1 Áádóó áko shooh, tʼáá ałtso Nephi dineʼé dahinánígíí bitahdóó Diyin yá yádaałtiʼí dadiyinii saad yee hadahaasdzíʼígíí deiyoosdląąd; háálá díí bohodoolníłígíí bił béédahózin.

2 Áádóó Christ níyáhígíí bohodoolníiłgo bił béédahózin, háálá ląʼí da bee daatʼínígíí baa dahóóneʼígíí biniinaa, diyin yá yádaałtiʼí bizaadígíí bikʼehgo; áko háálá tʼáá íídą́ą́ʼ ádahootʼįįdígíí biniinaa bił béédahózin tʼáá ałtso bee hadaʼiidzííʼ yę́ę baadahodoolzhish.

3 Éí bąą bąąhági ádaatʼéhę́ę, dóó aláahdi daalchʼį́į́dii yę́ę, dóó atsʼíís yee tsiʼnidaaskai yę́ę tʼáá ałtso nahjįʼ kódeiyiilaa, dóó Diyin God tʼáá ákwíí jį́ dóó tʼáá ákwíí jį́ tłʼééʼ yéego yá nidaalnish ńtʼę́ę́ʼ.

4 Áádóó áko baa hoolzhiizh tʼáá átʼé daʼniʼįįhii yahadeiyiiznilgo, tʼáadoo atídaalyaaígíí tʼáadoo łaʼ bitsʼą́ą́ chʼíheezhjééʼ da, dóó deistsxił yę́ę yah adeiyiiznil, dóó Diyin God bizaad yee ndeineeztą́ą́ʼ; dóó bibąąhági ádaatʼéii yaa ńdaʼoskanígíí dóó doo nináádadiiltsxił da daaníigo yee ahadaʼdeestʼą́ éí chʼéédabiʼdooʼnil.

5 Ákondi tʼáadoo ahaʼditʼaah ádeiyiilaaígíí, dóó tʼahdii bijéí biyiʼdi ndaʼdoołtsxiłgo yee ndahasʼánígíí, aooʼ, tʼahdii bikʼéí yikʼijįʼ hadahadziihígíí bándahwiistʼą́ dóó bee hazʼáanii bikʼehgo atídaalyaa.

6 Áádóó kótʼáo tʼáá átʼé bąąhági átʼéii, dóó ndanitʼinígíí, dóó aláahdi woolchʼíídgo dahʼooldahígíí niʼ kódeiyiilaa, éí bitsʼą́ą́dóó tʼóó ahayóí bąąhági átʼéii baanidaʼasdeeʼ, dóó ląʼí da naʼatseed ádaalyaa.

7 Áádóó áko naadiin naakiígíí ałtso nááhai, dóó naadiin tááʼ ałdóʼ, dóó naadiin dį́į́ʼ, dóó naadiin ashdlaʼ; áádóó naadiin ashdlaʼ ałtso nááhai.

8 Áádóó ląʼí ádahóótʼįįd, łaʼda, ayóó ádaatʼéii dóó beedaʼayóí; ákondi, tʼáá átʼé díí naaltsoos dóó biiʼ ndahidoodzoh da; aooʼ, díí naaltsoos ndi neeznádiin bídééltsʼiʼgóó naadiin ashdlaʼ nááhai bíighahgo dineʼé bitahgóó ádahóótʼįįdígíí doo biiʼ siláa da;

9 Ákondi shooh łaʼ ndaʼíísdzoh díí dineʼé bitah ádahóótʼįįdígíí tʼáá átʼé biiʼ silá; dóó tʼááʼałchʼį́dígo ákondi tʼáá aanii haneʼ éí Nephi náyízoh.

10 Éí bąą Nephi naʼíízooʼígíí bikʼehgo shí díí náházoh, éí béésh tʼą́hí bikááʼ náházoh éí Nephi bibéésh tʼą́hí wolyé.

11 Áádóó áko shooh, béésh tʼą́hí bikááʼ néhézooígíí tʼáá shí shílaʼ bee íishłaa.

12 Áádóó áko shooh, Mormon yinishyé, kéyah Mormon bitsʼą́ą́dóó shiʼdééjiʼ, éí kéyah biyiʼ Alma bidineʼé bitahgóó sodizin hayiyííłwod, aooʼ, éí sodizin áłtsé bitah niitʼą́ éí nidaʼiisdzííʼ yiiʼhaakaidóó.

13 Áko shooh, Jesus Christ yikééʼ sizíinii nishłį́, éí Diyin God yiYeʼ nilį́. Éí shikʼidiilniiʼ áko bidineʼé bizaad bee nabidínééshtįįł biniyé, áko hoolʼáágóó iiná bee dahólǫ́ǫ dooleeł.

14 Áádóó áko yáʼátʼéehii dooleeł, Diyin God iinízinígíí bikʼehgo, ánídahaaskaiʼígíí bisodizin, éí dahodísinii danilį́, bedaʼoodląʼígíí bikʼehgo bidahodoolnííł, éí ádahoodzaaʼígíí náhídóodzoh—

15 Aooʼ, éí ałtsʼíísígo ndaʼíísdzoh Lehi Jerusalemdę́ę́ʼ dahdiináyę́ędą́ą́ʼ ádahoodzaa, éí díí kojįʼ ahoolzhiizhjį́ ndi.

16 Éí bąą ńdaʼiidzoh yę́ę bitsʼą́ą́dóó baa náʼíísóóh éí ałkʼidą́ą́ʼ ánídaheeskaiyę́ę nídeiyízoh, éí kʼad shił hoolzhishgo shíyoołkáałjįʼ;

17 Áádóó tʼáá shí shinááʼ bee yiiłtsʼánígíí baa naʼiizoh.

18 Áádóó baa naʼiizohígíí éí tʼáá ákotʼé dóó tʼáá aaníigo naʼiisdzoh; ákótʼée ndi ląʼí, nihizaad doo bíneilʼánígíí biniinaa tʼáadoo ńdahísíidzoh da.

19 Áádóó áko tʼáá díí tʼéiyá bee hadeesdzih nisin, éí tʼáá shí shahaneʼ, áádóó ádahoodzaaʼígíí baa náʼiisézoh.

20 Mormon áshtʼį́, Lehi tʼáá aaníí bitsʼą́ą́dę́ę́ʼ yishááł. ShiDiyin God dóó shiYisdáʼiiníiłii Jesus Christ biniyé baa hashniihígíí hólǫ́, Jerusalem kéyahdę́ę́ʼ shizází yę́ę chʼííníʼeezh, (dóó doo bił bééhóziní da tʼáá bí tʼéiyá dóó kéyahdę́ę́ʼ chʼííníʼeezhígíí ałdóʼ) áádóó áko shí dóó shidineʼé nihiiʼ sizíinii yisdádootʼishígíí ląʼí da yee nanihineeztʼą́ągo nihichʼįʼ kóyiilaa.

21 Jacob yił háájéʼígíí tʼáá aaníigo yikʼijisdliʼ, áádóó Joseph baʼáłchíní yaa joobaʼ ńtʼę́ę́ʼ.

22 Áádóó Lehi baʼáłchíní bibee hazʼáanii yikʼeh dahółʼį́įgo yikʼihojisdliʼ dóó náás deeskai bizaadígíí bikʼehgo.

23 Aooʼ, dóó tʼáá aaníigo Joseph baʼáłchíní chʼéédziʼígíí Bóhólníihii biDiyin God yééndahodoosįįłgo ánéídoodlííł.

24 Áádóó tʼáá aaníigo Diyin Bóhólníihii hináago, daʼ dį́į́ʼ adahodeesʼáádę́ę́ʼ Jacob baʼáłchíní chʼéédziʼígíí ahaninéídiyooʼish, éí nahasdzáán bikááʼgóó daʼníłtsʼą́ąjigo ałtsʼádabidiʼnoolkaad.

25 Áádóó tʼáá ałtso Jacob bighandóóígíí yił ahadaʼdeestʼą́, Jacob bighandóóígíí yił ahadaʼdeestʼánígíí baa hoolzhiizhgo yee ahadaʼdeestʼánígíí ałtso bohodoolnííł, tʼáá ałtso Jacob bighandóóígíí háídidoodlííł yee yił ahadaʼdeestʼánée béndahodoodzįįł háálá éí yee yił ahadaʼdeestʼą́.

26 Áádóó índa báNináʼnídláii bił béédahodoozįįł, éí Jesus Christ átʼį́, Diyin God biYeʼ; áádóó índa dį́į́ʼ adahodeesʼáádę́ę́ʼ ałhąʼándoolnííł bikédaayahjįʼ, ałtsʼá dahineeskaadyę́ęjįʼ, Diyin Bóhólníihii hináago díí ádahodoonííł. Amen.