1 Áádóó baa hoolzhiizh Jesus hastóí bikééʼ naazínée áyidííniid bááh dóó chʼil naʼatłʼoʼii bitooʼ łaʼ wóshdę́ę́ʼ shaa nohnííł.

2 Áádóó bááh dóó chʼil naʼatłʼoʼii bitooʼ háʼaakaigo, áłah jílínée hachʼįʼ haadzííʼ niʼgóó dinohbįįh hodííniid.

3 Áádóó akééʼ naazíinii bááh dóó chʼil naʼatłʼoʼii ndeizhką́ąʼgo, bááhą́ą néidiiʼą́ dóó ałtsʼáyiiztiʼ dóó yikʼi sodoolzin; dóó bikééʼ naazíinii yaa yiiznil dóó daohsą́ yidííniid.

4 Áádóó daʼiiyą́ą́ʼ dóó yee hwiih daazlį́įʼgo, áłah jílínígíí bááh baa dadoohkááł yidííniid.

5 Áádóó áłah jílínígíí daʼiiyą́ą́ʼ dóó yee hwiih daazlį́įʼgo, akééʼ naazíinii kwíídííniid: Jó nihitahdóó tʼááłáʼí yidoolzį́į́ł, dóó éí bááh yikʼi sońdílzįįh dóó ałtsʼánéítih dooleeł dóó shisodizin daʼatahígíí, dashoosdląąd dóó shízhiʼ binahjįʼ tó bee dadoolzį́łígíí, yaa neikaah dooleeł.

6 Áádóó díí éí tʼáá áłahjįʼ ádaahtʼįgo béédaohłniih dooleeł, shí íishłaagi átʼéego, díí bááh kʼíhnítiʼígíí dóó bá sodeeszin dóó nihitah sékánéegi átʼéego ádaʼołʼį́į doo.

7 Áádóó díigi ádaʼołʼį́į doo shitsʼíís, nihichʼįʼ ííshją́ą́ íishłaago danóółʼíʼę́ę, béédaołniihgo. Áádóó díí éí binahjįʼ Diyin aZhéʼé nilíinii bichʼįʼ tʼáá aaníí tʼáá áłahjįʼ shéédaołniihígíí bee bééhózin dooleeł. Áádóó tʼáá áłahjįʼ shéédaołniihgo shiiʼ sizíinii nihił dahólǫ́ǫ doo.

8 Áádóó baa hoolzhiizh kódííniidgo, akééʼ naazíinii yichʼįʼ haadzííʼ bąąh haʼíízhahí chʼil naʼatłʼoʼii bitooʼ biiʼígíí dadoohdlį́į́ł, dóó áłah nilínígíí bitaadoohkááł áko łaʼ deidoodlį́į́ł.

9 Áádóó baa hoolzhiizh yidaʼiilaa, dóó dayoodlą́ą́ʼ dóó yee hwiih daazlį́į́ʼ; dóó áłah jílínígíí yitaadeizką́, dóó dayoodlą́ą́ʼ, dóó yee hwiih daazlį́į́ʼ.

10 Áádóó akééʼ naazíinii díí ałtso ádayiilaago, Jesus bichʼįʼ hanáánáádzííʼ: Díí ádaʼoohłaaígíí binahjįʼ nihikʼihojídlíi dooleeł, háálá díí shibee hazʼáanii bidaʼohłééh, dóó Diyin aZhéʼé nilíinii bichʼįʼ ííshjání ádaʼdoołyaaígíí éí shibee hazʼáanii nihaa níláhígíí bidaʼiilʼį́į doo dadooniid.

11 Áádóó díí éí ádaańdaʼooskanígíí dóó shízhiʼ binahjįʼ tó bee daalzį́ʼígíí tʼáá áłahjįʼ bá kódaʼołʼį́į doo; dóó shidił, nihá deeznaʼą́ą, béédaołniihgo kódaʼołʼį́į doo, ákogo Diyin aZhéʼé nilíinii tʼáá áłahjįʼ shéédaołniihígíí bichʼįʼ ííshjání áńdaʼoołʼįįh dooleeł. Áádóó tʼáá áłahjįʼ shéédaołniihgo shiiʼ sizíinii nihił dahólǫ́ǫ doo.

12 Áádóó bee hazʼáanii łaʼ nihaa nishłé áko díí bedaʼołʼį́į dooleeł. Áádóó díí tʼáá áłahjįʼ bedaʼołʼį́įgo éí nihikʼihojídlíi dooleeł, háálá shitsé éí bikáaʼgi ajiztłʼin dooleeł.

13 Ákondi tʼáá háiida díí yiláahgo dóó tʼáá biʼohgo áyiilaaígíí éí shitsé doo bikááʼ ajiztłʼin da, ndi éí éí séí bikáaʼgi ajiztłʼin; áádóó ahoʼniiłtą́ągo, dóó tó dááląądgo, dóó deeyolgo, dóó dah ndabiiłhango, éí ndoołdas, dóó chʼį́įdiitah bee dáádílkał éí há ąą átʼé.

14 Éí bąą shibee hazʼáanii bikʼeh dahonołʼį́įgo éí nihikʼihojídlíi doo, éí éí Diyin aZhéʼé nilíinii baa díílééł shidííniidígíí átʼé.

15 Tʼáá aaníí, tʼáá aaníigo, Nihichʼįʼ haasdziih, hadaʼohsííd dóó tʼáá áłahjįʼ sodadołzin, háálá éí biʼiiníziinii nihidínóotah, dóó nihił ndoodiłii yóó ánihidoolííł.

16 Áádóó shí nihitahgóó sodeeszinígi átʼéego nihídóʼ shisodizin góneʼ sodadołzin, shidineʼé ádaańdaʼooskanígíí dóó shízhiʼ binahjįʼ tó bee daalzį́ʼígíí bitahgóó. Áko shooh shí éí adinídíín nishłį́; shí éí nihinááł iʼiishłaa.

17 Áádóó baa hoolzhiizh Jesus díí saad bikééʼ naazíinii yee yichʼįʼ haadzíiʼgo, áłah nilíinii yichʼįʼgo nínááhaayá dóó yichʼįʼ haadzííʼ:

18 Áko shooh, tʼáá aaníí, tʼáá aaníigo, Nihichʼįʼ haasdziih, hadaʼohsííd dóó tʼáá áłahjįʼ sodadołzin doo ákotʼéego éí ndanihiʼdínóotah; háálá Chʼį́įdii éí nihinízin, tłʼoh naadą́ą́ʼ biyáázh yildééh nahalingo nihidoołdah.

19 Éí bąą tʼáá áłahjįʼ shízhiʼ binahjįʼ Diyin aZhéʼé nilíinii bichʼįʼ sodadołzin;

20 Áádóó haʼátʼííshį́į́ shízhiʼ binahjįʼ Diyin aZhéʼé nilíinii bíínóhkeedgo, tʼáá ákótʼéego, tʼáá aaníí shaa doolyééł nohsingo, áko shooh éí nihaa doolyééł.

21 Nihighan hazʼą́ągi Diyin aZhéʼé nilíinii bichʼįʼ sodadołzin, tʼáá áłahjįʼ shízhiʼ binahjįʼ, áko nihiʼzáanii dóó nihaʼáłchíní bikʼidahojidoodliił.

22 Áádóó áko shooh, tʼáá áłahjįʼ áłah nádleeh doo; áłah ńdaahdleehgo háíshį́į́ diné nihaa níyáago tʼáadoo bichʼįʼ aa danohchįʼí, ndi bíniʼ nihaahakai tʼáadoo bichʼįʼ aa danohchįʼí.

23 Ákondi bá sodadołzin, dóó doo éí yíwohjįʼ dabididoohniił da; dóó tʼáá ahą́ą́h nihaa ńdaakahgo éí Diyin aZhéʼé nilíinii bichʼįʼ, shízhiʼ binahjįʼ, bá sodadołzin doo.

24 Éí bąą, niheʼadinídíín wódahgo bił dah díílnih áko nihokááʼ dineʼé bá adinídíín dooleeł. Áko shooh, shí éí adinídíín nishłį́ áko éí bił dah díílnih doo—nihinááł áshłaa yę́ęgiʼ átʼáo. Áko shooh nihił bééhózin Diyin aZhéʼé nilíinii bichʼįʼ sodeeszin, dóó tʼáá ánółtso danihíínáał.

25 Áádóó nihił bééhózin doo éí łaʼ yíwohdi nihidííniid da, ákondi tʼóó wóshdę́ę́ʼ shaa hohkááh nihidííniid, áko nihiyiʼdi baa ákodínóohsį́į́ł dóó yidoołtsééł; áko índa nihokááʼ dineʼé bichʼįʼ kódaahtʼį́į dooleeł; dóó tʼáá háiida díí bee hazʼáanii doo yikʼehółínígíí éí bíniʼdii bidiʼnóotah.

26 Áádóó baa hoolzhiizh Jesus díí saad yee haadzíiʼgo, akééʼ naazíinii náyiizláʼą́ą náánéinééłʼį́į, dóó kóyidííniid:

27 Áko shooh tʼáá aaníí, tʼáá aaníigo, Nihichʼįʼ haasdziih, bee hazʼáanii łaʼ nihaa náánishłé, dóó áko índa Diyin shiZhéʼé nilíinii bichʼįʼ ńdeeshdááł áko náánáłaʼ bee hazʼáanii shaa haasyáhą́ą bidaʼdeeshłííł.

28 Áádóó áko shooh, díí éí bee hazʼáanii nihaa nishłé, éí aadanohkaahgo, tʼáá háiida nihił bééhózingo bąąhági átʼéii yee ádąąh dahastʼą́ągo éí díí shitsʼíís dóó shidił bee bééhániihii tʼáadoo tʼóó bíniʼ deiyání dóó deidlání dooleeł.

29 Háálá háíshį́į́ shitsʼíís dóó shidił bee bééhániihii doo yidísingóó yiyííyą́ąʼgo dóó yoodlą́ąʼgo éí bitsʼíís dóó biiʼ sizíinii tiʼdahooʼnííhgóó bá nidahodootʼááł; éí bąą diné ádąąh dahastʼą́ągo nihił bééhózingo shitsʼíís dóó shidił bee bééhániihii bichʼįʼ baa nohchįʼ dooleeł.

30 Ákótʼée ndi, doo nihitahdóó chʼídínóohłchéeł da, ndi tʼóó ndanohtin doo dóó Diyin aZhéʼé nilíinii bichʼįʼ, shízhiʼ binahjįʼ, bá sodadołzin dooleeł; dóó ádaanáʼooskango dóó shízhiʼ binahjįʼ tó bee yilzį́įʼgo, ákohgo índa wóshdę́ę́ʼ bididoohniił, dóó shitsʼíís dóó shidił bee bééhániihii baa doohkááł.

31 Ákondi doo ádaanáʼooskangóó éí shidineʼé doo bitah wóltaʼ da dooleeł, áko shidineʼé doo yidoołchxǫǫł da, háálá áko shooh shidibé bééhasin, haa néelą́ʼígíí bééhózin.

32 Ákótʼée ndi, sodizin bá dahooghandóó éí doo chʼídínóohłchéeł da, éí doodaiiʼ dahodínósindóó, ákódaatʼéhígíí éí tʼah bíkáʼandaałwoʼ doo; háálá doo éí nihił bééhózin da áko háadida nínáhidookahgo ádaańdaʼdookąął, dóó tʼáá aaníí ádaatʼį́įgo shaa ńdahidookah, áádóó hadaałtʼé áńdadeeshdlííł; dóó nihí éí nihinahjįʼ hasdáh náádzáa doo.

33 Éí bąą, díí bee nihichʼįʼ haasdzíʼígíí bikʼeh dahonołʼį́ áko doo nihihodidootʼih da; háálá hóyéeʼgi nahojíleʼ Diyin aZhéʼé nilíinii nahjįʼ kóhwiiłʼįįhgo.

34 Áádóó díí bee hazʼáanii nihichʼįʼ kwíishłaa ałghadaʼdohtʼáahgo biniinaa. Áádóó nihikʼijinishdlíi dooleeł doo ałghadaʼdohtʼááhgóó.

35 Áádóó kʼad éí Diyin aZhéʼé nilíinii bichʼįʼ déyá, biniyéii hólǫ́ǫgo biniinaa Diyin aZhéʼé nilíinii bichʼįʼ déyá nihí nihá yáʼátʼééh doo biniyé.

36 Áádóó baa hoolzhiizh Jesus díí saad ałtso yee haadzíiʼgo, bikééʼ naazíinii náyiizláʼą́ą bílaʼ yee yídadeelchid, tʼááłáʼí nízínígo, ałtso yídadeelchid, dóó yídadilchidgo yichʼįʼ hahasdzííʼ.

37 Áádóó áłah jílínée éí díí saad yee haadzíʼígíí tʼáadoo daazhdiiztsʼą́ą da, éí bąą tʼáadoo baa dahojolneʼ da; ndi akééʼ naazíinii éí adziilii bee Iiʼ Sizį́ Diyinii aa haalyéhígíí nihitaizlá daaníigo yaa daholneʼ. Áádóó shí eí díí haneʼ náásdi tʼáá aaníí átʼéego nihił ííshją́ą́ ádeeshłííł.

38 Áádóó baa hoolzhiizh Jesus ałtso yídadeelchidgo, kʼos niʼnikeeldoh dóó áłah jílínée ałtso hakéstiʼ silį́įgo Jesus tʼáadoo dajiiłtsą́ą da.

39 Áádóó kʼos ałtso hoł yaa niildohgo, éí hatsʼá níyá, dóó yáʼąąshgóde dah ńdiidzá. Áádóó akééʼ naazíinii éí yáʼąąshgódei anáádzáágo dayiiłtsą́ dóó tʼáá aaníigo yaa dahoolneʼ.