1 Áko baa hoolzhiizh éí náhástʼédiin dóó biʼaan tʼááłáʼí ałtso nááhai dóó Lehi éí hastą́ądi neeznádiin nááhaiyę́ędą́ą́ʼʼ Jerusalemdę́ę́ʼ chʼíníná; dóó ákweʼé yihahgo éí Lachoneus aláahdi anahwiiʼaahii dóó kéyah yikʼi naatʼáanii nilį́į́ ńtʼę́ę́ʼ.

2 Áádóó Nephi, Helaman biyeʼ nilíinii, Zarahemla bikéyah yiyiʼdóó dah diiyá, béésh łitsoii tʼą́hí, biyeʼ Nephi yaa ahályą́ą doogo yéidiniʼą́, éí biyeʼ alą́ąjįʼ naaghá, dóó tʼáá ałtso dahaneʼ ndaajaahą́ą, dóó Lehi Jerusalemdóó dah diináádą́ą́ʼ hodilzingo ndeijaah yę́ę ałdóʼ yeiníjaaʼ.

3 Áádóó kéyah yiyiʼdóó dah diiyá, dóó ííyáajigo, doo bił bééhóziní da; dóó haneʼ neijaah yę́ę biyeʼ Nephi akʼiidiitʼą́, aooʼ, éí bidineʼé baa haneʼ.

4 Áádóó baa hoolzhiizh náhástʼédiin biʼaan naaki náháah góneʼ, áko shooh, Diyin yá yádaałtiʼí náás yaa dahoolneʼę́ę áádóó yéego bedaʼalnéʼ silį́į́ʼ, háálá dineʼé bitahgóó ayóó átʼáo éédahózinii dóó álílee ádahoonííłgo bee hahoolzhiizh.

5 Ákondi łaʼ éiyá ádaaní Samuel, Laman dineʼé nilíinii, saad bohodoolnííł níigo yee haadzíʼę́ę bilááhgóó ahoolzhiizh.

6 Áádóó bikʼéí yaa bił dahózhǫ́, kódaaníigo: Áko shooh kʼad éí Samuel bizaad kóhodoonííł níigo yee haadzíʼę́ę, bilááhgóó ahoolzhiizh, dóó tʼáadoo beʼelyaa da, eíí bąą, nihił dahózhónígíí dóó díí deinohdlánígíí tʼáadoo biniyéhé da.

7 Áádóó baa hoolzhiizh tʼóó ahayóígo kéyah bikááʼgóó hahodíídláád; dóó daʼoodlánée, éí díí áhodoonííł hodooʼniidę́ę shąʼ tʼáadoo ádzaagóó daniizį́įʼgo, yaa yínííł daazlį́į́ʼ.

8 Ákondi shooh, Samuel bizaad dayoosdląądę́ę łaʼ ajį́ dóó łaʼ atłʼééʼ dóó łaʼ nááná jį́ tʼááłaʼajį́ dooleeł tłʼééʼ éí ádin haʼnínée tʼáá áłahjįʼ hádeidéezʼį́į́ʼ, háálá éí binahjįʼ bił béédahodoozįįł beʼóodląʼ éí doo tʼáadoo biniyéhé da ńtʼę́ę́ʼ.

9 Áko baa hoolzhiizh éí doo daʼóodląnígíí łaʼ ajį́ yee ndahazʼą́, ákóneʼ tʼáá ałkʼidą́ą́ʼ adaʼoolʼįįł deiyoodląnígíí ałtso ndooltsxíł, tʼáá hazhóʼó Samuel Diyin yá yáłtiʼí kóhodoonííł níigo, bee éédahózinii yee haadzíʼę́ę beʼelyaago tʼéiyá.

10 Áko baa hoolzhiizh Nephi, éí Nephi biyeʼ nilíinii, éí bidineʼé díí bąąhági ádaatʼinígíí yaa ákoniizį́įgo, tʼáá íiyisíí yaa yínííł silį́į́ʼ.

11 Áádóó baa hoolzhiizh dah diiyá dóó nahasdzáán yikáaʼjįʼ nitsidinígoʼ, dóó tsʼída yéego biDiyin God yichʼįʼ bidineʼé yá náʼooskan, aooʼ, ńléí bizhéʼé yę́ę beʼadaʼoołʼįįł dayoodlánígíí kʼadę́ę́ʼ ndabidiʼdiiltseedígíí biniinaa.

12 Áádóó baa hoolzhiizh tsʼída yéego Diyin Bóhólníihii yichʼįʼ sodilzingo łaʼ ajį́ azlį́į́ʼ; áádóó áko shooh, Diyin Bóhólníihii biinééʼ yidiiztsʼą́ą́ʼ, kóníigo:

13 Nitsiitsʼiin de ánílééh dóó nił hózhǫ́; háálá áko shooh, ádahodoonííł hodooʼniidę́ę baa hoolzhiizh, dóó díí tłʼééʼ éí bee éédahózinii ííshją́ą́ ádoolnííł, dóó yiskąągo éí nahasdzáán bikáaʼjįʼ nishááh, háálá nihokááʼ dineʼé bił ííshją́ą́ ádeeshłííł tʼáá ałtso Diyin yá yádaałtiʼii dadiyinii yee hadahaasdzíʼę́ę éí bohodeeshłííł.

14 Áko shooh, shí éí shidineʼé baa níyá, tsʼída ałtso hodeeyáádą́ą́ʼ nihokáá dineʼé baʼáłchíní bił ííshjání ádeishłaa yę́ę tʼáá ałtso bohodeeshłííł biniyé, dóó nihiTaaʼ nilíinii dóó aYeʼ nilíinii tʼáá áłah yinízinígíí bohodeeshłííł—shí shiniinaa nihiTaaʼ nilíinii binaanishígíí bohodeeshłííł dóó shitsʼíís hólónígíí biniinaa aYeʼ binaanishígíí ałdóʼ bohodeeshłííł. Áádóó áko shooh, beiníłką́, dóó díí tłʼééʼ éí bee éédahózinii ííshją́ą́ ádoolnííł.

15 Áádóó baa hoolzhiizh Nephi saad yidiiztsʼą́ʼą́ą beʼelyaa, tʼáá bee haʼoodzíʼę́ęgi átʼéego; háálá áko shooh, iʼííʼąągo tʼáadoo tłʼééʼ hazlį́įʼ da; dóó dineʼé tʼóó bił ádahóóyóí tłʼééʼjįʼ ayííłkąąhgo tʼáadoo chahóółhéłígíí biniinaa.

16 Áádóó tʼóó ahayóí dineʼé, Diyin yá yádaałtiʼii dabizaad doo dayoodlánée, nahasdzáán yikáaʼjįʼ naaʼaníídeeʼ daneezná nahalingo, háálá yéédaalniih Diyin yá yádaałtiʼii dabizaad dayoodlánée ndadiiltsxił daaníigo yidahodeezánée bitsʼą́ąʼ yíchxǫʼ; háálá bee ééhózinii ííshją́ą́ ádoolnííł haʼnínée éí baa hoolzhiizh.

17 Áádóó doo daʼoodlánée éí Diyin God biYeʼ hodíinaʼgo ííshjání ádiʼdidoolʼníłígíí yaa ákodaniizį́į́ʼ; aooʼ, diné tʼáá ałtso ndi eʼeʼaah doo haʼaʼaahjįʼ, náhookǫsjígo dóó shádiʼááhjígo kéédahatʼínígíí, tʼóó báhádzidgo yikʼee dadeesyizgo biniinaa nahasdzáán bikáaʼjįʼ naaʼahineezdeeʼ.

18 Háálá éí bił béédahózin Diyin yá yádaałtiʼí, áhodooníłígíí tʼááʼaanii yaa dahalneʼgo ląʼída nááhai, dóó bee ééhózinii baa hóóneʼę́ę éí tʼáá íídą́ą́ʼ baa hoolzhiizh; dóó ńdaasdzííd bąąhági átʼéii yaa naakai yę́ę dóó doo daʼoodlánée biniinaa.

19 Áádóó baa hoolzhiizh bitłʼééʼ tʼáadoo chahóółhéel da, ákotʼée ndi tʼóó ałníʼníʼąągo adinídínígi átʼéego adinídíín. Áádóó baa hoolzhiizh abínígo jóhonaaʼéí, tʼáá hanádáhági átʼéego, hanáánáádzá, áádóó éí bił béédahózin éí bijį́ éí Diyin Bóhólníihii bidiʼdoochíłígíí, háálá bee ééhózinígíí éí ííshją́ą́ ályaa.

20 Áádóó baa hoolzhiizh, aooʼ, tʼáá ałtsoní, kóníshéʼhé ndi, Diyin yá yádaałtiʼí dabizaadę́ę bedaʼalyaa.

21 Áádóó baa hoolzhiizh saad yę́ę bikʼehgo ałdóʼ, sǫʼ ániidí léiʼ hááyá.

22 Áádóó baa hoolzhiizh díí hoolzhishdóó Chʼį́įdii, diné bitahgóó yoochʼííd yiʼníłniiʼ, bijéí deidooltłʼis, áko díí bee ééhózinii dóó álílee naʼanish deiyiiłtsánée doo deidoodląął da biniyé; ndi azhą yoochʼííd dóó naʼadloʼ hólǫ́ǫ ndi tʼóó ahayóí diné daʼoosdląąd, dóó Diyin Bóhólníihii binahatʼá yikééʼ dahdiikai.

23 Áádóó baa hoolzhiizh Nephi, dóó ląʼída ałdóʼ, diné yitahgóó nikidiikai, ádaańdaʼooskanígíí tó yee deisį́įhgo, háálá tʼóó ahayóí bibąąhágiʼádáátʼįįdyę́ę bá yóóʼadahideestʼą́. Áádóó ákótʼáo diné kéédahatʼį́įgo bił nááhodeezyéél.

24 Áádóó doo saad ahétʼááh dahólǫ́ǫ da, tʼáá hazhóʼó tʼáá díkwíhígo dineʼé łaʼ ndaʼdíníítą́ą́ʼ, Diyin bizaad bee akʼedaʼashchínígíí binahjįʼ Moses bibee hazʼáanii beeʼóólzinée éí ninítʼiʼ daaníigo. Áko díí éí doo ákódaʼiilaa da, háálá tʼáadoo Diyin bizaad bee akʼedaʼashchínígíí yikʼidaʼdiitą́ą da.

25 Ákondi baa hoolzhiizh éí doo ákótʼéégóó dahalneʼę́ę hazhóʼó ninádabiʼdiʼneestą́ą́ʼgo yaa ákodaniizį́į́ʼ, dóó íhidiikai, háálá bee hazʼáanii tʼáhdoo ałtso beʼelnéeh da bééhoozingo ályaa, dóó tsʼída ałtso ndaaztʼiʼjįʼ beʼdoolnííł biʼdooʼniid; aooʼ, saad díí beʼdoolnííł bidííniid; aooʼ, tsʼída ndaaztʼiʼjįʼ dóó ndaneesʼąąjįʼ ałtso beʼdoolnííł doo éí bił yóó ahodoogáał da; eíí bąą díí yihahígíí biyiʼ éí doo ákódaʼiilaa yę́ę bił ííshją́ą́ ádaalyaa dóó yee ádaa dahoolneʼ.

26 Áádóó ákótʼéego náhástʼédiin dóó biʼaan naaki ałtso nááhai, ádaahootįįdígíí bee béédahoozinígíí biniinaa diné haneʼ yáʼátʼéehii bee bił dahooneʼ, tʼáá ałtso Diyin yá yádaałtiʼii dadiyinii Diyin bikʼehgo áhodoonííł yee hadahásdziiʼę́ę bikʼehgo.

27 Áádóó baa hoolzhiizh náhástʼédiin dóó biʼaan tááʼ éí ałdóʼ ahodeezyeelgo ałtso nínáánááhai, tʼáá hazhóʼó Gadianton bidaʼniʼįįhii, dziłyiʼgóó kéédahatʼínígíí tʼéiyá diné yitahgóó dááląąd, tsʼída ndahonitłʼahgóó ńdanitʼingo kéédahatʼį́įgo biniinaa chʼééh bikʼeh daazhdidleeh; éí bąą dineʼé ndeistseed, dóó tʼóó ahayóí dineʼé dayííghą́ą́ʼ.

28 Áádóó baa hoolzhiizh náhástʼédiin dóó biʼaan dį́į́ʼ yihah biiʼ díí daʼniʼįįhii tʼóó ahayóí silį́į́ʼ, Nephi dineʼé yitsʼą́ą́jí daazlį́ʼígíí yiłʼahidiikaigo biniinaa, áko Nephi dineʼé ákǫ́ǫ́ kéédahatʼínígíí ayóó átʼáo yinííł yiihyikai.

29 Áádóó Laman dineʼé bitahgóó ałdóʼ yéego yínííł hazlį́į́ʼ; háálá áko shooh, tʼóó ahayóí haʼáłchíní dabídziilgo daneeyánígíí, tʼáá bí ádaa ntsídaakees daazlį́ʼígíí, éí Zoram dineʼé, yoochʼííd dóó łikango bá ndahaʼáago, Gadianton daʼniʼįįhii yihidiikai.

30 Áádóó ákótʼéego Laman dineʼé ałdóʼ yichʼįʼ dahodiisnááʼ, dóó beʼóodląʼ dóó yáʼátʼéehgo dahinánée yaa kódzaa, háálá ániid hanáánootʼánígíí bąąhági átʼéego deeskaigo biniinaa.