1 Áádóó baa hoolzhiizh Jesus naakitsʼáadahgo hastóí náyiizláʼą́ą ndaakaigo deidiiztsʼą́ʼą́ą́ʼ dóó dayiiłtsánée yíndaʼniłtin, dóó Jesus bízhiʼ binahjįʼ tó yee daʼiisį́į́ʼ áádóó naakitsʼáadahii tʼááłaʼ yéego sodadilzin dóó chʼiyáán ádąąh deitʼį́įgo áłah daazlį́į́ʼ.

2 Áádóó Jesus yichʼįʼ ííshjání ánááʼdiilyaa, háálá éí bízhiʼ binahjįʼ Diyin aZheʼe nilíinii yichʼįʼ sodadilzin; dóó baa níyá dóó yiníiʼgi yiizįʼ, dóó iiłní: Haʼátʼíísh nihaa nishłé?

3 Áádóó ádeiłní: Diyin Bóhólníihii, díí sodizin biiʼ áłah néídleehígíí bízhiʼ bee wójíi dooleełígíí bee nihił hólneʼ; háálá díí éí biniinaa diné yee ałghadaʼditʼááh.

4 Áádóó Diyin Bóhólníihii ábiłní: Tʼáá aaníí, tʼáá aaníigo, Nihichʼįʼ haasdziih, haʼátʼíísh éí biniyé diné saad yee ałkʼijįʼ danilį́ dóó ahídeitʼááh?

5 Diyin bizaad bee akʼedaʼashchínígíísh doo deínóhłtaʼ da, shą́ą́ʼ éí ání Christ bízhiʼ ákʼidadidoohtʼááł, éí éí shí shízhiʼ? Háálá díí ázhiʼ éí akéeʼdi yoołkáłígíí biyiʼ bee danihiʼdójíi dooleeł;

6 Áádóó tʼáá háíshį́į́ shízhiʼ ákʼiidiitʼą́ągo, dóó nihoníyáajįʼ yáʼátʼéehgo iinánígíí yidiilkaalgo, éí akéeʼdi yoołkáłígíí biyiʼ yisdádoogááł.

7 Éí bąą, tʼáá haʼátʼííshį́į́ óhłéhígíí, éí shízhiʼ binahjįʼ ádoohłííł; éí bąą díí sodizin binahjįʼ áłah néídleehígíí éí shízhiʼ bee yídóohshiił; dóó shízhiʼ binahjįʼ Diyin aZhéʼé nilíinii bichʼįʼ sodadidoołzįįł áko sodizin shinahjįʼ yikʼijidoodliił.

8 Áádóó haash yitʼáo éí shí shisodizin dooleeł tʼáá hazhóʼó shízhiʼ bee wójíigo tʼéiyá? Háálá sodizin Moses bízhiʼ bee wójíigo éí Moses bisodizin dooleeł; éí doodago sodizin diné bízhiʼ bee wójíigo éí diné bisodizin dooleeł, ndi díí sodizin shízhiʼ bee wójíigo éí shí shisodizin átʼé, shinahatʼá bee yisdáʼiildéehii biyiʼ siláago tʼéiyá.

9 Tʼáá aaníigo Nihichʼįʼ haasdziih, shinahatʼá bee yisdáʼiildéehii bee nisoozį́įgo; éí bąą tʼáá haʼátʼííshį́į́ óhłéhígíí, shízhiʼ binahjįʼ ółʼį́į dooleeł; éí bąą díí sodizin bá, shízhiʼ binahjįʼgo Diyin aZhéʼé nilíinii bichʼįʼ sodoołzingo, Diyin aZhéʼé nilíinii éí nihididootsʼį́į́ł;

10 Áádóó ákogo éiyá díí sodizin éí shinahatʼá bee yisdáʼiildéehii bee hadilyaago índa Diyin aZhéʼé nilíinii biyiʼjįʼ binaanish ííshjání íidoolííł.

11 Ákondi shinahatʼá bee yisdáʼiildéehii doo bee hadilyaagóó, dóó diné binaʼanish bee ályaago, éí doodago biʼiiníziinii binaanish bee ályaago, tʼáá aaníigo Nihichʼįʼ haasdziih éí tʼóó hónízahjįʼ hoł dahózhǫ́ǫ dooleeł, dóó náásgóó bił nihodootʼih, áádóó éí naaʼahidookał dóó kǫʼ biih hidooltłʼił, áádę́ę́ʼ doo nináʼiildéeh da.

12 Háálá binaanish ádayiilaaii éí tʼáá bił dahólǫ́, háálá binaanish ádayiilaaii biniinaa naaʼahidookał; éí bąą bee nihił hweeshniʼée béédaohłniih.

13 Áko shooh shinahatʼá bee yisdáʼiildéehii nihichʼįʼ kwíishłaa, dóó díí éí shinahatʼá bee yisdáʼiildéehii nihichʼįʼ kwíishłaaígíí átʼé—Diyin shiZhéʼé nilíinii bíniʼ beʼeshłéehgo biniyé nahasdzáán bikáaʼgi níyá, Diyin shiZhéʼé nilíinii shiníłʼaʼígíí biniinaa.

14 Áádóó tsin ałnáozʼá bikʼijįʼ dah shidiilʼtį́ éí ádeeshlííł biniyé Diyin shiZhéʼé nilíinii shiníłʼaʼ, áádóó tsin ałnáozʼá bikʼijįʼ dah shidiilʼtį́įgo, áko tʼáá ałtso diné shikééʼ dahdidookah, áko diné dah dashidiiłtínígiʼ átʼáo Diyin aZhéʼé nilíinii éí diné yá nahwiidooʼááł, áádóó shidááhdóó deidoozįįł, binaanish ádayiilaayę́ę binahjįʼ bá ndahwidiyeeshʼááł, yáʼátʼéeh doodaiiʼ doo yáʼátʼééhgóó—

15 Áádóó díí éí biniyé dashiʼdiiltį́; éí bąą, Diyin aZhéʼé nilíinii bibee adziilígíí binahjįʼ diné tʼáá ałtso shikééʼ dahdidookah, áko naanish ádayiilaayę́ę bikʼehgo bá ndahodiyootʼááł.

16 Áádóó baa hodoolzhish, tʼáá háída ádaanáʼooskango dóó shízhiʼ binahjįʼ tó bee biʼdoolzį́ʼígíí éí Iiʼ Sizį́ Diyinii bił hólǫ́ǫ dooleeł; dóó nahasdzáán bikááʼ bá nihootʼą́ąjįʼ yéego átʼį́įgo iiná hazhóʼó áyiilaago; áko shooh, nihokááʼ dineʼé bá ndahwiistʼą́ąjįʼ ahoolzhiizhgo éí díí diné Diyin shiZhéʼé nilíinii bidááhdóó nizhónígo iiná áyiilaago bá hadeesdzih.

17 Áádóó tʼáá háíshį́į́ nahasdzáán bikááʼ bá nihootʼą́ąjįʼ doo yíníłdzilgóó, éí ałdóʼ naaʼahidoolkał dóó kǫʼ biih hidooltłʼił, áádę́ę́ʼ doo nináʼiildééh da, Diyin aZhéʼé nilíinii tʼáá ákogiʼ átʼáo bibee ánihwiitʼaahii biniinaa.

18 Áádóó díí éí saad bílaʼ ashdlaʼii baʼáłchíní yee neineeztą́ą́ʼ. Áádóó díí biniinaa saad yee yichʼįʼ haadzíʼę́ę yeʼiilaa, áko doo biyoochʼííd da, ndi bizaad yee hahadziihii ałtso yeʼdoolííł.

19 Áádóó tʼáá haʼátʼííshį́į́ chin bąąh shį́į́ éí bił hazʼą́ą góneʼ doo yah adoogááł daʼ; éí bąą tsʼídá shidił bee habąąhági átʼéii ádąąh táájízgizgo tʼéiyá bihanáʼáyį́į́h góneʼ yah ázhdoogááł, háálá beʼoodląʼígíí, dóó bibąąhági ádaatʼéii tʼáá ałtso yaa ńdaʼoozkanígíí, dóó nihokááʼ bá ndahwiistʼą́ bijį́įjįʼ sodizin deidohsinígíí biniinaa.

20 Áko díí éí bee hazʼáanii átʼé: Nahasdzáán ndaneezʼáajįʼ kéédahohtʼíinii, ádaańdaʼoohkąąh, dóó shaa hohkááh dóó shízhiʼ binahjįʼ tó bee danihiʼdiilzį́į́h, áko Iiʼ Sizį́ Diyinii hadanołtʼéego ánihiidoolííł, áko ánihwiitʼaah bijį́įdi doo nihąąh chingóó shidááhdóó nihidoohkah.

21 Tʼáá aaníí, tʼáá aaníigo, nihichʼįʼ haasdziih, díí éí shinahatʼá bee yisdáʼiildéehii átʼé; áko díí shisodizin biyiʼ ádoohłíłígíí éí nihił bééhózin; háálá nihinááł shinaanish íishłaaígíí éí nihinaanish ádeínóhsin; dashinółʼį́įʼgo íishłaaígíí éí ádadoohłííł;

22 Éí bąą, díí óohłaago nihikʼihojídlíi dooleeł, háálá nihoníyá bijį́įdi éí yisdánihidoonił.

23 Díí daʼoołtsánígíí dóó dasidootsʼą́ʼígíí bikʼedaʼoołchí, tʼáá hazhóʼó dooda nihiʼdooʼniidę́ę tʼéiyá dooda.

24 Díí diné binaanish ádeidoolíłígíí, bikʼedaʼdoołchííł, ałkʼidą́ą́ʼ ádáádzaahą́ą, ádayiilaa yę́ęgi átʼáo.

25 Háálá áko shooh, díí haneʼ hádadoolaaígíí, dóó ánáádadooníłígíí biyiʼdóó, diné bá ndahwidiyootʼááł, háálá díí náádaháasdzooígíí binahjįʼ binaanish ádayiilaaígíí diné bił bééhózin dooleeł.

26 Áádóó áko shooh, tsʼídá tʼáá ałtsoní Diyin aZhéʼé nilíinii néíyiizóóh; éí bąą díí haneʼ nááhádzoohígíí biyiʼdóó nihokááʼ dineʼé bá ndahidiyootʼááł.

27 Áádóó nihíł béédahózingo díí diné biʼándahwiiʼaahii danóhłį́į doo, éí bikʼehgo ánahwiitʼaah nihaa deeshłééł, éí tʼáá ákógiʼ átʼée doo. Éí bąą, dinéshąʼ haitʼéhígíí nohłį́į doo? Tʼáá aaníí nihichʼįʼ haasdziih, áníshtʼéhígíí ánóhtʼée doo.

28 Áádóó kʼad éí Diyin aZhéʼé nilíinii bichʼįʼ ńdésdzá. Tʼáá aaníí, tʼáá aaníigo nihichʼįʼ haasdziih, Dóó tʼáá aaníigo ánihidishní, tʼáá haʼátʼííshį́į́ shízhiʼ binahjįʼ Diyin shiZhéʼé nilíinii bíínóhkeedígíí nihaidoolééł.

29 Éí bąą, bíʼdíínóhkeed, dóó nihaa doolyééł; dáádílkał nanóhłtsʼin, dóó nihichʼįʼ ąą ádoolnííł; háálá tʼáá háiida adókeedígíí, éí baʼdoolyééł, dóó dáádílkał neiniłtsʼinígíí, éí bá ąą ádoolnííł.

30 Áádóó áko, shooh, tsʼídá yéego éiyá, nihaa shił hózhǫ́, nihiniinaa, dóó ałdóʼ kweʼé nooséłígíí; aooʼ, azhą́ Diyin nihiZhéʼé nilíinii ndi nihaa bił hózhǫ́, dóó Diyin yá ndaalʼaʼí dadiyinii ałdóʼ nihaa bił dahózhǫ́, háálá nihiniinaa dóó kweʼé nooséłígíí; háálá éí doo łaʼ yóó ííyáhígíí biniinaa.

31 Áko shooh, díí shá bikʼidadiʼdoohtį́į́ł; háálá ááłdishní kʼad kweʼé hoolzhishgo hinánígíí; dóó éí doo łaʼ yóó ííyáa da; dóó éí ił hózhǫ́ tʼáá ałtso binahjįʼ shiiʼ hólǫ́.

32 Ákondi shooh, kodóó dį́įʼdi są́ náʼoogą́ą́ʼ góneʼ nooséłígíí éí tsʼídá yéego baa yínííł nisin, háálá chʼį́įdii biʼiiníziinii dabisnáahgo yikééʼ dah diikai yóóʼ adootʼáanii biyeʼ nahalingo; háálá béésh łigaii dóó béésh óola yee ndashiiłniih doo, áádóó chʼosh ałchozhii ńdayigháashii dóó daʼniʼįįhii yił yah adahaʼnééh dóó deiniʼįįh éí yee ninadashídeezʼą́. Áádóó áadi yoołkáałgo éí baa deeshááł, índa binaanish ádayiilaaii éí tʼáá bí bikʼijįʼ áńdadeeshdlííł.

33 Áádóó baa hoolzhiizh díí Jesus ałtso yee haadzíiʼgo naakitsʼáadahí kóníigo yichʼįʼ hanáánáádzííʼ: Áhoołtsʼóózígo yah aʼatiindę́ę́ʼ yah ahohkááh; háálá iiná doo ninítʼiʼii éí áłtsʼóózígo bił yah ahóótʼiʼ, doo áhoołtsʼóózígo bichʼįʼ atiin, dóó tʼáá díkwíhígo tʼéiyá yikʼi hakááh, ndi hoolʼáágóó anoonééł éí hóteelgo yah aʼatiin, dóó hóteelgo bichʼįʼ atiin, dóó tʼóó ahayóí éí yikááʼ yikah, tłʼééʼ hodooleeł, biyiʼjįʼ éí doo łaʼ diné naanish íidoolíił da.