Wóltaʼii 25
Nínáádoodááł Bijį́į́di, ádaa hodzódlí dóó bąąhági átʼéii yaa deíkáahii éí tséhégod dookʼą́ą́ł nahalingo adahididookʼą́ą́ł—Elijah éí tʼah doo ayóó átʼáo báhádzidgo iiłkááh góneʼ ńdoodááł—Malachi 4 bił ahąąh nidííniłgo dínííłʼįįł. Jesus náádiidzáádóó A.D. 34 yihahgo.
1 Háálá áko shooh, bichʼįʼ yoołkááł éí bijį́ bááh bighan biiʼ kǫʼígi átʼéego hodinóogah; dóó ádaa dahaʼniihii, aooʼ, dóó bąąhági átʼéii yaa deíkááhą́ą, tséhégod ndahalin doo; dóó éí bijį́ biiníłką́ągo ałtso adahididookʼą́ą́ł, ní Diyin Tʼáá Ałtsoní bee Bóhólníihii, áko bikétłʼóól dóó bitsʼáozʼá ndi doo łaʼ doodzih da.
2 Ákondi nihí shízhiʼ béédaałdzidii, Diyin Tʼáá Ákogiʼ Átʼéii biYeʼ bitʼaʼ nádziihgo ńdidooʼnah, dóó náás doohkah dóó dínóohsééł béégashii yáázh hóneʼé sizį́ nahalingo.
3 Áádóó bąąhági ádáátʼíinii bikʼi ndoohkah; háálá éí nihikétłʼáahdi łeeshchʼih dooleeł éí bijį́ ákwíishłaago, ní Diyin Tʼáá Ałtsoní bee Bóhólníihii.
4 Shánanilʼaʼí, Moses bibee hazʼáanii béénílniih, éí Horebdi tʼáá átʼé Israel bá bee hazʼáanii ályaago bee nihichʼįʼ haasdzííʼ, bee ná hazʼáanii dóó bee ándahwiitʼaahii bił.
5 Áko shooh, Elijah Diyin yá yáłtiʼii nihichʼįʼ deeshʼaał tʼah doo Diyin Bóhólníihii bí íiyisíí báhádzidgo haiłkaahígíí tʼáá bichʼįʼ hoolzhishídi.
6 Áádóó éí azhéʼé baʼáłchíní bijéí yee tʼááłáʼí ńdadoodleeł, dóó áłchíní bizhéʼé bijéí yee tʼááłáʼí ńdadoodleeł, éí doodago éí deeshááł dóó nahasdzáán doo yáʼáshǫ́ǫ́góó bikʼijįʼ hadeesdzih.