Wóltaʼii 8
Níłtsą́ bił daníyolgo, nahasdzáán nahaʼnáago, dahodéekʼą́ą́łgo, níyoltso ndaakaigo, dóó tʼóó báhádzidgo áhooníłígíí éí Christ tsin ałnáozʼá bikáaʼjįʼ bił oʼoolkaalígíí yaa halneʼ—Tʼóó ahayóí dineʼé ndaaztseed—Kéyah tágí jį́ chahałheeł ałtso bikʼéstiʼ—Chʼídadzoodzíʼígíí éí kʼad shąʼ hahodoonííł dajiníigo dajichah. Jesus náádiidzáádóó A.D. 33–34 yihahgo.
1 Áádóó áko baa hoolzhiizh nihaa haneʼ ndeitʼáhígíí bikʼehgo, dóó nihaa haneʼ éí tʼááʼaaníí átʼéego nihił béédahózin, háálá áko shooh, hastįį yáʼátʼéehii haneʼ yaa áhályą́ą ńtʼę́ę́ʼ—háálá tʼááʼaaníí Jesus bízhiʼ binahjįʼ álíleekʼehjí naalnish ńtʼę́ę́ʼ; dóó doo éí tʼáá yigáłígíí Jesus bízhiʼ yinahjįʼ álíleekʼehjí naalnish da tʼáá hazhóʼó bąąhági átʼéii tsʼídá bá nahjįʼ kólyaago tʼéiyá—
2 Áádóó áko baa hoolzhiizh, díí hastįį yoołkáłígíí tʼáá ákotʼéego yiyííłtaʼgo, éí kʼad tádiin dóó biʼąąn tááʼ nááhai;
3 Áádóó diné Diyin yá yáłtiʼí Samuel, Laman dineʼé nilíinii, bee ééhózinii ádoonííł níigo yee haadzíʼę́ę ayóó yíká dadéezʼį́įʼgo hahoolzhiizh, aooʼ, niʼ bikááʼgóó tágí jį́ chahodoołhił hodooʼniidę́ę.
4 Áádóó dineʼé ląʼí da bił naaki danilį́ dóó bitah saad dahólǫ́ dahazlį́į́ʼ, azhą́ tʼóó ahayóí binahjįʼ éédahózinii bidaʼalyaa ndi.
5 Áádóó baa hoolzhiizh tádiin dóó biʼąąn yihah góneʼ, dóó tʼááłáʼí yiził biyiʼ, dį́į́ʼgóó yoołkáałgo, tsʼídá ayóó átʼáo nahłtinʼgo deiyol; tsʼídá hádą́ą́ʼda díí kéyah bikáaʼgi kótʼéego doo haleeh da ńtʼę́ę́ʼ.
6 Áádóó níłtsą́ ayóó átʼéego dóó tʼóó báhádzidgo bił deeyol; dóó tsʼídá yéego daʼdiní, wónáasiiʼ nahasdzáán tʼáá átʼé nayiłhan ałtsʼádooltǫǫł nahalingo.
7 Áádóó tʼáá naʼńleʼdii ndaʼdilchʼil, tsʼídá hádą́ą́ʼda díí kéyah bikáaʼgi tʼáhdoo ákónééh da ńtʼę́ę́ʼ.
8 Áádóó Zarahemlagi kin dashijaaʼąą diiltłah.
9 Áádóó Moronigi kin dashijaaʼąą taah tó ditʼą́ą́gi taah yíłdááz, dóó ákweʼé kéédahatʼínéé ałtso tó dabííghą́ą́ʼ.
10 Áádóó Moronihahgi kin dashijaaʼąą łeezh bikʼiiłdááz, dóó kin dashijaaʼ yę́ęgi dził ayóó áníłtsogo siʼą́ silį́į́ʼ.
11 Áádóó shádiʼááhjígo kéyahą́ą ayóó átʼéiigo dóó tʼóó báhádzidgo ndahaazchxǫʼ.
12 Ákondi shooh, náhokǫsjígo kéyahą́ą́ tsʼídá aláahgo ayóó átʼáo dóó tʼóó báhádzidgo yíchxǫʼ; háálá áko shooh, kéyahąą tʼáá átʼé łahgo átʼé silį́į́ʼ, tʼóó báhádzidgo ndahaastą́ dóó níyoltsoh ndaaskaaígíí biniinaa, dóó ndaʼdilchʼil dóó ńdaʼdeesnih, dóó tʼóó báhádzidgo nahasdzáán nahaasnáʼígíí biniinaa kódzaa.
13 Áádóó íiyisíí daʼnítiinée ndahaastǫʼ, dóó hodilkǫǫhgo ndaʼaztiinée ndi ndahaazchxǫʼ, dóó dahonteel yę́ęgo dahonoojí hazlį́į́ʼ.
14 Áádóó tʼóó ahayóí kin nitsaago dah naazhjaaʼą́ą́ dóó béédahoʼdílzinée táyiʼ góyaa daazlį́į́ʼ, dóó tʼóó ahayóí adahideezkʼą́ą́ʼ, dóó łaʼ éí tsʼídá yéego ndahasnáʼígíí bąą nahasdzáán bikáaʼjįʼ ndahaasdááz, dóó akweʼé kéédahojitʼínée ndaaztseed, dóó kéyah bikááʼgóó doo siláhá da silį́į́ʼ.
15 Áádóó łaʼ kin nitsaago dah naazhjaaʼą́ą́ éí tʼah dah naazhjaaʼ, ndi tsʼídá yéígo ndahaazchxǫʼ, dóó tʼóó ahojíyóí ákweʼé biyiʼ ndajizhtseed.
16 Áádóó náánáłaʼ éí níyoltsoh adahwiizhjaaʼ; háágóó dajizlį́ʼígíí éí doo bił bééhóziní da, tʼáá hazhóʼó níyoltsoh náhwiiláʼą́ą́ tʼéiyá bił béédahózin.
17 Áádóó ákótʼáo niʼ bikááʼgóó ałtso dahóóchxǫʼ, tsʼídá tʼáá áwołí bee níłtsą́ bił ndaayolígíí dóó, ndaʼdeesniiʼígíí dóó ndaʼdeeschʼilígíí dóó niʼ nahaasnáʼą́ą́ biniinaa.
18 Áádóó áko shooh, tséhę́ę ndahaastǫʼ; tʼáá ałtso nahasdzáán bikááʼgóó nikiʼdílʼá silį́į́ʼ, índa niʼ yéego ndahaaztǫʼ dóó niʼ ndahaazdládę́ę́góó, tséhę́ę ndadeeztąąd, tʼáá ałtsogóó nahasdzáán bikáaʼgi.
19 Áádóó baa hoolzhiizh ndaʼdiʼnínée dóó ndaʼdilchʼil yę́ę, dóó níłtsą́ bił deeyol yę́ę, dóó niʼ nahaʼnánée áhodiilzééʼ—háálá áko shooh, tsʼídá tááʼ ahééʼilkid bíighahgo daatsʼí índa niʼ kódzaa; dóó łaʼ ádaaníigo éí tʼáá íiyisíí hodíinaʼ daaní; ákotʼée ndi, díí ákóhóótʼįįdígíí éí tááʼ ahééʼilkidjįʼ áhoodzaa—áko shooh áádóó índa, niʼ bikááʼgóó ałtso chahóółhéél.
20 Áádóó baa hoolzhiizh chahałheełyę́ę ditą́ silį́į́ʼ tʼáá ałtso niʼ bikááʼgóó, háálá índa dajoodziʼyę́ę éí díí chahałheeł áhí dahʼoogish nahalingo baa ákodazhniizį́į́ʼ;
21 Áádóó tʼáá haʼátʼíi da bee adinídíín ádoolníłígíí éí ádin, díí chahałheeł ditánígíí biniinaa, doo ndi akʼah kǫʼ, doo ndóʼ kǫʼ ndaaltʼáʼígíí da; dóó ałdóʼ azhą́ tsin tsʼída danizhónígíí dóó tsʼída deíłtseiígíí ndi doo bíighah da, háálá tʼáá haʼátʼííshį́į́ bee adinídíín dooleełígíí éí ádin.
22 Áádóó tʼáá háadi da adinídíín dooleełígíí éí ádin, doodaiiʼ kǫʼ ndi, doodago tʼįįhdígo dałichíʼígíí ndi, doodaiiʼ jóhonaaʼéí ndi, doodago ooljééʼ da, doodago sǫʼ ndi, doo daatʼį́į da, háálá ayóó átʼáo kéyah bikááʼgóó chahałheeł ditą́ągo niʼ nikéshgishígíí biniinaa.
23 Áádóó baa hoolzhiizh díí tʼáá chahałheełgo tágí jį́ azlį́į́ʼ adinídíín doo yitʼį́į́góó; dóó tʼáá ałtsogóó dineʼé yínííł bikʼee tʼáá áwołí tʼáá áłahjįʼ dazhdiʼní dóó dazhdilwosh dóó dajicha; aooʼ, ayóó íitsʼaʼgo diné dadiʼní, chahałheeł dóó ayóó átʼáo hóóchxǫʼígíí biniinaa.
24 Áádóó łaʼ hazʼą́ągi dajicha, kódajiníigo: O dooládóʼ tʼáá íídą́ą́ʼ ádaańdaʼsiikan dooleeł ńtʼę́ę́ʼ tʼáhdoo tʼóó báhádzidgo nihił áhánéhę́ędą́ą́ʼ, dóó índa nihidineʼé kintah ayóó átʼéii Zarahemla doo yił adahididookʼąął da ńtʼę́ę́ʼ.
25 Áádóó nááná łahgo éí dajicha, kódajiníigo: O dooládóʼ tʼáá íídą́ą́ʼ ádaańdaʼsiikan doo ńtʼę́ę́ʼ tʼáhdoo tʼóó báhádzidgo nihił áhánéhę́ędą́ą́ʼ, dóó Diyin yá yáłtiʼí doo ndadiiltsił da ńtʼę́ę́ʼ dóó tsé doo bee ndaniilneʼ da doo ńtʼę́ę́ʼ, doo chʼídadíníilkał da ńtʼę́ę́ʼ; índa nihimáhąą dóó nihitsiʼ danizhóní yę́ę, dóó nihaʼáłchíní yę́ę yisdáákai doo ńtʼę́ę́ʼ, dóó doo éí kintah ayóó átʼéii Moronihah yił bikʼidahołdaaz da ńtʼę́ę́ʼ. Áádóó ákótʼéego ayóó íitsʼaʼgo yínííł bikʼee dajicha.