1 Áádóó baa hoolzhiizh tseebíítsʼáadah niihááhgo daʼniʼįįhii bindaabaahí daʼahidooghááłgo hashtʼeʼádaʼdiilyaa, dóó adaakai dóó deilkʼidééʼ adáájééʼ dóó daadziłdéé, dóó doo kééhojitʼínídééʼ, dóó hółdzilgo bił nahazʼą́ą́dééʼ, dóó ndanitʼindééʼ, dóó kéyah yee ádídahoosníiʼ, tʼáá ałchʼįhjí kéyah shadiʼááhjigooígíí dóó kéyah náhookǫsjigooígíí, dóó tʼáá átʼé kéyah Nephi dineʼé doo deiniizįʼígíí yee ádídahoosnííʼ, áádóó kintah doo daniizįʼígíí ałdóʼ.

2 Ákondi shooh, naaldlooshii daʼáłchínígíí dóó bíkándaʼazheehígíí Nephi dineʼé kéyah doo deiniizį́ʼígíí doo łaʼ bikááʼ hólǫ́ǫ da, dóó bíká ndaʼazheehígíí daʼniʼįįhii doo łaʼ bá hólǫ́ǫ da tʼáá hazhoʼó doo kéédahatʼínídi tʼéiyá.

3 Áádóó daʼniʼįįhii chʼídadoonééłgo doo bábííghah da tʼáá hazhóʼó doo kéédahojitʼíníjigo tʼéiyá, chʼiiyáán ndzinígíí biniinaa; háálá Nephi dineʼé bikéyah bikááʼ doo siláhígóó ádeiyiilaa, dóó binaaldlooshii dóó ndeiniłkaadígíí dóó binaadeełii dahdeidiijaaʼ, éí tʼáá ałtso tʼáá łahjįʼ dahdiiná.

4 Éí baah, daʼniʼįįhii doo daʼdínóóʼį́į́ł dóó chʼiiyáán ndeididoolééłgo doo bá bííghah da, tʼáá hazhóʼó Nephi dineʼé yił daʼahidooghą́ą́łgo tʼéiyá; dóó Nephi dineʼé éí tʼááłaʼígo dahyiinééł, dóó łąʼígo dahyiinééłgo, dóó chodeidoołʼįįłii hashtʼeʼádeiyiilaa, łį́į́ʼ dóó bééghahshii, dóó naaldlooshii ałʼąą áátʼeełgo, tsostsid nááhaijįʼ yikiin dahiináa doogo, éí hoolzhish biyiʼ daʼniʼįįhii kéyah bikááʼdóó ałtso ndeidoołtsxił; áádóó áko tseebíítsʼáadah yihahígíí ałtso nááhai.

5 Áádóó baa hoolzhiizh nahastʼéí tsʼáadah yihah góneʼ Giddianhi éí Nephi dineʼé tʼáá kʼad yił daʼahidooghááłgo yaa ákoniizį́į́ʼ, háálá doo éí dahiináa da dooleeł tʼáá hazhóʼó aghadaʼiiʼnííł dóó daʼniʼįįh dóó ndaʼałtseedgo tʼéiyá.

6 Áádóó doo éí kéyah bikááʼgóó ałʼąą dahdiinééh dá dóó doo kʼidaʼdilééh da, háálá Nephi dineʼé da bikʼidookah dóó ndabidoołtsxił; éí bąą Giddianhi bańdaabaahí yá hideezʼą́ díí yihahígíí biyiʼ Nephi dineʼé bił daʼahidiigą́ą́ł.

7 Áádóó baa hoolzhiizh daʼahidoogą́ą́łgo níná; dóó hastʼą́ą́ yiził góneʼ; áádóó áko shooh, éí bijį́ ayóó átʼé dóó tʼóó baaʼihgo daʼahiʼniigą́ą́ʼ; dóó éí daʼniʼįįhii ndahalingo hadadiidzaa; dóo dibé yázhí bikágí boozhnííʼ gónaa naastsooz, dóó dił bee daaschííʼgo, dóó bitsiiʼ daashzhééʼgo, dóó béésh chʼah bikʼi dadíʼą́ą́go, dóó ayóó átʼáo dóó tʼóó báhádzidgo Giddianhi bindaabaahí hadadítʼéh, háálá bibéésh ééʼ, dóó dił bee daaschííʼígíí biniinaa.

8 Áádóó baa hoolzhiizh Nephi dineʼé bindaabaahí, Giddianhi bindaabaahi yee hadadiidzaahígíí deiyiiłtsą́ągo, niʼjįʼ adahineezdeeʼ, dóó biDiyin God Bóhólníihii yichʼįʼ hadadeeshghaazh, áko yisdádabidooʼish dóó beʼanaaʼí yitsʼą́ą́dóó yisdádabiʼdoodlóós.

9 Áádóó baa hoolzhiizh Giddianhi bindaabaahí díí deiyiiłtsʼą́ągo ayóó íítsʼaʼgo hadadeeshghaazh háálá bił dahóozhǫǫd, háálá Nephi dineʼé ńdaasdzíídgo naaʼaníídeeʼ daniizííʼ háálá bindaabaahí tsʼídá tʼóó baadahadzidígíí biniinaa.

10 Ákondi baa ndahóókaad, háálá Nephi dineʼé doo béédaaldzid da, áko biDiyin God éí yéédaaldzid dóó bíká, adoolwołgo ndayooskan; éí bąą, Giddianhi bándaabaahi bichʼįʼ dahdiijééʼgo yichʼįʼ dahdidoojahgo hashtʼeʼádadiilyaa; aooʼ, Diyin Bóhólníihii bibeʼadziilii yee yił adaʼahiʼniigą́ą́ʼ.

11 Áádóó hastʼą́ą́ yiziłígíí biyiʼ adaʼahiʼniigą́ą́ʼ, dóó ayóó átʼéego dóó tʼóó baaʼihígiʼ átʼéego daʼahiʼniigą́ą́ʼ, aooʼ, ayóó átʼéego dóó tʼóó baaʼihígiʼ átʼéego ndaʼahistseed, tʼáá ałtso Lehi bidineʼé bitahgóó éí Jerusalemdę́ę́ʼ dahdiináá dóó hóshdę́ę́ʼ tsʼídá tʼahdoo ákótʼéego ndaʼahijiltseed da ńtʼę́ę́ʼ.

12 Azhą́ Giddianhi hahaasdzííʼ dóó yee ádééhahaasdzíí ndi, áko shooh Nephi dineʼé bikʼeh deesdlį́į́ʼ, hónáasiiʼ nátʼą́ą́ʼ anánoolkaad.

13 Áádóó baa hoolzhiizh Gidgiddoni bindaabaahí doo kééhojitʼíní nineelʼą́ąjįʼ bikééʼ ninoohnééh yidííniid, dóó akǫ́ǫ́ deiyiiłtsoodígíí ałtso ndeidoołtsxił; dóó áko yikéé deiyíbááh dóó ndeistseed, doo kééhojitʼíní nineelʼą́ąjįʼ, Gidgiddoni yee haadzííʼ yę́ę yedaʼiilaa.

14 Áádóó baa hoolzhiizh Giddianhi, tsʼídá yéego doo naaldzidgóó sizį́įgo ahoogą́ą́ʼ, dóó bikééʼ dahdadiibaaʼ; áádóó naazbaaʼígíí biniinaa chʼééh deiyáago bikʼíʼildeeʼ dóó biʼdiisxį́. Áádóó ákotʼáo Giddianhi aniʼįįhii biʼdiisxį́.

15 Áádóó baa hoolzhiizh Nephi dineʼé bindaabaahí niłdzilgo hashtʼeʼdahoolaa yę́ęgo naʼná. Áádóó baa hoolzhiizh náhástʼéíʼtsʼáadah ałtso nááhai, dóó daʼniʼįįhii tʼáadoo náádadeezbaaʼ da; áádóó naadiin yihah góneʼ ałdóʼ tʼáadoo náádadeezbaaʼ da.

16 Áádóó naadiin łaʼ yihah góneʼ tʼáadoo yichʼįʼ náádadeezbaaʼ da, ákondí tʼáá ałtsʼą́ą́dééʼ Nephi bidineʼé doo chʼíhidookahgo yinídaaztʼiʼ; háálá Nephi bidineʼé doo bikéyahjigo chʼíhootʼiʼgóó, dóó tʼáá ałtsodééʼ doo bá chʼíhootʼiʼgóó, dóó tłóódééʼígíí deinízinígíí niʼkódeiyósingo, éí binahjįʼ nihílákʼeh dadookah danízin.

17 Áko nááná łaʼ naatʼáanii yikʼi náádadiilniiʼ, éí Zemnarihah joolyé; éí bąą Zemnarihah tʼáá ałtsodééʼ doo bá chʼíhonítʼiʼgóó áyiilaa.

18 Ákondi shooh, díí Nephi dineʼé bichʼiʼjí silį́į́ʼ; háálá nízaadgo daʼniʼįįhii Nephi dineʼé dayótąʼgo doo bidééłníí da, háálá ńzaadgóó chodeidoołʼįįłgo hashtʼeʼndayiznilígíí biniinaa.

19 Áádóó háálá daʼniʼįįhii ałchʼį́į́digo hashtʼeʼádaʼdiilyaaígíí biniinaa; háálá áko shooh, doo bee dahólóní da tʼáá hazhoʼó atsįʼ ałchʼį́į́dígo yee dahiinánígíí tʼéiyá, éí atsʼiʼ doo kééhojitʼínídééʼ chódeiyoostʼeʼ.

20 Áádóó baa hoolzhiizh bíká ndaʼazheehii doo kééhojitʼínídi ádaasdįįd hónáásii daʼniʼįįhii kʼadééʼ dichin ádabiłdįįh.

21 Áádóó Nephi dineʼé tʼáá ákwiijí dóó tʼáá ákwiitłʼééʼ chʼíndaakah, dóó bindaabaahí yikʼinéíjah, dóó dimííl yázhí dóó neeznádiin dimííl yázhí ndeistseed.

22 Áádóó áko Zemnarihah bidineʼé yee ndahazʼánééʼ yitsʼą́ą́jįʼ kódaadzaa, háálá ayóó átʼáo tʼáá ákwííjįʼ dóó tʼáá ákwíí tłʼééʼ ndabiʼdiʼtseed.

23 Áádóó baa hoolzhiizh Zemnarihah bidineʼé ayidííniid nihinaʼaztʼiʼígíí bitsʼą́ą́jįʼ nahjiʼ haohkááh, dóó kéyah tsʼídá nahookǫsjigooígíí bichʼįʼ dohnééh.

24 Áádóó kʼad, Gidgiddoni yee dahodeezʼánígíí yaa ákonízingo, dóó doo dabidziilígíí bił bééhózin háálá bichʼiyąʼ ádaasdįįdígíí biniinaa, dóó tʼóó báhádzidgo ndabiʼdiztseedígíí biniinaa, éí bąą tłʼéégo bindaabaahí chʼííníʼeezh, dóó chʼídoonééł yę́ęgiʼ yichʼą́ą́h niníjééʼ, dóó bindaabaahí chʼídookah yę́ęgi niiníʼeezh.

25 Áádóó díí kótʼáo tłʼéégo ádaʼiilaa, dóó daʼniʼįįhii yilááh ííná, áko biiskání daʼniʼįįhii dahdiináago, Nephi dineʼé bindaabaahí bikʼiidoojahgo bidááhʼdééʼ dóó bineʼdééʼ niníná.

26 Áádóó daʼniʼįįhii shádiʼááhdééʼgo yikahígíí ałdóʼ bidziilgo bił nahazʼánígiʼ yichʼą́ą́h niikai. Áádóó díidí tʼáá ałtsoní ádahoodzaa Gidgiddoni ádííniid yę́ęgiʼ átʼáo.

27 Áádóó miil yázhí bilááhgóó Nephi dineʼé dabisnááh, dóó łaʼígíí éí ndabiʼdistseed.

28 Áádóó binaatʼáanii, Zemnarihah, éí bidisził dóó tsin yąąh dahbiʼdiidloʼ, aooʼ, azhą́ tsʼídá tsin bilátahdi daaztsʼą́ą́jįʼ ndi. Áádóó dahbiʼdiidloʼgo ádin silį́į́go tsin yę́ę niʼjįʼ kʼékal, dóó ayóó íítsʼaʼgo hadadoolghaazh, kódaaníigo:

29 Diyin Bóhólníihii bidineʼé diyinkʼehgo deiyíkahígíí dóó bijéí deidísingo yisdéídooʼish, dóó niʼjįʼ dadínónééł tʼáá háída nidbiʼdoołtsxiłígíí, háálá adziil dóó nanilʼingo adaalʼinigii biniinaa, tʼáá díí hastiin niʼjįʼ íítłʼizhígíí nahalingo.

30 Áádóó yaa dahaznih dóó ázhí yee hadadoolghaazh, kódaaníigo: Abraham biDiyin God, dóó Isaac biDiyin God, dóó Jacob biDiyin God, díí dineʼé Diyinkʼehgo eʼélʼínígíí bee baa áháyáa doo, tʼáá biDiyin God bízhiʼ yíkáʼádaaníigo bee baa áháyą́ą doo.

31 Áádóó baa hoolzhiizh tʼáá átʼé ádadííniid, dahataałgo, dóó biDiyin God Bóhólníihii yaa dahaniih, ayóó átʼáo baʼádaʼiilaaʼígíí biniinaa, beʼanaaʼí doo yilákʼeh dookahgóó yisdábidooʼishgo.

32 Aooʼ, hadadoolghaazh: Hosanna Aláahdi Diyin God Nilíinii. Áádóó hadadoolghaazh: Bóhólníihii Diyin God Ayóóʼánóodziilii nízhiʼ baa dahwiiʼniih, Aláahdi Diyin God Nilíinii.

33 Áádóó bijéí ił hózhǫ́ biiʼ hadadéébįįd, áádóó binákʼeeshtoʼ łąʼígo hadahaazʼnaʼ, háálá Diyin God ayóó átʼéego biyáʼátʼéehii biniinaa biʼanaaʼ yílákʼeedóó yisdáyiiʼeezhígíí; áádóó ádaańdaʼooskan bił béédahózinígíí biniinaa dóó beʼajoobaʼ ahoolʼáago atíbiʼdilnééhdééʼ habiʼdootʼeezh.