1 Áádóó baa hoolzhiizh Diyin aZhéʼé nilíinii éí Malachi saad yee yichʼįʼ haadzíʼę́ę bikááʼ ádoohłííł yidííniid, éí yee yił hodoolnihgo. Áádóó baa hoolzhiizh éí ałtso bikááʼ ályaa dóó índa tsʼídá nizhónígo ałtso yee nahoneeztʼą́ą́ʼ. Áádóó díí éí saad yee yił nahasneʼ, kóníigo: Diyin aZhéʼé nilíinii Malachi kóyidííniid—Áko shooh, shánaalʼaʼí deeshʼaał, éí shilą́ąjįʼ hashtʼehodoolííł, dóó Diyin Bóhólníihii hádasídóoʼį́ʼę́ę tʼáá hooshchʼįʼ bighanjįʼ doogááł; éí éí bee ahaʼdeetʼą́ yaa halneʼii, baa nihił dahózhóonii; áko shooh, éí doogááł, ní Diyin Tʼáá Ałtsoní bee Bóhólníihii.

2 Ákondi háíshąʼ níyá bijį́įdi yíneilʼą́ą doo, dóó háíshąʼ tʼahdii sizį́į dooleeł níyáago? Háálá kǫʼ doo yáʼátʼéehii nahjįʼ kwííłʼíinii nahalin, dóó táláwosh bee tʼáá ágisígíí nahalin dooleeł.

3 Áádóó béésh łigaii doo nidzinii yąąh haidiyiłkaahii dóó tsʼídá tʼáá ałtso chin nahjįʼ kwííłʼíinii nahalingo dah sidá; dóó Levi dabiyeʼ doo yáʼátʼéehii bąąh ádingo íidoolííł, dóó béésh óola dóó béésh łigaii nahalingo íidoolííł, áko Diyin Bóhólníihii yáʼátʼéehii yee yichʼįʼ nádaʼíídóołnih.

4 Índa Judah dóó Jerusalem nááʼiisniiʼgo Diyin Bóhólníihii bił nizhóní dooleeł, tʼáá ałkʼidą́ą́ʼ átʼéhę́ęgi átʼéego, dóó áłtséhę́ędą́ą́ʼ átʼéhę́ęgiʼ átʼéego.

5 Áádóó ánihwiitʼaah biniyé nihitah deeshááł; dóó tʼóó nichxǫ́ǫ́ʼígo éédahósinii, dóó aadaʼdiléí, dóó aseezį́ ádeiłʼíinii, dóó naalnishí yikʼé naʼanishígíí yee yichʼįʼ nahwiiłnáanii, dóó asdzání bąąh ádahasdįįdii, dóó áłchíní bizhéʼé ádaadinii, dóó diné doo yaa dajoobaʼii, dóó doo shéédaaldzidii, tʼáá hooschʼįʼ ooʼíinii nishłį́įgo bá ndahwiidiyeeshʼááł, ní Diyin Tʼáá Ałtsoní bee Bóhólníihii.

6 Háálá shí éí Diyin Bóhólníihii nishłį́, dóó doo łahgo ánááshnííł da; éí bąą Jacob biyeʼ nohłíinii doo nahjįʼ kónihidiʼdoolnííł da.

7 Nihizhéʼé dahiinánéedą́ą́ʼ dóó wóshdę́ę́ʼ shibee hazʼáanii bikʼehgo ádaʼoolʼįįłę́ę bitsʼáhisoohkai, dóó doo bikʼeh dahonołʼį́į da. Shaa nánóhkááh áko shídóʼ nihaa ńdeeshdááł, ní Diyin Tʼáá Ałtsoní bee Bóhólníihii. Ákondi ádadohní: Haʼátʼéegoshąʼ tʼą́ą́ʼ nínááhidiikah?

8 Dinéésh Diyin God yee adínóoʼį́į́ł? Ákondi shee dasiʼnooʼį́į́ʼ. Ákondi ádadohní: Haashąʼ yitʼéego nee daʼneetʼį́į́ʼ? Tʼááłáʼí dootłʼizh bíighahgo nihee nahodleełii Diyin God baa nahidoohʼaahą́ą dóó naaʼiiniihę́ę bee.

9 Hóyéeʼgo ahaʼiidziihii bee nihá haʼoodzííʼ, háálá nihí tʼáá kéédahohtʼíí ńtʼę́ę́ʼ shee dasiʼnooʼį́į́ʼ.

10 Tʼááłáʼí dootłʼizh nihee náhoodleełii bíighahgo shinaalyeʼé bá hooghan góneʼ yah adahohjááh, áko shighan góneʼ atsįʼ hólǫ́ǫ doo; dóó kʼad shínóhtááh, ní tsʼídá Diyin Tʼáá Ałtsoní bee Bóhólníihii, tʼáá daatsʼí aaníí yáʼąąshdę́ę́ʼ tsésǫʼ nihá ąą ádadeeshłííł, dóó nihikʼijįʼ akʼihojídlí kódeeshłííł áko wónáásdóó nihighan góneʼ doo hwiidooʼaał da.

11 Áádóó naʼałtseedii níwohádi nahá bidideeshniił, dóó niʼ bikááʼ kʼidoołáhígíí doo yidoołchxǫǫł da; doo dáʼákʼehdi kʼidoołáhígíí bineestʼąʼ tʼah doo áajįʼ ahalzhííshdą́ą́ʼ dínóotʼį́įł da, ní Diyin Tʼáá Ałtsoní bee Bóhólníihii.

12 Áádóó ałʼąą dineʼé bił nahazʼą́ą́dę́ę́ʼ bikʼihojídlí daniłníi doo, háálá kéyah hózhóón daniłníi doo, ní Diyin Tʼáá Ałtsoní bee Bóhólníihii.

13 Shikʼijįʼ nihizaad bidziilgo bee hadahsoodzííʼ, ní Diyin Bóhólníihii. Ákondi ádadohní: Haʼátʼíísh dadiiʼníigo bee nikʼijįʼ hadasiidzííʼ?

14 Kódoohniid: Tʼáadoo biniyéhégóó Diyin God bá ndeiilʼaʼ, dóó haʼátʼíísh éí bee ndadidiilyéełgo bibee ádaʼoolʼįįł bá dahodíníílzin dóó Diyin Tʼáá Ałtsoní bee Bóhólníihii binááł yínííł neiidáa doo?

15 Áádóó áko ádaa hodzódlíi bił dahózhǫ́ dadiiʼní; aooʼ; bąąhági átʼéii yindaalnishii éí hashtʼedaalyaa; aooʼ Diyin God yídaneeztą́ʼą́ą ndi tʼáadoo ádabiʼdiilyaaí da.

16 Índa Diyin Bóhólníihii yéédaaldzidii áłahjįʼ ałchʼįʼ hadaadziih, dóó Diyin Bóhólníihii íistsʼą́ąʼgo adiiztsʼą́ą́ʼ; dóó Diyin Bóhólníihii yéédaaldzidii dóó bízhiʼ yaa ntsídaakeesii naaltsoos bee ééhaniihii bá nááháasdzo.

17 Áádóó éí shí dooleeł, ní Diyin Tʼáá Ałtsoní bee Bóhólníihii, shitséghádiʼnídíinii áshłéehdi; dóó diné léiʼ biyeʼ bíká análwoʼii yaa joobaʼígi átʼéego baa jiideeshbaał.

18 Índa nínáhidoohkah dóó yáʼátʼéehgo dahiinánígíí dóó bąąhági átʼéego dahiinánígíí bee ałʼąą ádaatʼéhígíí nihił bééhodoozįįł, índa Diyin God yá naalnishii dóó doo yá naalnishii bee ałʼąą átʼéhígíí nihił bééhodoozįįł.