1 Áádóó baa hoolzhiizh Jesus díí ałtso saad yee hanáánáádzíiʼgo, naakitsʼáadahí tʼááłáʼí nízinígo kóníigo yichʼįʼ hahasdzííʼ: Diyin aZhéʼé nilíinii bichʼįʼ anáásdzáágo dóó bikʼijįʼshąʼ, haʼátʼíí bee shikʼihozhdoodliił dashíínóhʼní?

2 Áádóó tʼáá ałtso ádaaní, tʼáá hazhóʼó táltʼéego tʼéiyá, kódaaní: Ałtso są́ bikʼihiikaigo dóó bikʼijįʼ, ndaʼnohtin dooleeł éí éí nihidííníniidę́ę, ałtsogo, tsxį́įłgo nił hazʼą́ąjįʼ nínááhidiikah.

3 Áádóó éí kóyidííniid: Díí shitsʼą́ą́dóó danohsinígíí bee nihikʼihojídlíi dooleeł; éí bąą, tsostsʼidiin dóó baʼaan naaki nihéédááhaigo shił hazʼą́ądi shaa hidoohkah; dóó shí shinahjįʼ háádadoohłyįh.

4 Áádóó ałtso yichʼįʼ yáłtiʼgo, diné táltʼéhę́ę yichʼįʼ yiizįʼ, dóó kwíídííniid: Nihíshąʼ éí nihiTaaʼ bichʼįʼ anáásdzáá dóó bikʼijįʼ, haʼátʼíí bee nihíká adeeshwoł danohsin?

5 Háálá deinízinígíí yee yichʼįʼ hadadoodzihyę́ę yichʼįʼ niʼ daniizį́į́ʼ, dóó bijéí biyiʼ tʼóó yaa dabíniʼgo naazį́.

6 Áádóó yichʼįʼ haadzííʼ: Áko shooh, baa ntsídaahkeesígíí shił bééhózin, Jew dineʼé tʼah doo dah dashiiłhéégóó, John, ayóí ííníshʼníinii, nihookáaʼgi naʼnishtingo bił tádíshʼaashę́ę, shiyííkeedę́ę, ałdóʼ danohsin.

7 Éí bąą, hózhǫ́ nihikʼihojídlíi dooleeł, háálá nihí éí anoonééł doo nihidééłníi da dooleeł; ndi dahinohnáa dooleeł áko Diyin aZhéʼé nilíinii bílaʼ ashdlaʼii baʼáłchíní yee yindoolnishígíí ałtso nihił ííshją́ą́ ádadoolʼnííł, índa tsʼídá ałtso Diyin aZhéʼé nilíinii yee nihwiizʼánée ałtso bidaʼalyaajįʼ, sheʼayóó átʼéii yáʼąąsh bibee adziilii bił nánísdzáajįʼ.

8 Áádóó tsʼídá anoonééł bidaʼneezgai doo nihidadééłníi da dooleeł, ndi shí ayóó átʼéii bił níyáago jineeskʼolgi átʼéego łahgo ádoohnííł anoonééł dóó doo anoonééłjįʼ; dóó índa Diyin shiZhéʼé nilíinii bił hazʼą́ądi nihikʼihojidoodliił.

9 Áádóó nááná, nihitsʼíís biiʼ honohłǫ́ǫgo atsʼíís neezgai doo nihee hólǫ́ǫ da dooleeł, doo yínííł ndi tʼáá hazhóʼó nihokááʼ dineʼé bąąhági ádaatʼínígíí tʼéiyá baa yínííł nohsin dooleeł; dóó díí tʼáá ałtso ádeeshłííł háálá danohsinígíí biniinaa, háálá díí nahasdzáán tʼahdii siʼą́ą́dą́ą́ʼ, nihokááʼ dineʼé biiʼ sizíinii shaa ndahidoohʼish danohsinígíí biniinaa.

10 Áádóó díidí biniinaa tsʼídá ił hózhóonii nihiiʼ hadidoobį́į́ł; dóó Diyin shiZhéʼé nilíinii bił hazʼą́ądi dínóohbįįł; aooʼ, shí Diyin aZhéʼé nilíinii tsʼídá ił hózhóonii tʼáá átʼé yee shikʼijoosdliʼígi átʼéego; nihídóʼ ił hózhǫ́ tʼáá átʼé bee nihikʼidahozhdoodliił; dóó tʼáá shígi ánóhtʼée dooleeł, dóó shí éí Diyin aZhéʼé nilíinii átʼéhígi áníshtʼé; dóó Diyin aZhéʼé nilíinii dóó shí éí tʼááłáʼí niidlį́;

11 Áádóó Iiʼ Sizį́ Diyinii éí Diyin aZhéʼé nilíinii dóó shí nihaa halneʼ, dóó shí shiniinaa, Diyin aZhéʼé nilíinii éí Iiʼ Sizį́ Diyinii bílaʼ ashdlaʼii baʼáłchíní yichʼįʼ kóyiilaa.

12 Áádóó baa hoolzhiizh Jesus díí saad ałtso yee haadzíiʼgo, naakitsʼáadahí bílátah yee yidadeeshchid tʼáá hazhóʼó táltʼéego tʼáá kǫ́ǫ́ dooleeł danínée tʼéiyá tʼáá dooda, dóó índa dah ńdiidzá.

13 Áádóó áko shooh, yáʼąąsh ąą ádzaa, dóó díí táltʼéego yáʼąąshgódei abiʼdootʼeezh, dóó tsʼídá doo baa haneʼii deinééłʼį́į́ʼ dóó deidiiztsʼą́ą́ʼ.

14 Áádóó díí tʼáadoo baa dahołneʼé dabiʼdooʼniid; doo ndi díí dayiiłtsánígíí dóó deidiiztsʼą́ʼígíí baa hodoonihígíí beʼadziilii doo bee yílyáa da;

15 Áádóó daatsʼí bitsʼíís bee éí doodago bitsʼíís daatsʼí tʼáá géedgo; doo bił béédahózin da; háálá bitsʼíís tʼáá íiyisíí łahgo ádanoolningo ádabiʼdiilyaa, áko bitsʼíís doo anoonééł bidadééłníígóó ádabiʼdiilyaa, áko Diyin God áyiilaaígíí tʼáá bí dayooʼį́ daazlį́į́ʼ.

16 Ákondi baa hoolzhiizh éí nahasdzáán bikááʼgóó nináádaʼdíniitą́ą́ʼ; ákótʼée ndi yáʼąąshdi tʼáadoo leʼé deidiiztsʼą́ʼą́ą dóó dayiiłtsánée éí doo yaa dahalneʼ da, háálá tʼáadoo baa dahohłneʼé dabiʼdooʼniid.

17 Áádóó áko, díí ałtso bitsʼíís bitsʼádaʼdeezdíín daazlį́į́ʼyę́ędą́ą́ʼ, daatsʼí bitsʼíís łahgo ádáádzaayee doo anoonééł dabidééłníi da daazlį́į́ʼ, shí éí doo shił bééhózin da;

18 Ákondi kóníłtsogo tʼéiyá shił bééhózin, díí haneʼ náádaháasdzoyę́ę binahjįʼ—nahasdzáán bikááʼgóó diné ndeinitingo ndaakai dóó haashį́į́ néelą́ą́ʼ binaʼnitin, dayoosdląądígíí éí sodizin yihidiikai; tó yee deisį́įʼgo, dóó tʼáá ałtsogo tó bee dabiʼ doolzį́ʼígíí éí Iiʼ Sizį́ Diyinii bichʼįʼ kódaalyaa.

19 Áádóó sodizin doo daʼatahígíí éí awáalyah góneʼ ańdabiiłtłʼiʼ ńtʼę́ę́ʼ. Áádóó awáalyaa doo dabootʼąʼ da ńtʼę́ę́ʼ, háálá éí tʼóó ałtsʼádahinidééh ńtʼę́ę́ʼ.

20 Áádóó łeeyiʼ hahwiisgeedgóó adayiistlʼííd; ndi Diyin God bizaad yee nahasdzáán ndayiiłdił, áko índa beʼadziilii binahjįʼ nahasdzáán biyiʼdę́ę́ʼ hadahakaah; dóó éí bąą nízaad góyaa hahwiisgeed doo łaʼ bótąʼí da silį́į́ʼ.

21 Áádóó táadi éí tsídzabiʼdiistłʼííd dóó tʼáadoo ádáádzaaí da.

22 Áádóó naakidi éí naaldlooshii daʼałchinii bighan góneʼ yah adabiʼdiistłʼííd; áádóó áko shooh áłchíní dibé yázhí daʼałtʼoʼígíí nahalingo tʼóó yił ndaané, dóó tʼáadoo átídabiilaaí da.

23 Áádóó baa hoolzhiizh éí ákótʼáo Nephi bidineʼé yitahgóó nikidadiikai, dóó tʼáá ałtso diné kéyah bikáaʼgi kéédahatʼį́įgo Christ binahatʼá bee yisdáʼiildéehii yíndaʼniłtin; dóó binahjįʼ diné Diyin Bóhólníihii yichʼįʼ dah dahidiikai, dóó Christ bisodizin yee dah yíkaiígíí yidiikai, dóó ákótʼáo kweʼé diné nooséłígíí bikʼidahojisdliʼ, Jesus yee haadzíʼę́ę bikʼehgo.

24 Áádóó áko shí, Mormon, díí baa hashneʼígíí haada nízahjįʼ da niʼkwéshłééh.

25 Áko shooh, tsʼídá kʼad doo anoonééł bikʼiidooldoh da haʼnínée bízhiʼ ádeeshłííł ńtʼę́ęʼgo, ákondi Diyin Bóhólníihii dooda shidííniid; éí bąą doo bikááʼ áshłéeh da, háálá éí nihokááʼ dineʼé bitsʼąą nanélʼin.

26 Ákondi shooh, shí éiyá deiłtsą́, dóó shíká ííjééʼ.

27 Áádóó áko shooh Gentile dineʼé yitaadaakai dooleeł, dóó Gentile dineʼé doo béédahósin da dooleeł.

28 Jew dineʼé ałdóʼ yitaa daakai dooleeł, dóó Jew dineʼé doo béédahósin da dooleeł.

29 Áádóó baa hodoolzhish, Diyin Bóhólníihii yaa ntsékeesígíí bikʼehgo Israel bidineʼé daʼníłtsʼą́ąjigo ałtsʼádabidiʼnoolkaad yę́ę ałtso ndeidínóotį́į́ł, dóó índa ałʼąą dóoneʼé bił nahazʼą́ągo, ałkʼéí danidlíinii bitahgóó, ałʼąą dabizaadii dóó diné danilíinii bitahgóó naʼnitin kódeidoolííł, dóó áádę́ę́ʼ dineʼé daʼoosdląądígíí Jesus yaa deidiyooʼish, áko deinízinée ałtso bá bóhodoolnííł, dóó ałdóʼ Diyin God bibee adziilii bee akʼeh hodidlíinii biiʼ naazláhígíí bikʼehgo.

30 Áádóó éí táltʼéego éí Diyin yá ndaalʼaʼí ndahalin, dóó Jesus bízhiʼ binahjįʼ Diyin aZhéʼé yichʼįʼ sodadilzingo éí tʼáá háíshį́į́ diné yichʼįʼ ííshjání ádadiʼdoolniił.

31 Éí bąą, naanish ayóó átʼéego dóó ayóó ánoolningo ádeidoolííł, tʼah doo ayóó áhootʼé bee yiłkaahgóó éí bijį́ diné tʼáá ałtso Christ bibee ánihwiitʼaah-bikááʼdahʼasdáhí bidááhdóó deidoozįįł;

32 Aooʼ azhą́ Gentile dineʼé bitahgóó ndi naanish ayóó átʼéego ayóó ánoolningo ádeidoolííł, tʼah doo ayóó áhootʼé bee yíłkááhgóó.

33 Áádóó tsʼídá tʼáá átʼé Christ ayóó átʼéego binaanish áyiilaaígíí Diyin bizaad bee akʼedaʼashchínígíí ndaajaahgo, áko éí, Christ bizaadígíí binahjįʼ, díí tʼáá aaníí ádahodooníiłgo nihił béédahózin dooleeł.

34 Áádóó yíiyá haalaaneʼ háíshį́į́ Jesus bizaad, dóó ałdóʼ náyiizláʼą́ą hatah yiníłʼaʼą́ą, doo dazdiiztsʼą́ʼígíí; háálá Jesus bizaad dóó hatah yiníłʼaʼígíí bizaad doo dazhniizį́į́ʼgóó éí Jesus doo dazhniizį́įʼ da dooleeł, dóó éí bąą yíiníłką́ągo éí doo hodínóozįįł da;

35 Áádóó éí dinéhígíí éí tʼáadoo hoʼdizhchį́į́góó éí há yáʼátʼéeh dooleeł ńtʼę́ę́ʼ. Háálá daʼ Diyin God bíníjiiłʼaʼgo tʼáá ákogi bibee ánihwiiʼaahii nahjįʼ kózhdoolííł danohsin, éí éí diné tʼóó yikʼinaaskai, áko binahjįʼísh yisdáʼnáʼiildééh?

36 Áádóó áko shooh, áłtséédą́ą́ʼ Diyin Bóhólníihii náyiizláaʼgo baa haasdzíʼę́ę, aooʼ, díí táltʼéego ndi yáʼąąshgódei daazlį́ʼę́ę, éí daatsʼí anineehjiʼ dóó doo anineehjiʼ ádabiʼdiilyaa jó éí doo shił bééhózin da—

37 Ákondi shooh, áłtséédą́ą́ʼ iʼíishłaayę́ę áádóó wóshdę́ę́ʼ, Diyin Bóhólníihii díí binabídéełkid, dóó éí díí shił ííshjání áyiilaa díí bitsʼíís łahgo átʼéego ályaago tʼéiyá, doo anoonééł bikʼiidooldoh da;

38 Éí bąą, doo dadínóonéeł da biniyé bitsʼíís łahgo ádaatʼéego ádaalyaa, áko doo tiʼdahooníih da dooleeł doodago doo yínííł danízin da dooleeł tʼáá hazhóʼó nihokááʼ dineʼé bąąhági ádaatʼínígíí tʼéiyá yaa yínííł danízin dooleeł.

39 Áko díí bitsʼíís łahgo ádaalyaaígíí éí nihoníyáadi atsʼíís łahgo ádadooníłígíí doo bił aheełtʼée da; ndi bitsʼíís éí łahgo ádáádzaa, áko índa Chʼį́įdii biʼiiníziinii beʼadziil doo bidadééłníi da daazlį́į́ʼ, áko yínítáahgo doo yíighah da silį́į́ʼ; dóó bitsʼíís hadaałtʼéego ádabiʼdiilyaa, áko dadiyin daazlį́į́ʼ, dóó nahasdzáán beʼadziilii doo bidadééłníi da daazlį́į́ʼ.

40 Áádóó díí tʼáá kódaatʼéego Christ bibee ánihwiitʼaah biiníłką́ąjįʼ ahodoolzhish; dóó éí bijį́ bitsʼíís hózhǫ́ łahgo ádadoonííł, dóó Diyin aZhéʼé nilíinii bił hazʼą́ą góneʼ yah anáhidookah áko doo chʼínááhidookah da, ndi hoolʼáágóó Diyin God yáʼąąshdi yił dahólǫ́ǫ dooleeł.