1 Áádóó baa hoolzhiizh tʼáá ałtso nihokááʼ dineʼé nahasdzáán bikááʼgóó bízhí deidiiztsʼą́ą́ʼ, tʼáá átʼé kédaayahgóó, hodiitsʼaʼgo kódííniid:

2 Yíí, yíí, yíí díí dineʼé bichʼįʼ; yíí tʼáá ałtso nahasdzáán bikááʼgóó nihokááʼ dineʼé bichʼįʼ tʼáá hazhóʼó ádaa ńdaʼooskango tʼéiyá; háálá biʼiisizíinii anádloh, dóó bá nidaalʼaʼí bił dahózhǫ́, háálá nihokááʼ dineʼé biyeʼké dóó bitsiʼké danizhóníyééʼ nidaaztseed; áádóó bąąhági átʼéii dóó tʼáá íiyisíí dajoodláhígíí yaa nidaakaiígíí biniinaa ádabiʼdisdįįd!

3 Áko shooh, Zarahemla kin dashijaaʼ ayóó átʼéii kǫʼ beeʼadííłkʼą́ą́ʼ, yiiʼkéédahatʼínígíí ałdóʼ.

4 Áádóó áko shooh, Moroni kin dashijaaʼ ayóó átʼéii tónteel ditą́ądi bił diiłkǫʼ, dóó yiiʼ kéédahatʼínée tó bee áséłdįįd.

5 Áádóó áko shooh, Moronihah kin dashijaaʼ ayóó átʼéii łeezh bił diilkǫʼ, dóó yiiʼ kéédahatʼínée ałdóʼ, bibąąhági ádaatʼéii dóó tʼáá íiyisíí dajoodléii shidáahgi doo yideestsééł da biniyé, áko Diyin yá yádaałtiʼii dóó Diyin yá naazíinii nideistseed yę́ę bidił hojoobaʼgo daachago éí bikʼijįʼ naazláa doo.

6 Áádóó áko shooh, Gilgal kin dashijaaʼ łééh yíłdáázgo íishłaa, áádóó yiiʼ kéédahatʼínée nahasdzáán łeezh ditą́ągo bikʼííłdáázgo íishłaa;

7 Aooʼ, áádóó Onihah kin dashijaaʼ dóó yiiʼ kéédahatʼínée, dóó Mocum kin dashijaaʼ dóó yiiʼ kéédahatʼínée, dóó Jerusalem kin dashijaaʼ dóó yiiʼ kéédahatʼínée, dóó yiiʼ kéédahatʼínée, áádóó tónteel bikáaʼgi siyį́įgo íishłaa, bibąąhági ádaatʼéii dóó tʼáá íiyisíí dajoodléii shidáahgi doo yideestsééł da biniyé, áko Diyin yá yádaałtiʼii dóó Diyin yá naazíinii nideistseedyę́ę bidił hojoobaʼgo daachago éí bikʼijįʼ naazláa doo.

8 Áádóó áko shooh, Gadiandi kin dashijaaʼ, dóó Gadiomnah kin dashijaaʼ, dóó Jacob kin dashijaaʼ, dóó Gimgimno kin dashijaaʼ, díí tʼáá átʼé łeeh daheesdáázgo íishłaa, dah daaskʼid dóó dadzígai bikʼi íishłaa; áádóó yiiʼ kéédahatʼínée nahasdzáán łeezh ditą́ągo bikʼiiłdáázgo íishłaa, bibąąhági ádaatʼéii dóó tʼáá íiyisíí dajoodléii shidáahgi doo yideestsééł da biniyé, áko Diyin yá yádaałtiʼii dóó Diyin yá naazíinii nideistseedyę́ę bidił hojoobaʼgo daachago éí bikʼijįʼ naazláa doo.

9 Áádóó áko shooh, Jacobugath ayóó átʼéii kin dashiijaaʼ, éí aláahdi naatʼáanii Jacob bidineʼé yiiʼ kéédahatʼį́į́ ńtʼę́ę́ʼ, éí kǫʼ bee adííłkąąh háálá bibąąhági ádaatʼéii dóó doo biʼyáʼádaashóonii, éí nahasdzáán tʼáá átʼéé ńtʼééʼ biláahdi doo yáʼádaashǫǫ da ńtʼę́ę́ʼ, háálá ndanitʼingo ndaʼastseed dóó ndaʼahijaah; háálá bí éiyá dineʼé áhodiilzéeʼgo kéédahatʼínée deiyííłchǫʼ dóó kéyah yikʼi dahwééʼaahígíí ałdóʼ; éí bąą ahodííłkʼą́ą́ʼ, shidááhdóó áhóséłdįįd, áko Diyin yá yádaałtiʼii dóó Diyin yá naazíinii nideistseedyę́ę bidił hojoobaʼgo daachago éí bikʼijįʼ naazláa doo.

10 Áádóó áko shooh, Laman kin dashijaaʼ, dóó Josh kin dashijaaʼ, dóó Gad kin dashijaaʼ, dóó Kishkumen kin dashijaaʼ, díí kǫʼ bee áséłdįįd, dóó yiiʼ kéédahatʼínée ałdóʼ, háálá doo yáʼádaashónígíí biniinaa Diyin yá yádaałtiʼí chʼídeineeschą́ą́ʼ, dóó tsé yee ńdeineesneʼ éí doo yáʼátʼéehii dóó tʼáá íiyisíí dajoodléii ádeiłʼínígíí yił chʼídeidooʼaał biniinaa bichʼįʼ ííłʼaʼ.

11 Áádóó tʼáá átʼé ałtso chʼídeineeschą́ą́ʼígíí biniinaa, ádin doo łaʼ bitahdóó diyinkʼehgo yigááł da, kǫʼ bichʼįʼ íishłaa dóó bee áséłdįįd, áko bibąąhági ádaatʼéii dóó tʼáá íiyisíí dajoodléii shidáahgi doo yideestsééł da biniyé, áko Diyin yá yádaałtiʼii dóó Diyin yá naazíinii bitahgóó ahííłʼaʼ yę́ę nideistseedgo niʼdę́ę́ʼ bidił hojoobaʼgo daachago éí bikʼijįʼ naazláa doo.

12 Áádóó kéyah bikááʼgóó ayóó átʼáo łą́ąhgo dahóółchxǫʼ, dóó díí dineʼé bitahgóó, háálá doo yáʼádaashóonii dóó tʼáá íiyisíí ádajoodléii ádeiłʼínígíí biniinaa.

13 O yisdáohkaiʼígíí háálá aláahgo diyinkʼehgo deínóhkááhígíí biniinaa, kʼadísh doo shichʼįʼ nináhóhkááh da, dóó nihibąąhági ádaatʼéii baa ádaa ńdaʼoohkąąh da, dóó shikééʼ ninoohkááh da, áko nánihideesdzih?

14 Aooʼ, tʼáá aaníigo Nihichʼįʼ haasdziih, shikééʼ ninooyáago hoolʼáágóó iiná nihaa doolyééł. Áko shooh, háálá sheʼajoobaʼ bee nihichʼįʼ dah dishnih, tʼáá háiida shikééʼ dahdiiyą́ągo, éí shił hólǫ́ǫ dooleeł, áko tʼáá háí shį́į́ shikééʼ dah diiyáhígíí éí bikʼihozhdeeshdlííł.

15 Áko shooh, shí éí Diyin God biYeʼ nishłį́ Jesus Christ áshtʼį́. Yádiłhił dóó nahasdzáán hadiishłaa, dóó tʼáá átʼé bee hadilyaaígíí ałdóʼ. Hodeeyáádą́ą́ nihiTaaʼ nilíinii bił hinishłǫ́ǫ́ ńtʼę́ę́ʼ. NihiTaaʼ nilíinii bił honishłǫ́, áádóó nihiTaaʼ nilíinii shił hólǫ́; dóó shinahjįʼ éí nihiTaaʼ nilíinii bízhiʼ ayóó átʼéego áyiilaa.

16 Tʼáá shíhígíí baaníyá, dóó tʼáá shíhígíí doo dashiniizį́įʼ da. Áádóó Diyin bizaad bee akʼedaʼashchínígíí deesháałgo yaa halneʼígíí ałtso bohoolyaa.

17 Áádóó tʼáá ałtso dashiniizį́ʼígíí, éí Diyin God baʼáłchíní dadooleełgo bee lą́ aséłį́į́ʼ; dóó tʼáá háí shį́į́ shízhiʼ deiyoosdląądígíí éí ałdóʼ bá lą́ aséłį́į́ʼ, háálá áko shooh, shí shinahjįʼ éí nihánináʼníshdlá, áádóó shinahjįʼ éí Moses bibee hazʼáanii tʼáá ałtso bohoolyaa.

18 Shí éí nahasdzáán beʼadinídíín dóó binahjįʼ daʼiináanii nishłį́. Shí éí Alpha dóó Omega, bee hodeeztʼiʼii áádóó bee nihonítʼiʼii nishłį́.

19 Áádóó dił bee nááʼiiniihii éí doo shichʼįʼ kónáádadoohłííł da, aooʼ, nihinááhániihii dóó didlidgo nihinááhániihii nahjįʼ kódadoohłííł, háálá nihinááhániihii dóó didlidgo nihinááhániihii éí doo nisin da.

20 Áádóó nihijéí dóó nihiyiʼsizʼíinii yínííł danilį́įgo shichʼįʼ náádahídóółnih. Áádóó tʼáá háí shį́į́ bijéí dóó biiʼ sizʼíinii yínííł nilį́įgo shichʼįʼ niníyą́ągo, éí kǫʼ dóó Iiʼ Sizį́ Diyinii bee yídeesį́į́ł, Laman dineʼé ádaadzaaígi átʼáo, háálá idahidiikááhdi dashoosdląądígíí biniinaa, éí kǫʼ dóó Iiʼ Sizį́ Diyinii bee dabidiisdzį́į́ʼ, ákondi tʼáadoo yaa ákódaniizį́į́ʼ da.

21 Áko shooh, nahasdzáán bikáaʼjįʼ níyá nihokááʼ dineʼé bá nináʼdeeshdlééł biniyé, áko nihokááʼ dineʼé bibąąhági átʼéii bitsʼą́ą́dóó yísdádeeshʼish.

22 Éí bąą, tʼáá háiida ádaa náʼooskango dóó áłchíní yázhí nahalingo shaa níyą́ągo, éí shił yah adoogááł, háálá Diyin God bił hazʼą́ądí éí ákóhootʼé. Áko shooh, éi ákódaatʼéhígíí biniinaa sheʼiinaʼ bee bá nináʼníshdlá, dóó nínáádiishdlá, éí bąą ádaa ńdaʼoohkąąh, dóó adahwiisʼáádę́ę́ʼ shaa hohkááh, dóó yisdáhidoohkah.