1 Tʼáá aaníí, tʼáá aaníigo, Nihichʼįʼ haasdziih baa dahojoobáʼígíí baa dajiinohbaah; ndi díí aa nohłéhígíí éí tʼáadoo hazʼą́ągi bee shidiʼdooltsééł nohsiní; ákótʼéego éí nihiTaaʼ yáʼąąshdi hólóonii doo nihaʼdoolééł da.

2 Éí bąą, aa nohłéhígíí éí tʼáadoo ayóó íitsʼaʼgo ádaahohniihí, tʼóó ádahoʼdilʼínígíí nahalingo ńléí sodizin bá dahooghangóó dóó daʼnítiingóó ákódaatʼį́, ákogo dineʼé shaa dahodoonih danízin. Tʼáá aaníigo Nihichʼįʼ haasdziih, éí éiyá tʼáá íídą́ą́ʼ baa daʼiisyá.

3 Ákondi áká anilyeedgo tʼáadoo nihílaʼ nishtłʼají nihílaʼ nishʼnáájí yaa naagháhígíí yiniihí.

4 Áko aa nohłéhígíí éí tʼáadoo nihá yiʼniihí; dóó diyingo nihiTaaʼ nilíinii doo yitʼíinii yooʼíinii, tʼáá bí hootʼį́įgo nihaʼdoolééł.

5 Áádóó sodílzingo tʼáadoo tʼóó ádahoʼdilʼínígíí nahalingo sodadołziní, háálá éí éiyá sodizin bá hooghan góneʼ dóó ahidaʼdiitiingóó naazį́įgo, sodadilzingo bił ayóó ádaátʼé, diné danihiidoołtsééł danízin. Tʼáá aaníigo Nihichʼįʼ haasdziih, éí éiyá tʼáá íídą́ą́ʼ baa daʼiisyá.

6 Ákondi ni, sodílzingo, niʼééʼ dahnídiiʼnił góneʼ yah anánídáahgo, dóó dádiʼníłkaałgo, diyingo niZhéʼé nilíinii doo hootʼį́įdi hólóonii bichʼįʼ sodílzin; dóó diyingo niZhéʼé nilíinii, doo yitʼíinii yooʼíinii, hootʼį́įgo naʼdoolééł.

7 Ákondi sodílzingo, doo tʼáá ádzaagóó tʼóó ałkééʼ náhidíłtʼéhí, doo Diyin God dayóodlanígíí ádáátʼíní, háálá éí éiyá yéego ałkʼińdeidiyiłtʼééhgo shididootsʼį́į́ł danízin.

8 Nihí tʼáadoo ákódaahtʼíní, háálá diyingo nihiZhéʼé nilíinii éí bee nihichʼįʼ anáhóótʼiʼígíí tʼáá íídą́ą́ʼ tʼáadoo bee haadziihgo bił bééhózin.

9 Díi bikʼehgo sodadołzin doo: Diyingo nihiZhéʼé nilíinii yáʼąąshdi honílóonii, nízhiʼ dílzinii.

10 Íinínízinígíí nihokááʼ bikáaʼgi bikʼehgo áhodoonííł yáʼąąshdi átʼéhígi átʼáo.

11 Áádóó bee nihąąh hadaazʼáhígíí bee nihaa ndiníʼaah, nihí nihąąh hadayíłʼahígíí baa ndaʼdiitʼaahgo.

12 Áádóó doo yáʼátʼéehii achʼįʼ nahwiiłnáanii biyiʼjįʼ kónihóleʼ lágo, ndi doo yáʼáshóonii bitsʼą́ąjigo kónihidíílííł.

13 Háálá yáʼąąsh hazʼąą, dóó adziil, dóó ayóóʼátʼéii, éí ahoolʼáágóó ni dooleeł. Amen.

14 Háálá, diné nihíniʼ dayííłʼaʼii baa ńdaʼdiyohʼaahgóó éí nihiTaaʼ yáʼąąshdi hólóonii nihídóʼ nihaanídiʼdooʼááł.

15 Ákondi diné doo baa ńdaʼdiyohʼaahgóó éí diyingo nihiZhéʼé nilíinii ałdóʼ doo nihaa nihaanídiʼdooʼááł da.

16 Áádóó ałdóʼ nááná, chʼiyáán ádąąh wohtʼį́įgo sodołzingo tʼáadoo tʼóó ádahoʼdilʼíinii ádáátʼínígi ádanohtʼéhé, háálá doo bił dahózhǫ́ǫ da ndahalin chʼiyáán adąąhdeitʼį́ ádaʼdólzingo. Tʼáá aaníigo Nihichʼįʼ haasdziih, éí éiyá tʼáá íídą́ą́ʼ baa daʼiisyá.

17 Ákondi ni, chʼiyáán ádąąh nitʼį́įgo sodílzingo, nitsiitʼááh akʼah bąąh ánílééh, dóó niniiʼ táánígis;

18 Ni tʼáadoo diné binááł chʼiyáán ádąąh nitʼį́įgo sodílziní, ndi diyingo niZhéʼé nilíinii bichʼįʼ sodílzin, éí éiyá doo hootʼį́įdi hólóonii, dóó diyingo niZhéʼé nilíinii, doo yitʼíinii yooʼíinii, hootʼį́įgo naʼdoolééł.

19 Tʼáadoo naadeełii daʼílíinii nahasdzáán bikáaʼgi ádá hashtʼendahojáhí, háálá éí áadi chʼosh ałchozhí yiih dahjeeh dóó dadiichííh, dóó daʼniʼįįhii yił yah adahalyeed dóó deiniʼįįh;

20 Ákondi naadeełii daʼílíinii yáʼąąshdi hashtʼendahojááh, áadi éí chʼosh ałchozhii ádin dóó doo dadiichííh da, dóó daʼniʼįįhii doo yah adahaʼnééh da dóó doo daʼniʼįįh da.

21 Háálá naadeełii daʼílíinii sinilígi, ákweʼé ałdóʼ nihijéí siʼąą dooleeł.

22 Anááʼ éí atsʼíís bibee adinídíín átʼé; áko, eí bąą, tʼááłáʼígíí tʼéiyá nółʼį́įgo, nihitsʼíís tʼáá átʼé adinídíín biyiʼ hólǫ́ǫ dooleeł.

23 Ákondi doo yáʼáshóonii tʼéiyá nihinááʼ biyiʼgo, nihitsʼíís tʼáá átʼé biyiʼ chahałheeł doo. Háálá, éí bąą, niiʼ adinídínígíí biyiʼ chahałheełgo, éí chahałheełígíí ayóó átʼéii doo!

24 Diné binaatʼáanii doo naakigo yá naalʼaʼ da doo; háálá łaʼ éí yijoołáa doo dóó łaʼ éí ayóó áyóʼníi doo, éí doodago łaʼ éí yikééʼ sizį́į doo dóó łaʼígíí éí yiyoołchʼį́į́d doo. Diyin God dóó Naalyéhé tʼáá áłah bá neilʼaʼgo doo bíighah da.

25 Áádóó áko baa hoolzhiizh Jesus díí saad yee haadzíiʼgo hastóí naakitsʼáadah neiyizlááʼígíí yitáázghal dóó áyídííniid: Saad bee nihichʼįʼ haasdzííʼyę́ę béédaałniih. Háálá áko shooh, nihí éí nihikʼihdadeeshniiʼ díí diné ndanohtin doo biniyé. Éí bąą ánihidishní, niheʼiinaʼ éí tʼáadoo baa ntsídaahkeesí, haʼátʼíí lá dadoohsį́į́ł, éí doodago haʼátʼíí lá dadoohdlį́į́ł; éí doodago nihitsʼíís, haʼátʼíí ééʼ shį́į́ bee hadadidohnííł. Jiinánígíísh chʼiyáán doo biláahgo ílį́į da, áádóó hatsʼíísísh ééʼ doo biláahgo ílį́į da?

26 Áko shooh tsídii níłchʼi yiiʼ ndaatʼaʼígíí, doo kʼéédaʼdidléeh da, doo ndóʼ ndaalnish da, doo tłʼoh bighan biyiʼjįʼ doo ahą́ ádaʼałʼį́į da dóó doo ahą́ ádaʼiilééh da; ákondi nihiTaaʼ yáʼąąshdi hólóonii éí yanáʼáłtsoʼ. Daʼ éísh biláahdi daniidlį́ danohsin?

27 Tʼáá noháiida baa ntsóhkeesgo łaʼ dah alzhin anółtsooígíí daatsʼí bínínáánéidoohʼááł?

28 Áádóó haʼátʼíísh éí biniyé biih dooháłígíí baa ntsóhkees doo? Chʼilátah hózhóón dahonteelgo deilʼáhígíí danéeséłígíí baa ntsídaahkees; doo éí ndaalnish da, doo ndi daʼadiz da;

29 Dóó nihichʼįʼ haasdziih, azhą́ Solomon ndi, ayóó ájítʼéii, tʼáadoo díígiʼ átʼéego ééhjíiyá da.

30 Ákohgo, Diyin God tłʼoh kótʼéego nizhónígo haidiilaago, éí éiyá díí jį́ hólǫ́, dóó yiskąągo biyiʼ atʼeesí biih doojih, kótʼéego nihídóʼ ééʼ nihidoołtééł, niheʼóodląʼ doo áłtsʼíísídą́ą́ʼ.

31 Díí bąą tʼáadoo baa ntsídaahkeesí, kódadohníigo, Haʼátʼíí lá dadiidį́į́ł? Éí doodago, Haʼátʼíí lá dadiidlį́į́ł? éí doodago, Haʼátʼíí lá bee hadadidiiʼnííł?

32 Háálá nihiTaaʼ yáʼąąshdi hólóonii éí tʼáá íídą́ą́ʼ díí bee nihichʼįʼ anáhóótʼiʼígíí bił bééhózin.

33 Ákondi Diyin God bił hazʼánígíí dóó bitʼáá ákogiʼ átʼéii áłtsé biká ádaahtʼį́, áko díí tʼáá ałtso nihaa doolyééł.

34 Tʼáadoo yiskąągo baa ntsídaahkeesí, háálá yiskąągo éí tʼáá bí ádaantsékees. Yoołkáłígíí éí tʼáá átʼé áchʼįʼ anáhóótʼiʼ biyiʼ dahólǫ́.