1 Áádóó baa hoolzhiizh tʼáá ałtso nihokáá dineʼé nahasdzáán bikááʼgóó bízhí deidiiztsʼą́ą́ʼ, tʼáá átʼé kédaayahgóó, hodiitsʼaʼgo kódííniid:

2 Yíí, yíí, yíí díí dineʼé bichʼįʼ; yíí tʼáá ałtso nihosdzáán bikááʼgóó nihokááʼ dineʼé bichʼįʼ tʼáá hazhóʼó ádaańdaʼooskango tʼéiyá; háálá biʼiiníziinii anádloh, dóó bá ndaalʼaʼí bił dahózhǫ́, háálá nihokááʼ dineʼé biyeʼké dóó bitsʼiʼké danizhóní yééʼ ndaaztseed; áádóó bąąhági átʼéii dóó tʼáá íiyisíí daajoodláhígíí yaa ndaakaiʼígíí biniinaa ádabiʼdisdįįd!

3 Áko shooh, Zarahemla kin dashijaaʼ ayóó átʼéii kǫʼ beeʼadííłkʼą́ą́ʼ, yiiʼkéédahatʼínígíí ałdóʼ.

4 Áádóó áko shooh, Moroni kin dashijaaʼ ayóó átʼéii tónteel ditą́ądi bił diiłkǫʼ, dóó yiiʼ kéédahatʼínéé tó bee áséłdįįd.

5 Áádóó áko shooh, Moronihah kin dashijaaʼ ayóó átʼéii łeezh bił dííłkǫʼ, dóó yiiʼ kéédahatʼínée ałdóʼ, bibąąhági ádaatʼéii dóó tʼáá íiyisíí dajoodléii shidááhgiʼ doo yiideestsééł da biniyé, áko Diyin yá yádaałtiʼii dóó Diyin yá naazíinii ndeistseed yę́ę bidił hojoobagoʼ daachago éí bikʼijįʼ naazláa doo.

6 Áádóó áko shooh, Gilgal kin dashijaa łééh yííłdáázgo ííshłaa, áádóó yiiʼ kéédahatʼínéé nahasdzáán łeezh ditą́ągo bikííłdáázgo ííshłaa;

7 Aooʼ, áádóó Onihah kin dashijaaʼ dóó yiiʼ kéédahatʼínéé, dóó Mocum kin dashijaaʼ dóó yiiʼ kéédahatʼinéé, dóó Jerusalem kin dashijaaʼ dóó yiiʼ kéédahatʼínéé, dóó yiiʼ kéédahatʼínéé, áádóó tónteel bikáaʼgi siyį́įgo ííshłaa, bibąąhági ádaatʼéii dóó tʼáá íiyisíí dajoodléii shidááhgiʼ doo yiideestsééł da biniyé, áko Diyin yá yádaałtiʼii dóó Diyin yá naazíinii ndeistseedyę́ę bidił hojoobagoʼ daachago éí bikʼijįʼ naazláa doo.

8 Áádóó áko shooh, Gadiandi kin dashijaaʼ, dóó Gadiomnah kin dashijaaʼ, dóó Jacob kin dashijaaʼ, dóó Gimgimno kin dashijaaʼ, díí tʼáá átʼé łeeh daheesdáázgo ííshłaa, dahdaaskid dóó dadzígai bikʼih ííshłaa; áádóó yiiʼ kéédahatʼínéé nahasdzáán łeezh ditą́ągo bikííłdáázgo ííshłaa, bibąąhági ádaatʼéii dóó tʼáá íiyisíí dajoodléii shidááhgiʼ doo yiideestsééł da biniyé, áko Diyin yá yádaałtiʼii dóó Diyin yá naazíinii ndeistseedyę́ę bidił hojoobagoʼ daachago éí bikʼijįʼ naazláa doo.

9 Áádóó áko shooh, Jacobugath ayóó átʼéii kin dashiijaaʼ, éí aláahdi naatʼáanii Jacob bidineʼé yiiʼ kéédahatʼíín ńtʼę́ę́ʼ, éí kǫʼ bee adííłkąąh háálá bibąąhági ádaatʼéii dóó doo biʼyáʼádaashóonii, éí nahasdzáán tʼáá átʼée ńtʼę́ę́ʼ bilááhdi doo yáʼádaashǫǫ da ńtʼę́ę́ʼ, háálá ndanitʼingo ndaʼastseed dóó ndaʼahijaah; háálá bí éiyá dineʼé ahodiilzééʼgo kéédahatʼinéé deiyííłchǫʼ dóó kéyah yikʼi dahwééʼaahígíí ałdóʼ; éí bąą ahodííłkʼą́ą́ʼ, shidááhdóó áhóséłdįįd, áko Diyin yá yádaałtiʼii dóó Diyin yá naazíinii ndeistseedyę́ę bidił hojoobagoʼ daachago éí bikʼijįʼ naazláa doo.

10 Áádóó áko shooh, Laman kin dashijaaʼ, dóó Josh kin dashijaaʼ, dóó Gad kin dashijaaʼ, dóó Kishkumen kin dashijaaʼ, díí kǫʼ bee áséłdįįd, dóó yiiʼ kéédahatʼinéé ałdóʼ, háálá doo yáʼádaashónígíí biniinaa Diyin yá yádaałtʼiʼí chʼídeineeschą́ą́ʼ, dóó tsé yee ńdeineesneʼ éí doo yáʼátʼéehii dóó tʼáá íiyisíí dajoodléii ádeiłʼínígíí yił chʼídeidooʼaał biniinaa bichʼįʼ ííłʼaʼ.

11 Áádóó tʼáá átʼé ałtso chʼídeineeschą́ą́ʼígíí biniinaa, adin doo łaʼ bitahdóó diyinkʼehgo yigááł da, kǫʼ bichʼįʼ ííshłaa dóó bee áséłdįįd, áko bibąąhági ádaatʼéii dóó tʼáá íiyisíí dajoodléii shidááhgiʼ doo yiideestsééł da biniyé, áko Diyin yá yádaałtiʼii dóó Diyin yá naazíinii bitahgóó ahííłʼaʼéé ndeistseedgo niʼdééʼ bidił hojoobagoʼ daachago éí bikʼijįʼ naazláa doo.

12 Áádóó kéyah bikááʼgóó ayóó átʼáo łą́ąhgo dahóółchxǫʼ, dóó díí dineʼé bitahgóó, háálá doo yáʼádaashóonii dóó tʼáá íiyisíí ádajoodléii ádeełʼínígíí biniinaa.

13 O yisdáohkaiʼígíí háálá aláahgo diyinkʼehgo deiyínóhkahígíí biniinaa, kʼadísh doo shichʼįʼ nináhóhkááh da, dóó nihibąąhági ádaatʼéii baa ádaańdaʼoohkąąh da, dóó shikééʼ ninoohkááh da, áko nánihideesdzih?

14 Aooʼ, tʼáá aaníigo Nihichʼįʼ haasdziih, shikééʼ ninooyáago hoolʼáágóó iiná nihaa doolyééł. Áko shooh, háálá sheʼajoobaʼ bee nihichʼįʼ dah dishnih, tʼáá háída shikééʼ dahdiiyą́ągo, éí shił hólǫ́ǫ dooleeł, áko tʼáá háíshíí shikéédahdiiyáhígíí éí bikʼihozhdeeshdlííł.

15 Áko shooh, shí éí Diyin God biYeʼ nishłį́ Jesus Christ ashtʼį́. Yádiłhił dóó nahasdzáán hadiishłaa, dóó tʼáá átʼé bee hadilyaaígíí ałdóʼ. Hodeeyáádą́ą́ nihiTaaʼ nilíinii bił hinishłǫ́ǫ́ ńtʼę́ę́ʼ. NihiTaaʼ nilíinii bił honishłǫ́, áádóó nihiTaaʼ nilíinii shił hólǫ́; dóó shinahjįʼ éí nihiTaaʼ nilíinii bízhiʼ ayóó átʼéego áyiilaa.

16 Tʼáá shíhígíí baaníyá, dóó tʼáá shíhígíí doo dashiniizį́į́ʼ da. Áádóó Diyin bizaad bee akʼedaʼashchínígíí deeshááłgo yaahalneʼígíí ałtso bohoolyaa.

17 Áádóó tʼáá ałtso dashiniizį́ʼígíí, éí Diyin God biyeʼké dadooleełgo bee ląʼ aséłį́į́ʼ; dóó tʼáá háíshį́į́ shizhiʼ deiyoosdląądígíí éí ałdóʼ bá lą́ aséłį́į́ʼ, háálá áko shooh, shí shinahjįʼ éí nihánináʼníshdlá, áádóó shinahjįʼ éí Moses bibee hazʼáanii tʼáá ałtso bohoolyaa.

18 Shí éí nahasdzáán beʼadinídíín dóó binahjįʼ daʼiináanii nishłį́. Shí éí Alpha dóó Omega, bee hodeeztʼiʼii áádóó bee nihonítʼiʼii nishłį́.

19 Áádóó dił bee nááʼiiniihii éí doo shichʼįʼ kónáádadoohłííł da, aooʼ, nihinááhániihii dóó didlidgo nihinááhániihii nahjįʼ kódadoohłííł, háálá nihinááhániihii dóó didlidgo nihinááhániihii éí doo nisin da.

20 Áádóó nihijéí dóó nihiyiʼsizʼíinii yínííł danilį́įgo shichʼįʼ náádahídóółnih. Áádóó tʼáá háíshį́į́ bijéí dóó biiʼsizʼíinii yínííł nilį́įgo shichʼįʼ niníyą́ągo, éí kǫʼ dóó Iiʼ Sizį́ Diyinii bee yídeesį́į́ł, Laman dineʼé adaadzaaígiʼ átʼáo, háálá idahidiikááhdi dashoosdląądígíí biniinaa, éí kǫʼ dóó Iiʼ Sizį́ Diyinii bee dabidiisdzį́į́ʼ, ákondi tʼáadoo yaa ákódaniizį́į́ʼ da.

21 Áko shooh, nahasdzáán bikáaʼjįʼ níyá nihokááʼ dineʼé bá nináʼdeeshdlééł biniyé, áko nihokááʼ dineʼé bibąąhági átʼéii bitsʼą́ą́dóó yísdádeeshʼish.

22 Éí bąą, tʼáá háída ádaanáʼooskango dóó áłchíní yázhí nahalingo shaa níyą́ągo, éí shił yahʼadoogááł, háálá Diyin God bił hazʼą́ądí éí ákóhootʼé. Áko shooh, éi ákódaatʼéhígíí biniinaa sheʼiinaʼ bee bá nináníshdlá, dóó nínáádiishdlá, éí bąą ádaańdaʼoohkąąh, dóó adahwiisʼáádééʼ shaahohkááh, dóó yisdáhidoohkah.