1 Áádóó kʼad díí Jesus ałtso yaa nahasneʼgo tsʼídá nizhónígo áháʼnínígíí átʼéii diné áłah jílínée yee neineeztʼą́ą́ʼ; tsʼídá ałtso dantsaa dóó ádaałtsʼísíjįʼ ałtso nizhónígo yee neineeztʼą́ą́ʼ.

2 Áádóó ání: Díí Diyin bizaad bee akʼedaʼashchínígíí, doo nihee dahólónée, Diyin aZhéʼé nilíinii éí bee bił hodíílnih shidííniid; háálá éí bił bééhózinígíí biniinaa náásgóó oochíłígíí baa doolyééł dííniid.

3 Áádóó tsʼídá tʼáá ałtsoní, hodeeyáádą́ą́ʼ ádahoodzaahą́ą dóó ńléí ayóó átʼéii nilį́įgo doogáałjįʼ, nizhónígo yaa nahasneʼ—aooʼ, tsʼídá ałtso nahadzáán bikááʼgóó ádahodooníłígíí yaa nahasneʼ, ńléí nahasdzáán bee hadilyaaígíí ałtso doo chohooʼį́į́góó honiigaiigo ałtso dadidoołhįh ndi, dóó nahasdzáán éí naaltsoos nahalingo doodis, dóó yádiłhił dóó nahasdzáán éí ádin dooleeł;

4 Áádóó ayóó átʼéego ándahwiitʼaah bijį́įgi ndi, diné tʼáá ałtsogo, dóó ałʼąą dóoneʼé, dóó bił nahazʼą́ągo dóó ałʼąą dabizaadii tsʼídá ałtso Diyin God yidááhdóó deidoozįįłgo, binaanish ádayiilaa yę́ę binahjįʼ bá ndahwidiyootʼááł, yáʼátʼéehgo da daatsʼí éí doodago doo yáʼátʼééhgóó daatsʼí beʼiinaʼ ádayiilaa yę́ę—

5 Nizhónígo beʼiinaʼ ádayiilaaígíí, éí hoolʼáágóó iiná yee náádahidooʼnaał; dóó doo yáʼáshǫ́ǫ́góó dahináanii, éí tiʼdahoonííhgo bá nidahodootʼááł; ahąąh nítʼiʼ nahalin, łaʼ kojí nishʼnáájí dóó náánáłaʼ éí ńléí nishtłʼají, díí éí Christ, nahasdzáán tʼah doo álnééhyę́ędą́ą́ʼ hináanii, ajoobaʼ, dóó tʼáá ákótʼéhígíí dóó hodiyingo biiʼ hólóonii bikʼehgo.

6 Áádóó áko díí haneʼ hadilyaaígíí éí biyiʼ áłchʼį́į́dígo ndi Jesus tʼáá aaníí yínaʼneestą́ʼą́ą bikááʼ álnéehgo doo bíighah da;

7 Ákondi shooh Nephi bibéésh tʼą́hí bikáaʼjįʼ éí tsʼídá ląʼída yínaʼneestą́ʼą́ą bikááʼ.

8 Áádóó díí éí shí íishłaa, éí áłchʼį́į́dígo tʼéiyá diné yee neineeztą́ʼą́ą átʼé; dóó díí íishłaaígíí áko náasdi díí diné, Gentile dineʼé bitsʼą́ą́dę́ę́ʼ, bitah ndootʼááł biniyé, Jesus bizaad yee yáłtiʼę́ę bikʼehgo.

9 Áádóó díí ńdeidiiláago, éí tsʼídá áłtsé bílákʼedoolyééł beʼoodląʼ bee bíhodínóotah, dóó díí dayoosdląądgo índa hózhǫ́ haneʼ dabidziilii bił ííshjání ádoolnííł.

10 Áádóó díí doo dayoosdląądgóó, éí bíniʼ hózhǫ́ dabidziilii doo bichʼįʼ kódoolníił da, éí bikʼehgo doo bidiʼnóodzįįł da.

11 Áko shooh, tsʼídá kʼad, Nephi bibéésh tʼą́hí bikáʼígíí haneʼ dabidziilii sinilígíí bikááʼ, ábiʼniishłaago, ndi Diyin Bóhólníihii éí dooda ní, kóníigo: Shidineʼé beʼoodląʼ bídínéeshtah.

12 Éí bąą shí, Mormon, éí Diyin Bóhólníihii bikááʼ ádíílííł shiłnínígíí tʼéiyá bikááʼ íishłaa. Áádóó kʼad éí shí, Mormon shizaadígíí tʼáá ákódí dooleeł, doo kʼad éí bikááʼ nááhidíidzoh shiʼdooʼniidę́ę éí náhásóóh dooleeł.

13 Éí bąą, díí éí nihił bééhózin doo laanaa nisin Diyin Bóhólníihii tʼáá aaníí diné neinitingo, tágí jį́ azlį́į́ʼ; dóó bikʼijįʼ yichʼįʼ ííshjání áʼdiilyaa doo éí tʼáá ahą́ą́h yaa nádááh ńtʼę́ę́ʼ, dóó tʼáá ahą́ą́h bááh ninayitih, dóó yá sońdílzįįh, dóó hatah neikaah ńtʼę́ę́ʼ.

14 Áádóó baa hoolzhiizh diné áłah jílínée há haadzíʼę́ę hadaʼáłchíní neidíníitą́ą́ʼ dóó yíká aheeswod, dóó áłchíní bitsooʼ bee hadoodzih bíighahgo áyiilaa, dóó bishchíinii ayóó átʼéii dóó ayóó ádahooshónígíí yee yichʼįʼ yádaałtiʼ, azhą́ diné yił ííshjání ayiilaaʼą́ą ndi yiláahgo yaa dahoolneʼ; áko bitsooʼ yee hadadoodzihgo áyiilaa.

15 Áádóó baa hoolzhiizh naakidi yáʼąąshgóde ánáádzáádóó bikʼijįʼ—hachʼįʼ ííshjání áʼdiilyaa, dóó Diyin aZhéʼé nilíinii yichʼįʼ anáádzá, tʼáá ałtso bitah dahoneezgaiyę́ę hadaałtʼéego ányiidlaa, dóó ndanitłʼahyę́ę, dóó doo daʼooʼínée dadeezghal dóó bijédaakałę́ę ńdaʼdiiztsʼą́ą́ʼ, dóó tsʼídá ałtso bąąh dah hazʼáanii hadaałtʼéego ánáyiidlaa ndi, dóó diné łaʼ ádinée nínéidiisą́, dóó beʼadziil ííshjání áyiilaa, dóó Diyin aZhéʼé nilíinii yichʼįʼ deigo dah nahodiidleʼ—

16 Áko shooh, áádóó baa hoolzhiizh biiskání diné ałtso áłah náánásdlį́į́ʼ, dóó áłchíní yázhí yádaałtiʼgo dajiiłtsą́ dóó dazhdiiztsʼą́ą́ʼ; aooʼ, azhą́ awééchʼíʼí ndi bizééʼ ąą ádayiilaa dóó nizhónígo hadahaasdzííʼ; dóó yaa yádaałtiʼígíí éí doo nááhídóodzoh da hodooʼniid.

17 Áádóó baa hoolzhiizh naakitsʼáadah Jesus hastóí náyiizláʼą́ą tó yee daʼasį́įhgo hahoolzhiizh dóó haashį́į́ néelą́ą́ʼ diné baa dahakáhígíí ndeinitin; dóó haashį́į́ néelą́ą́ʼ Jesus bízhiʼ binahjįʼ tó bee dabiʼdoolzį́ʼígíí éí Iiʼ Sizį́ Diyinii bił hólǫ́ daazlį́į́ʼ.

18 Áádóó tʼóó ahayóí diné éí doo bee hajidziih ádaatʼéii dayiiłtsą́ dóó deidiiztsʼą́ą́ʼ, díí éí nááhídóodzohígíí doo bee bá hazʼą́ą da.

19 Áádóó ndaʼnitin, dóó tʼáá bí ndaʼahinitin; dóó tʼáá ałtsoní aheełtʼéego áłká ańdaajah, tʼáá ałtso diné tʼáá ákogi átʼéego, ahił ndaalnish.

20 Áádóó baa hoolzhiizh Jesus yee bichʼįʼ haadzíʼę́ę tʼáá ałtso yidaʼiilaa.

21 Áádóó Jesus bízhiʼ binahjįʼ tó bee dabiʼdoolzį́ʼę́ę éí Christ bisodizin daʼatahgo bee dabiʼdééjiʼ.