1 Áádóó tʼáá aaníí, tʼáá aaníigo, Nihichʼįʼ haasdziih łaʼ dibé shee nááhódlǫ́, éí éiyá doo díí kǫ́ǫ́ kéyah bikááʼgóó kéédahatʼį́į da, doo ndi Jerusalemdi kéyahígíí da, doo ndóʼ kéyah bikááʼ naʼnétąʼąą binaagóó yikááʼ kéédahatʼį́į da.

2 Háálá baa yáshtiʼígíí éí tʼahdoo shiinééʼ deidíítsʼį́įh da, doo ndi háadida tʼahdoo bichʼįʼ ííshjání íʼdíshnééh da.

3 Ákondi nihiTaaʼ Nilíinii éí bitah díínááł shiłní, dóó éí shiinééʼ deididootsʼį́į́ł, dóó shilį́į́ʼ danilínígíí yitah bił daʼóltaʼ doo, háálá tʼááłáʼíjįʼ dibé hólǫ́ǫ dooleeł dóó tʼááłáʼí dibé yá sizį́į doo; éí bąą ákǫ́ǫ́ bichʼįʼ deeshááł dóó bichʼįʼ ííshjání ádiʼdideeshnííł.

4 Áádóó nihichʼįʼ haasdziih dah ńdiisdzáago díí bee nanihinétąʼígíí náádahídóohsoh, háálá shidineʼé Jerusalemdi kéédahatʼínígíí, dashiiłtsánée dóó naʼnishtingo shił dahólónée, doo Diyin aZhéʼé nilíinii tʼáadoo shízhiʼ binahjįʼ ndeídéíłkidgo, háálá Iiʼ Sizį́ Diyinii binahjįʼ nihaa bił bééhodoozįįłgo, dóó diné náánáłaʼ nááhódlǫ́ doo bił béédahózinígíí ałdóʼ, háálá díí naʼnítin náádahídóohsohígíí éí ndaahʼáa dooleeł dóó Gentile dineʼé bichʼįʼ ííshjání ádoolnííł, háálá Gentile dineʼé baa hoolzhiizhgo, baʼáłchíní łaʼ, doo daʼóodlánígíí biniinaa nahasdzáán tʼáá ałtso bikááʼgóó daʼníłtsʼą́ąjigo ałtsʼádabidiʼnoolkaad, shóńdadooltʼeeł, éí doodago naneestą́ąʼgo sheeńdahodoosįįł, báNináʼnídláii nishłį́įgo.

5 Áádóó nahasdzáán bikááʼ tʼáá dį́į́ʼgóó adahwiisʼáádę́ę́ʼ índa áłah ádeeshłííł; dóó índa Diyin aZhéʼé nilíinii dineʼé Israel bighan dooígíí danilínígíí yił ahaʼdeetʼánée ałtso bohodeeshłííł.

6 Áádóó Gentile dineʼé éí bikʼihojídlí, Iiʼ Sizį́ Diyinii, éí éiyá shí dóó Diyin aZhéʼé nilíinii yił ííshjání ádayiilaago, dashóodlánígíí biniinaa.

7 Áko shooh, dashóodlánígíí biniinaa, Diyin aZhéʼé nilíinii ání, dóó doo daʼiinohdlánígíí biniinaa, O Israel bighandóó danohłíinii, akéeʼdi yoołkáłígíí biyiʼ tʼááʼ aaníinii éí Gentile dineʼé bichʼįʼ kódoolnííł, dóó tsʼídá ałtso ííshją́ą́ ádaalyaaígíí bił ííshją́ą́ ádadoolnííł.

8 Ákondi yíi, Diyin aZhéʼé nilíinii kóníiniʼ, Gentile dineʼé doo daʼóodlánígíí yichʼįʼ—háálá ákótʼée ndi éí díí kéyah yikááʼ náhaaskaiígíí, dóó shidineʼé éí éiyá Israel bighandóó danilínígíí ałtso daʼníłtsʼą́ąjigo ałtsʼádeineeskaad; dóó shidineʼé Israel bighandóó danilínígíí ałtsʼáńdeineeskaad, dóó tʼóó yikʼi naaskai;

9 Áádóó Diyin aZhéʼé nilíinii Gentile dineʼé yaa joobaʼígíí biniinaa, dóó Diyin aZhéʼé nilíinii shidineʼé Israel bighandóó danilínígíí yá nihoníʼánígíí biniinaa, tʼáá aaníí, tʼáá aaníigo, Nihichʼįʼ haasdziih, díí bikééʼdóó, dóó shidineʼé Israel bighandóó danilínígíí atídaalyaa, dóó bichʼįʼ nidahwiiʼnáa dooleeł, dóó nidabiʼdistseed dooleeł, dóó bitahdóó chʼihidooltłʼił, dóó dabiʼjoodláago, dóó hiss bidiní dóó baa daʼoodlohgo ádeeshłííł—

10 Áádóó ákótʼéego díí éí Diyin aZhéʼé nilíinii kóbidiní shiłní: Áajįʼ ayííłką́ągo Gentile dineʼé shinahatʼá bee yisdáʼiildéehii bikʼijįʼ bąąhági ádaatʼį́į doo, dóó shinahatʼá bee yisdáʼiildéehii tʼáá ałtso bee hadilyaaígíí doo deinízin da dooleeł, dóó kéyah tʼáá naaznilígíí biláahgo bijéí biyiʼ ádaa dadzódlíii dadooleeł, dóó tʼáá ałtso nihokááʼ dineʼé biláahgo, dóó tʼóó báhádzidgo dabiyoochʼííd dooleeł, dóó bindaʼadloʼ dooleeł, dóó tʼáá ałtsoní yá nidahałtʼiʼ dooleeł, dóó tʼóó ídaʼdilʼį́į dooleeł, dóó nidaʼałtseed doo, dóó sodizin yee ndaʼííłbįįh dooleeł, dóó bąąhá doo, dóó doo hootʼį́įdi tsʼídá aláahdi joodláhígíí yaa naakai dooleeł; dóó díí ałtso ádeidoolíiłgo, dóó shinahatʼá bee yisdáʼiildéehii tʼáá ałtso bee hadilyaaígíí doo deinízin da dooleeł, áko shooh, Diyin aZhéʼé nilíinii ání, nahatʼá bee yisdáʼiildéehii tʼáá ałtso bee hadilyaaígíí bitahdóó náádideeshdlééł.

11 Áádóó índa shidineʼé bił ahaʼdinishtʼánée béédeeshnih, O Israel bighandóó danohłíinii, dóó shinahatʼá bee yisdáʼiildéehii baa deeshłééł.

12 Áádóó nihił ííshjání ádeeshłííł, O Israel bighandóó danohłíinii, éí díí Gentile dineʼé doo nihikʼehdidlį́įʼ da dooleeł; ndi O Israel bighandóó danohłíinii, nihił ałhaʼdinishtʼánée béédeeshnih, dóó nahatʼá bee yisdáʼiildéehii tʼáá ałtso bee hadilyaaígíí nihił béédahodoozįįł.

13 Ákondi Gentile dineʼé ádaa ńdaʼdookąąłgo dóó shaa nákaigo, áko shooh éí shidineʼé, O Israel bighandóó danohłíinii, yitah danilį́įgo bił daʼóltaʼ dooleeł, ní Diyin aZhéʼé nilíinii.

14 Áádóó Diyin aZhéʼé nilíinii ání, shidineʼé, Israel bighandóó danilínígíí, doo yitah hadidookah da, dóó doo yikʼi nidookah da.

15 Ákondi doo shichʼįʼgo nahakaigóó, dóó shiinééʼ doo dazhdiitsʼaʼgóó, shidineʼé, O Israel bighandóó danohłíinii, hachʼįʼ deeshʼaał, éí hatah dookahii, dóó yikʼi nidookah, dóó áshįįh doo halniih da silį́ʼígíí ndahojílin doo, éí éiyá tʼáadoo yee chooʼíní da dooleeł ndi tʼóó chʼídoolkał, dóó shidineʼé, O Israel bighandóó danohłíinii, éí tʼóó hakʼi naakai dooleeł.

16 Tʼáá aaníí, tʼáá aaníigo, Nihichʼįʼ haasdziih, ákótʼáo Diyin aZhéʼé nilíinii shichʼįʼ haadzííʼ—éí díí diné díí kéyah baa didííʼááł háálá daabí dooleeł.

17 Áádóó índa Diyin yá yáłtiʼí Isaiah kóníigo haadzíʼę́ę bohodoolnííł, éí kóní:

18 Nihá hadaʼasíidii iinééʼ diitsʼaʼgo; iinééʼ yił dahataał dooleeł, háálá tʼáá áłah anááʼ yee déezʼį́į́ʼ dooleeł Diyin Bóhólníihii Zion nináánéídláago.

19 Nihił dahózhǫ́ǫgo dahohtaał, tʼáá ánółtso dahohtaał, nihí ndahiishochxǫʼígíí Jerusalem; háálá Diyin Bóhólníihii éí bidineʼé yikʼijisdliʼ, éí Jerusalem yá nináʼnídlá.

20 Diyin Bóhólníihii bigaan dílzinii tʼáá ałtso ałʼąą dineʼé dah deíkáahii yitʼį́įgo ííshją́ą́ áyiilaa; dóó kéyah nináneelʼą́ąjįʼ Diyin God biyisdáʼiiníiłii deizdoołtsééł.