1 Áádóó baa hoolzhiizh Christ níyáádóó hastʼą́ʼáádah nááhaigo, Lachoneus, kéyah yikʼi bóhólníihii, éí daʼniʼįįhii binaatʼáanii dóó bikéyah yikʼi bóhólníihii saad hachʼįʼ áyiilaa; dóó díí saad éí ńdéiyízoh, kódaaníigo:

2 Lachoneus, aláahdi kéyah bee Bóhólníihii dóó ayóó ánítʼéii, díí saad nichʼįʼ áshłeeh, dóó tsʼídá ayóó átʼáo naahashniih háálá nizaad bee sinízinígíí, dóó nidineʼé ałdóʼ ayoo dabidziilgo nidaazį́, éí éí bee niháʼadahaztʼįʼígíí dóó tʼáá danohsingo daʼhiinóhnánígíí tʼáh deinóhtʼą́ʼígíí; aooʼ, nizhónígo bee ntsoozį́, diyin god nihikaʼanalwoʼ nahalingo, tʼáá nihí ádanohsingo daʼhiinóhnánígíí bichʼą́ą́h nitsoozį́įgo, dóó nihinaadeełii, dóó nihikéyah, éí doodago ákótʼáo bee deiyinóhshíhígíí.

3 Áádóó tʼóó baa hojoobáʼígo baa ntséskees, Lachoneus ayóó ánítʼéii, doo áhonílyą́ą da dóó chʼééh ádíítʼįįł shinidaabaahii ląʼígo doo nidaaldzidgo shikʼeh dahółʼínígíí bikʼijįʼ dohkááhgo, éí kʼad ndi yee ndaabaahígíí yee hashtʼeʼ ádaʼdólzingo naazį́, dóó shizaad deididootsʼíłígíí yibaʼ hashtʼeʼ ádaʼdólzin—Nephi dineʼé ákóyaaʼí bichʼįʼ dohkááh dóó ndaołtseed.

4 Áádóó shí, doo bikʼidahodidleehgóó shił bééhózin, anaaʼdi bidahoneestʼą́ʼgo shił bééhózin, dóó hoolʼáágóó danihijoołahígíí shił bééhózin háálá ląʼídi doo ákótʼéego eʼélʼiinii bichʼįʼ kwiinlaa, éí bąą nihikʼijįʼ dadeezbaaʼgo tsʼídá ałtso ndanihidoołtsxił.

5 Éí bąą díí saad nichʼįʼ íishłaa, tʼáá shí shílaʼ bee bidáʼdiníłjééʼ, háálá hojoobaʼgo nanitséskees, nił tʼáá aaníigo yinídlánígíí bee nidziilígíí, dóó daʼahijigą́ądi niʼiiʼ sizíinii ayóó átʼéhígíí biniinaa.

6 Éí bąą nichʼį eʼéshłééh, shidineʼé bichʼįʼ, nihikin dah naazhjaaʼ, nihikédayah, dóó nihinaadeełii, bee ádaa daʼdinohtʼaahgo nihíínishkeed, jó áko béésh hał doo nihichʼįʼ dahdeididootįįłgo yee ndanihidoołtsxił da.

7 Éí doodago kótʼáo ááhdishní, nihichʼįʼ ádaadadinohtʼaah, dóó nihihidoohkááh dóó naʼnilʼingo naʼanishígíí nihił béédahodoozįįł, dóó nihikʼiské dadohłeeł áko nihígi ádanohtʼée doo—doo éí nihinaalteʼí danółį́į da doo, ákondi nihikʼiské dóó tʼáá ałtsoní nihee dahólónígíí bee ahił ndeilnish doo.

8 Áádóó áko shooh, bee ádee haasdziih, díí bikʼeh ádaʼoohłaago, tʼáá aaníí ádadohníigo, doo nidanihidiʼdooltsxił da; ákondi díí doo bidaʼoohłaagóó, tʼáá aaníinii bee nihichʼįʼ ádee hadeesdzih, hanáánáázidgo shá nidaabaahí nihichʼįʼ deeshʼaał, dóó niʼ kódaatʼéego dóó doo daastiʼgo, ndanihidoołtsxił, dóó béésh hał nihikʼijįʼkólʼį́įgo bee ánihidiʼdooldįįł.

9 Áádóó áko shooh, Giddianhi nishłį́; dóó Gadianton ndanitʼingo dahʼooldah binaatʼáanii nishłį́; éí dahʼooldahígíí dóó bindaʼanishígíí éí yáʼátʼéehígíí ádaatʼéego shił bééhózin; dóó ałkʼidą́ą́ʼ ádaalyaa dóó éí díí jį́įdi nihilákʼee dahaasyá.

10 Lachoneus, díí saad nichʼįʼ áshłééh, dóó nikéyah dóó ninaadeeł nihaadahidoohniłgo laanaa nisin, tʼáadoo naʼíłtseedí, áko shidineʼé báʼadahaaztiʼígíí dóó nahatʼá bee bídahólniihii baa ndahidoolyééł, éí nihitsʼáhaaskai háálá nibąąhági átʼéii bee doo nahatʼá bee bídahólnííh da, díí doo beʼílééhgóó, shidineʼé bił ndaʼiisíʼígíí bá hashtʼéedeeshdlííł. Shí Giddianhi áshtʼį́.

11 Áádóó áko baa hoolzhiizh Lachoneus bichʼįʼ eʼelyaaígíí néidiiłtsoozgo tʼáá íiyisíí yikʼeedeesyiz, Giddianhi Nephi dineʼé bikéyah nihaadadoohʼááł níigo yee hahadziih, dóó ałdóʼ dineʼé yee hadahaasdzíʼígíí dóó tʼáadoo daʼasihígíí doo ákódaʼiiláago bá hashtʼéedeeshdlííł nínígíí, tʼáá hazhóʼó daʼniʼįįhii bąąhági átʼéii dóó aláahdi woolchʼį́į́d ádeiłʼínígíí yihidiikaigo tʼéiyá.

12 Áko shooh, díí Lachoneus, kéyah yikʼi bóhólníihii, éí diné tʼáá ákogi átʼíínii nilį́, dóó aniʼįįhii deiyókeedígíí dóó dabizaad bikʼeʼáyééʼígíí doo yináldzid da; éí bąą Giddianhi, daʼniʼįįhii yikʼi bóhólníihii saad bichʼįʼ áyiilaa yę́ę doo yóóstsʼą́ą́ da, ákondi bidineʼé Diyin Bóhólníihii bichʼįʼ ndaʼoohkaah yidííniid áko daʼniʼįįhii bikʼijįʼ dadeezbaaʼgo yichʼįʼ dabidziil doo biniyé.

13 Aooʼ, saad íłíinii tʼáá ałtso dineʼé bitahgóó áyiilaa, bizáanii, baʼáłchíní, bilį́į́jįʼ dóó ndeiniłkaadígíí dóó binaalyéhé, bikéyah éí dooda, éí tʼáá łahígi ałhąʼádadoolnííł yidííniid.

14 Áádóó áłah silį́įʼgi anaaʼí yichʼįʼ hashtʼeyiilaa, ayóó átʼáo bidziilgo áyiilaa. Nephi dineʼé dóó Laman dineʼé tʼáá áłah, éí doodaiiʼ Nephi dineʼé yił dayółtaʼígíí, bindaabaahí hadaʼasíidgo áyiilaa, jį́įgo dóó tłʼéeʼgo daʼniʼįįhii yíká hadaʼasíidgo áyiilaa.

15 Aooʼ, éí íidííniid: Diyin Bóhólníihii hináago, tʼáá hazhóʼó nihibąąhági átʼéii baa ńdaʼsookango tʼéiyá, dóó Diyin Bóhólníihii bichʼįʼ ádaa ńdaʼsoohkango, doo ádaahdzaago éí Gadianton daʼniʼįįhii doo yitsʼą́ą́dóó yisdádoohkah da.

16 Áádóó Lachoneus bizaad dóó náásádahodoonííł yee haadziʼígíí ayóó ádaatʼé dóó tsʼídá danizhóní áko dineʼé tʼáá ałtso yéédaasdzííd; dóó Lachoneus bizaad yéego dabidziilígíí yikʼehdahóółʼįįd.

17 Áádóó baa hoolzhiizh Lachoneus Nephi dineʼé bindaabaahí tʼáá ałtso yikʼi aláahdi binaatʼáanii yikʼi dadiilniiʼ, éí daʼniʼįįhii doo kééhatʼínídę́ę́ʼ hachʼįʼ dadeezbaaʼgo éí dahwééʼaah doo.

18 Áko aláahdi ndaabaah binaatʼą́ą́ tsʼídá alą́ąjįʼ sizinígíí dóó Nephi dineʼé binidaabaahii yikʼi hooʼááłdooígíí bikʼihodiiniiʼ, dóó éí Gidgiddoni woolyé.

19 Áko Nephi dineʼé aláahdi nidaabaahii binaatʼáanii bikʼihodiiniiʼgo, (tʼáá hazhóʼó bąąhági átʼéii yaa naakaiyę́ędą́ą́ʼ tʼéiyá) éí dinéhígíí diyingo ił ííshją́ą́ ályaaígíí bił hólǫ́ǫ doo dóó diyingo áhodooníłígíí bił bééhózin doo; áko, díí Gidgiddoni Diyin yá yáłtiʼii ayóó átʼéii nilį́į́ ńtʼę́ę́ʼ, ánahwiiʼaahii naatʼáanii ałdóʼ ákótʼée ńtʼę́ę́ʼ.

20 Áko dineʼé Gidgiddoni kódeidííniid: Diyin Bóhólníihii bichʼįʼ sodílzin, áádóó dził yiʼgóó diikah, áko daʼniʼįįhii bikʼiidiijah dóó bikéyahdi ndadiiltsxił.

21 Ákondi Gidgiddoni ábíłní: Diyin Bóhólníihii dooda ní; háálá bikʼijįʼ dadeebaaʼgo Diyin Bóhólníihii áajigo danihidoosiłgo íidoolííł; éí bąą nihikéyah ałníiʼgi hashtʼeʼádadidiilnííł, dóó nihindaabaahí tʼáá átʼé ahídahidiitʼish, áko doo bikʼijįʼ diikah da, éí bąą Diyin Bóhólníihii hináago, kódeilyaago Diyin Bóhólníihii nihilákʼei yidinóołkał áko bikʼeh dadidiidleeł.

22 Áádóó baa hoolzhiizh tsostsʼidtsʼáadah yihah góneʼ; kʼadę́ę ałtso náhááhgo, Lachoneus haneʼ ílíinii íyilaayę́ę tʼáá ałtsogóó ádaalyaa, áádóó dabilį́į́ʼ, bitsin naabąąs yee ndaabaahígíí, dóó dabibéégashii, dóó tʼáá átʼé nidaaldlooshii, dóó ndeiniłkaadii, dóó binaadą́ą́ʼ, dóó tʼáá átʼé binaadeełii, éí yee mííl yázhí dóó neeznáá damííl yázhí yee dahdiiná, tʼáá ałtso hazʼánigi nidadoonééł hodooʼniid yę́ęjįʼ ndadoonéełgo dah dadiiná, yee beʼanaaʼí yikʼjįʼ achʼą́ą́h ndadoobah.

23 Áádóó kéyah bikʼihodiiniiʼígíí éí Zarahemla kéyah, áádóó kéyah Zarahemla dóó kéyah Bountiful bitaʼígi ałdóʼ, aooʼ, kéyah Bountiful dóó Ádahasdįįd kéyah bitaʼ ádeesdzogi.

24 Áádóó miil yázhí bilááhgóó dinéhígíí Nephi dineʼé daolyé, éí díí kéyahgi ahíikai. Áádóó Lachoneus kéyah shádiʼáahjigooígíí ahíídookahgo áyiilaa, háálá náhookǫsjigo kéyah éí hóyéeʼgo báhaʼoodzííʼ.

25 Áádóó bił hazʼą́ągi bidziilgo beʼanaaʼí yichʼįʼ hashtʼeʼádaʼdiilyaa; dóó kéyah tʼááłáʼígi ahíikai, tʼááłáʼí dah yinéełgo, áádóó Lachoneus saad yee haadzííʼ yę́ę yéédaasdzíidgo, bibąąhági ádaatʼéii tʼáá átʼé yaa ńdaʼooskan; dóó Bóhólníihii biDiyin God yichʼįʼ sodadoolzin áko éí beʼanaaʼí yił daʼahidoogą́ąłgo bikʼijįʼ deeznáago yisdábidooʼish.

26 Áádóó beʼanááʼí tʼáá íiyisíí yaa yínííł daniizį́į́ʼ. Áádóó Gidgiddoni yee ndadoobahígíí ałʼąą ádaatʼéego ádeidoolíiłgo áyiilaa, áko béésh ééʼ yee dabidziil doo, áádóó achʼą́ą́h naatʼáhí yee, dóó achʼąąh natʼáhí áłtsʼíísígíí, éí ádííniidígíí bikʼehgo.