1 Áko shooh, nihił ííshją́ą́ ádeeshłííł aláahdi naatʼáanii kéyah yikʼi hooʼááłgo tʼáadoo ádeiyiilaa da; ákondí tʼáá díí yihahígíí biyiʼ, aooʼ, tááʼtsʼáadah yihahígíí biyiʼ, ánahwiiʼaahii dahsidáhígíí dayiisxį́, aooʼ, aláahdi ánahwiiʼáahii dayiisxį́.

2 Áádóó dineʼé ałkʼijįʼ dahdeiyíkááh daazlį́į́ʼ; dóó ałʼąąhgo dahdeiyíkááhgo ádaʼdiilyaa, diné tʼáá łaʼí nízinígo yił háájééʼ dóó bikʼéí dóó dabikʼis bikʼehgo; dóó díígiʼ átʼáo kéyah bikʼihootʼááłę́ę deiyííłchxǫʼ.

3 Áádóó dahdeiyíikahígíí aláahdi naatʼáanii doodaiiʼ aláahjįʼ bikʼih sizínígíí yikʼidadiilniiʼ, áádóó díígiʼ átʼáo dahdeiyíkááh dóó yiláahjįʼ naazíinii daazlį́į́ʼ.

4 Áko shooh, diné łaʼí nízínígo tʼáá ałtso yił háájééʼígíí dóó dabikʼéí dóó dabikʼis łą́ągo bee dahólǫ́; éí bąą dahdeiyíkáhígíí ayóó ánéílą́ą́ʼ daazlį́į́ʼ.

5 Áko díí tʼáá atʼé ałtso ádeiyiilaa, dóó anaaʼ tʼahdoo bitah dahalééh da; dóó díí tʼáá átʼé bąąhági ádaatʼį́ daazlį́į́ʼ háálá Chʼį́įdii beʼadziilii yaa ádaʼdeestʼánígíí biniinaa.

6 Áádóó kéyah bikʼihootʼááł bee hazʼáanii yę́ę deiyííłchxǫʼ, háálá ndanitʼingo dahyiikahígíí bikʼis dóó bikʼéí danilínii éí Diyin yá yádaałtiʼii ndeestseedígíí biniinaa.

7 Áádóó ayóó átʼáo kéyah bikááʼgóó ałkʼijįʼ saad adeiyiiníiłgo ahináádiijah, diné hózhǫ́ diyin yikʼehgo deiyíkáá yę́ę ndi doo yáʼátʼéehgo deeskai, aooʼ, áko bitahgóó tʼáá díkwíhí diyinkʼehgo deiyíkááh silį́į́ʼ.

8 Áádóó áko tʼahdoo hastʼą́ą́ náháádą́ą́ʼ diné diyinkʼehgo deiyíkááh yę́ę yitsákai, łééchąąʼí bikwii néídį́į́h nahalingo, doodaiiʼ bisóodi hashtłʼish yiihnáʼnah nahalingo.

9 Áko díí ndanitʼingo dahyiikahígíí, éí ayóó átʼáo bąąhági átʼéii dineʼé yikʼijįʼ kódeiyiilaa, ahííkai, áádóó hastį́į́ Jacob yee dayozhíʼę́ęʼ bilą́ąjįʼ sizʼį́įgo ádeiyiilaa;

10 Áádóó aláahdi nihinaatʼáanii deiłníigo deiyiizhiʼ; éí bąą bąąhági ádaatʼį́įgo dahyikahígíí aláahdi yiʼnaatʼáanii silį́į́ʼ; dóó bí éíí tsʼídá aláahdi Jesus yá yádaałtiʼí yikʼijįʼ yáłtiʼ ńtʼę́ę́ʼ.

11 Áádóó baa hoolzhiizh dineʼé dahdeiyíkááh yę́ę doo bidziilgóó yilááh ánéílą́ą́ʼ da, díí yił daʼahóótʼą́ daazlį́į́ʼ ákondi binaatʼáanii éí bibee hazʼáanii bá hadeidiilaa, tʼáá átʼé dineʼé dahdeiyíkáhígíí bikʼehgo; ákótʼée ndi ałkʼijįʼ anaaʼí danilį́, áko éí doo diyinkʼehgo deiyíkááh da, ákotʼée ndi kéyah bikʼihootʼááł doolchxǫǫłgo yee ahadaʼdeestʼánígíí deijoołáago yee łaʼ danilį́.

12 Éí bąą, Jacob biʼanaaʼ bilááh áneilą́ą́ʼgo yiyiiłtsʼą́, dahyikahígíí yilą́ąjįʼ sizʼį́, éí bąą bidineʼé tsʼídá nahookǫsjigo kéyahígíí bichʼįʼ dahdidoohnééł yidííniid, dóó áadi kéyah bikʼi nihídahólnííhgo ádadoohłííł, atsʼádaheeskaiʼígíí nihił ahííkaigo índa, (háálá áko ląʼí atsʼádaheeskaiʼígíí dahólǫ́ǫ dooleeł yił níigo łikango yee yichʼįʼ hahaasdzííʼ) áádóó dineʼé dahdeiyíkáhígíí tʼáá dabidziilgo yichʼįʼ nídadibah daazlį́į́ʼ.

13 Áádóó tsxįįłgo deiyínéłígíí biniinaa doo niʼ kódabiʼdilnééhgóó diné doo dabidoosiłígíí yilááhgóó chʼékai. Áádóó kótʼáó tádiin ałtso nááhai; áádóó kótʼáo Nephi bidineʼé ádáátʼįįd.

14 Áádóó baa hoolzhiizh tádiin dóó biʼaan tʼááłaʼí yiihah góneʼ ałʼąąh dahdeiyínééh daazlį́į́ʼ, diné tʼáá łaʼí nízinígo bighan hazʼą́, bikʼéí dóó dabikʼis bikʼehgo, ákotʼée ndi doo áłkʼijįʼ anaaʼ ádadiilnííł da daníigo ałhadaʼdeestʼą́; ákotʼée ndi bibee hazʼáanii doo yee łaʼ danilį́į da, dóó haitʼáo kéyah bikʼihootʼááłgi, háálá biʼaláahdi naatʼáanii dóó binaatʼáanii danilíinii biniʼ bikʼehgo ádaalyaa. Ákondi bee hazʼáanii doo kʼídootʼih átʼéego dahdeiyíkáhígíí doo nááná łaʼ yikʼijįʼ dadooleełgo ádeiyiilaa, áko éí bąą kéyah bikááʼgóó tʼáá kʼé dahólǫ́, ákotʼée ndi Bóhólníihii biDiyin God éí bijéí yitsʼą́ąjigo kódeiyiilaa, áádóó Diyin yá yádaałtiʼii ńdeineesneʼ dóó bitahdóó chʼídeineeskaad.

15 Áádóó baa hoolzhiizh Nephi—Diyin yá ndaalʼaʼí baa heeskaigo dóó Diyin Bóhólníihii bizhí ałdóʼ yidiiztsʼą́ągo, éí bąą Diyin yá ndaalʼaʼí yiyiiłtsą́ągo, dóó binááʼ-yee yiyiiłtsʼą́ągo, dóó bibeʼadziilii bee yilyáago áko Christ yee ákáʼalwodígíí bił bééhodoozįįł biniyé, áádóó diyinkʼehgo deiyíkááh yę́ę tsxįįłgo doo yáʼátʼéehii dóó aláahdi daolchʼídígíí yichʼįʼ nináhíkááhgo binááʼ-yee yiyiiłtsą́;

16 Éí bąą, bijéí deistłʼisígíí yaa yínííł silį́į́ʼ dóó biniʼ doo yee daʼooʼínígíí biniinaa—tʼáá éí yihahígíí biyiʼ yitah dahdiiyá, tʼáá aaníí, ádaanáʼookąąh dóó Diyin Bóhólníihii Jesus Christ woodlánígíí binahjįʼ bąąhági ádaatʼéii bá yóóʼadahiditʼaah, éí yéego yił chʼííníʼą́.

17 Áádóó tʼóó ahayóí naʼnitin yee neineeztʼą́ą́ʼ; dóó tʼáá átʼé doo náhidoodzoh da, dóó łahdóó ndi doo bíighah da, éí bąą díí naaltsoos biyiʼ doo náháásdzoh da. Áádóó Nephi adziilii dóó ayóó átʼáo bee óhólnííh yee naʼneeztʼą́ą́ʼ.

18 Áádóó baa hoolzhiizh bikʼijįʼ bá dahoochįįd, háálá adziilii bilááhgóó bee hólónígíí biniinaa, háálá bizaad doo deidoodląąłígíí doo bá bííghah da, háálá Diyin Bóhólníihii Jesus Christ yoodlánígíí ayóó átʼéhígíí biniinaa Diyin yá ndaalʼaʼí tʼáá ákwííjį́ baa ńdaakah.

19 Áádóó Jesus bízhiʼ binahjįʼ bidaʼiiníziinii dóó iiʼsizʼį́ bidaʼiiníziinii nahjįʼ haineeskaad; dóó bikʼis ndi anoonééłdę́ę́ʼ néídiyiiłá, éí tsé yee ńdeineesneʼ dóó dineʼé dabiisxį́įgo.

20 Áádóó dineʼé deiyiiłtsą́, dóó deiyííniiʼ, dóó beʼadziilígíí biniinaa bichʼįʼ bádahoochįįd; áádóó álílee ádaʼalʼíinii tʼóó ahayóí ałdóʼ ayiilaa, dineʼé binááł, dóó Jesus bízhiʼ bee.

21 Áádóó baa hoolzhiizh tádiin dóó biʼaan łaʼ ałtso nááhai, dóó tʼáá dikwíhí Diyin Bóhólníihii yikééʼ dahdiikaigo tʼáá íiyisíí łáh ádaadzaa; áko éí dineʼé adziilii dóó Diyin God biʼIiʼ Sizį́ Diyinii bił dahooleʼ, éí Jesus Christ bił hólónéé, éí dayoodlą́ągo.

22 Áádóó bidaʼiiníziinii bá nahjįʼ kódaalyaaígíí, dóó bee bitah dahoneezgaii dóó bąą dahnahazʼánée ndáádzííʼ, éí dineʼé tʼáá aaníí Diyin God biʼIiʼ Sizį́ Diyinii bee ndaasdzííʼ dadííniid; dóó bee daatʼíinii ałdóʼ ííshjání ádayiilaa dóó dineʼé bitah łaʼ álílee ádayiilaa.

23 Áádóó ákótʼáo tádíín dóó biʼaan naaki ałdóʼ ałtso nááhai. Áádóó Nephi éí tádiin dóó biʼaan tááʼ góneʼ dineʼé náyooskan; áádóó ádaanáʼookąąh dóó bąąhági ádaatʼéii bá yóóʼadahidootʼááłgo yee neineeztʼą́ą́ʼ.

24 Áádóó kʼad ałdóʼ béédaałniih, áko ádaańdaʼooskanígíí doo ła tʼáadoo tó bee dabiʼdoolzį́į́ʼ da.

25 Éí bąą, Nephi, hastóí díí naʼnitin biyiʼjįʼ yiyiisį́į́ʼ, áko tʼáá ałtso baadahakáhígíí tó bee dabidiʼdoolzį́į́ł, dóó díí Diyin God bidááhdóó bee yitʼį́ dóó tʼáá aaníigo baahodoonih, dóó dineʼé bichʼįʼ ałdóʼ, áko ádaańdaʼooskan dóó bibąąhági ádaatʼéii bee baandaʼdeestʼą́.

26 Áádóó díí yihah beehahoolzhiizhígíí biyiʼ ádaańdaʼooskanígíí tó bee dabiʼdoolzį́į́ʼ; dóó kótʼáo ałnííʼ bilááhgóó ałtso nááhai.