1 Áádóó áko baa hoolzhiizh Jesus díídí yee haadzííʼgo dóó áłah daazlį́ʼígíí yichʼįʼ nínááhaayá, dóó yichʼįʼ hanáánáádzííʼ, kóníigo: Tʼáá aaníí, Tʼáá aaníigo, Nihichʼįʼ haasdziih, doo ánahwijiiʼaah da, áko doo nihá nahodootʼááł da.

2 Háálá haʼátʼíshį́į́ bee nahwiiyíʼaahígíí, tʼáá éí bee há nináhodootʼááł; dóó haʼátʼíshį́į́ bee iʼnííníłʼąądyę́ęgi anéeltʼeʼgo, bee ndiʼdínóolʼąął.

3 Áádóó haʼátʼíí biniyé nikʼis binákʼe ooltsʼidígíí níníłʼį́, ndi tʼáá ni nástáán ninákʼee sitánígíísh doo baa ákonínízin da?

4 Éí doodaiiʼ haash yitʼéego éí nihikʼis kóbídídohniił: Haaʼíshąʼ ninákʼe ooltsʼidígíí ná haashʼaah—áádóó áko shooh, tʼáá ni nástáán ninákʼee sitą́ągo?

5 Ni tʼóó áhoʼdilʼíinii, áłtsé tʼáá ni nástáán ninákʼee sitánígíí nahjįʼ hańtįįh; áádóó índa hazhóʼó díníʼį́įʼgo nikʼis binákʼeʼ ooltsʼidígíí bá hadííʼááł.

6 Haʼátʼíida dadiyinii tʼáadoo łééchąąʼí bichʼįʼ adahołtłʼiidí, doo ndi nihiyooʼ ílíinii tʼáadoo bisóodi bidáahjįʼ adaohłkaadí, háálá éí tʼóó yikʼi ndookah, dóó nihichʼįʼ náhidookah dóó biwooʼ yee adanihidoołdlał.

7 Binaʼídółkid, dóó nihaa doolyééł; haʼnohtá, áko bikʼidínóohtááł, dáádílkał nanóhłtsʼin, dóó nihá ąą ádoolnííł.

8 Háálá tsʼída tʼáá ałtso ndaʼídíłkidígíí, éí bichʼįʼ kódaalneʼ; dóó haʼnitáhígíí, éí akʼídínóotaał, dóó háíshį́į́ dáádílkał neiniłtsʼinígíí bichʼįʼ, ąą ádoolnííł.

9 Éí doodaiiʼ nihitahdóó, diné, łaʼ biyeʼ łeesʼáán bíyííkeedgo, daʼ tséésh yeidooʼááł?

10 Éí doodaiiʼ łóóʼ łaʼ bíyííkeedgo, daʼ tłʼiishísh łaʼ yeidoolééł?

11 Nihígo índa, doo yaʼánóshónígíí, nihaʼáłchíní haitʼáo yáʼátʼéehii baa doolyéłígíí nihił bééhózingo, niTaaʼ nilíinii yáʼąąshdi hólǫ́nígíí dashąʼ haa néelą́ą́ʼ ndaʼídíłkidígíí hózhǫ́ yaʼdoolééł?

12 Éí bąą, tʼáá ałtso nihokááʼ dineʼé shichʼįʼ kódeidoolííł nínízinígíí, bí ałdóʼ bichʼįʼ kódadíílííł, háálá díí éí bee hazʼáanii dóó Diyin yá yádaałtiʼii bizaad ádaatʼé.

13 Áhoołtsʼóózígo yah ahóótʼiʼ góneʼ yah hohkááh; háálá dáńdítį́hí ayóó aníłtéél, dóó hóteelgo honítʼiʼ, éí éiyá hóóchxǫʼíjí bichʼįʼ ahóótʼiʼ, dóó tʼóó ahayóí éí áajigo yah dahakááh;

14 Iiná bichʼįʼ honítʼiʼígíí, éí dáńdítį́hí áłtsʼóózígo bee yah aʼatiin, dóó áhoołtsʼóózígo honítʼiʼ, dóó tʼáá díkwíhíyeeʼ yikʼi dahakááh.

15 Diyin yá yádaałtiʼí tʼóó ádaʼdilínígíí baa ákodanohsin, éí dibé ndahalingo hadadítʼéego ndaakai, ndi biyiʼdi maʼiitsoh dichin biʼniighąʼígíí ádáátʼį́.

16 Éí bineestʼąʼígíí bee béédahodoohsįįł. Dinéésh chʼil dadeenínígíí yitsʼą́ą́dóó chʼil naʼatłʼoʼii dayóbé, éí doodaiiʼ hosh yitsʼą́ą́dóó hashkʼaan dayóbé?

17 Áko tsin yáʼádaatʼééhii éí neestʼą́ yáʼátʼéehii bąąh ńdahoodleeł; ákondi tsin diiłdzidígíí éí bineestʼą́ doo yáʼáshónígíí bitsʼą́ą́dóó ńdahoodleeł.

18 Tsin yáʼátʼéehii neestʼąʼ doo yáʼáshónígíí bąąh hodooleełgo éí doo bííghah da, ndi tsin yíchxǫʼígíí neestʼą́ yáʼátʼéehgo doo bąąh dínóotʼį́į́ł da.

19 Tsin tʼáá ałtso bineestʼąʼ doo yáʼátʼéhígíí éí kʼíhidookał, dóó dzídzadahaltłʼiid.

20 Ákohgo, bineestʼąʼígíí bee béédahodoohsįįł.

21 Doo tʼáá átʼé Diyin Bóhólníihii, Diyin Bóhólníihii dashiłníníí, yáʼąąsh bił hazʼą́ądi doo yah ahidookah da; tʼáá hazhóʼó tʼáá háíshį́į́ shiTaaʼ nilíinii yáʼąąshdi hólóonii yinízinígíí yeʼełʼínígíí tʼéiyá.

22 Áadi biiníłką́ągo tʼóó ahayóí ádashididooniił; Diyin Bóhólníihii, Diyin Bóhólníihii shą́ą́ʼ nízhiʼ binahjįʼ náás ádahodooníłígíí baa ndahosiilneʼ neʼ, dóó nízhiʼ binahjįʼ bidaʼiiníziinii nahjįʼ adahineesdzood neʼ, dóó nízhiʼ binahjįʼ naanish baa dahózhóonii ádeiilyaa neʼ?

23 Áádóó áadi bichʼįʼ hadeesdzih: Doo niheedahasin da; shitsʼánohkááh, nichxǫ́ǫ́ʼígo ndaahłnishii.

24 Éí bąą, tʼáá háíshį́į́ díí ádíshnínígíí yidiiztsʼą́ąʼgo dóó yeʼíilaaígíí, éí diné hóyáanii, tsé bikáaʼgi bighan áyiilaaígíí nahalingo, baa ntséskees dooleeł—

25 Áádóó ahoʼniiłtą́, dóó tó yíląąd, dóó deiyol, dóó hooghanée dah nayíłhxan; dóó tʼáadoo nááłdaaz da, háálá tsé bikáaʼgi ályaa.

26 Dóó tʼáá ałtso díí ádíshnínígíí yidiiztsʼąʼígíí dóó doo yeʼiilaaígíí éí diné doo áhályáanii, bighan séí kááʼ bighan niiníʼáanii nahalingo, baa ntséskees dooleeł—

27 Áádóó ahoʼniiłtą, dóó tó yíląąd, dóó deiyol, dóó hooghané dah nayíłhxan; dóó ahiinááłdááz, dóó ayóóʼatʼáo adoołdas.