; ke ntak oro mmɔ ema etiene nnyin eduk wilderness; ndien nnyin ima ibe ke ufɔt Gid ye Teomner, tutu ete ke mme Lamanite ikikwe mmɔ.

20 Ndien edikem ete ke ini mme Lamanite ema ekebe, mme ke ini mbon ekɔŋ ema ekebe, Gid ye Teomner ema edaha eda ke mme ebiet udibe mmɔ, enyuŋ ebiɔŋɔ mbon uyep mme Lamanite esio man mmɔ ekufiak enyɔŋ obio.

21 Ndien edikem ete ke ini ema ekebiɔŋɔ mmɔ esio, mmɔ efehe eka obio enyuŋ ekeŋwana ye mbon ukpeme emi ekenimde ete ekpeme obio oro, tutu ete ke mmɔ ema ewot mmɔ enyuŋ eda obio oro enyene.

22 Idahaemi ekenam emi koro mme Lamanite ema eyak ofuri mbon ekɔŋ mmɔ, ibɔhɔke mbon ukpeme ifaŋ kpɔt, ete eda ewɔrɔ eduk ke wilderness.

23 Ndien edikem ete ke Gid ye Teomner ke usuŋ emi ema enyene mkpɔsɔŋ ebiet mmɔ. Ndien edikem ete nnyin ima imen isaŋ nnyin, ke imaikisaŋa ke anyan ke wilderness ika isɔŋ Zarahemla.

24 Ndien ke ini mme Lamanite ekekutde ete ke mmɔ ekesaŋa eka isɔŋ Zarahemla, idem ama enyeŋ mmɔ ata eti eti, man ukudi ke ama odu uduak emi ekenimde ndida mmɔ ŋka nsobo; ke ntak oro mmɔ etɔŋɔ ndifiak edem mfiak nduk wilderness, iŋ, edem edem kpa ke ukem usuŋ emi mmɔ eketode edi.

25 Ndien sese, ekedi okoneyo ndien mmɔ ema ewuk mme tent mmɔ, koro mme ada ibuot mme etubom ekɔŋ ema ekere ete ke idem ama emem mme Nephite ke ntak isaŋ mmɔ; ndien ke ekerede ete ke mmɔ ema ebin ofuri mbon ekɔŋ mmɔ ke ntak oro mmɔ ikikereke ibaŋa obio Manti.

26 Idahaemi edikem ete ke ini ekedide okoneyo, ami mma nnam nte yak mbon ekɔŋ mi ekude idap, edi ete yak mmɔ esaŋa ke usuŋ efen eka obio Manti.

27 Ndien ke ntak isaŋ nnyin emi ke okoneyo, sese, ke mkpɔŋ nnyin ima ibe mme Lamanite, tutu ete ke nnyin ima ibem mmɔ iso ikisim obio Manti.

28 Ndien ke ntem edikem, ete ke ŋkari emi nnyin ima inyene obio Manti ke unana ediduɔk iyip.

29 Ndien edikem ete ke ini mme mbon ekɔŋ mme Lamanite ema ekedisim mkpere obio oro, ndien ekut ete ke nnyin ima ibeŋe idem ndisobo mmɔ, idem ama akpa mmɔ ata eti eti ndien ɔkpɔsɔŋ ndik ama omum mmɔ, tutu ete mmɔ ema efehe eduk wilderness.

30 Iŋ, ndien edikem ete ke mme mbon ekɔŋ mme Lamanite ema efehe ewɔrɔ ke ofuri ŋkaŋ isɔŋ emi. Edi sese, mmɔ etaŋ ye mmɔ uwak iban ye nditɔ ewɔrɔ ke isɔŋ oro.

31 Ndien mme obio oro emi mme Lamanite ekebɔde, kpukpru mmɔ edu ke ini emi ke ubɔk nnyin; ndien mme ete nnyin ye iban nnyin ye nditɔ nnyin ke enyɔŋ edi mme ufɔk mmɔ, kpukpru ibɔhɔke mbon emi ekemumde nte mbon ŋkpɔkɔbi ye emi mme Lamanite eketaŋde ewɔrɔ.

32 Edi sese, mme mbon ekɔŋ nnyin edi ekpri ndikpeme utɔ ediwak obio ye utɔ ekese inyene ntem.

33 Edi sese, nnyin idorienyin ke Abasi nnyin emi ɔnɔde nnyin edikan kabaŋa mme isɔŋ oro, tutu ete ke nnyin imibɔ mme obio oro ye mme isɔŋ oro, emi ekedide ekenyin.

34 Idahaemi nnyin ifiɔkke ntak emi ukara minɔhɔ nnyin odudu idian do; ŋko mbon oro emi ekedɔkde edibine nnyin ifiɔkke ntak emi nnyin mibɔhɔ ɔkpɔsɔŋ odudu.

35 Sese, nnyin ikere ke mbufo ikanke, ndien mbufo eme eda mbon ekɔŋ esin ke ŋkaŋ isɔŋ oro; edieke edide ntre, nnyin iyomke ndikuni.

36 Ndien edieke midighe ntre, sese, nnyin ifehe ndik ite ke ubahade odu ke ukara, man mmɔ ekunɔ mbon efen ediŋwam nnyin; koro nnyin imifiɔk ite ke mmɔ ewak ke ibat ekan mbon emi mmɔ edɔŋde ete edi.

37 Edi, sese, idighe akpan ŋkpɔ—nnyin idorienyin ite ke Abasi ayanam nnyin ibɔhɔ, kpa ye nte mme mbon ekɔŋ nnyin ememde, iŋ, ndien anam nnyin ibɔhɔ iwɔrɔ ke ubɔk mme asua nnyin.

38 Sese, emi edi ɔyɔhɔ isua edip ye usukkiet, ke mkpere utit isua, ndien nnyin iminyene mme isɔŋ nnyin; ndien mme Lamanite efehe eka isɔŋ Nephi.

39 Ndien nditɔ ikɔt Ammon oro, emi ami ntiŋde ye ima mbaŋa, edu ye ami ke obio Manti; ndien Jehovah aŋwam mmɔ, iŋ, onyuŋ ekpeme mmɔ ndiduɔ ke akaŋkaŋ, tutu ete ke akpanikɔ ata owo kiet owo ikiwotke.

40 Edi sese, mmɔ enyene ediwak unan; edi mmɔ esɔŋɔ eda ke uwɔrɔ ufin oro emi Abasi anamde mmɔ ewɔrɔ; ndien mmɔ ekpeme nditi Jehovah Abasi mmɔ ke usen ke usen; iŋ, mmɔ ekpeme ndinim mme ewuhɔ esie, ye mme ubiere ikpe esie, ye mme ibet esie kpukpru ini; ndien mbuɔtidem mmɔ ɔsɔŋ ke mme prophecy kabaŋa emi anade nte edi.

41 Ndien idahaemi, edima eyeneka mi, Moroni, yak Jehovah Abasi nnyin, emi afakde nnyin onyuŋ anamde nnyin ibɔhɔ, enim fi kpukpru ini ke iso esie; iŋ, ndien yak enye aŋwam ikɔt esie, tutu ete afo enyene edikan ke ndibɔ kpukpru inyene emi mme Lamanite ebɔde nnyin, akanade ndiŋwam nnyin. Ndien idahaemi, sese, ami metre ŋwed mi. Ami ndi Helaman, eyen Alma.