1 Ndien edikem ete mmɔ ema etre enyuŋ efiak edem esisit ekpɔŋ mmɔ. Ndien Moroni ɔdɔhɔ Zerahemnah ete: Sese, Zerahemnah, ete ke nnyin iyomke ndidi mme ɔduɔk iyip. Mbufo emefiɔk ete ke mbufo esine nnyin ke ubɔk, edi nnyin iyomke ndiwot mbufo.

2 Sese, nnyin iwɔrɔke idi ekɔŋ ye mbufo man nnyin iduɔk iyip ke ntak odudu; ŋko nnyin iyomke ndisin owo ndomo kiet ke ɔkpɔnɔ itie-ufin. Edi emi edi ata akpan-ntak emi mbufo edide eŋwan ye nnyin; iŋ, ndien mbufo eyatesit ye nnyin ke ntak edu ukpono nnyin.

3 Edi idahaemi, mbufo emekut ete ke Jehovah odu ye nnyin; ndien mbufo emekut ete ke enye ayak mbufo esin nnyin ke ubɔk. Ndien idahaemi ami moyom nte yak mbufo efiɔk ete ke enam emi enɔ nnyin ke ntak edu ukpono nnyin ye mbuɔtidem nnyin ke Christ. Ndien idahaemi mbufo emekut ete ke mbufo ikemeke ndiwot mbuɔtidem nnyin emi.

4 Idahaemi mbufo emekut ete ke emi edi ata mbuɔtidem eke Abasi; iŋ, mbufo emekut ete ke Abasi ayaŋwam, onyuŋ ekpeme, onyuŋ etim nnyin enim, ke adaŋa nte nnyin ibuɔtde idem ke enye, ye ke ukpep ŋkpɔ edu ukpono nnyin, ye edu ukpono nnyin; ndien tutu amama Jehovah idiyakke ete ewot nnyin ibɔhɔke nnyin iduɔ iduk ke ndudue inyuŋ ikaŋ ukpep ŋkpɔ edu ukpono nnyin.

5 Ndien idahaemi, Zerahemnah, ami nnɔ fi uyo, ke enyiŋ Abasi oro emi enyenede ofuri odudu, emi ɔsɔŋɔde nnyin ubɔk man nnyin inyene odudu ikan mbufo, ke ukpep ŋkpɔ edu ukpono nnyin, ke edu ukpono nnyin, ye ke mme edinam ukpono nnyin, ye ke ufɔk Abasi nnyin, ye ke edisana uŋwam emi nnyin inyenede ndi nnɔ iban nnyin ye nditɔ nnyin, ke uwɔrɔ-ufin oro emi adiande nnyin ye mme isɔŋ nnyin ye obio nnyin; iŋ, ndien ŋko ke nditim edisana ikɔ Abasi nnim, emi ofuri inemesit nnyin otode; ye ke kpukpru se idide akpan ima inɔ nnyin—

6 Iŋ, ndien emi idighe kpukpru; ami nnɔ mbufo uyo ke kpukpru uduak emi mbufo enyenede enɔ uwem, nte mbufo eyak mme ŋkpɔ ekɔŋ mbufo enɔ nnyin, ndien nnyin idiyomke iyip mbufo, edi nnyin iyisuhɔ uwem mbufo, edieke mbufo edikade usuŋ mbufo inyuŋ ifiakke idi ekɔŋ ye nnyin.

7 Ndien idahaemi, edieke mbufo minamke emi, sese, mbufo esine nnyin ke ubɔk, ndien ami nyɔnɔ mbon ekɔŋ mi uyo nte eŋwana ye mbufo, enyuŋ enɔ mme unan mkpa ke idem mbufo, man mbufo esop; ndien ke ini oro nnyin iyikut me anie owo edinyene odudu ke idem mbon emi; iŋ, nnyin iyikut me anie owo ke edida isin ke ufin.

8 Ndien idahaemi edikem ete ke ini emi Zerahemnah ama okokop mme ikɔ emi enye ɔwɔrɔ edi onyuŋ ayak akaŋkaŋ esie ye ikwa esie, ye utigha esie esin ke ubɔk Moroni, ndien ɔdɔhɔ enye ete: Sese, emi edi mme ŋkpɔ ekɔŋ nnyin ; nnyin iyiyak mmɔ inɔ fi, edi nnyin idiyakke idem nnyin ite ida uŋwɔŋɔ inɔ fi, emi nnyin ifiɔkde ite ke nnyin iyibiat, ŋko ye nditɔ nnyin; edi emen mme ŋkpɔ ekɔŋ nnyin, enyuŋ eyak nnyin iwɔrɔ ikiduk wilderness; midighe ntre nnyin iyinim mme akaŋkaŋ nnyin, ndien nnyin iyikpa mme ikan.

9 Sese, nnyin idighe eke ukpep ŋkpɔ edu ukpono mbufo; nnyin inimke ite ke edi Abasi ayak nnyin esin ke ubɔk mbufo; edi nnyin imikere ite ke edi ŋkari mbufo etim mbufo enim kabaŋa mme akaŋkaŋ nnyin. Sese, edi mme ukwak ikpanesit mbufo ye mme ukwak emi ekpemede mbufo etim mbufo enim.

10 Ndien idahaemi ke ini Zerahemnah ama eketre nditiŋ mme ikɔ emi, Moroni afiak ayak akaŋkaŋ ye mme ŋkpɔ ekɔŋ, emi enye ɔkɔbɔde, ɔnɔ Zerahemnah, ɔdɔhɔ ete: Sese, nnyin iyikure eŋwan emi.

11 Idahaemi ami nkemeke ndisin mme ikɔ emi ami ntiŋde, ke ntak oro ke adaŋa nte Jehovah odude uwem, mbufo idinyɔŋke ibɔhɔke mbufo enyɔŋ ye uŋwɔŋɔ ete ke mbufo idifiakke idi ekɔŋ ye nnyin. Idahaemi nte mbufo esinede nnyin ke ubɔk nnyin iyiduɔk iyip mbufo ke isɔŋ, midighe mbufo eyenyime enɔ mme ŋkpɔ emi ami mmende ndi.

12 Ndien idahaemi ke ini emi Moroni amaketiŋ mme ikɔ emi, Zerahemnah omum akaŋkaŋ esie akama, onyuŋ ayatesit ye Moroni, onyuŋ efehe aka man enye owot Moroni; edi nte enye emenede akaŋkaŋ esie, sese, owo ekɔŋ Moroni kiet amia enye enim ke isɔŋ, onyuŋ obuŋ ubɔk esie; ndien enye ŋko ekpi isɔŋ-ibuot Zerahemnah ɔduɔk ke isɔŋ. Ndien Zerahemnah esik ɔkpɔŋ iso mmɔ oduk ke otu mbon ekɔŋ esie.

13 Ndien edikem ete owo ekɔŋ emi akadade ekpere, emi ekekpide isɔŋ-ibuot Zerahemnah, emenede isɔŋ-ibuot oro ke isɔŋ ke idet, onyuŋ odori enye ke ibuot akaŋkaŋ esie, onyuŋ anyan enye owut mmɔ, ɔdɔhɔ mmɔ ke ɔkpɔsɔŋ uyo ete:

14 Kpa nte isɔŋ-ibuot emi ɔduɔde ke isɔŋ, emi edide isɔŋ-ibuot ada ibuot mbufo, ntre ke mbufo ediduɔ ke isɔŋ ibɔhɔke mbufo eyeyak mme ŋkpɔ ekɔŋ mbufo enɔ enyuŋ enyɔŋ ye ediomi emem.

15 Idahaemi ediwak ema edu, ke ini mmɔ ekekopde mme ikɔ emi enyuŋ ekutde isɔŋ-ibuot emi okodude ke akaŋkaŋ, emi ndik okomumde; ndien ediwak ewɔrɔ edi enyuŋ enim mme ŋkpɔ ekɔŋ mmɔ ke ikpat Moroni, enyuŋ eduk ke ediomi emem. Ndien ke adaŋa nte ediwak emi ekedukde ke ediomi mmɔ ema eyak ewɔrɔ eka wilderness.

16 Idahaemi edikem ete Zerahemnah ama ayatesit ata eti eti, ndien enye ama edemede nsuhɔ mbon ekɔŋ esie ke iyaresit, ete eŋwana ke ɔkpɔsɔŋ ye mme Nephite.

17 Ndien idahaemi Moroni ama ayatesit, ke ntak nsɔŋ-ibuot mme Lamanite; ke ntak oro enye ɔnɔ ikɔt esie uyo ete mmɔ eŋwana ye mmɔ enyuŋ ewot mmɔ. Ndien edikem ete mmɔ etɔŋɔ ndiwot mmɔ; iŋ, ndien mme Lamanite ema eŋwana ye mme akaŋkaŋ mmɔ ye odudu mmɔ.

18 Edi sese, iferi ikpɔkidem mmɔ ye ukpɔk ibuot mmɔ ema ena iŋwaŋ enɔ mme nsɔsɔp akaŋkaŋ mme Nephite; iŋ, sese ema ekim enyuŋ ekpi mmɔ, iŋ, ndien ema esɔp ndiduɔ ke iso mme akaŋkaŋ mme Nephite; ndien etɔŋɔ ndikwɔk mmɔ nsio, kpa nte owo ekɔŋ Moroni eketiŋde nte prophet.

19 Idahaemi Zerahemnah, ke ini enye okokutde ete ke emɔŋ ewot kpukpru mmɔ, eseme ke ɔkpɔsɔŋ ɔnɔ Moroni, ɔŋwɔŋɔ ete ke enye oyodiomi ŋko ye ikɔt esie emi edude ye mmɔ, edieke mmɔ edisuhɔde uwem mbon emi esuhɔde, ete ke mmɔ ididihe ekɔŋ aba ye mmɔ.

20 Ndien edikem ete Moroni anam ete efiak etre utom mkpa ke otu mme owo. Ndien enye ɔbɔ mme Lamanite mme ŋkpɔ ekɔŋ; ndien ke ini mmɔ ema ekeduk ke ediomi ebaŋa emem ema eyak mmɔ ewɔrɔ eka wilderness.

21 Idahaemi mme Nephite ikibatke mme akpa mkpa mmɔ ke ntak emi ibat mmɔ okokponde; iŋ, ibat mme akpa mkpa mmɔ ama okpon ata eti eti, ke ŋkaŋ mme Nephite ye mme Lamanite mbiba.

22 Ndien edikem ete mmɔ ema etop mme akpa mkpa mmɔ edɔŋ ke mme mmɔŋ Sidon, ndien mmɔ eka enyuŋ ebuhɔ ke mme udem inyaŋ.

23 Ndien mbon ekɔŋ mme Nephite, mme eke Moroni, efiak enyɔŋ enyuŋ eka mme ufɔk mmɔ ye mme isɔŋ mmɔ.

24 Ndien ntem ke ɔyɔhɔ isua ukara efiteta mme ebiere ikpe nnɔ ikɔt Nephi eketre. Ndien ke ntem ke ŋwed Alma eketre, emi ekewetde ke mme usan ŋwed Nephi.