Wóltaʼii 29
Naaltsoos Mormon Wolyéhígíí áyiilaayę́ę naaltsoos bee dadínéezdeeʼgo éí Diyin Bóhólníihii Israel áłah ánéídléehgo dóó yił ahadaʼdeestʼánée yindiilnishgo bee ééhózin dooleeł—Tʼáá háíshį́į́ díí akéeʼdi-yoołkáłígíí íł ííshją́ą́ ádaalyaaígíí dóó diyinkʼehgo aʼiilyéii doo deiniizį́ʼígíí éí doo bá yáʼádaatʼéeh da dooleeł. Jesus náádiidzáádóó A.D. 34–35 yihahgo.
1 Áádóó áko shooh, ánihidishní Diyin Bóhólníihii yaa ntsékeesígíí, dóó ádííniidę́ę bikʼehgo díí náádaháasdzooígíí Gentile dineʼé bichʼįʼ kódadoolnííł, ákódzaago nihił béédahodoozįįł Diyin aZhéʼé nilíinii Israel baʼáłchíní yił ahadaʼdeestʼánée, díí kéyah ałkʼidą́ą́ʼ yeidiníʼánée baa ndeetʼaahígíí éí tʼáá íídą́ą́ʼ bee hahoolzhiizh dooleeł.
2 Áádóó nihił béédahodoozįįł díí Diyin Bóhólníihii bizaad, éí éí Diyin yá yádaałtiʼí yaa dahoolneʼę́ę, éí ałtso bohodoolnííł; dóó éí Diyin Bóhólníihii Israel baʼáłchíní yeiyigháhą́ą biláahgo ahoolzhiizh doo dadidoohniił da.
3 Áádóó doo éí díí saad bee hadaʼiisdzíʼę́ę tʼáadoo biniyéhé da doo łaʼ dadínóosįįł da, háálá áko shooh, Diyin Bóhólníihii éí bidineʼé Israel bighandóó danilínígíí yił ahadaʼdeestʼánée yéédoolnih.
4 Áádóó díí kóhaʼnínée danółʼį́ nihitahgo bidaʼdoolníiłgo, áko ákódzaago éí Diyin Bóhólníihii binaanish áyoolíiłii tʼáadoo deínóhdziihí dooleeł, háálá bitʼáá ákogi átʼáo ánihwiitʼaahii bééshhał nahalinii éí nishʼnáájígo dah yootį́į́ł; áádóó áko shooh, éí bijį́, binaanish bikʼijįʼ danohłį́įgo éí nihikʼíndookǫs.
5 Háiida Diyin Bóhólníihii binaanish yikʼijįʼ nilíinii hóyééʼ bí dooleeł; aooʼ, háiida Christ dóó binaanish doo yiniizį́ʼígíí éí hóyééʼ bí dooleeł!
6 Aooʼ, yíiyá, háiida Diyin Bóhólníihii ił ííshją́ą́ áyiilaaígíí doo jiniizį́ʼígíí, dóó Diyin Bóhólníihii éí kʼad ił ííshją́ą́ eʼélʼíinii doo yikʼehgo naalnish da jinínígíí, éí doodaiiʼ doo Diyin bikʼehgo áhodooníłígíí, éí doodaiiʼ aadaʼiilyéhę́ę, éí doodaiiʼ saad ałʼąą átʼéii bee yátiʼ, éí doodaiiʼ náádaʼiidziih, éí doodaiiʼ Iiʼ Sizį́ Diyinii bibeʼadziilii bee!
7 Aooʼ, háíshį́į́ akéeʼdi yoołkáłígíí biyiʼ, iidoołbįįł biniyé, Jesus Christ éí kʼad doo álíleekʼehgo naalnish da nínígíí éí hóyééʼ bí dooleeł; háálá háíshį́į́ kójitʼínígíí chʼį́įdii biʼiiníziinii éí yóó adootʼáanii biyeʼgi nahalingo jílį́į doo, éí éí doo haa hojidoobaał da, Christ bizaadígíí bikʼehgo!
8 Aooʼ, kʼad éí doo Jew dineʼé doodaiiʼ Israel bighandóó dineʼé danilínígíí bichʼįʼ tʼáadoo hiss dadohníní, doodaiiʼ deínóhdziihí, doodaiiʼ dajiinohłahí; háálá áko shooh, Diyin Bóhólníihii yił ahadaʼdeestʼánée yénáálniiʼ, dóó éí yił ałhaʼdeetʼánée bikʼehgo yiʼdoolííł.
9 Éí bąą Diyin Bóhólníihii, bílaʼ nishʼnáájígo nishtłʼajígo dah doolnihgo éí doo ádoohłíił da, áko Israel bighandóó danilíinii tʼáá átʼé yił ahadaʼdeestʼánée éí doo yiʼdoolíił da.