1 Áádóó baa hoolzhiizh náhástʼédiin dóó biʼaan ashdlaʼ ałtso nááhai, dóó dineʼé bee éédahózinii dóó álílee bee bił dahóóneʼ yę́ę yaa deiyoonééhgo hodeeshzhiizh, dóó bee éédahózinii dóó álílee yáʼąąshdę́ę́ʼ bił ííshją́ą́ ádaalyaa yę́ę doo bił ayóó ádaatʼéego deeskai, honáásiiʼ bijéí deistłʼis, dóó bíniʼ doo yee daʼooʼį́į da, dóó tʼáá ałtso deidiiztsʼą́ą́ʼ dóó deiyiiłtsánée doo deiyoodlą́ą da daazlį́į́ʼ—

2 Tʼáadoo biniyéhígíí bijéí biyiʼdi yaa tsídadeezkééz, éí nihokááʼ dineʼé dóó biʼiiníziinii bibeʼadziilii ádeiyiilaa, diné bijéí yindaʼaloʼ dóó yee yooʼadeiyiilóós; áádóó áko Chʼį́įdii dineʼé bijéí yikʼi bóhólnííh náánásdlį́į́ʼ, hónáásiiʼ doo ádaa ákodaniidzin da dóó Christ binaʼnitin éí tʼóó átʼé dóó tʼáadoo biniyéhí da yiłníigo yooʼayiizhʼeezh.

3 Áádóó baa hoolzhiizh dineʼé yéego bąąhági ádaatʼį́ dóó aláahdi woolchʼį́dígíí yeʼdaʼałʼį́ daazlį́į́ʼ; dóó bee ééhózinii dóó álílee ádaʼałʼį́ éí doo nááhodoodleeł da danízin; dóó Chʼį́įdii éí dineʼé bitahgoo, bijéí yee yooʼayiiʼéésh, kéyah bikááʼgóó ayóó átʼáo bąąhági átʼéii adéídoołʼį́įłgo yichʼįʼ yiʼoołkąąh.

4 Áádóó áko náhástʼédiin dóó biʼaan hastą́ą́ ałtso nááhai; dóó náhástʼédiin dóó biʼaan tsostsʼid ałdóʼ ałtso nááhai, dóó náhástʼédiin dóó biʼaan tseebíí ałdóʼ ałtso nááhai, áádóó náhástʼédiin dóó biʼaan náhástʼéí ałdóʼ ałtso nááhai;

5 Áádóó neiznádiin ałdóʼ ałtso nááhai Mosiah tʼádííyahę́ę́ʼdą́ą́ʼ dóó hóshdę́ę́ʼ, éí Nephi dineʼé yikʼi aláahdi yinaatʼáanii nilį́į́ ńtʼę́ę́ʼ.

6 Áádóó hastą́ądi neeznádiin dóó biʼaan náhástʼéí ałtso nááhai Lehi Jerusalemdę́ę́ʼ chʼínínándą́ą́ʼ.

7 Áádóó náhástʼéí ałtso nááhai bee ééhózinii nihił ííshją́ą́ʼ ałyaa yééʼdą́ą́ʼ, éí diyin yá yádaałtiʼii yaa hadahaasdzííʼ, áko Christ nahasdzáán yikáaʼjįʼ doogááł.

8 Nephi dineʼé bee ééhózinii ííshją́ą́ ályaayę́ędą́ą́ʼ hoolzhish wóltaʼígíí bee hahoolzhiizhgo ádeiyiilaa, éí doodaiiʼ Christ níyáhę́ędą́ą́ʼ, áko, náhástʼéí ałtso nááhai.

9 Áádóó Nephi, éí Nephi yizhéʼé nilį́į́ ńtʼę́ę́ʼ, éí haneʼ nídaháasdzoyę́ę bee bóhólnííh ńtʼę́ę́ʼ, tʼáadoo Zarahemlajįʼ nádzáa da, dóó adahwiisʼáágóó tʼáadoo bénahoosdzin da.

10 Áádóó baa hoolzhiizh dineʼé tʼahdii bąąhági ádaatʼį́, azhą́ ląʼígo ndabidiʼneestą́ą́ʼ dóó Diyin bikʼeh áhodooníłígíí bichʼįʼ kódaalyaa ndi; áko díigi átʼáo neeznáá ałdóʼ ałtso nááhai; dóó łaʼtsʼáadah ałdóʼ bąąhági átʼéii baa naʼaldeehgo ałtso nááhai.

11 Áádóó baa hoolzhiizh tááʼtsʼáadah yihah góneʼ anaaʼ dóó ałkʼijįʼídlį́ adahwiisʼáágóó bee hahoolzhiizh; háálá Gadianton daʼniʼįįhii tʼóó ahayóí yíląąd, dóó dineʼé tsʼídá tʼóó ahayóí nideistseed, dóó kindaatah yę́ę ląʼí da deiyííłchxǫʼ, dóó adahwiisʼáágoo tʼóó ahayóí dineʼé nideistseed dóó deiyííghą́ą́ʼ, áko dineʼé tʼáá ałtso Laman dineʼé dóó Nephi dineʼé tʼáá áłah, yee daʼahigánígíí Gadianton daʼniʼįįhii yichʼįʼ dahdeididoojih.

12 Áko, tʼáá ałtso Laman dineʼé Diyin Bóhólníihii deiyoosdląądígíí éí bikʼéí, Nephi dineʼé danilíinii yił ałhidiikai, dóó éí doo ádeinízin da ndi, dabizáanii dóó badaʼáłchíní beʼiinaʼ baa ádahidooyąąłgo yichʼą́ą́h dahdadiibaaʼ, Gadianton daʼniʼįįhii yichʼįʼ bee ndaʼabaahí dah deidiijaaʼ, aooʼ, beʼoodląʼ dóó bisodizin bee báʼadahaztʼįʼígíí, dóó tʼáá hó jinízingo naʼadahígíí dóó tʼáá hó jinízingo daʼiiná, tʼáá ádeiłʼį́į doogo ałdóʼ biniyé.

13 Áádóó baa hoolzhiizh tááʼtsʼáadah yihah tʼahdoo bił ahoolzhíízhgóó Nephi dineʼé ábidiʼdooldįįłgo bá nahastʼą́ háálá díí anaaʼígíí biniinaa, éí tʼáá awołí bee yikʼee tiʼdahoonííh.

14 Áádóó baa hoolzhiizh Laman dineʼé éí Nephi dineʼé yił ahiidiikaiyę́ę Nephi dineʼé bił yééltaʼ;

15 Áádóó hóyéeʼgo bee bá haʼoodzííʼ yę́ę nahjįʼ bá kólyaa, dóó bitsįʼ daalgai daazlį́į́ʼ Nephi dineʼé nahalingo;

16 Áádóó bitsíłkéí dóó bichʼeekęʼ éí tʼáá íiyisíí deigai, dóó éí Nephi dineʼé bił wóóltaʼ, dóó Nephi dineʼé daosyeʼ. Áádóó áko tááʼtsʼáadah ałtso nááhai.

17 Áádóó baa hoolzhiizh dį́į́ʼtsʼáadah yihah bee hahaalzhíízhgo, daʼniʼįįhii dóó Nephi bidineʼé tʼah daʼahigą́ą́go tsʼídá yikʼee tiʼdahóónííh; ákótʼée ndi, Nephi bidineʼé éí daʼniʼįįhii łahdóó yikʼeh dadeesdlį́į́ʼ, hónáásiiʼ bikéyahdóó daadził dóó bindahonitʼingóó nátʼą́ą́ʼ ánídeineeskaad.

18 Áádóó áko dį́į́ʼtsʼáadah ałtso nááhai. Áádóó ashdlaʼáadah yihah góneʼ Nephi bidineʼé yikʼijįʼ náádadeezbaaʼ; dóó Nephi bidineʼé bąąhági ádaatʼínígíí biniinaa, dóó ląʼí da ałkʼijįʼ danidlinígíí dóó ałtsʼá dahaaskaiʼígíí, Gadianton daʼniʼįįhii ląʼígo bikʼeh dadeesdlį́į́ʼ.

19 Áádóó áko ashdlaʼáadah ałtso ííhai, dóó áko dineʼé ląʼígo bichʼiʼnidahwiiʼnáago bił hooʼaʼ; dóó béésh hał niʼdoołtsxiłígíí bikʼisitą́, hónáásiiʼ ndabidoołtsxiłgo bichʼįʼ hodeeshzhiizh, dóó díí éí bąąhági ádaatʼínígíí biniinaa.